Lewe Veranderd: Aanvaar Jou IdentiteitVoorbeeld

Kies Om Deel Van Sy Plan Te Wees

Wanneer ons saamstem met die etikette wat om ons nekke hang, of glo dat ons te kort skiet, loop ons die pragtige lewe mis wat God vir ons wil gee. Hy het elkeen van ons met 'n spesiale kombinasie van eienskappe, sterkpunte en talente gemaak, en Hy hoop dat ons dit vir sy koninkryk sal gebruik. As ons egter te veel op ons onsekerhede, negatiewe gedagtes en gevoelens fokus, kan dit ons van sy doel vir ons weglei.

Jare gelede het ek gehoor van 'n Bybelstudie vir vroue wat ek graag wou bywoon. Ek het so selfbewus gevoel dat ek amper nie gegaan het nie. Ek het myself wysgemaak dat hulle nie 'n oorgewig huisvrou wou hê wat niks nuttig tot die bespreking kon bydra nie, omdat sy nie genoeg Bybelkennis het nie. Op een of ander manier het ek deur my vrese gebeur en in elk geval gegaan. Soos Hy altyd doen, het God daardie klein treetjie van oorgawe gebruik om 'n verandering in my teweeg te bring. Hy het my gehelp om my waarde raak te sien en my selfbeeld te verbeter.

Wat ek nie daardie tyd besef het nie, was dat God my gevra het om Hom te vertrou sodat ek later ander vroue kon help om dieselfde te doen. Eers toe ek my onsekerhede aan Hom oorgegee het, was ek in staat om my roeping te vervul. In der waarheid het ek dieselfde dinge wat ek in die Bybelstudie geleer het, gebruik toe ek self vroue begin onderrig het. As ek toegelaat het dat my vrese my daardie dag weerhou het om te gaan, sou my lewe en bediening baie anders gelyk het. Selfs die ewigheid sou anders lyk.

Die wete wie ons in Christus is, gee vir ons vertroue in God. Dis nie omdat ons onvolmaakthede wat ons onsekerhede veroorsaak weg is nie, maar omdat ons besef ons swakhede word in sy krag vervolmaak. In werklikheid is dit nie vir God nodig dat ons foutloos moet wees nie. Hy spesialiseer daarin om mense te gebruik wat onwaardig, onbekwaam en onbevoeg voel. Regdeur die Bybel sien ons hoe Hy deur onvolmaakte mense van verskillende geslag, ras en ouderdom gebruik maak om sy wil te bereik. Niks in sy oë diskwalifiseer ons nie. Dis net ons wat onsself van die plan kan onttrek. Ons kan besluit of ons gaan toelaat dat God ons definieer en deel van sy plan maak, of ons kan ander mense toelaat om ons te definieer en 'n geleentheid misloop om die ewigheid te beïnvloed.

Aksieplan:

Dink 'n oomblik na oor hoe die leuens wat jy oor jouself glo, jou daarvan weerhou om na God se leiding in jou lewe te luister. Luister jy meer na die menings en verwagtinge van die mense om jou, of is jy ingestel op wat God in jou hart in spreek? Moenie God se doel vir jou lewe misloop omdat jou identiteit verwronge is nie. Vra vir God om al die leuens in jou hart uit te roei. Laat toe dat Hy dit wat gebroke is herbou. Vra Hom dan om jou te wys hoe jy kan help om sy koninkryk uit te brei. Jy het 'n spesiale plek in sy hart en speel 'n noodsaaklike rol in sy plan.