God Is Naby Jou Deur Nina SmitVoorbeeld

Jy is ’n begenadigde!

Toe die engel Maria ’n “begenadigde” noem, was sy totaal verbysterd. Op die oog af was sy nie eintlik ’n tipiese toonbeeld van genade nie. Sy was ’n eenvoudige jong meisie wat in ’n klein plattelandse dorpie grootgeword het, sonder geleerdheid of enige status. 

Sy was waarskynlik tussen 13 en 16 jaar oud, want dit was die ouderdom waarop meisies verloof geraak en getrou het in die tyd waarin sy geleef het. Maar God ag haar goed genoeg om die ma van sy Seun te wees.

Vandag kom God met dieselfde boodskap na jou toe en noem jou ook ’n “begenadigde”. Want as jy in Jesus glo, hét Hy jou reeds begenadig. En omdat Jesus vir jou gebore is en ook gesterf het, is jy nou goed genoeg en kan die geskenk van sy liefde jou lewe verander.

Jou grootste roeping as gelowige is om hierdie genade-aanbod te aanvaar. Dit is juis die hoofboodskap van Jesus se geboorte: God se liefde vir jou. Net soos die engel se boodskap vir Maria, slaan God se liefdesboodskap steeds ons voete onder ons uit, want soos sy, besef ons dat ons dit nooit sal regkry om aan die Bybel se standaarde te voldoen nie.

Maar God maak dit vir jou moontlik – die engel vertel Maria ook dat niks vir Hom onmoontlik is nie (sien Lukas 1:37). God wil jou in sy plan gebruik soos vir Maria, lank tevore. Reik met God se liefde uit na mense om jou en begenadig hulle soos God met jou doen.

Gebed

Hemelse Vader, hoe goed is dit om te weet dat ek u begenadigde is, omdat ek reeds u genade vir my geneem het. Amen.