God Is Naby Jou Deur Nina SmitVoorbeeld

Kragtige inspirerende woorde

God se Woord is nooit staties nie. Dit praat anders met elke mens. Soms lees ek ’n ou bekende en geliefde Bybelvers en meteens inspireer die woorde my op ’n splinternuwe manier wat ek nog nooit tevore só ervaar het nie. En elke keer is dit dan ook presies die regte boodskap wat ek op daardie tyd nodig het. My Bybel slaan my asem weg elke keer as ek daarmee besig raak. 

In die Nuwe Lewende Vertaling word die Bybel met die ontleedmes van ’n chirurg vergelyk – dit is ’n woord vol lewenskrag en energie wat tot diep binne ons innerlike wese sny en ons diepste motiewe oopvlek. Dit laat ons, soos Hebreërs 4:13 so mooi sê “kaalgestroop” voor dié God staan vir wie ons niks kan wegsteek nie. 

Praat jou Bybel al so met jou? Want om die inspirasie wat in jou Bybel opgesluit lê op hierdie manier te ervaar, vra inspanning. Dit sal beteken dat jy ekstra tyd moet maak vir Bybelstudie, dat jy meer as een Bybelvertaling behoort te gebruik en ook in ’n Bybelkommentaar of twee (of drie!) moet belê. 

Dis is nou wel moeiliker as om soggens jou Bybel lukraak oop te slaan en vinnig ’n teksvers te lees, maar dit sal ’n inspirasiekanaal vir jou oopsluit waarvan jy nooit sou kon droom nie.

Gebed

Hemelse Vader, hoe wonderlik is u Woord nie! Daardie hemelse manna waarsonder u kinders nie kan klaarkom nie. Ek kan getuig dat dit vir my elke dag ’n inspirasie bly. Sluit asseblief u Woord vandag opnuut vir my oop deur die werking van u Heilige Gees. Amen.