Gebed: 'n 14-dag leesplan deur Tim KellerVoorbeeld

Efesiërs 1:15–19

Dit is merkwaardig dat in al sy briewe, Paulus se gebede vir sy vriende geen versoek bevat vir veranderinge in hul omstandighede nie. Dit is verseker so dat hulle te midde van baie gevare en ontberings geleef het. Hulle het vervolging, dood weens siektes, onderdrukking deur magtige magte en skeiding van geliefdes in die gesig gestaar. Hulle bestaan was baie minder veilig as wat ons vandag leef. Tog sien jy in hierdie gebede nie eenkeer ‘n versoek vir 'n beter keiser, vir beskerming teen plunderende leërs, of selfs vir brood vir die volgende maaltyd nie. Paulus bid nie vir die dinge wat ons gewoonlik boaan ons lys van versoeke het nie.

Beteken dit dat dit verkeerd sou gewees het om vir sulke dinge te bid? Glad nie. Soos Paulus geweet het, nooi Jesus self ons uit om ons “daaglikse brood” te vra en dat God ons “van die Bose sal verlos”. In 1 Timoteus 2 vra Paulus sy lesers om te bid vir vrede, goeie regering en vir die behoeftes van die wêreld. In sy eie gebede gee Paulus dus nie vir ons 'n universele model vir gebed op dieselfde manier wat Jesus gedoen het nie. Daarin openbaar hy eerder wat hy die meeste vir sy vriende gevra het — wat hy geglo het die belangrikste ding was wat God vir hulle kon gee.

Wat is dit? Dit is — om Hom beter te ken. Paulus verduidelik dit met kleur en besonderheid. Dit beteken om die “geestesoë te verhelder” (Efesiërs 1:18). Bybels gesproke is die hart die beheersentrum van die hele self. Dit is die bewaarplek van 'n mens se kernverpligtinge, diepste liefdes en mees fundamentele hoop wat ons gevoel, denke en gedrag beheer. Om die “oë van die hart verlig” te hê met 'n bepaalde waarheid, beteken om dit so diep te laat deurdring en aan te gryp dat dit die hele mens verander. Met ander woorde, ons mag dalk weet dat God heilig is, maar wanneer ons harte se oë verlig is vir daardie waarheid, dan verstaan ons dit nie net uit ‘n verstandelike perspektief nie, maar emosioneel vind ons God se heiligheid wonderlik en mooi, en vrywillig vermy ons gesindhede en gedrag wat Hom sou mishaag of oneer aandoen. In Efesiërs 3:18 sê Paulus hy wil hê dat die Gees aan hulle insig sal gee om al die voordele van die verlede, hede en toekoms wat hulle ontvang het toe hulle in Christus geglo het, te begryp. Natuurlik weet alle Christene van hierdie voordele in hulle gedagtes, maar die gebed is vir iets dieper — dit is om 'n kragtige gevoel van die werklikheid van God se teenwoordigheid en van ‘n gedeelde lewe met Hom te hê.

Geneem uit gebed deur Timothy Keller.
Herdruk met vergunning van Dutton, 'n lid van Penguin Group (USA) LLC, A Penguin Random House Company. Kopiereg © 2014 deur Timothy Keller