Staan Sterk In ’n Wankelende Wêreld Deur Angelique Du ToitVoorbeeld

Staan Sterk in Jou Siel

Jou siel bestaan uit jou gedagtes, jou wil, jou emosies en jou gewete. Dit is die plek waar jou karakter gevorm word en jou geheuebank gestoor word. Dit is die setel van jou emosies en gevoelens. Jou persoonlikheid weerspieël die toestand van jou siel.

Jou siel leef van die oomblik wat jy verwek word, en daarom het elke ervaring sedert jou geboorte tot vandag ’n impak op jou en het dit ’n merk op jou siel gemaak. Jy is vandag die somtotaal van jou ervarings, jou gedagtes en jou dade van gister.

Die goeie nuus is: Wat jy ook al in jou siel ervaar het, wat jou gewete ook al mag teister, of wat ook al verhinder dat jy sterk staan, jy kan dit vandag verander! Jou siel was manjifiek geskape om in vryheid, vreugde, vrugbaarheid en oorvloed te leef (sien Johannes 10:10). Jou siel se bestemming lê in die keuses wat jy elke oomblik maak. 

Jy besluit of jou siel deur afbrekende gedagtes, skuldgevoel, woede en depressiewe dade ingeperk gaan word. Die wonderlike alternatief is dat jy kan kies om die vergifnis te ontvang wat Jesus gekom het om aan jou te gee; om sy vryheid in jou gedagtes, jou wil en jou emosies te ken, en met ’n gewete te leef wat jou nie veroordeel nie. Een keuse kan jou siel herskep.