PSALMS 84:1-12
PSALMS 84:1-12 Bybel vir almal (ABA)
Vir die leier van die koor: Dieselfde musiek soos vir die lied oor die parskuip. Van die Korag-groep. 'n Psalm. Here, U wat oor alles regeer, ek is lief vir u tempel. Ek wil graag daar wees, ek verlang na die tempel van die Here, ek wil juig oor die God wat lewe. Here, U wat oor alles regeer, die mossies het ook neste, en die swaeltjies het plek vir hulle kleintjies daar by u altare, my Koning en my God. Dit gaan goed met mense wat in u tempel woon, hulle hou nie op om U te prys nie. Sela Dit gaan goed met mense wat weet dat U hulle sal beskerm en wat graag na u tempel wil kom. Wanneer hulle deur 'n droë vallei moet gaan, dan gaan daar fonteine vir hulle oop en dan laat die eerste reën dit goed gaan. Hulle kry elke maal nuwe krag totdat hulle by God in Sion kom. Here, U wat oor alles regeer, U moet luister wanneer ek bid. God van Jakob, U moet luister. Sela O God, U moet goed wees vir die koning wat ons moet beskerm. U moet sorg vir u gesalfde. Waarlik, een dag in u tempel is beter as 1 000 dae op 'n ander plek. Dit is vir my beter om hier te staan by die deur van die tempel van my God. Ek wil nie woon in die huise van die mense wat verkeerd doen nie. God die Here gee vir ons lewe en beskerm ons, die Here is genadig en Hy gee vir ons eer. Hy gee goeie dinge vir mense wat eerlik lewe.
PSALMS 84:1-12 Afrikaans 1933/1953 (AFR53)
VIR die musiekleier; op die Gittiet. Van die kinders van Korag. 'n Psalm. Hoe lieflik is u woninge, o HERE van die leërskare! My siel verlang, ja, smag na die voorhowe van die HERE; my hart en my vlees jubel uit tot die lewende God. Selfs vind die mossie 'n huis en die swaweltjie 'n nes vir haar, waar sy haar kleintjies neerlê, naamlik u altare, HERE van die leërskare, my Koning en my God! Welgeluksalig is hulle wat woon in u huis; hulle prys U gedurig. Sela. Welgeluksalig is die mens wie se sterkte in U is, in wie se hart die gebaande weë is. As hulle deur die Droë Laagte trek, maak hulle dit 'n fonteinland; ook oordek die vroeë reën dit met seëninge. Hulle gaan van krag tot krag; elkeen van hulle sal verskyn voor God in Sion. HERE, God van die leërskare, hoor my gebed; luister tog, o God van Jakob! Sela. O God, ons skild, kyk en aanskou die aangesig van u gesalfde. Want 'n dag in u voorhowe is beter as duisend; ek wil liewer by die drumpel staan in die huis van my God as om te woon in die tente van goddeloosheid. Want die HERE God is 'n son en skild; die HERE sal genade en eer gee; Hy sal die goeie nie onthou aan die wat in opregtheid wandel nie.
PSALMS 84:1-12 Afrikaans 1983 (AFR83)
Vir die koorleier: met musiek. Van die Koragiete. 'n Psalm. Hoe lief het ek u woning, Here, Almagtige! Ek versmag van verlange na die tempel van die Here; met alles wat ek is, wil ek jubel oor die lewende God. Selfs 'n mossie het 'n nes en 'n swaeltjie 'n plek vir haar kleintjies daar by u altare, Here, Almagtige, my Koning en my God! Dit gaan goed met mense vir wie u huis 'n tuiste is: hulle hou nie op om U te prys nie. Sela Dit gaan goed met mense wat hulle krag in U vind en graag na u tempel toe gaan. Vir hulle gaan daar fonteine oop wanneer hulle deur 'n dorre laagte trek en die vroeë reëns sy seëninge bring. Keer op keer ontvang hulle nuwe krag totdat hulle voor God in Sion verskyn. Here, almagtige God, hoor my gebed, luister tog, God van Jakob! Sela Sien tog om na die koning, ons beskermer, o God; hou u gesalfde onder u sorg. Waarlik, één dag in u tempel is beter as duisend daarbuite. Ek staan liewer by die drumpel van die huis van my God as om te woon in huise sonder God. Die Here God is ons krag en ons beskerming, die Here gee genade en eer, Hy weerhou die goeie nie van dié wat reg lewe nie.
PSALMS 84:1-12 Die Bybel 2020-vertaling (AFR20)
Vir die •musiekleier. Op Haghittiet . Van die Koragiete. 'n Psalm. Hoe lieflik is u woning, HERE, Heerser oor alle magte! My hele wese verlang, ja, smag na die voorhowe van die HERE; my hart en liggaam roep uit na die lewende God. Selfs 'n mossie vind 'n tuiste, en 'n swaeltjie haar nes waarin sy haar kleintjies neerlê, by u altare, HERE, Heerser oor alle magte, my Koning en my God! Gelukkig is hulle wat in u huis woon! Hulle loof U gedurig. •Sela Gelukkig is mense wie se krag in U lê! Die pelgrimstogte leef in hulle gedagtes: Trek hulle deur die Baka-vallei, maak hulle daarvan 'n landskap ryk aan fonteine; die vroeë reën maak dit selfs vol waterpoele. Hulle gaan van krag tot krag; elkeen verskyn voor God in Sion. HERE, God, Heerser oor alle magte, hoor tog my gebed, luister tog, God van Jakob! Sela O God, sien ons skild raak, slaan ag op u gesalfde; want 'n dag in u voorhowe is beter as duisend daarbuite. Ek wag liewer op die drumpel van die huis van my God as om te woon in die tente van goddeloosheid. Ja, 'n son en skild is die HERE God; genade en eer is wat die HERE skenk. Hy hou wat goed is nie terug van hulle wat onberispelik leef nie.
PSALMS 84:1-12 Contemporary Afrikaans Bible 2023 (CAB23)
Hoe lieflik is u tente, HERE van die leërskare! My siel smag, ja, beswyk ook na die voorhowe van die HERE; my hart en my vlees roep na die lewende God. Ja, die mossie het 'n huis gevind, en die swaweltjie 'n nes vir haar, waar sy haar kleintjies kan neerlê, naamlik u altare, HERE van die leërskare, my Koning en my God. Geseënd is die wat in u huis woon; hulle sal U nog loof. Sela. Geseënd is die man wie se krag in jou is; in wie se hart hulle weë is. Wat deur die dal van Baca trek, maak dit 'n put; die reën vul ook die poele. Hulle gaan van krag tot krag, elkeen van hulle in Sion verskyn voor God. O HERE, God van die leërskare, hoor my gebed; luister, o God van Jakob! Sela. Kyk, o God, ons skild, en aanskou die aangesig van u gesalfde. Want 'n dag in u voorhowe is beter as duisend. Ek sou liewer 'n poortwagter wees in die huis van my God as om in die tente van goddeloosheid te woon. Want die HERE God is 'n son en skild; die HERE sal genade en heerlikheid gee; geen goeie ding sal Hy weerhou van die wat opreg wandel nie. O HERE van die leërskare, geseënd is die man wat op U vertrou.
PSALMS 84:1-12 Nuwe Lewende Vertaling (NLV)
Hoe lief het ek u woonplek, o HERE, die Almagtige! HERE, ek verlang, ek hunker na u woning. Met my hele wese, liggaam en gees, wil ek jubel oor die lewende God. Selfs ’n mossie kry hier ’n plek, en die swaeltjie bou haar nes en maak haar kleintjies groot naby u altare, HERE, die Almagtige, my Koning en my God! Gelukkig is hulle wat in u huis woon, waar hulle U deurentyd kan loof. Sela Gelukkig is hulle wie se krag van U kom, wat hulle harte rig op ’n pelgrimstog. Gaan hulle deur ’n droë vallei, word dit omskep tot ’n fonteinedal. Vroeë reëns bring vir hulle seëninge. Hulle kragte sal vermeerder tot hulle in Sion voor God verskyn. HERE God, die Almagtige, luister na my gebed. Luister, o God van Jakob! Sela O God, ons beskermer, kyk tog, betoon genade aan u gesalfde! Een dag in u tempel is beter as duisend elders! Ek staan liewer by die drumpel van die huis van my God as dat ek woon in huise van goddeloses. ’n Son en skild is die HERE God. Die HERE gee genade en eer. Hy sal die goeie nie weerhou van hulle wat doen wat reg is nie.