JOB 33:13-29
JOB 33:13-29 Bybel vir almal (ABA)
Hoekom beskuldig jy vir God? Hoekom sê jy dat Hy nie wil antwoord nie? Want God praat weer en weer, maar mense luister nie. God praat in die nag, wanneer mense vas slaap, Hy wys vir hulle dinge wanneer hulle droom. Hy sê duidelik vir hulle wat Hy wil hê, Hy waarsku hulle, en hulle word bang. Hy wil hê hulle moet ophou om verkeerd te doen, hulle moet ophou om hoogmoedig te wees. God wil keer sodat 'n mens nie sterf nie, Hy wil die mens red van die graf. Hy straf 'n mens, Hy laat hom siek word, die pyn hou nooit op nie. Kos maak daardie mens naar, ook die lekkerste kos. Hy word so maer dat hy net vel en bene is. Hy is naby die dood, hy is amper in die graf. Maar daar kom miskien 'n engel by hom, een van die baie engele wat daar is. Die engel wil vir hom bid en vir hom sê wat hy moet doen. Die engel is jammer vir hom en die engel bid en sê: ‘Moenie dat hy sterf nie, ek sal hom loskoop.’ Dan sal daardie mens weer jonk word, sy liggaam sal nuwe krag kry. Hy sal tot God bid, en God sal doen wat hy vra. Hy sal vir God dien en bly wees, God sal hom beloon omdat hy gedoen het wat reg is. Dan sal hy vir mense sê: ‘Ek het sonde gedoen, ek het nie gedoen wat reg is nie, en God het my nie gestraf nie. Hy het my gered, ek het nie gesterf nie, ek geniet nog die lewe.’ Luister na my: God doen dit alles met 'n mens, Hy doen dit weer en weer.
JOB 33:13-29 Afrikaans 1933/1953 (AFR53)
Waarom het u teen Hom getwis, dat Hy op al die woorde van 'n mens nie antwoord nie? WANT God spreek op een, ja, op twee maniere; maar die mens let daar nie op nie. In die droom, in 'n naggesig, as diepe slaap op die mense val, tydens sluimeringe op die bed, dan open Hy die oor van die mense, en Hy druk die seël op die waarskuwing aan hulle; om die mens terug te hou van sy onderneming en trotsheid vir die man te verberg; sodat Hy sy siel kan red uit die kuil; en sy lewe, dat dit nie omkom deur die spies nie. OOK word hy getugtig met smart op sy bed en aanhoudende stryd in sy gebeente, sodat sy lewe hom laat walg van brood en sy siel van lieflingspys. Sy vlees verdwyn, weg uit die gesig; en sy gebeente, wat onsigbaar was, steek uit. Ja, sy siel kom nader by die kuil en sy lewe by die dodende magte. Is daar dan vir hom 'n gesant, 'n tolk, een uit duisend, om die mens sy plig te kenne te gee; en is Hy hom genadig en sê: Verlos hom, dat hy in die kuil nie afdaal nie: Ek het 'n losprys gevind — dan word sy vlees fris van jeugdige krag, hy keer terug na die dae van sy jonkheid. Hy bid tot God, en Hy het 'n welbehae in hom, sodat hy sy aangesig sien met gejuig: so vergeld Hy dan aan die mens sy geregtigheid. Hy sing voor die mense en sê: Ek het gesondig en verdraai wat reg is, maar dit is my nie na verdienste vergeld nie. Hy het my siel verlos, dat dit nie in die kuil ingegaan het nie, en my lewe mag hom verlustig in die lig. Kyk, dit alles doen God, twee keer, ja, drie keer met 'n mens
JOB 33:13-29 Afrikaans 1983 (AFR83)
Waarom beskuldig jy vir God? Hy hoef nie vir jou rekenskap te gee van sy dade nie.” “God spreek die mens aan, Hy huiwer nie om dit op meer as een manier te doen nie. Hy praat met die mens in 'n droom, in 'n gesig in die nag, wanneer die mens diep slaap, wanneer hy vas slaap op sy bed. Dan openbaar God Hom aan die mens en dreig dat Hy hom sal straf om hom van verkeerde dade af weg te hou en hom van hoogmoed te weerhou. God wil die mens nie die graf laat ingaan nie, Hy wil hom nie laat sterf nie. “Of Hy spreek die mens aan met ernstige siekte, met pyn wat aan sy liggaam knaag, sodat alle kos hom walg, selfs die lekkerste ete. Die vleis aan sy liggaam is so weggevreet dat jy dit nie meer kan sien nie, jy sien nou net been. Hy is op pad na sy graf toe, na dié toe wat klaar dood is. As daar dan 'n engel by hom sou wees, een uit duisende, wat vir hom pleit, en vir hom sê wat sy plig is, wat hom jammer kry en sê: ‘Red hom dat hy nie sterf nie, ek het 'n losprys vir hom,’ dan sal sy liggaam weer jonk word, weer word soos in die dae van sy jeug. Hy sal tot God bid, God sal sy gebed verhoor, hom met vreugde laat bid, hom 'n mens maak wat weer reg leef voor God. Dan getuig hy voor die mense: ‘Ek het gesondig, my nie gesteur aan wat reg is nie, en tog het God my nie gestraf soos ek verdien nie. Hy het my gered, ek het nie gesterf nie, nou lewe ek weer.’ “Dit alles doen God met die mens, selfs meer as een keer.
JOB 33:13-29 Die Bybel 2020-vertaling (AFR20)
Waarom voer jy met Hom 'n twisgesprek, as Hy Hom nie verweer oor al sy dade nie? Want God praat op een, ja, op twee maniere, maar die mens sien dit nie raak nie. In 'n droom, in 'n naggesig, wanneer 'n diep slaap mense oorval, en hulle insluimer op hulle beddens, dan open Hy die ore van mense, en bevestig Hy die vermanings aan hulle – om mense te laat afsien van wat hulle doen, en 'n man van hoogmoed te vrywaar, om hom weg te hou van die grafkuil, sy lewe daarvan te weerhou om die rivier oor te steek. Of hy word met pyn op sy bed tereggewys – 'n voortdurende stryd in sy gebeente, sodat sy lewe walg van kos, en hy self van begeerlike voedsel. Sy liggaam teer weg, raak onaansienlik; sy gebeente, wat onsigbaar was, word ontbloot. Hy beweeg self nader aan die grafkuil, sy lewe beweeg nader aan hulle wat die dood bring. As daar by hom 'n engel is, 'n voorspraak, een van die duisende, om vir die mens oor sy opregtheid te getuig, en dié hom genadig is en sê, ‘Bevry hom daarvan om na die grafkuil af te daal, ek het 'n losprys vir hom gekry,’ word sy liggaam lewenskragtiger as dié van 'n jong man, keer hy terug na die dae van sy jeug. Wanneer hy by God pleit, aanvaar Hy hom; hy ervaar God se teenwoordigheid met 'n uitroep van vreugde, en God herstel die sterfling se geregtigheid. So iemand kyk na mense en sê: ‘Ek het gesondig en die reg verdraai, maar daar is nie met my afgereken nie. God het my vrygekoop van die oorgang na die grafkuil; en my lewe mag hom in die lig verlustig.’ “Kyk, al hierdie dinge doen God selfs twee of drie maal met 'n man
JOB 33:13-29 Contemporary Afrikaans Bible 2023 (CAB23)
Waarom stry jy teen hom? want hy gee geen rekenskap van enige van sy sake nie. Want God spreek een keer, ja twee keer, maar die mens sien dit nie. In 'n droom, in 'n naggesig, wanneer diepe slaap oor die mense val, in sluimering op die bed; Dan maak Hy die ore van die mense oop en verseël hulle tug, sodat hy die mens van sy voorneme kan onttrek en hoogmoed vir die mens kan verberg. Hy bewaar sy siel uit die kuil en sy lewe om deur die swaard te vergaan. Hy word ook getugtig met pyn op sy bed, en die menigte van sy gebeente met sterk pyn; Sodat sy lewe 'n afsku het van brood en sy siel 'n afsku van lekker spys. Sy vlees is verteer, sodat dit nie gesien kan word nie; en sy bene wat nie gesien is nie, steek uit. Ja, sy siel nader tot die doderyk en sy lewe na die verderwers. As daar 'n boodskapper by hom is, 'n tolk, een uit die duisend, om aan die mens sy opregtheid te toon; Daarna is hy hom genadig en sê: Verlos hom van afdaal in die kuil: Ek het 'n losprys gevind. Sy vlees sal varser wees as 'n kind s'n; hy sal terugkeer na die dae van sy jeug; Hy sal tot God bid, en Hy sal Hom welgevallig wees; en Hy sal sy aangesig met blydskap sien, want Hy sal aan die mens sy geregtigheid vergeld. Hy kyk na die mense, en as iemand sê: Ek het gesondig en verdraai wat reg was, en dit het my niks gebaat nie; Hy sal sy siel verlos daarvan om in die kuil te gaan, en sy lewe sal die lig sien. Kyk, al hierdie dinge werk God dikwels met die mens
JOB 33:13-29 Die Boodskap (DB)
Hoe kan jy God verwyt omdat Hy jou nie antwoord op alles wat jy gesê het nie? God praat op verskillende maniere met mense, maar hulle besef dit nie altyd nie. Vir party mense sal God ’n droom of ’n gesig in die nag gee as hulle vas op hulle bed lê en slaap. Op so ’n manier gee die Here dan vir hulle ’n duidelike waarskuwing om met verkeerde dinge op te hou en nie te veel van hulleself te dink nie. So probeer Hy keer dat mense doodgaan en in die graf eindig. “Ander kere weer probeer God mense reghelp deur siekte en pyn wat net nie ophou nie. Hulle verloor dan selfs hulle eetlus en wil nie eers van die lekkerste kos eet nie. Op die ou einde is hulle net vel en been, so maer is hulle. So beland hulle op die randjie van die graf, amper op die laaste van hulle lewe. “Daar is duisende spesiale boodskappers in die hemel. Hulle praat baiekeer namens ’n mens met God. As een van hulle net vir ’n mens kan wys wat reg is, sal God nie hard met so iemand werk nie. Hy sal sê: ‘Red hom dat hy nie doodgaan nie, want daar is ’n losprys vir sy lewe betaal.’ Dan sal sy liggaam weer fris en sterk voel soos toe hy jonk was. As hy bid, sal God hom antwoord. Hy sal die Here met groot blydskap aanbid. God sal weer die verhouding tussen hulle regmaak. Hy sal vir die mense vertel: ‘Ek het verkeerde dinge gedoen. Ek het my nie gesteur aan wat reg is nie, maar dit het my niks in die sak gebring nie. Dit was nie die moeite werd om so te leef nie. Maar God het gesorg dat ek nie in die dood beland het nie. Hy het my losgekoop. Nou lewe ek en kan ek die lig geniet.’ “Dit is wat God vir mense doen. Hy doen dit selfs twee of drie keer vir hulle.
JOB 33:13-29 Nuwe Lewende Vertaling (NLV)
Nou, waarom bring jy dan ’n klag teen Hom? Jy sê: ‘Hy luister nie na mense nie.’ Maar God praat op verskillende maniere. Ons kom dit net nie agter nie. Hy praat deur drome en visioene, in die nag wanneer mense diep slaap en op hulle beddens lê. Hy fluister in hulle ore en verskrik hulle met sy waarskuwings. Hy laat mense van gedagte verander om hulle van verkeerde dade weg te hou, en hulle van hoogmoed te weerhou. Hy red hulle van die graf, van die diep rivier van die dood. Soms praat Hy met mense deur ernstige siekte op ’n siekbed, as pyn aan hulle liggaam knaag. Dan verloor mense hulle eetlus. Die lekkerste kos walg hulle. Hulle is later net vel en been. Hulle staan met die een voet in die graf. Die dood wag vir hulle. “Maar as ’n hemelse boodskapper, ’n baie unieke een, intree vir so ’n persoon en hom regverdig verklaar, sal God hom genadig wees en sê: ‘Laat hom vry. Moenie dat hy sterf nie, want Ek het ’n losprys gevind vir sy lewe.’ Dan word sy liggaam weer so gesond soos dié van ’n kind, ferm en jeugdig soos toe hy jonk was. As hy bid tot God, sal Hy hom aanvaar. God sal hom met vreugde ontvang, en hom ’n mens maak wat reg lewe. Hy sal vir sy vriende sê: ‘Ek het gesondig en verkeerd gedoen, maar God het my nie gestraf soos wat ek verdien het nie. God het my gered van die graf, en nou is my lewe gevul met lig.’ “Ja, God doen al hierdie dinge vir mense, weer en weer.