Mateo 16
16
1Ecꞌo cꞌa juleꞌ fariseo e cachbil juleꞌ saduceo, ejeꞌeꞌ xeꞌekaj ruqꞌuin ja Jesús. Cꞌoli quicꞌaxaj tre pro xa nquicꞌambajbej rxin, quewaꞌ quibij tre riꞌ:
—Tabanaꞌ jun milagro ja ncꞌutu chikawach chi Dios yoyon chawe ja poder ja cꞌo pan akꞌaꞌ, xecheꞌ tre. 2In bix chique rmal:
—Cꞌoli neban jeꞌe tok noc akꞌaꞌ quewaꞌ nebij riꞌ: —Camic buena ja tiempo penak, ja caj ncꞌutuwi, congana quiak, nixcheꞌe. 3In cꞌo jeꞌe ja pa tak sakaric quewaꞌ nebij riꞌ: —Ja tre jun kꞌij riꞌ ma buena ta ja tiempo penak, ja caj ncꞌutuwi, congana quiak in congana mukuli, nixcheꞌe. Cacaꞌ epalaj, ixix bien nchꞌobtaj emwal nak rcꞌamonto ja netzꞌat jeꞌe chicaj pro ja ntajini nuban ja Dios chewach chipan ja tiempo ja rokcꞌo wiꞌ riꞌ jariꞌ ni matichꞌobtaj wiꞌ emwal nak rcꞌamonto. 4Ja winak ja necꞌutun chwe chi nban jun milagro utzcꞌa chi ninquinimaj ejeꞌeꞌ xa e itzel tak winak, xa quiyaꞌon can ja Dios. Pro ja milagro ja nquicꞌutuj jariꞌ ni matinban wiꞌ chiquewach xarwariꞌ cꞌo jun ja milagro nbantaj na chiquewach, jun milagro ja caniꞌ xuban ja rojer profeta Jonás. Queriꞌ bix chique rmal. Cꞌacꞌariꞌ xelel chiquicojol in be.
* * * * * * * * * *
5Ja cꞌa tok xeꞌekaji chajuparaj yaꞌ ja cꞌa rdiscípulo ejeꞌeꞌ queyaꞌ cuenta tre chi mta queway quicꞌamonto, quimestaj can. 6Ja cꞌa Jesús xbij chique:
—Kas bien techꞌoboꞌ, kas tebanaꞌ cuenta ewiꞌ chwach ja levadura quixin ja fariseo e cachbil ja saduceo, neꞌ chique. 7Ja cꞌa rdiscípulo ejeꞌeꞌ quemaj tzij chibil tak quiꞌ, quewaꞌ nquibij riꞌ:
—Queriꞌ nbij chake rumac ja mta way kacꞌampi ta, xecheꞌe. 8Pro ja Jesús arjaꞌ rotak ja quimajon rbixic in quewaꞌ xbij chique riꞌ:
—Achiꞌiꞌ, takaꞌan ma nim ta ja yukulbal ecꞌuꞌx wqꞌuin. ¿Nak tre tok nebij: —Takaꞌan mta way kacꞌampi ta, kas nixcheꞌe? 9¿Majaꞌn ek tichꞌobtaj emwal? ¿La maturkaj cꞌa chewe ja xinban tre ja joꞌoꞌ rkan caxlanway xenutzuk joꞌoꞌ mil achiꞌiꞌ tre? ¿In la maturkaj cꞌa chewe chakajaꞌ jaruꞌ chacach totaji? 10¿La maturkaj cꞌa chewe ja xinban chic tre ja wukuꞌ rkan caxlanway xenutzuk quijiꞌ mil achiꞌiꞌ tre? ¿In la maturkaj cꞌa chewe chakajaꞌ jaruꞌ chacach totaji? 11¿Nak cꞌa tre tok matichꞌobtaj emwal ja xinbij chewe chi neban cuenta ewiꞌ chwach ja levadura quixin ja fariseo e cachbil ja saduceo? Ma rmal ta waꞌan caxlanway xemestaj can ja tok xinbij queriꞌ chewe, neꞌ chique. 12Cꞌacꞌariꞌ chꞌobtaj cumal chi ja xbij ja Jesús chi nqueban cuenta quiꞌ chwach ja tijonem quixin ja fariseo e cachbil ja saduceo, ma ja ta ja levadura xin caxlanway nqueban cuenta quiꞌ chwach.
* * * * * * * * * *
13Ja cꞌa Jesús tok xeꞌekaj chinakaj ja tinamit Cesarea ja cꞌo pa rcuenta Filipo arjaꞌ xcꞌaxaj chique ja rdiscípulo:
—Anin ja rin Alcꞌwalaxel ja xinoc alaxic cuqꞌuin ja winak ¿nak inocnak wiꞌ ja nquibij chwe ja winak? neꞌ chique. 14Ja cꞌa rdiscípulo ejeꞌeꞌ quibij tre:
—Ecꞌoli nebin chawe chi atat at Juan Bautista, juleꞌ chic nebini chi at Elías in ecꞌo chic juleꞌ ja nebini chi at Jeremías owi at jun chic chique ja rojer tak profeta, xecheꞌ tre.
15—Ja cꞌa rixix ¿nak nebij chwe, nak inocnak wiꞌ? neꞌe. 16Peti ja Simón Pedro, xbij tre:
—Ja ratat at Cristo at Ralcꞌwal ja cꞌaslic Dios, neꞌ tre. 17Ja cꞌa Jesús arjaꞌ xbij tre:
—Congana quiꞌil chawe Simón ja rat rcꞌajol Jonás como ja cꞌa xabij kaj chwe ma winak ta xekꞌalasan ta chawach, ja Nataꞌ ja cꞌo chilaꞌ chicaj arjaꞌ kꞌalasan chawach. 18Anin nbij chawe chi atat at Pedro in parwiꞌ awaꞌ ja jun abaj riꞌ xtintic wiꞌ ja wiglesia in ja camíc ni maticowin wiꞌ trij. 19Anin cꞌo juleꞌ lawe nyaꞌ na chawe rxin ja gobierno xin chilaꞌ chicaj. In xa nak ta ja mataban permitir waweꞌ chwachꞌulew jariꞌ ja matiban permitir chilaꞌ chicaj. In xa nak ta ja naban permitir waweꞌ chwachꞌulew jariꞌ ja nba̱n permitir chilaꞌ chicaj, neꞌ tre. 20Cꞌacꞌariꞌ xbij chique ja rdiscípulo chi ni majun bar ta triꞌ nquibij wiꞌ chi arjaꞌ ja Cristo.
* * * * * * * * * *
21Ja Jesús, chipan ariꞌ tiempo xumajto rkꞌalasaxic chiquewach ja rdiscípulo chi rjawaxic nbe na pa Jerusalén, quewaꞌ xbij chique riꞌ:
—Nentijaꞌ na rpokonal pa quekꞌaꞌ ja principaliꞌ e cachbil ja jefe quixin sacerdote e cachbil chakajaꞌ ja maestro ja netijon quixin ja winak tre ja ley xin Dios. Congana lawuloꞌ xtiban na chwe, nincamsax na in chi rox kꞌij nincꞌastaj na, neꞌ chique. 22Ja cꞌa Pedro arjaꞌ xuchap chi rukꞌaꞌ in xumaj rchꞌaꞌic tre ja xbij:
—Dios ta xtipokonaj awach, ja xabij leꞌ mta moda xtibantaj ta, neꞌ tre. 23Ja cꞌa Jesús xuyaꞌ vuelta in xbij tre ja Pedro:
—Catel chinwach Satanás, atat xa at caniꞌ jun abaj ninapajsaj chipan ja bey nmajon. Queriꞌ nbij chawe como ma queriꞌ ta nawajoꞌ chwe chi nban ja caniꞌ nrajoꞌ chwe ja Dios chi nban, xa junan anaꞌoj cuqꞌuin winak, neꞌ tre. 24Cꞌacꞌariꞌ ja Jesús xbij chique ja rdiscípulo:
—Xa nak ta ja cꞌo rgana nyukeꞌ rucꞌuꞌx wqꞌuin rjawaxic chi matuyaꞌ rgana ja tzabuklaj cꞌaslemal rcꞌan. Rjawaxic chakajaꞌ chi matipokonaj nutij ja rpokonal mwal in ntreꞌel chwij. Jariꞌ caniꞌ jun cruz nya̱ꞌ trij pro matipokonaj nucꞌam ja cruz, nrijkajel in nbe ja bar necamsax wiꞌ. 25Queriꞌ nbij chewe como xa nak ta ja npokonaj nuyaꞌ can ja rcꞌaslemal jariꞌ ni matuwil wiꞌ ja utzlaj cꞌaslemal ja mta qꞌuisic trij. Pro xa nak ta ja matipokonaj nuyaꞌ can ja rcꞌaslemal mwal jariꞌ nuwil ja utzlaj cꞌaslemal ja mta qꞌuisic trij. 26Como caniꞌ tre jun winak ¿nak cꞌa nuchꞌec trij wi xuchꞌec nojel ja mebaꞌil rxin ja rwachꞌulew pro wi ma xuwil ta ja utzlaj cꞌaslemal ja mta qꞌuisic trij? Ja wi xutzak ja utzlaj cꞌaslemal ja mta qꞌuisic trij jariꞌ mta jun mebaꞌil ja xtilokꞌbej ta. 27Queriꞌ nbij chewe como anin ja rin Alcꞌwalaxel ja xinoc alaxic cuqꞌuin ja winak ninpi chi na jutij e wachbil ja ángel wxin, tokoriꞌ ja gloria xin Dios congana nchꞌaꞌan chwij in ja winak nunyaꞌaꞌ na rtojbalil chique chiquijujunal ja queban waweꞌ chwachꞌulew. 28Ni katzij wiꞌ ja xtinbij chewe riꞌ, ecꞌoli chewe ja recꞌo waweꞌ camic riꞌ cꞌa ecꞌas na ja tok xtiquetzꞌat ja Ralcꞌwalaxel ja xoc alaxic cuqꞌuin ja winak, arjaꞌ ocnak chic Rey in xtumaj rbanic mandar chipan ja rgobierno. Queriꞌ xbij ja Jesús chique.
Tans Gekies:
Mateo 16: tzjW
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
© 2010, Wycliffe Bible Translators, Inc. All rights reserved.
