Mateo 15
15
1Ecꞌo cꞌa juleꞌ maestro ja netijon quixin ja winak tre ja ley xin Dios ja tzꞌibtal can rmal ja Moisés e cachbil juleꞌ fariseo, ejeꞌeꞌ epenak pa Jerusalén, xeꞌekaj ruqꞌuin ja Jesús in quewaꞌ quibij tre riꞌ:
2—¿Nak cꞌa tre tok ja radiscípulo atat matiquinimaj ja costumbre quixin ja katiꞌt kamamaꞌ? como ejeꞌeꞌ tok newaꞌi matiquinimaj ja caniꞌ nrajoꞌ ja costumbre tre ja chꞌajoj kꞌabaj, xecheꞌ tre. 3Ja cꞌa Jesús arjaꞌ xbij chique:
—Pro ja cꞌa rixix chakajaꞌ ma eniman ta ja mandamiento xin Dios como cꞌo juleꞌ costumbre necoj chibil tak ewiꞌ ja xa nuyoj ja mandamiento. 4Queriꞌ nbij chewe como ja Dios cꞌo jun mandamiento ryaꞌon chewe, quewaꞌ nbij riꞌ: —Lokꞌ queꞌanaꞌaꞌ ja ratataꞌ ateꞌ, neꞌe. In jun chic mandamiento ryaꞌon chewe quewaꞌ nbij riꞌ: —Ja wi cꞌo jun xa itzel ntzijon tre ja rtataꞌ owi ruteꞌ jariꞌ puersa ncamsaxi, neꞌe. 5Pro ja rixix xa ma lokꞌ ta neꞌenaꞌ como quewaꞌ ja tijonem neyaꞌ riꞌ: —Ja wi nabij tre atataꞌ owi ateꞌ: —Camic maquincowini natnutoꞌ tre ja cꞌo rjawaxic chawe como nbin chic tre ja Dios chi rxin chic arjaꞌ ja cꞌo wqꞌuin, wi natcheꞌ tre, 6jariꞌ ma rjawaxic chi ta chi natoꞌ tre ja cꞌo rjawaxic tre, nixcheꞌe. Queriꞌ ebanon, ja mandamiento xin Dios, ixix ebanon tre ni mta pro xa rumac ja recostumbre. 7Cacaꞌ epalaj, bien ntakeꞌ chewe ja binto chewe ojer rmal ja profeta Isaías, quewaꞌ xbij riꞌ: 8—Jawaꞌ winak riꞌ xa chi quechiꞌ cꞌo wiꞌ tok nqueyaꞌ nukꞌij, ja canma cꞌa cꞌa nat cꞌo wiꞌ chwe. 9Ni majun noc wiꞌ ja tok nqueyaꞌ nukꞌij, ja tijonem nqueyaꞌ rtzobal Dios necheꞌ tre, pro xa mandamiento quixin winak. Queriꞌ ja binto chewe rmal ja rIsaías, neꞌe ja Jesús chique.
10Ja cꞌa Jesús arjaꞌ xumaj chic tzij cuqꞌuin ja winak, quewaꞌ xbij chique riꞌ:
—Tecꞌwaxaj ja xtinbij chewe riꞌ, kas ta xtichꞌobtaj emwal. 11Ma ja ta ja noc pan achiꞌ ja ntzꞌilorsani ja rawanma pro ja ntzꞌilorsan rxin jariꞌ ja nelto pan achiꞌ, neꞌ chique. 12Ja cꞌa rdiscípulo ejeꞌeꞌ xetiloc ruqꞌuin in quibij tre:
—¿La awotak chi ja fariseo junwiꞌ quicꞌaxaj ja xabij leꞌ? xa pokon nquenaꞌ rmal, xecheꞌ tre. 13In bix chique rmal ja Jesús:
—Ja tijonem, xa nak ta chi tijonemal, ja Nataꞌ ja cꞌo chilaꞌ chicaj wi ma arjaꞌ ta ticyon rxin jariꞌ tijonem xa nyoji caniꞌ nba̱n tre kꞌayis xa nboki. 14Maxta quixoclaꞌ il chiquewach ja fariseo leꞌ, ejeꞌeꞌ xa e caniꞌ moyaꞌ ja recucꞌan chic juleꞌ cach tak moyaꞌ. Pro jun moy wi nrcꞌaj chic jun rach moy xa netzakel pa jul chi e caꞌiꞌ, queriꞌ ja bix chique. 15Ja cꞌa Pedro xbij tre:
—Tachꞌoboꞌ chikawach ja cꞌambal tzij xabij, neꞌ tre. 16In bix chique rmal ja Jesús:
—Takaꞌan matichꞌobtaj emwal ixix chakajaꞌ. 17¿La matichꞌobtaj cꞌa emwal chi ja noc pan achiꞌ jariꞌ nkaj chi apan in nelel chic jutij? 18Pro ja nelto pan achiꞌ jariꞌ pan awanma nwinakarto wiꞌ in jariꞌ ntzꞌilorsan rxin ja rawanma. 19Queriꞌ nbij chewe como pan awanma nwinakarto wiꞌ ja ritzel tak naꞌoj caniꞌ tre banoj camíc, caniꞌ tre tok cꞌo jun natoc ruqꞌuin ja wi ma awixjayil ta owi ma awachajil ta, caniꞌ tre banoj alakꞌ, caniꞌ tre ja nayaꞌ testigoꞌil ja ma katzij ta in caniꞌ tre ja tok nabij juleꞌ tzij tre ja Dios ja xa ofensa rcꞌamonto tre. 20Nojel awaꞌ ritzelal riꞌ jariꞌ ntzꞌilorsan rxin ja rawanma no ja mataban ja costumbre tre ja chꞌajoj kꞌabaj jariꞌ mta moda xtitzꞌilorsax ta ja rawanma rmal. Queriꞌ bix chique rmal.
* * * * * * * * * *
21Cꞌacꞌariꞌ ja Jesús xelel chipan ja lugar, be cha jun lugar chic ja bar cꞌo wiꞌ ja caꞌiꞌ tinamit, jun rbinaꞌan Tiro in jun rbinaꞌan Sidón. 22Ja cꞌa tok xekaji chaka jalal tok cꞌo jun ixok xekaj ruqꞌuin. Ja rixok cananea neꞌxi, in triꞌ cꞌo wiꞌ chipan ja lugar ja xekaj wiꞌ ja Jesús. Arjaꞌ xurak ruchiꞌ trij ja Jesús in quewaꞌ xbij tre riꞌ:
—Wajaw, atat ja rat Ralcꞌwal can ja rojer rey David, tapokonaj jutzꞌit nwach, cꞌo jun wal ocnak jun itzel espíritu tre in congana lawuloꞌ nba̱n tre rmal, neꞌ tre. 23Pro ja Jesús ni majun nak ta xbij tre. Xepi cꞌa ja rdiscípulo in quewaꞌ quibij tre riꞌ:
—Tabanaꞌ jun utzil, tabij tre ja rixok chi nmeloji, congana nurak ruchiꞌ chakij, xecheꞌ tre. 24In bix chique rmal ja Jesús:
—Ja Dios xa ruyon cuqꞌuin ja tinamit Israel inrtakonto wiꞌ, ejeꞌeꞌ e caniꞌ tak carnelo etzaknak, xecheꞌx rmal. 25Pro peti ja rixok, xuqueꞌ chwach in xbij tre:
—Wajaw, quinatoꞌoꞌ, neꞌ tre. 26Ja cꞌa Jesús quewaꞌ xbij tre ja ncꞌambajbej rxin:
—Ma rubey ta xticꞌam ta queway ja ralcꞌwalaxelaꞌ in xtiqꞌuiakel ta chiquewach tak tzꞌiꞌ, neꞌ tre. 27Ja cꞌa rixok xbij chic jutij tre:
—Wajaw, ni katzij wiꞌ ja nabij pro ja tak tzꞌiꞌ ejeꞌeꞌ nya̱ꞌ lugar chique cumal ja cajaw chi nquetij ja rcꞌutal tak way ja ntzakel xeꞌ mesa, neꞌ tre. 28In bix chic jutij tre rmal ja Jesús:
—Ixok, congana takaꞌan nim ja yukulbal acꞌuꞌx wqꞌuin. Camic ntzuri ja rawal ja caniꞌ xacꞌutuj chwe, neꞌxi rmal, in ni jariꞌ hora tzuri ja ral.
* * * * * * * * * *
29Ja cꞌa Jesús xelel chipan ja lugar, be, xekaj chuchiꞌ ja yaꞌ ja binaꞌan tre Galilea, joteꞌ chwach jayuꞌ, xuwil jun lugar ja bar tzꞌabeꞌ wiꞌ. 30Congana e qꞌuiy ja winak xeꞌekaj ruqꞌuin, equicꞌamonto jeꞌe yawaꞌiꞌ caniꞌ chique tak cojo, caniꞌ chique moyaꞌ, caniꞌ chique memaꞌ in caniꞌ chique ja ma tzꞌakat ta jeꞌe quekꞌaꞌ owi cakan, in cꞌa ecꞌo na más ja yawaꞌiꞌ, xeꞌequiyaꞌaꞌ chwach ja Jesús in arjaꞌ xertzursaj. 31Ja winak congana cꞌascꞌoꞌi quetzꞌat ja bantaji, ja memaꞌ netzijon chic, ja ma tzꞌakat ta jeꞌe quekꞌaꞌ owi cakan xetzuri, ja tak cojo utz chic nebini, ja moyaꞌ necaꞌy chic. Ejeꞌeꞌ congana queyaꞌ rukꞌij ja Dios, jariꞌ Dios rxin ja tinamit Israel.
* * * * * * * * * *
32Cꞌacꞌariꞌ ja Jesús xersiqꞌuij pon ja rdiscípulo, quewaꞌ xbij chique riꞌ:
—Congana npokonaj quewach ja winak, tuban oxiꞌ kꞌij queqꞌuejeꞌ wqꞌuin in mchita nak chi ta nquetij. Mta ngana nenutakel ja maquita xquewaꞌel, matzij xa quetujkar pa bey rmal waꞌal, neꞌ chique. 33Ja cꞌa rdiscípulo ejeꞌeꞌ quibij tre:
—Jawaꞌ lugar ja rokcꞌo wiꞌ riꞌ congana talani ¿bar cꞌa nekacꞌamaꞌ wiꞌ ja xtiquetij ja winak leꞌ? como congana e qꞌuiy, xecheꞌ tre.
34—¿Jaruꞌ rkan ja caxlanway cꞌol ewqꞌuin? xecheꞌx rmal ja Jesús.
—Wukuꞌ rkan rachbil jun caꞌiꞌ cakan chꞌuꞌ chakajaꞌ, xecheꞌ tre. 35Ja cꞌa Jesús xbij chique ja winak chi netzꞌabeꞌ kaj pa tokꞌulew. 36Cꞌacꞌariꞌ xucꞌam ja wukuꞌ rkan caxlanway rachbil chꞌuꞌ, xmaltioxij tre ja Dios, xuwechꞌ in xujach chique ja rdiscípulo. Ja cꞌa rdiscípulo ejeꞌeꞌ queyaꞌ chic chique ja winak. 37Xewaꞌi ja winak pro canojelal in xenoji chi utz. Ja cꞌa caxlanway rachbil chꞌuꞌ mol ruchiꞌ ja totaji, wukuꞌ chacach xuban. 38Ja xewaꞌi e quijiꞌ mil pro xa queyon achiꞌiꞌ, aparte ixokiꞌ in acꞌalaꞌ. 39Cꞌacꞌariꞌ ja Jesús xeruban can despedir ja winak, xoquel chipan ja lancha, be chipan ja lugar rbinaꞌan Magdala.
Tans Gekies:
Mateo 15: tzjW
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
© 2010, Wycliffe Bible Translators, Inc. All rights reserved.
