যোহন 14
14
যীশুচা সাগ্রাদু লাঃফু লেং
1“নাংরোমা চিইচা অর থুদু-দুঃ মফ্ররাঅং। থাওরা ফোরা ঈ আঃপমা অক্যুং থাআঃ, ঙা আঃপমালি অক্যুং থাআঃ। 2ঙা ফাখাং ঈংমা নিংফু আঃরা আম্যা হিকরি। য়াংচা মুহুকি ঙা নাংরোগু প্রলিফু, আক্রংগা ঙা নাংরো কিজু আঃরা য়াংজং লাঃরি। 3ঙা লাঃরো নাংরো কিজু আঃরা য়াং থাঃরো প্রেংরো লাঃফু অর ঙাবাদুঃ নাংরোগু য়ুউলাঃফু। যাস্যালিছুগি ঙা যামা নিংরিলি, নাংরোলি য়াংদেমা নিংনৈঅং। 4ঙা যাদু লাঃরিলি, য়াং লেংগুগা নাংরো সিকরি।”
5থোমা যীশুগো প্রলিরি, “আস্যাং, কুঃবাং যাদু লাঃরিলি, য়াংচাগো ঙারো মিঃসিক, য়জংছুগি লেংগু যাপুয়েং সিকফুলি?”
6যীশু থোমাগো প্রলিরি, “ঙা লেং, আম্হেং অর বাওয়া। ঙা আতুওয়ংগা নিংরো মাঃলাগি, তয়কলি ফাখাংবাদুঃ মাঃলানৈ। 7নাংরোরা ঙাগো সিকগি, ঙা ফাখাংগুলি সিকফু। অগু নাংরো য়াংসুউগো সিঃব্যা অর য়াংসুউগো ম্রাংলি ম্রাংব্যা।”
8ফিলিপ যীশুগো প্রলিরি, “আস্যাং, ফাখাংগো ঙারোগু প্রাবা। য়াংখারা ঙারো ওয়েংসাফু।”
9যীশু য়াংসুউগো প্রলিরি, “ফিলিপ, দকরাক্কু ঙা নাংরোনা আঃতু হিকলিরি, য়িগিলি নাং ঙাগো মিসিকলিলঃ? যাসু ঙাগো ম্রাংরিলি, য়াংসুউ ফাখাংগুলি ম্রাংলিরি। নাং যাপুয়েং প্যাংরো প্ররিলি, ‘ফাখাংগো ঙারোগো প্রাবা’? 10নাং মক্যুংচারা, ঙা ফাখাং আতুওয়ংমা হিকরি অর ফাখাং ঙা আতুওয়ংমা হিাচাগো? ঙা যা চাঃগারোগু নাংরোগু প্ররিলি, য়াংচা ঙা কুঃদৈং মাপ্র, য়িগিলি ফাখাং, যাসু ঙা আতুওয়ংমা হিকরি, য়াংসুউচা কুঃও আলুককো লুকতি। 11ঙা চাঃগাগো ক্যুংগে, ঙা ফাখাং আতুওয়ংমা হিকরি অর ফাখাং ঙা আতুওয়ংমা হিকরি। য়াংচামুহুকি, ঙা দিঃ অলুককো য়ুউরো ঙাগো ক্যুংগে।”
12“ঙা নাংরোগু আম্হেং প্ররি, খ্যাংসুমুছু ঙা আঃপমা ক্যুংরিছুগি, ঙা যা অলুকরোগু লুকতিলি, য়াংসুউলি য়াংচা লুকফু। ঙা ফাখাংবাদু লাঃরিছুরো য়াংসুউ দিঃচাথাক আগ্রি আগ্রি অলুক লুকফু। 13নাংরো ঙা নাঃমিনা যা তংফুলি, য়াংচা ঙা লুকফু। যাস্যালিছুগি ফাখাং গুংধচা সাঃ আতুওয়ংগা নিংরো পুঅংবেচি। 14ঙা নাঃমিনারা ঙাবামা তুখুমাঃসা তংগি, ঙা য়াংচা লুকফু।”
সেংস্যাংস ওয়িঞেং আক্রংলিলাগু য়ুুরু গিঃদি থঃচা
15“নাংরোরা আম্হেং ঙাগো খ্যতিছুগিরা, ঙামা হিকচা আলুং আঃনাগো চংস্যক্কে। 16ঙা ফাখাংবামা তংমি, অর য়াংসুউ নাংরোবামা তাসাক নিংফু আতুওয়ক অরতয়ক লাকলিহিসাগু রুওয়েলৈমি। 17য়াং লাকলিহিসারা আম্হেং ওয়িঞেং। লঃগামা লুঃউরো য়াংসুউগো লাক মেখেংনৈ। আক্রংগা য়াংসুউরো য়াংসুউগো মাম্রাংরা অর য়াংসুউগো মিঃসিক। ছুগি নাংরোরা য়াংসুউগো সিঃরি, আক্রংগা য়াংসুউ নাংরোনা আঃতু নিংরি অর নাংরো চিইনুন্হুংমা ওয়ংরো নিংরি।
18“ঙা নাংরোগু আঃমি-আঃফা মিহিক লুকরো মাবাহা, ঙা নাংরোবাদুঃ লাঃমি। 19তাঃনামিগি দিঃ লঃগা লুঃউরো ঙাগো মাম্রাংমুব্যা, য়িগিলি নাংরো ম্রাংমি। ঙা আহ্রাং হিরিকিজু নাংরোলি আহ্রাং হিফু। 20য়াংরাকমা নাংরো সিকলিমিচাগা, ঙা ফাখাংনা পংরো হিকরি অর নাংরো ঙানা পংরো হিকরি, অর ঙা নাংরোনা পংরো হিকরি। 21যাসু ঙামা হিকচা আলুং আঃনারুগো সিকরি অর সুংরিছুগিরা য়াংসুউ ঙাগো খ্যতি। যাসু ঙাগো খ্যতিলি, ঙা ফাখাং য়াংসুউগো খ্যতি। ঙালি য়াংসুউগো খ্যফু অর য়াংসুউবামা ঙামা গুংধগো ফুঅংফু।”
22য়াংখা যিহূদা(ঈষ্কারিয়দ মুহু) য়াংসুউগো প্রলিরি, “আস্যাং, কুঃবাং যাফু কেবেলে ঙারোবামারা কুঃ গুংধগো ফুঅংফুলি। লঃগা লুঃউরোবামা মাপ্রালঃ?”
23যীশু য়াংসুউগো আফ্রি পিলিরি, “যাসুমুছু ঙাগো খ্যকি, য়াংসুউ ঙা চাগাঃ আতৈং লাঃমি। ঙা ফাখাং য়াংসুউগো খ্যতি, অর ঙুরো য়াংসুউবাদু লাঃফু অর য়াংসুউনা আঃতু নিংফু। 24যাসু ঙাগো মখ্যলি, য়াংসুউ ঙা চাগাঃ আতৈং মাঃলা। নাংরো যা চাগাঃ ক্রাগেতিলি, য়াংচা ঙা চাগাঃমুহু। প্রফুছুগি যাসু ঙাগো রুওয়েলৈতিলি, য়াং ফাখাংঈঃ চাগাঃ। 25নাংরোনা আঃতু নিংরি আখিংমা দিঃচাগাঃরোগু ঙা নাংরোগু প্রলিরি। 26থুউ আঃকুরেং পিইসা, প্রফুছুগি সেংস্যাংসো ওয়িঞেং যাসুগো ফাখাং ঙানাঃমিনা রওয়েলৈফু, য়াংসুউরা আং অাক্রংলিলাগো য়ুউরো নাংরোগু সুওয়েংসাং পিঃমি অর ঙা নাংরোগো যাচারোগু প্রলৈতি, য়াংচারোগু চিইমা তুওয়ক পিইলিমি।
27“ঙা নাংরো আতুওয়ক ঈখিয়েং থাঃরো লাঃফু। ঙাঈঃ খেংসাগো ঙা নাংরোগু পিরি। লঃগা যাপুওয়েং পিইরিলি, ঙা য়াংপুওয়েং মিপিঃ। নাংরো চিইচা থুদু-দু মাফ্ররাঅং অর চিইমালি আক্রক মিহিরাঅং। 28নাংরো ক্রাগেলঃ, ঙা নাংরোগো প্রলিরি, ‘ঙা লাঃরিব্যা, অর প্রেংরো নাংরোবাদুঃ লাঃফু।’ নাংরোরা ঙাগো খ্যলিইগি, ঙা ফাখাংদুঃ লাঃরি আতুওয়ক নাংরো প্যগেলিফু। আক্রংগা ফাখাংচা ঙাথাবাং ম্যাকন্হা হিকসু। 29দিঃচারো প্রাসানা ফ্রইফুহ্রিঃগা ঙা নাংরোগু প্রঃথারি, যাখা ফ্রইতিলি, য়াংখা নাংরো ক্যুংঅং। 30ঙা নাংরোনা অর আম্যা আখিং চাঃগা মঃপ্রব্যা। আক্রংগা লঃগাগো ওখ্যুকসু লাঃব্যা। ঙা আঃপমা য়াংসুউ তুখুউলি তাওয়েং মিহিক। 31ছুগি দিঃচারো প্রাসানা ফ্রইতি আক্রংগা, লুঃউরো সিঃঅংচাগা ঙা ফাখাংগো খ্যতি অর ফাখাং যাপুয়েং ঙাগো আঃনা পিইলিরি, য়াংপুয়েং আলুংচা ঙা লুকলিইরি। আগু থাঃফি, ঙারো দিঃগা লাঃগেমি।”
Tans Gekies:
যোহন 14: BBSRMZ
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
