যোহন 15
15
আস্যাং যীশু চব্যসি আঃপাং অর তিবিরোচা আঃখাক
1“ঙাচা আচৈ চব্যসি আঃপাং অর ঙা ফাখাংচা চব্যসিবাং ইংস্যাং। 2ঙামা যা আঃখাকমা ঈসি মিসিলি, য়াংচাগো য়াংসুউ খুওয়ে বৈতি। অর যা আঃখাকমা আসিই সিইরিলি, য়াংচাগো য়াংসুউ খাঃরো সেসেং লুকতি, যাস্যালিছুগি অরলি আম্যা ঈসি সিইঅং। 3ঙা নাংরোগু যা চাঃগা প্রলিরিলি, য়াংচাকিজু হ্রিঃগাকাবাং নাংরো সেসেং ফ্রইব্যা। 4নাংরো ঙা আতুওয়ংমা নিংগে অর ঙালি নাংরো চিইনুন্হুংমা নিংফু। চব্যসি আঃপাংমা পংছাকরো মিহিগি, যাপুয়েং সাঃখাক কুঃখ্যাং আঃসিই মিসিইনৈলি, য়াংপুয়েং ঙা আতুওয়ংমা নাংরো মিনিইগি, নাংরোলি কুঃখ্যাংকুঃ আঃসি মিসিনৈমু।
5“ঙারা আম্হেং চব্যসি আতুওয়ংমা হিকগি, য়াংসুউ আঃসাকমা আম্যা আঃক্যুও পিইরি। আক্রংগা ঙাগো অাঃপি নাংরো তখুলি মলুকনৈমুহু। 6খ্যাংসুউমুছু ঙা আতুওয়ংমা মিহিকগি, য়াংসুউচা খুয়েচা আঃখাক তুউরি। য়াংসুউগো প্রাংদু বৈতি অর য়াংচা স্যুঈরো খ্রকলারি। 7ছুগি নাংরোরা ঙা আতুওয়ংমা হিকগি অর ঙা চাঃগারো নাংরো চিইনুন্হুংমা হিকগিরা, নাংরোমা যা তুওয়কতিলি য়াংচা তংগে; নাংরো আতুওয়ক য়াংচা লুকপিফু। 8প্রফুছুগি নাংরো আঃসাকমা আম্যাগ্রি আঃক্যু রারিছুগি অর য়াংপুয়েং নাংরো কুরোগো ঙা তিবিলুঃউ প্রাগেকিরা, ঙা ফাখাং ম্যাকন্হা রাকফু। 9ফাখাং যাপুয়েং ঙাগো খ্যতিলি, য়াংপুয়েং ঙা নাংরোগো খ্যলিরি। ঙা অঃখ্য আঃতুওয়ংমা নিগে। 10ঙা ঙামা ফাখাং আলুং আঃনাগো চংস্যকরো, য়াংসুউ অঃখ্য আঃতুওয়ংমা হিকলিরি, য়াংপুয়েং নাংরোলি ঙা আঃনাগো চংস্যককি, য়াংখারা নাংরোলি ঙা অঃখ্যমা আঃতুওয়ংমা হিকমি।”
11“দিঃ আলুং চাঃগা নাংরোগু যাফু প্রলিছুগি, অঃপ্যচা নাংরো চিইদানামা হিঅং অর আঃপ্য-আঃপাচা প্রিজুংঅং। 12ঙা আঃনাচা ফৈতি, ঙা যাপুয়েং নাংরোগো খ্যলিরিলি, য়াংপুয়েং নাংরোলি তয়ক্কু তয়ক খ্যকে। 13খ্যাংসুউমুছু কুঃ মিকছুয়ি কিজু আঃসাক পিরিরাছুগি, য়াংসুউথাক অর আম্যা অঃখ্য তয়কমালি মিহিকব্যা। 14যা আঃনারোগু ঙা নাংরোগু পিইরিলি, য়াংচাগুরা নাংরো চংস্যককিরা নাংরো ঙা মিকছুয়ি। 15ঙা অর নাংরোগু ঙাক ক্যুং মাপ্রব্যা। আক্রংগা ঈঃস্যাং যা লুকতিলি, ক্যুংচা মিসি; ছুগি ঙা নাংরোগু মিকছুয়ি প্রলিরি, আক্রংগা ঙা ফাখাংগা যামুছু ক্রালিরি, য়াংচাগো নাংরোগু আসিক পিইলিরি। 16নাংরো ঙাগো রুইকক ময়ুলি, প্রফুুছুগি ঙারা নাংরোগু রুইকক য়ুরু, অলুক পিইলিরিচাগা নাংরো আঃসাকমা আক্যুও রাঃঅং। অর য়াং আক্যুওচা নাংরোমা তিম্রিঅং। য়াংপুয়েং ছুগি ঙা নামিনা ফাখাংবামা যামুছু তংগি, য়াংসুউ নাংরোগু পিইমি। 17দিঃ আঃনাগো ঙা নাংরোগু পিইরি, নাংরো তয়ক্কু তয়ক খ্যকে।
কাঃবাচা ক্যুংসুরো আতুওয়ক রেংসুউ।
18“কাঃবামা লুঃউরোচা নাংরোগু মুংরি। য়িগিলি ম্হেরো থাঃ, য়াং হ্রিইগা য়াংসুউরো ঙাগো মুংগেরি। 19নাংরোরা দিঃ কাঃবামা লুঃউ ফ্রইলিগিরা, য়াংখারা লুঃউরো কুঃরোচা ছুরো নাংরোগু খ্যক্কেফু। প্রফুছুগি নাংরোগা দিঃ লঃগা লুঃউ মুহু। ঙা নাংরোগু দিঃ লঃগাগা রুঈঃকক য়ুলিরি কিজু লঃগামা লুঃউরো নাংরোগু মুংগেতি। 20ঙামা দিঃ চাঃগাগু মিঃমিংগি, ক্যুংয়েংচা ঈঃস্যাংথাক মিক্রি। য়াং আতুওয়ক লুঃউরোরা ঙাগো সেঃফু ক্রেংগেতিরা ছুগি, নাংরোগুলি য়াংপুয়েং লুকফু। য়াংসুউরোরা ঙা চাঃগাগু নাথংরিরাছুগি, নাংরো চাঃগাগুলি নাথংফু। 21য়াংসুউরো ঙাক কিজুরা নাংরোগু য়াংপুয়েং লুকফু। আক্রংগা যাসু ঙাগো রুওয়েলৈতিলি, য়াংসুউগা য়াংসুউরো মিসি।
22“ঙারা মাঃলালিগি অর য়াংসুউরোবামা চাঃগা মপ্রলিগিরা য়াংসুউরোমা আঃপ্র ক্যালিফুমুহু। প্রফুছুগি অগু অঃপ্র আতুওয়ক তুখুকলি হ্লিপ্রাজারা মিহিক। 23যাসুউ ঙাগো মুংরিলি, য়াংসুউ ঙাক ফাখাংগুলি মুংরি। 24যা অলুককু তাখালি তয়ক মুলুকসি, য়াংচাগু ঙা য়াংসুউরো আতুওয়ংমা মুলুকলিইরাছুগি, য়াংসুউরোমা আঃপ্র ক্যালিফুমুহু। অঃগুগা য়াংসুউরো ঙানা ফাখাংগুলি ম্রাংব্যা অর মুংলি মুংগেলিরি। 25দিঃচারো ফ্রইরি, আক্রংগা য়াংসুউরো থুংজৈমা রুইহিকঅং আঃব্রিচুং ফ্রইঅং। ‘য়াংসুউরো তুখুমুহুকব্রি ঙাগো মুংগেরি।’
26“আকুঞিং পিসা লুঃউগু ঙাক ফাখাংবাগা নাংরোদু রুওয়েলৈফু, য়াংসুউ যাখা লাঃফুলি, য়াংখা য়াংসুউ ঙাক আক্রংলিলাগু সাকসি পিইলিমি। য়াংসুউচা ফৈতি আম্হেং চাংজ ওয়িঞেং যাসু ফাখাংবাগা লাঃফু। 27অর নাংরোলি ঙাক আক্রংলিলাগু য়ুউরো সাকসি পিইগে, আক্রংগা পাথামাকাবাং নাংরো ঙানা আঃতু আঃতু হিকলিরি।
Tans Gekies:
যোহন 15: BBSRMZ
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
