যোহন 13
13
তিবিরো আঃখ্রিগো ছিঃচা
1ক্যুওয়েম্রকতি ফুউখিং তিঃফি হ্রিইগা প্রাসানা। যীশু চিইমা সিকলিইরি, য়াংসুউমা দিঃ লঃগাগো বৈরো ফাখাংবাদু লারাফু আখিং রকব্যা। দিঃ লগামা যাসুরো যীশু লুঃউ হিকলিরি, য়াংসুউরোগু খ্যলিরি অর অকছুং রকঅংলি খ্যলিরি।
2য়াংখা চাঃখিং। য়াং হ্রিইগা রেংসুউ শিমোনমা সাঃ যিহূদা ঈষ্কারিয় চিঃমা যীশুগো রেংসুউ অালাকমা তিপিইফু চিঃমা রকলিরি। 3যীশু সিলিরি, ফাখাং সাগ্রা য়াংসুউ অঃলাকমা আলুংচা পিলিরি। য়াংসুউ অরলি সিলিরি, কুঃচা য়াংসুউবাগা লাঃচা অর য়াংসুউবাদু লাঃফু। 4য়াংচাকিজু যীশুচা আঃচাগো পিরো থালিরি অর আঃথাক্কা আঃওয়েকু খ্যুওয়েরো খাঃমা গাংসা তিঃথি রঃলিইরি। 5য়াংনক যীশু ডাংগেংমা রিই স্যুওয়েং খ্যারো তিবিরোগু আখ্রিই ছিইলিরি। অর খাঃমা খ্যংরোহিচা গাংসানা পুওয়েলিরি।
6তেথেং লুঃউরো যীশু যাখা শিমোননা পিতরদু লালিরি, য়াংখা পিতর য়াংসুউগো প্রলিরি, “আস্যাং, কুবাংলঃ, ঙা আখ্রিইগো ছিইপিইবাফু?”
7যীশু আফ্রিমা প্রলিরি, “ঙা আগু যা লুকতিলি, য়াংচাগু নাং নাঃলিমুহুক, নক্কারা সিলিমি।”
8পিতর য়াংসুউগো প্রলিরি, “কুঃবাং তাখালি ঙা আখ্রিইগো ছিঃমিপিগি।”
যীশু পিতরগো প্রলিরি, “ঙারা নাক্কু ছিই মিপিছুগি, নাংনা ঙানা আছ্যুঈ আছাক তুখুউলি মিহিক।”
9য়াংখা শিমোন-পিতর প্রলিরি, “আস্যাং, য়জংছুগি কেবেলে ঙা আখ্রিই মুহুক, ঙা আলাকনা অগংগোলি ছিঃরো পিবা।”
10যীশু য়াংসুউগো প্রলিরি, “যাসু রিইখ্যুরিলি, য়াংসুউ আখ্রিই পিঃরো তখুলি ছিঃফু মিহি। আক্রংগা য়াংসুউমা অর আলুংচা সেসেং হিরি। 11নাংরো আম্হেং সেসেং হিরি, য়িগিলি আলুংসু মুহুক।” যাসুুউ য়াংসুউগো তিপিইফুলি, য়াংচাগো য়াংসুউ সিলিরি। য়াংচাকিজু য়াংসুউ প্রলিরি, “নাংরো আলুংসু সেসেং মুহুক।”
12তিবিরো আলুংসু আঃখ্রিগো ছিঃব্রিনক যীশু আঃথাক্কা আঃওয়েকু ওয়েলিরি। য়াংনক প্রেংরো থৈরো য়াংসুউরোগু প্রলিরি, “ঙা যা লুকলিইরিলি, নাংরো য়াংচাগো নাঃলিগেলঃ? 13নাংরো ঙাগো ছাঃড়ানা আস্যাং খগেতি, অর য়াংচা নাংরো আম্হেং প্ররি আক্রংগা ঙায়াংসুউ। 14য়িগিলি ঙা ছাঃড়ানা আস্যাং ফ্ররোলি, নাংরো আখ্রিইগো ছিই পিইলিইরি, য়াংখা নাংরোলি তয়ক্কু তয়ক আখ্রিই ছিঃরাফু তেংরি। 15ঙা নাংরোবামা দিঃচাগো লুকপ্রারি, ছুগি নাংরোগো ঙা যা লুকলিইরি, নাংরোলি য়াংচা লুক্কে। 16ঙা নাংরোগু আম্হেং প্ররি, ক্যুংসিচা ঈস্যাংথাক আগ্রি মুহু। যাসুগো রওয়েলৈতিলি, য়াংসুউ থুসুউথাক আগ্রিই মুহুক, যাসু য়াংসুউগো রুওয়েলৈতি। 17দিঃচারোগু সিঃরো রোসিঃগি, নাংরো ওয়েংম্রকতি।
18“ঙা নাংরো আলুংসু চাঃগাগো মঃপ্র। ঙা যাসুউরোগু রুঈকক য়ুউলিরি, য়াংসুউরোগুগা ঙা সিকরি। য়িগিলি সেংস্যাংস কেইংচাউমা দিঃ চাঃগাচা প্রিজুংরাফু, ‘যাসু ঙানা আঃতু চাঃরি সকতিলি, য়াংসুউলি ঙাগো ছেংগ্যাংফাক লুকফু ফাওয়া খিব্যা।’ 19দিঃচা ফ্রইফু হ্রিইগা ঙা নাংরোগু প্ররি, প্রচা প্রাসানাচা ফ্রইকি নাংরো ক্যুংঅংচাগা, ঙা য়াংসুউ হিকলিরি। 20ঙা নাংরোগু আম্হেং প্ররি, ঙা যাসুগো রুওয়েতিলি, যাসুউ য়াংসুউগো লাকখেংরিলি, য়াংসুউ ঙাগো লাকখেংরি। অর যাসুউ ঙাগো লাকখেংরিলি, যাসু ঙাগো রুওয়েলৈতি, য়াংসুউ য়াংসুউগো লাকখেংরি।”
যাসু আস্যাং যীশুগো তিঃ পিইফুলি?
(মথি ২৬:২০-২৫; মার্ক ১৪:১৭-২১; লূক ২২:২১-২৩)
21দিঃ চাগাঃরো প্রব্রিনক যীশু চিইচা থুদু-দুঃ ফ্রলিরি। য়াংসুউ আঃব্রিচি প্রলিরি, “ঙা নাংরোগো আম্হেং প্ররি, নাংরো আতুওয়ংমা তয়ক ঙাগো রেংসুঃ আঃলাকমা তিঃ পিইফু।” 22যীশু যাসু চাঃগাগো প্ররিলি, য়াংচাগো মিসিকব্রি তিবিরোচা তয়ক্কু তয়ক ম্যাকচি তাং ক্রিগেলিরি। 23য়াং আতুওয়ংমা যাসুগো যীশু খ্যতিলি, য়াংসুউ যীশু রাংখুওয়ংবামা হিকলিরি। 24শিমোননা পিতর য়াংসুউগো আলাক প্রারো প্রলিরি, “য়াংসুউ যাসু চাঃগাগো প্ররিলি, মিংক্রিলমে।”
25য়াং তিবি য়াংখা যীশুদু রুওয়িরো প্রলিইরি, “আস্যাং, য়াংসুউ যাসুলি?”
26যীশু আফ্রিমা প্রলিরি, “দিঃ ভংমুঃগো খুওয়কমা নঙরো যাসুগো পিইফু, য়াংসুউ য়াংলুঃউ ফ্রইতি।” অর যীশুচা ভংমুঃ আপিগো খুওয়কমা ন্হরো শিমোন ইস্কারিয় যিহুদাগো পিইলিরি।
27ভংমুঃ আপিগো য়ুউব্রিনক রেংসুউনেঃচা যিহূদামা ওয়ংলিরি।
যীশু য়াংসুউগো প্রলিরি, “যা লুকফুলি, আয়াং লুক।”
28যাসুরো যীশুনা চাঃগেতি, য়াংসুউরো তয়কলি মিসিলি, যাফু যীশু যিহূদাগো দিঃচাঃগা প্রলিরিলি। 29তয়কতিরি তুওয়ক্কেলিরি, ফুউফু আতুওয়ক যা লুঃরি যীশু যিহূদাগো ওয়িয়ুউফু প্রলিরি, মুহুকিঃ ছাংরিসারোগু তুখুমাসা পিইফু আতুওয়ক প্রলিরি, আক্রংগা য়াংসুউরো তেংগা ভুউচা যিহূদাবামা থাঃরি। 30ভংমুঃ য়ুউরি খ্যাংখ্যাং যিহূদা প্রাংদু লাঃলিইরি। য়াংখা ঞিনাকব্যা।
আঃসঃ আঃনা
31যিহুদা প্রাংদু লাঃব্রিনক যীশু প্রলিরি, “মুনুসাওয়া সাঃ গুংধ ফুঅং প্রাখিং লাঃব্যা অর য়াংসুউ আতুওয়ংমারা সাগ্রা গুংধ পুঅংফু। 32সাগ্রা গুংধ যাখা য়াংসুউ আতুওয়ংমা পুঅংফুলি য়াংখা সাগ্রালি মনুসাওয়া সাঃ গুংধচা কুবামা পুঅংফু অর য়াংচা য়াংসুউ কংগং আয়াং লুকফু।
33“সাঃরো, অর তিঃফি আখিংরা ঙা নাংরোনা হিকচারা। নাংরো ঙাগো হ্রাগেমি য়িগিলি ঙা যিহূদী গংখ্যুকরোগু যাপুয়েং প্রলৈতিলি, ‘ঙা যাদু লারিলি, কুবাংরো য়াংদু মালানৈমু।’ য়াংপুয়েং নাংরোগুলি আগু য়াংপুয়েন প্ররি। 34ঙা আঃস তুখু আঃনা নাংরোগু পিরি, নাংরো তয়ক্কু তয়ক খ্যককে। ঙা যাপুয়েং নাংরোগো খ্যতিলি য়াংপুয়েং নাংরোলি তয়ক্কু তয়ক খ্যককে। 35নাংরোরা তয়ক্কু তয়ক খ্যককেকি, য়াংখারা আলুসু সিকফুচাগা নাংরো ঙাক তিবি।”
পিতর গিঃদি খেংচা
(মথি ২৬:৩১-৩৫; মার্ক ১৪:২৭-৩১; লূক ২২:৩১-৩৪)
36শিমোননা পিতর যীশুগো প্রগেলিরি, “আস্যাং, কুঃবাং যাঃদু লাঃবালি?” যীশু আফ্রিমা প্রলিরি, “ঙা আগু যাঃদু লাঃরিলি, য়াংদু নাংরো ঙানা আঃতু মাঃলানৈমু, ছুগি নক্কারা নাংরো লাঃনৈমি।” 37পিতর য়াংসুউগো প্রলিরি, “আস্যাং, যাফু আগু কুঃবাং নক্কা মাঃলানৈবালি? কুঃবাং আতুওয়ক ঙা ঙামা আঃসাক তয়ং পিইফু।”
38য়াংখা যীশু প্রলিরি, “আম্হেংলঃ নাং ঙা কিজু নাক আঃসাক পিইফু? ঙা নাক্কু আম্হেং প্ররি, ক্রাক মুতুওয়েং হ্রিইগা নাং সুংব্রেং প্রফুচাগা, নাং ঙাগো মিঃসিক।
Tans Gekies:
যোহন 13: BBSRMZ
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
