Met 50
50
Ejamembime Yakob e Kanaan
(Met 47:28-31; 49:29-33; Met 45:1-11; Kol 3:12-14)
1Ane Yôsep a nga butubu asu ésaa yôp a latane nye anyu. 2Wôna Yôsep a nga bendé bevo'o ya bebo bisaé bé be mbe bedokita na be kôme mbim ésaa wé, a bedokita be nga kôme mbim Israél. 3Jame te e nga sili môse mewôm menyin asu ya kôme mbim. Bôte y'Ejipte be nga yône nye môse mewôme zamgbwa.
4Eyoñe melu m'ôlun me nga lôt, Yôsep a nga kobô bôte be too *nda Faraoñ na: Nge me ne nguleya bi mvolane wu be mia: Koba'an Faraoñ, ma ye'elane mia na: 5Esaa wom a nga bo ma me kane ngana na: Me mbeme wu! Wo ye jame ma e soñe me nga fak e Kanaan. Ajô te ma kômbô bete wé asu ya jam ésaa wom; mvus éte ma ye bulan. 6Faraoñ a nga yalane na: Betek a jamek ésoo wôé, avale a nga bo wo de na ô kane ngana.
7Ane Yôsep a nga bet asu ya jam ésaa wé. Be nga bet a nye avale di: Bebo bisaé be Faraoñ bese, minnôm mi bôt mise ya *nda jé, benyabôtô bese y'Ejipte, 8*nda Yôsep ése, bobenyañ a *nda bôt ésaa wé; be nga li'i si ya Gôzen ve bone bap, mimbam mi bone biyem a mi beta biyem. 9Bemetôa a bebebe bikabela fe be nga bet a Yôsep, avale ya na nsamba te ôse ô mbe beta nsamba. 10Eyoñ be kuiya Atad, e nye a ne e Yordane yat, be nga bo éjamembim é ne ngu a adit, a Yôsep a nga bo awu mimôse zamgbwa asu duma ésaa wé. 11Bekananééñ be nga bo awu te e nseñ Atad a be nga jô na: Za awu e ne anen ana e be bôte y'Ejipte. Ajô te be nga yôlé vôm ate jôé na: Abél Mitsrayim e Yordane yat. 12Ane bone be Yakob be nga bo avale ésaa wop a nga bendé be. 13Bone bé be nga be'e a kee nye e Kanaan a jame nye e mbas akok ô mbe afube Makpéla, afub Abraham a nga kuse be Efroñ, mone Hitit, ane afube mesoñ, bebé Mamré. 14Eyoñ a maneya jam ésaa wé, Yôsep a nga bulan Ejipte a bobenyañ a ba bese be nga bet a nye asu ya jam ésaa wé.
15Eyoñe bobenyañe be Yôsep be nga yene na ésaa wop a wuya, be nga jô na: Ndô'ôtô Yôsep a ye su'ulane bo nsiñe wongan a bulane bia *abé ese bi nga bo nye! 16Ane be nga lôme bôt be jô nye na: Valé a ngenane teke wu, ésoo a nga li'i wo abendé na: 17Mia ye kobô Yôsep a jô nye na: Engôngo! Ma ye'elane wo, jamé'é *abé mewôé me môt bobenyoñ be nga bo wo a mbia mboone wop, amu be nga bo wo *abé! Ajô te ma ye'elane wo na jamé'é *abé bebo bisaé be Zambe ésaa wôé be nga bo wo éyoñe ji. Yôsep a nga yôn éyoñe be nga kobô nye nalé. 18Bobenyañe bé bebien be nga zu ku nye mebo a jô na: Bia ba, bebo bisaé bôé. 19Yôsep a nga jô be na: Te mia ko woñ; bebela na, ye me ne éjiane Zambe' 20Mi nga bôndé fe'e ya bo ma *abé, Zambe a nga kôñelane je na é bo mvaé, asu ya tôé jam da bobane môse wu, a asu ya nyii ényiñ ayoñe bôt e n'abui. 21Eyoñe ji ñhe te mia ko woñ, ma ye ve mia mam mese mia kômbô a bone benan; a nga volô be minlem nkoban a nga kobô minleme miap.
Awu Yôsep
(Hé 11:22; Yas 24:32)
22Yôsep a nga tabe Ejipte, émien a *nda bôte jé, a nga nyiñe mimbu 110. 23Yôsep a nga yene bone b'Efrayim a kui miaé lale; a bone be Makir, mona Manasé, be nga bialé meboñe mé yôp. 24Yôsep a nga jô bobenyañe bé na: Me mbeme wu! Ve Zambe a ye bo jam éziñ asu denan teke selan, a ye bo na mi bet mi kôlô'ô Ejipte a ke e si a nga ka'a Abraham, Izak a Yakob a nkanane ngana. 25Yôsep a nga bo na bone b'Israél be kane ngana be jô'ô na: Zambe a ye bo jam éziñ asu denan teke selan, a mia ye bete bivese biam ôyabe va.
26Yôsep a nga wu a too mimbu 110. Be nga kôme mbime wé a be nga futi wô éwolo été Ejipte.
Tans Gekies:
Met 50: BDCB
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
Bible en langue Bulu © L'Alliance Biblique du Cameroun, 2007, 2015.
