युहन्ना 5
5
पक्षाघाती गेप्च
1होटै न्हुइङ यहूदीकुङ चाड राहा र येशू यरूशलेमाङ नुङा। 2यरूशलेम सहर भीत्री पर्च भेडा म्यार्मीन लेच गालाम ले, र होच्यो खेरेप बाङा पट्टी दलान लेच काट पोखरी ले। होसे पोखरीकी हिब्रु भासाङ बेथस्दा डेले। 3होला वास्टै छाच अन्धा, लङ्गडा र पक्षाघाती भर्मीको मीस्न ङुमन्या। [होखुरीक कुडीक बेला पोखरीयुङ डी छ्योर्ल्होले डेयार लेन्न ङुमन्या। 4हीजैडेनाङ बेला-बेलाङ परमप्रभुओ काट डुट म्हाका पोखरीयाङ झाल्न राहार डी क्योट्न याम्हन्या। डी छ्योर्ल्होछ बीट्टीकै सु पहीला डीयाङ परन्या, होसे कुङ्च खाल्या रोग लक्डीस्च लेनाङ र गेप्की क्योट्नन्या।]#5:4 इसे बाड्को कोस्ट भीट्री लेच सब्डको चहीँ कोइ-कोइ सोरोट बाइबलाङ माले।
5होला लेच छाचको मढ्याङ काट जना चहीँ अड्टीस वर्ष सम्म पक्षाघात छानार ङुच भर्मी लेया। 6येशूये होसकी होला मीस्न ङुच डाङा, र होसे वास्टै वर्ष लकीङ रोगै ग्रस्त छानार ङुमेसा डेच कुरा येशूये थाहा डीन्हार डेया, “ही नाको गेप्की मीमन जाट्ले?”
7होसे रोगी भर्मीये येशूकी डेया, “हजुर, डी छ्योर्ल्होछ बेलाङ ङाकी पोखरीयाङ काम याछ ङौ सुर माले। ङा नुङ्नाङ-नुङ्नाङ न ङा डेनाङ अघी अर्को भर्मी डीयाङ पर्की क्योट्ले।”
8येशूये होसकी डेया, “सोनी! लहो ओछ्यान बुवार व्हानी।” 9होडीक न बेला होसे रोग लक्डीस्च भर्मी गेप्की क्योटा र लहो ओछ्यान बुवार होसे व्हाकी क्योटा।
टर होसनीक म्हुङ बाट्च डीन लेया। 10होटबाटै यहूदी अगुवाकै होसे गेप्च भर्मीकी डेया, “छीनी च म्हुङ बाट्च याक हो, र इसे डीनाङ नाकै ओछ्यान बुवार व्हाकी कानुङ व्यवस्थौ विरुद्ध हो।”
11टर होसे गेप्च भर्मीये डेया, “सुये ङाकी गेपाका, होसकै न ङाकी ओछ्यान बुवार व्हानी डेच हो।”
12यहूदी अगुवाकै गेप्च भर्मीकी गीना, “नाकोकी ओछ्यान बुवार व्हानी डेच भर्मी सु हो?”
13टर होसे गेप्च भर्मीये लाहाकी गेपाक्च सु हो डेयार माचीन्डीमन्या, हीजैडेनाङ होला भर्मीयो भीड लेचबाटै येशू होटै व्हाम भ्यामन्या।
14होटै न्हुइङ येशूये होसे गेप्च भर्मीकी परमेश्वरौ मन्दिराङ डुपार डेया, “ङोस्नी, अब नाको गेप्मने। फेरी पाप माजाट्की, नभा च नाको मीटाक झन मासेछ डसा आइपर्ले।”
15टब होसे भर्मी यहूदी अगुवाको लेठाङ नुङार लाहाकी गेपाक्च येशू टी लेसा डेयार सेटाका। 16येशूये इसे काम म्हुङ बाट्च याकाङ जाट्च बाटै यहूदी अगुवाकै होसकोकी खेडो जाट्की ठाला। 17टर येशूये होखुरीककी डेया, “ङौ बोये सढैँ न काम जाट्न न ङुले, होटबाटै ङा र काम जाट्न न ङुले।”
18इसे कुरा सेयार यहूदी अगुवाकै येशूकी झन साट्की सुरडीसार डेया, “होचे म्हुङ बाट्च डीन भङ्ङ जाट्च काम मट्टै होइन, टर परमेश्वरकी लहो बोइ डेयार होचे लाहाकी न परमेश्वर बराबर खास्नने। होसकी च साट्की न पर्ले।”
परमेश्वरौ मीजौ अधिकार
19येशूये होखुरीककी डेया, “साँच्ची न ङा नाखुरीककी डेले, मीजा लहे न हीर जाट्की माय्होक्ले, टर परमेश्वर बोये ही जाट्च डाङ्ले, होचे होसे मट्टै जाट्ले। हीजैडेनाङ बोये ही जाट्ले, मीजै र होट न जाट्ले। 20हीजैडेनाङ परमेश्वर बोये लहो मीजाकी माया जाट्ले, र होसको लहे जाट्च पट्ट न कामको मीजाकी टान्हाक्ङ याल्हे। इसे डेनाङ बा-बाड्सो कामको बोये मीजाकी टान्हाक्ले, र नाखुरीक पट्ट न छक्क पर्ले। 21परमेश्वर बोये सीच कोलाक जीवाटाकार सेन्र मासीच जीवन याछ लेखा न मीजै र लहे सुकी मीमन जाट्ले, होखुरीककी सेन्र मासीच जीवन याल्हे। 22हीजैडेनाङ परमेश्वर बोये सुओर न्याय माजाट्ले, टर पट्ट न न्याय जाट्च काम चहीँ मीजाकी याम्हने, 23होटबाटै पट्टये मीजौ आदर जाट्ख्यो, कुटजाट्न होखुरीकै परमेश्वर बोयो आदर जाट्ले। मीजाकी आदर माजाट्चये मीजाकी बीर्न्हकाच बोइकी र आदर माजाट्ले।
24“साँच्ची न, ङा नाखुरीककी डेले, सुये ङौ बचन सेले र ङाकी बीर्न्हकाचकी विश्वास जाट्ले, होसेखाटा सेन्र मासीच जीवन ले। होसे न्यायौ डीनाङ दोषी माठहरीस्ले, टर होसे सीच लकीङ सेन्र मासीच जीवनाङ सरीस्न भ्याच छान्ले। 25साँच्ची न ङा नाखुरीककी डेले, काट समय राम्हन ले, बास्टबाङ होसे समय चाँहा न राम्हभ्यामने जब सीम भ्याचकै परमेश्वरौ मीजौ सोर सेले, र सुये होसे सेले होखुरीकै चहीँ सेन्र मासीच जीवन डुप्ले। 26परमेश्वर बोइ खाटा जीवन याछ शक्तिले, होसे न शक्ति होसकै लहो मीजाकी र याम्हने। 27अनी होसकै मीजाकी न्याय जाट्च अधिकार याम्हने, हीजैडेनाङ होसको भर्मीयो मीजा हो। 28इसे कुराङ नाखुरीक अचम्म मामन्डीनी, हीजैडेनाङ काट समय राम्हन ले, होडीक बेला पट्ट न सीचकै भर्मीयो मीजौ सोर सेले, 29अनी होखुरीक सीच लकीङ सोले। सेछ काम जाट्चको चहीँ जीवाम सोले र सेन्र मासीच जीवन डुप्ले, टर मासेछ काम जाट्चको चहीँ दोषी ठहरीस्कीयो लागी जीवाम सोले।
30“ङा ङाल्है न हीर जाट्की माय्होक्ले। परमेश्वरै ही डेले होसे अनुसार ङा न्याय जाट्ले, अनी ङै जाट्च न्याय ठीक छान्ले, हीजैडेनाङ ङा ङाल्हौ इच्छा मापाले, टर ङाकी बीर्न्हकाचौ इच्छा पाले।
31“इडीक ङै ङाल्हौ बारेयाङ गबाही याहा डेनाङ ङौ गबाही सत्य माठहरीस्ले। 32टर ङौ बारेयाङ गबाही याछ चहीँ परमेश्वर बोइ ले, र होसकै ङौ बारेयाङ ही डेले, होसे पट्ट न सत्य छान्ले डेच कुरा ङाकी थाहा ले।
33“नाखुरीकै बप्तिस्मा याछ युहन्ना लेठाङ गीन्की बीर्न्हका, अनी होचे सत्यौ गबाही याहा। 34ङाकी भर्मीयो गबाही चहडीस्च होइन, टर नाखुरीक जीवाख्यौ डेयार ङै इसे कुरा डेच हो। 35युहन्ना ढाम ङुच र ट्याङ्छ बट्टी ल्याक्च लेया, र नाखुरीकै काटछीन मट्टै होच्यो ट्याङ्ठाङ मार्हाङ्छ मीमन जाटा।
36“टर ङाखाटा लेच गबाही युहन्नै याछ गबाही डेनाङ बाड्को ले। हीजैडेनाङ कुसे कामको पुरा जाट्की परमेश्वर बोये ङाकी याम्हने, होसे काम ङा जाट्न न ले, अनी होसे कामै न ङौ बारेयाङ गबाही याम्हन ले, र परमेश्वर बोये ङाकी बीर्न्हकाच हो डेम टान्हाक्ले। 37ङाकी बीर्न्हकाच परमेश्वर बोये मेखोलै न ङौ बारेयाङ गबाही याम्हने। होसकुङ सोर नाखुरीकै सेन्र मासेमने, र होसकुङ रुप र माडाङ्ने। 38होसकुङ बचन नाखुरीकुङ मीमनाङ माङुले, हीजैडेनाङ सुकी होसकै बीर्न्हका, नाखुरीकै होसको मीटाक विश्वास माजाट्ले। 39नाखुरीक धर्मशास्त्राङ पाले, हीजैडेनाङ होला सेन्र मासीच जीवन डुप्ले डेम नाखुरीक आर्मीटले। टर ङौ बारेयाङ गबाही याछ होसे न धर्मशास्त्र हो। 40टर सेन्र मासीच जीवन डुप्की नाखुरीक ङा लेठाङ राखी मामन्डीले।
41“ङै भर्मीकै याछ प्रशंसा पाच होइन। 42टर परमेश्वरौ लागी नाखुरीकुङ मीमनाङ प्रेम माले डेम ङाकी थाहा ले। 43ङा ङौ परमेश्वर बोयो म्यार्मीनाङ राम्हने, टर नाखुरीक ङाकी स्वीकार माजाट्ले। बरु सुर लहो म्यार्मीनाङ राहा डेनाङ, होसकी चहीँ स्वीकार जाट्ले। 44नाखुरीक लाहा-लहीङ प्रशंसा डुप्की मीमन जाट्ले, टर काट मट्टै परमेश्वर लकीङ डुप्च प्रशंसा चहीँ मापाले डेनाङ नाखुरीकै कुटजाट्न विश्वास जाट्की य्होक्ले र?
45“ङै नाखुरीककी परमेश्वर बोयो म्याहासाङ दोष लैडीले डेम माआर्मीट्नी। नाखुरीकै मोशा मीटाक लहो आशा डामने, होचे न नाखुरीककी दोष लैडीले। 46इडीक नाखुरीकै मोशाकी विश्वास जाट्च लेनाङ च ङाकी र विश्वास जाट्च लेया, हीजैडेनाङ मोशै न ङौ बारेयाङ रीक्ङन्या। 47टर इडीक नाखुरीक मोशै रीक्च कुराको विश्वास माजाट्ले डेनाङ, ङै डेच कुराङ कुटजाट्न विश्वास जाट्ले ट?”
Tans Gekies:
युहन्ना 5: EMGP
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
© 2024 (Active), Wycliffe Bible Translators, Inc. All rights reserved.
