युहन्ना 4
4
सामरी मास्टो खाटा येशू कुरा जाट्च
1युहन्नै डेनाङ येशूये वास्टै जना चेलाको खासार बप्तिस्मा याम्हन ले डेच कुरा फरीसीकै सेया। 2येशू लहे न सुकीर बप्तिस्मा माय्हामन्या, टर होसकुङ चेलाकै चहीँ बप्तिस्मा याम्हन्या। 3जब फरीसीकै इसे कुरा सेया डेम थाहा डीन्हा, टब येशू यहूदिया क्षेत्र डासार फेरी गालीलाङ ल्हेसा। 4होसको गालीलाङ नुङ्नाङ सामरीया क्षेत्रौ लाम छानार नुङ्की पर्नन्या। 5अनी येशू सामरीया क्षेत्रौ सुखार डेच लाङ्घाङ टाराहा। इसे लाङ्घा चहीँ याकुबै लहो मीजा योसेफकी याछ य्हा खेरेप लेया। 6होला याकुबौ इनार लेया। येशू व्हानाङ-व्हानाङ म्हुङार होसे इनारौ छेवाङ ङुम ङुमन्या। होडीक बेला मढ्य नाम्सीन छानन्या।
7होला होडीक बेला काट सामरी मास्टो भर्मी डी गाप्की डेयार राहा। येशूये होसकी डेया, “ङाकी डी गाकी यान्ही।” 8होसकुङ चेलाको चहीँ होडीक बेला लाङ्घाङ ज्याच ठोक लोकी नुङ्नन्या।
9होसे सामरी मास्टोये येशूकी डेया, “नाको यहूदी छानार ङा काट सामरी मास्टौ मीहुटीङ कुटजाट्न डी गाकी ङेल्हे?” (हीजैडेनाङ यहूदीकै सामरीकोखाटा हीर सम्बन्ध माडामन्या।)
10येशूये होसकी डेया, “इडीक नाकै परमेश्वरौ वरदान र नाकोखाटा डी ङेछ भर्मीकी चीन्डीच लेनाङ नाकै होसेखाटा ङेछ लेया, र होचे नाकोकी जीउँडो डी याछ लेया।”
11होसे मास्टो भर्मीये येशूकी डेया, “हजुर, नाकोखाटा गाप्च भाडा र माले, अनी इनार र लुप्च ले। टब नाकै होसे जीउँडो डी कुटै राक्ले? 12इसे इनार कानुङ पुर्खा याकुबै खास्च हो। आसकै र आसकुङ मीजाकै र र्हा-भेडाकै इसे न इनारौ डी गामन्या। ही नाको कानुङ पुर्खा याकुब डेनाङ र महान हो?”
13येशूये होसकी जवाफ याहा, “इसे डी गाचको पट्ट न फेरी डी सोन्ल्हे, 14टर ङै याछ डी गाचको चहीँ फेरी सेन्र डी मासोन्ल्हे। हीजैडेनाङ ङै याछ डी होसे भीत्री गीट्न ङुच डीयो मुल छान्ले र होचे होसकी सेन्र मासीच जीवन याल्हे।”
15होसे मास्टो भर्मीये येशूकी डेया, “गुरुज्यु, होटडेनाङ ङाकी होसे डी यान्ही, र ङाकी फेरी सेन्र डी मासोन्ल्हे, अनी ङा इला डी गाप्की राम्ह ङुकी र मापर्ले।”
16होटै न्हुइङ येशूये होसे मास्टोकी डेया, “नुङ्नी, र नाकुङ लेन्जाकी इला आर्घार राक्नी।”
17होसे मास्टो भर्मीये डेया, “ङौ च लेन्जा न माले।” येशूये होसकी डेया, “‘ङौ लेन्जा माले’ डेयार नाकै ठीक न डेया। 18नाकुङ बाङा जना लेन्जा छान्न भ्यामने, चाँहा नाको सुखाटा ङुमने, होसे नाकुङ लेन्जा होइन। नाकै डेच कुरा साँच्ची न हो।”
19होसे मास्टो भर्मीये डेया, “गुरु ज्यु, अब ङाकी थाहा छाना नाको च अगमवक्ता टी लेसा। 20कानुङ सामरी पुर्खाकै च इसे डाँडाङ परमेश्वरौ आराधना जाट्नन्या। टर नाखुरीक यहूदीको चहीँ आराधना जाट्च ठाउँ च यरूशलेम न हो डेले।”
21येशूये होसे मास्टो भर्मीकी डेया, “ङै डेच कुराङ विश्वास जाट्नी, होसे बेला राम्हन ले, जब नाखुरीक परमेश्वर बोइकी आराधना जाट्की न इसे डाँडाङ न यरूशलेमाङ नुङ्ले। 22नाखुरीक सामरीकै हीकी आराधना जाट्नने होसे माव्हार्ले। कान हीकी आराधना जाट्ले होसे वार्ल्हे, हीजैडेनाङ मुक्ति चहीँ यहूदीकोलकीङ न राल्हे। 23टर बेला राम्हन ले र होसे बेला चाँहा न हो, जब साँचो आराधना जाट्चकै परमेश्वर बोइकी आत्मा र सत्यताङ आराधना जाट्ले। हीजैडेनाङ परमेश्वर बोये याङ्च न आराधना जाट्चकोलाक पाले। 24परमेश्वर आत्मा हो र होसकोकी आराधना जाट्चकै आत्मा र सत्यताङ आराधना जाट्की न पर्ले।”
25होसे मास्टो भर्मीये येशूकी डेया, “ङाकी थाहा ले, मसीह राल्हे (होसकोकी मुक्ति याछ ख्रीष्ट डेले), जब होसको राल्हे, टब होसकै न कानकी पट्ट न कुरा डेम याल्हे।”
26येशूये होसे मास्टो भर्मीकी डेया, “नाकोखाटा ङाक्चै जाट्च, ङा होसे न हो।”
27होडीक न बेला येशूओ चेलाको टाराहा, र होसको काट मास्टो भर्मी खाटा ङाक्ङ ङुच डाङार होखुरीक छक्क पर्या। टर सुयेर “नाको ही मीमन जाट्ले?” अठबा “नाको होसे मास्टो खाटा हीजै कुरा जाट्नन ले?” डेयार मागीना।
28होस न्हुइङ होसे सामरी मास्टो डीओ कुँडा होला न डासार लहो लाङ्घाङ नुङा, र भर्मीकोलाक डेया, 29“रान्ही र काट जना भर्मीकी ङोस्नी। होसकै ङै जाट्च पट्ट न काम ङाकी डेम याहा। ही होसको न मुक्ति याछ ख्रीष्ट च होइन?” 30टब पट्ट न भर्मीको लाङ्घालकीङ ख्योव्हार येशूकी ङोस्की नुङा।
31होडीक न बेला चेलाकै येशूकी ज्याच ठोक याछै, “गुरुज्यु, अब हीर ज्याच कुरा ज्यानी” डेयार बिन्ती जाटा।
32टर येशूये होखुरीककी डेया, “ङाखाटा ज्याच कुरा ले, होच्यो बारेयाङ नाखुरीककी थाहा माले।”
33इसे कुरा सेयार चेलाकै मेखुरीक-मेखुरीक डेया, “कुचे होसकोकी ज्याच कुरा राक्ङ याहा की य्हाले?”
34येशूये होखुरीककी डेया, “ङौ ज्याच कुरा चहीँ ङाकी बीर्न्हकाचौ इच्छा अनुसार होसकुङ काम पुरा जाट्की हो। 35नाखुरीक डेले, ‘बाली म्हीन्की अझै बुली महीना लक्डीस्ले’ टर ङा नाखुरीककी डेले, बारी पट्टी सेम्हजा ङोस्नी, बाली म्हीन्न भ्यामने अब चेच बेला छाना।#4:35 इला म्हीन्छ बाली डेच चहीँ येशू न मुक्टी याछ ख्रीष्ट हो डेम बीस्वास जाट्की टयार छान्च भर्मीको हो। 36सुये बाली चेले होचे ज्याला डुप्ले, र होचे सेन्र मासीच जीवनौ लागी अन्न बटुलीले, अनी भेरेट्च र बाली चेच नीस न काठोव्हाङ न मार्हाङ्ले। 37इला ‘काट जनै भेरेट्ले र अर्कोये बाली चेले’ डेच सत्य हो। 38ङै नाखुरीककी कुला बाली चेकी बीर्न्हका, होला नाखुरीकै मारोप्डीमने। अरुकै न होला रोप्डीया, अनी होखुरीकै जाट्च कामौ फल नाखुरीकै डुप्मने।”
39सामारी मास्टोये, “ङै जाट्च पट्ट न कामौ बारेयाङ होसकै ङाकी डेम याहा” डेच गबाही याछये जाट्नाङ होसे लाङ्घुङ वास्टै जना सामरीकै येशू मीटाक विश्वास जाटा। 40होटबाटै सामरीको येशूकी डुप्की राहा, अनी होसकोकी होखुरीकखाटा न ङुनी डेयार बिन्ती जाटा र होसको नीस याकसम्म ङुवा। 41होटै येशूये याछ शिक्षौ कारनै झन वास्टै सामरीकै होसको मीटाक विश्वास जाटा। 42होखुरीकै होसे मास्टोकी डेया, “नाकै डेच कुरा सेयार मट्टै कानै विश्वास जाट्च होइन, टर अब च कान लहे न होसकुङ शिक्षा सेचबाटै विश्वास जाट्नने। होसको साँच्ची न संसारौ मुक्तिदाता हो डेच कुरा अब कानै वार्न्हने।”
येशूये सरकारी कर्मचारीयो लेन्जा मीजाकी गेपाक्च
43येशू होला नीस याकसम्म ङुवा, र होटै ख्योव्हार गालीलाङ नुङा। 44येशू मेखोलै न गबाही याहा, “लहो देशाङ कुसे अगमवक्ताकी र आदर माछान्ने”। 45जब होसको गालीलाङ टाराहा, टब होलुङ भर्मीकै होसकोकी स्वागट जाटा, हीजैडेनाङ यरूशलेमाङ छुटकारौ चाड मन्डीकी नुङ्च बेलाङ होसकै जाट्च अचम्मौ कामको होखुरीकै डाङ्ङन्या।
46येशू फेरी गालीलुङ काना सहराङ राहा, होला होसकै डीकी अङ्गुरौ मड्य खास्नन्या। येशू इसे सहराङ लेच बेलाङ काट जना सरकारी कर्मचारी र होला लेया। होच्यो लेन्जा मीजा चहीँ कफर्नहुम सहराङ छामन्या। 47येशू यहूदियालकीङ गालीलाङ राम्हने डेच कुरा सेयार होसे सरकारी कर्मचारी होसको लेठाङ राहार, “ङौ लेन्जा मीजाकी गेपाक्ङ यान्ही” डेयार बिन्ती जाटा, हीजैडेनाङ होच्यो लेन्जा मीजा छार सीकी पामन्या। 48येशूये होसकी डेया, “चीन्हको र अचम्मौ कामको माडाङ्ठर नाखुरीकै सेन्र विश्वास माजाट्ले।” 49होसे सरकारी कर्मचारीये डेया, “प्रभु, ङौ लेन्जा मीजा सीकी डेनाङ अगाडी न राम्ह यान्ही।” 50येशूये होसकी डेया, “नुङ्नी, नाकुङ लेन्जा मीजा जीवाले।” अनी येशूये डेच बचनाङ होचे विश्वास जाटा र होसे ल्हेसा।
51होटै न्हुइङ होसे नुङ्चै जाट्नाङ मेन नोकरकै होसकी लामाङ न डुपार डेया, “नाकुङ लेन्जा मीजा गेपा!” 52होचे नोकरकोलाक, “ङौ लेन्जा मीजा कुडीक बेला लकीङ गेप्च हो?” डेयार गीना। होखुरीकै डेया, “टीस्यामीङ नाम्सीन काट बजे लकीङ होसकी ज्वरै डास्च हो।” 53येशूये होसे लेन्जा जजौ बोइकी, “नाकुङ लेन्जा मीजा जीवाले” डेच समय लकीङ न गेप्च हो लेसा डेम होचे थाहा डीन्हा। होटबाटै होसे सरकारी कर्मचारी मेल्हा र होच्यो पट्ट न परीवारै येशूवाङ विश्वास जाटा।
54इसे चहीँ यहूदियालकीङ गालीलाङ राहार येशूये जाट्च दोस्रो अचम्मौ चीन्ह लेया।
Tans Gekies:
युहन्ना 4: EMGP
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
© 2024 (Active), Wycliffe Bible Translators, Inc. All rights reserved.
