ማቲወስት ወንጌል 14
14
ፈወነ 14
ጣምቀተ ይዃንስ ክረጘ
(ማር. 6፡14-29፤ ሉቃ. 9፡7-9)
1ኣይንድ ገሊለ ክፍለ ኻግሪዝ ቅመተ ዊነው ኺረውድስ እየሱስት ጂጘድ ወሹ። 2ጝኣገልጋያንድዛትም፦ «እኒን ጣምቀተ ይዃንስ የጝ፤ ጘጝ ክርጘይስ ጕኩ፤ እንቝጥጝ ዲንቅሰቍ ታምራን ጝግዝ ፃቭሽትጘውድም እንዝ ማጥን የጝ» ዩ።
3ኺረውድስ ጝዝን ፊልበውስት እውነ ዊንደይ ኺረውድያደት ምላሰንዝ ይዃንስት ፃይስ ወኽኒ ጝንል እፁስ ዊኑ።#ሉቃ. 3፡19-20። 4ምላሰንድም ይዃንስ ኺረውድስት፦ «ክዝንት እውነት ድውተ ወሪትት ኽግ ፊቅዳውም!» ያ ዊኑ።#ዘሊ. 18፡16፤ 20፡21። 5ኺረውድስም ይዃንስት ቁጠ በን ዊኑ፤ ኣነጚ ኽዝቭድ ይዃንስት ነቭይ ፃቭ ለምር ዊናንስቅ ጐውቱ።
6ዊገድ ግን ኺረውድስ ጝእዅርሸው ግርየድየንት ኪብርዛንድ ኺረውድያደት ቝረ ጥውር ዚቭች፤ ኺረውድስትም ጭቕጘ ዲስ ሽች። 7እንዝ ማጥን ኺረውድስ ጚ በንረውድየንትቅ ይውጠ ፃርዝ ቃል ጥዉ። 8እፈረየንም ጝርኘ ጅቅ ማኽርሽር፦ «ጣምቀተ ይዃንስት ኣውርድየንት ሽኻንዝ ፃቭር ነን ነቅ!» ይች። 9ንጕስድም ኣይንድ እን ዊገይዝቍዝ ኻዝኑ፤ ኣነጚ ጝፃሪዝቍዝመ ጝጅቅ ዊነቍ ኣብኒዝቍዝ ይሉኝተ ፃቭ ጚ ዋቕርደውድየንት ይውጛንስ ኣዙ። 10ወኽኒ ጝኒልም እቅ እፃቕ ይዃንስት ኣውርድ ቀቭሱ። 11ቀቭሽተው ኣውርድየንትም ሽኻንዝ ፃቭጝ ነስጝ እፈረየንስ ይው፤ ጚይም ለምትር ጝርኘስ ይውች። 12ይዃንስት ክንደጥድም ተርጝ ጝእርሸድየንት ዲቭ፤ ፊርጝም እየሱስስ እን ዊገድ ድቍ።
እየሱስ ኣኰ ሽኽ እቅ ታምርዝ ሚግቨጘ
(ማር. 6፡30-44፤ ሉቃ. 9፡10-17፤ ይዃ. 6፡1-14)
13እየሱስም ይዃንስት ክርጘድ ወሸጘ ጝዊነው ስፍረይስ ጕ ታኰዝ ተሳፍርሽ ላው ገለል የው ስፍረል ጝለ ፊሩ። ኽዝቭድም እኒንት ወሻንድ ኻትመ ጨቨቂስ ፋ ልኵዝ ቲክን ፊሩ። 14ጘጝም ታኰይስ ጊማንድ ንቕፀው ኽዝቭ ቓል ኣርኽርኹ፤ ፅውዝጅንጥድዛትም ቓዙ።
15ኵናንድም ጝክንደጥድ ጝጐ ኣልትጝ፦ «እኒን ስፍረድ በራኸ የጝ፤ ጊርቅድ ኵንኩ፤ እንዝ ማጥን ኽዝቭድ ጣቀቲዝቍ ኪቋኒል ፊር ዀነው ጅቫንስ ማጥን ሲነቭሽ» ይ። 16እየሱስም፦ «ክትን ዀነው ይውጥንጚ ዝም ይጝ ፊርጥጘ ጥውሻውም» ዩ። 17ጛይም፦ «እንል ይናግል ፅበቍድ ኣኰ ምጭዝመ ሊጘ ኻዝዝ ጭቝ ጛይ» ይ። 18እየሱስም፦ «እስቲ ጛት ይጐ ነስጥን!» ዩ። 19ኽዝቭድየንትም ሚስጊዙ ፃቀይል ጐያንስ ኣዙ፤ ኣኰ ምጪዝመ ሊጘ ኻዚዝም ጒ ሲመይ ትጐ ጭቅ የው ቓላ እደረት ሚዝየንዙ፤ ሚድየንትም ኪል ጝክንደጢዝ ይዉ፤ ክንደጥድም ኽዝቪዝ ኣድል። 20እጝቅቅም ዅጝ እቭት፤ ቲርፈውድየንትም ክንደጥድዛይ ፅጭ ሊጘ ምስቫንዝ እቻዝጝ ጕይ። 21ዀቍ እቅድም እቍኒዝመ እፈሪዝ እጊቲጝቀ ግልቍድ ጭቝ ኣኰ ሽኽ ኣጥጘ ዊን።
እየሱስ ባኽር ዲጊዝ ልኵዝ ፃጘጘ
(ማር. 6፡45-52፤ ይዃ. 6፡15-21)
22እየሱስም ኣይንድ ጝክንደጥድዛት፦ «ያን ኽዝቭድ ሲነቭስጪስቅ ይት ቀድምርን ታኰዝ ተሳፍርሽርን እጂ ከትጥን» የው ኣዙ። 23ጘጝም ኽዝቭድ ሲነቭስ በር ፃልይጠ ጝለ ኣበል ፉ፤ ኵናንድም ጝግል ጝለ ዊኑ። 24ታኰየንም ባኽሪዝ ዚልቅር ፃጝራ ሲጝቀ በውዝ በው ፊግየ ዊናንስቅ ማቨልዝ ገልታሽራ ዊንች። 25ኻር ፃይጨ ሳይዝ ግረ እየሱስ ባኽርድየንት ደዳ ጝክንደጢዝጐ ተሩ። 26ጛይም ባኽርድየንት ደዳ ፃጛንድ ቓልጛንድ፣ ምታት የጝ ይጝ ኻውክሽ፤ ጐውትዝም ቓፅ። 27እየሱስም በውዝ፦ «ኣይዝዀጥን ያን የጝ፤ ጐውትርነ!» የው ዊግቱ።
28ኣይንድም ቢጥሮስ፦ «ኣደረወ! ክት ኣረውዝየስ ባኽርድየንት ደጣ ክጐ ተጨር ኣዝ» ዩ። 29ጘጝም፦ «ለው!» ዩ፤ ቢጥሮስም ታኰይስ ጊም ባኽርድየንት ደዳ እየሱስ ትጐ ፊሩ። 30ዊገድ ግን ፊግየይዙ ኻይልትድ ቓላንድ ጐውቱ፤ ኣይንድም ስርሽጠ ኪርሙ፤ እየሱስትም፦ «ኣደረወ! ይት ቓዛ!» የው ቓፁ። 31እየሱስም በውዝ ጝናንድ በርስ ፃይ በር፦ «እፈ እምንት ጒድልደር ክተ! ውርቃጥ ተጣርጥርሽሩ?» ዩ። 32እየሱስስመ ቢጥሮስስም ታኰይል ጥውጛንድ ፊግየድ ፀጥ ዩ። 33ታጝኰይል ዊነቍድም እየሱስት፦ «እማንዝ ክት እደረት ኵር የጝ» ይጝ ጝጭስ ሲግድ።
34ጛይም ባኽርድየንት ከርጝ ጀንሰሪጥ የነው ዝቨይል ችጝ። 35ጘጝ ብጣይዝቍ እቅድም እየሱስ ኣቐጘ ኣርቕጛንድ ጝታጅልወይዝቍ ኻግራኒልቅ እፃቕጝ ፅውዝጅንጥድዛትቅ ጝጐ ነስ። 36ፅውዝጅንጥድዛይ ጝኣልቨይዙ ጫፍድየንት ጭቝ ዳቕጛንስ ማጥንም ጝት ጨው፤ ዳቐቍድዛይም እጝቅቅ ጝታፅውዘይስ ቓድ።
Tans Gekies:
ማቲወስት ወንጌል 14: ኽምጣኣኪ
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
