ማቲወስት ወንጌል 13
13
ፈወነ 13
ዚረ ፊዘተዙ ተከድ
(ማር. 4፡1-9፤ ሉቃ. 8፡4-8)
1እየሱስም ኣይንት ግርየይዝ ጝኒስ ፍ ባኽሪዝ ጋቢል ጐዩ። 2ንቕፀው ኽዝቭም ተር ጝት ኪባንስቅ ታኰል ፍ ጐዩ፤ ኽዝቭድም ባኽሪዝ ደዪል ችብር ዊኑ።#ሉቃ. 5፡1-3። 3ጘጝም ንቕፀቍ ዊቅ ተከዝ እንት ያ ድቍጠ ኪርሙ፦ «እንወ ኣርሸ ዚረ ፊዝጠ ፊሩ። 4ፊዛንድም ላው ላው ዚረድ ጒደን ደዪል ሊቩ፤ ዚልቅም ተርጝ ሊቅምጝ ዅ። 5ላው ላው ዚረድም እቀጘ ብጥ እጀው ፃፀይል ሊቩ፤ ዝቨድም ሲፍ የው ኣቓንስቅ በውዝ ቢቍሉ። 6ኣነጚ ኰረድ ፋንድ ፃምልዉ፤ ስርም ስቪየው ኣቓንስቅ ይዙ። 7ላው ላው ዚረድ ቈሽ ኣምቃነው ቍጥቋጥ ማኽሊል ሊቩ፤ ኣምቃነው ቍጥቋጠድም ሊግዝ ቢቈለድየንት ኻንቕ እዳዙ። 8ላው ላው ዚረድ ቀሰው ዝቨይል ሊቭ ቢቍሉ፤ ፍርም ፍርዙ፤ ላውድ ላ ፍር፣ ላውድ ዋልጥርጝን ፍር፣ ላውድ ሰውርጝን ፍር፣ ይዉ። 9ወሸው ቀርዝ ፃየውድቅ ወሽነ!»
10እንዝ ግረ ጝክንደጥድ ጝጐ ኣልትጝ፦ «ውር ቃጥ የጝ ኽዝቪዝ ተከዝ ዊግትረውድ?» ይ። 11እየሱስም እንት ዩ፦ «ክታጭስ ምጝግስተሰማያትት ምስጢርድ ኣርቐነው ነይሽትኩ፤ ጛጭስ ግን ይውሽቲየውም። 12ፃየው እጅርዝ ቈሺት ይውሽተኵ፤ ጝጭስም ንቕፀኵ፤ እጀው እጅሪስ ግን ፃይ ዊነውድየንት እኳ ፊስሽተኵ።#ማቲ. 25፡29፤ ማር. 4፡25፤ ሉቃ. 8፡18፤ 19፡26። 13እንዝ ማጥን
ቓልጛ ቓላቊ ኣጛንስቅ፣
ወሽጛም ወሻቊ ኣጛንስቅ፣ ዊንም ኣስክሳቊ ኣጛንስቅ፣ ጛጭስ ተከዝ ድቈኵን።
14እንዝም ነቭይ ይሳያስ፦
‹ወሸነውድስ ወሽርነኵ፤ ዊገድ ግን ኣስክሳይርነቅም፤
ቓለነውድም ቓልድርነኵ፤ ዊገድ ግን ልብ ያይርነቅም።
15ምላሰንድም እኒን ኽዝቪዝ እዘንድ ዲንድንኩ፤
ጝቀርዝድም ወሻውም፤
ቓላየጘም ጝእልጣንድ ፅምርኩ፤
እኒን ኣየው ኣቓንስ ጝእሊዝ ቓል፣ ጝቀርዚዝም ወሽ፣
ጝእዘኒዝም ኣስክስ፣
ይጐ ዋጥርጠ ዊኑ፤ ያንም ጝት ቓዝጨ ዊኑን›
የው ዊግተውድ ፋፅምሽጡ።#እሳ. 6፡9-10። 16ክትን ግን ክታእልጣንድ ቓለቍ ኣጛንስቅ፣ ክታቀርዝጣንድም ወሸቍ ኣጛንስቅ፣ ቀቫሽርነቅ የጝ። 17እማንዝ የኵን፤ ንቕፀቍ ነቭያታንዝመ ፃድቃንዝ ክትን ቓልድርነውድየንት ቓልጥጘ በንጝ ዊን፤ ዊገድ ግን ቓሊየቍም፤ ክትን ወሽርነውድየንትም ወሽጥጘ በንጝ ዊን፤ ዊገድ ግን ወሺየቍም።#ሉቃ. 10፡23-24።
18«ነስየ ክትን ዚረ ፊዘተይዙ ተከድ ወረጘ ኣቐጘ ወጭጥን። 19እደረት ምጝግስቲዙ ቃልድየንት ወሽ በር ልብታው እጅሪስቅ ሲጣን ተር ጝእዘኒል ፊተው ቃልድየንት ፊሰኵ፤ ጒደን ደዪል ሊቨው ዚረድ ቓሊሰውድ እኒንት የጝ። 20ፃፀይል ሊቨው ዚረድ ቓሊሰውድ ቈሽ፣ ቃልድየንት ወሽ በውዝ ዲስተዝ ለምረው እጅርድየንት የጝ። 21ዊገድ ግን ስር ሲቪየው ኣቓንስቅ ንቕፀቍ ኰር ዊናውም፤ ቃሊዝ ምላሰንዝ ሚከረ ዊንም ስድት ተራንድ በውዝ ፅጋረኵ። 22ኣምቃነው ቍጥቋጠ ማኽሊል ሊቨውድ ቓሊሰውድ ቈሽ ቃልድየንት እልቲዝ ወሸው እጅርድየንት የጝ፤ ኣነጚ እን ኣልሚዙ ኻሰቭዝመ ፃጀዙ ምርቕፀዝ ጝእዘኒል ጥወው ቃልድየንት ኻንቕ ፃያንስቅ ፍር እጀው እዳቐኵ። 23ቀሰው ዝቨይል ሊቨውድ ቓሊሰውድ ቈሽ፣ ቃልድየንት ወሽ ኣስክሰው እጅርድየንት የጝ፤ ጘጝ ፍር ፍርዘኵ፤ ላውድ ላ፣ ላውድ ዋልጥርጝን፣ ላውድ ሰውርጝን፣ ፍር ይወኵ።»
እጝክርዳድ ዚረይዙ ተከድ
24እየሱስም ላየ ተከ እንት የው ዊግቱ፦ «ምጝግስተሰማያት ጝቺዝጚል ቀሰው ዚረ ፊዘው እጅርድ ተከች። 25ዊገድ ግን እጅር እጝቅ ኽርያንድ ፃለት ተር ፊተው ዚርወይዝ ዲጊል እጝክርዳድ ፊዝ ፊሩ። 26ዚርወድም ቢቍል ፍራንድ እጝክርዳደድም ኣይንድ እትሉ። 27ቺዝጝ ወነይዝ ኣገልጋያንድም ጝጐ ኣልትጝ፦ ‹ኣደረወ! ክቺዝጚል ቀሰው ዚረ ኣየውቀ ፊዝር ዊንደውድ? እደስለ እጝክርዳደድ ኣዊስ ተሩ?› ይ። 28ጘጝም፦ ‹እኒንት ፃቨውድ ፃለት የጝ› ዩ፤ ጝኣገልጋያንድም፦ ‹እደስለ ፊርን እጝክርዳደድ ብቝዝነ በንረኵመ?› ይ። 29ጘጝ ግን፦ ‹ኣቓውም! እጝክርዳደድ ብቝዝርናንድ ዚርወድም ላብጠ ብቝዝርነኵ። 30በጥን ማፅወይል ኣሽ ላብጠ ሊግዝጝነ፤ ማፅወይዝ ኰር ኣይረቍድዛት፦ <በዊል እጝክርዳደድ ብቝዝጥን፤ ልየዝ ቃጥልሻንስም ጝለ ሊድስርና እፁጥን፤ ዚርወድ ግን ኣኽቭርን ይቅፋነይል ድውጥን> ይጭር› ዩ።»
ስናፍጭስመ ምጨዝዙ ተከድ
(ማር. 4፡30-32፤ ሉቃ. 13፡18-19)
31ላየ ተከም እንት የው ዊግቱ፦ «ምጝግስተሰማያት ላው እጅር ፊስ ጝቺዝጚል ፊዘይ ስናፍጭ ዚረት ተከች። 32ጚ ዚረይስቅ መልወ ጚ፤ ሊግዝራንድ ግን ኣታክልታኒስቅ ዲቍረይ ዘፍ ኣቐች፤ ዚልቅም ጝርቅርንጫፋኒል ጝታጕጂድ ተስጝ ሲፍርጘኵ።»
33ነንም ላየ ተከ እንት የው ዊግቱ፦ «ምጝግስተሰማያት ላይ እውነ ፊስር ሸውን ሚክረነ ግዘን ጅቅ ፃቭር ምጭስረው ሚጨድ ተከች፤ ምጨድም ምኰተድየንትቅ ምጭትጠ ፃቩ።»
እየሱስ ተከዝ ዊግተዊዝ ምላሰንድ
(ማር. 4፡33-34)
34እየሱስም እኒንትቅ ኽዝቪዝ ተከዝ ዊግቱ፤ ተከ እጀው ግን ውረውረም ዊግቲየው። 35እንም ነቭይድ፦
«ይዊገድ ተከዝ ጋልፅጭር፤
ኣልም ፋጥርሸት ኪርም ሲውርሸውድየንትም ዊግጭር»
የው ዊግተውድ ፋፅምሻንስ የጝ።#መዝ. 78፡2።
እጝክርዳዲዙ ተከይዝ ትርጕምድ
36እንዝ ግረ ኽዝቭድ በር ጝን ኣቒ ጥዉ፤ ጝክንደጥድም ጝጐ ኣልትጝ፦ «ቺዝጚዙ እጝክርዳደይዝ ተከድ ይናጭስ ቲርጕም» ይ። 37ጘጝም እንት ዩ፦ «ቀሰው ዚረድ ፊዘውድ እጅር ዅር የጝ። 38ቺዝጝድም እን ኣልምድ የጝ፤ ቀሰቍ ዚረድም እደረት ምጝግስቲዝ ቝር ጛይ፤ እጝክርዳድድም ሲጣኒዝ ቝር ጛይ። 39እጝክርዳድ ፊዘው ፃለትድም ዳቪለውስ የጝ፤ ማፅወድም እን ኣልሚዝ ኻትሸነድ የጝ፤ ኣይረቍድም መላካንድ ጛይ። 40ነስየ እጝክርዳድ ብቚት ልየይል ቃጥልሻንትጘ እን ኣልሚዙ ኻትሸነይዝም ጘጝት ኣጡ። 41ኣይንድ እጅር ዅር ጝመላካንድዛት እፃጡ፤ ጛይም ኽጥያትዝ ምላሰን ኣቐቊዝመ ጭቓ ሰቭ ሰራሸቊዝዛት እጝቅትቅ ሊቅምጝ ጝምጝግስቲስ ፊስጥቍ። 42ኻዊተው ኽየው ልጂልም ማልጥቍ፤ ጝግልም ሊዝዝመ እርቍጣን ገጫዘው ሚከረዝ ኣጡ። 43ፃድቃን ግን ጝታይርት ምጝግስቲዝ ኰረይዝጘ ኣቭርኽጥቍ፤ ወሸው ቀርዝ ፃየውድቅ ወሽነ።»
ጭቭሽተው ኻፍትዙ ተከድ
44ቈሽም፦ «ምጝግስተሰማያት ቺዝጝ ማኽሊል ጭቭሽተው ኻፍት ተከች፤ ላው እጅርም እኒን ኻፍጥድየንት ችጝ በር ዊስ ጭቭሱ፤ ዲስተዝ ክራንስቅም ጝፃየውድየንትቅ ቂ እድየን ቺዝጝድየንት ጅቩ።
እቊዙ ተከድ
45ቈሽም፦ «ምጝግስተሰማያት ቀሰው እቍ ደምዘው ንየረ ተከች። 46ጝወየድ ጭቕጘ ኪብረው እቍ ችጛንድም ፊር ጝፃየውድየንትቅ ቂ እድየን እቍድየንት ጅቩ።
መረቭዙ ተከድ
47ቈሽም፦ «ምጝግስተሰማያት ባኽር ኣቒል ማልኑ ኻዘዝ ኣይንትድቅ ጥቅል ፃየው መረቭድየንት ተከች። 48ኻዘ ፃውረጥድም መረብድየን እቻቓንድ ዊትርጝ ባኽር ደዪል ፊስ፤ ጝግልም ጐይጝ ቀሰው ቀሰው ኻዘድየንት ማርፅጛ ክቪል እቕር፤ ኻቨረ ኻቨረድየንት ግን እለ ማል። 49ኣልሚዙ ኻትሸነይዝም ጘጝት ኣጡ፤ መላካንድ ተርጝ ጭቕድዛት ፃድቃኒስ ቲዝጝ፣ 50ኻዊተው ኽየው ልጂል ማልጥቍ፤ ጝጊስም ሊዝዝመ እርቍጣን ገጫዘው ሚከረዝ ኣጡ።»
51እየሱስም፦ «እኒንትቅ ኣስክስርኑመ?» የው ዋቕሩ፤ ጛይም፦ «የያ» ይ። 52ጘጝም፦ «እንዝ ማጥን ምጝግስተሰማያትት ምስጢርድ ተረድሸው ወሪትት ኽግ ክንሰተድቅ ጝጐዝ ጝኒስ ኣይር ጐዘይዝመ ኣርጐው ጐዘይዝ ፊሰው ንቭርት ጕርየድየንት ተከኵ» ዩ።
እየሱስት ጝኻግር ናዝሪትት እቅድ ተቃውምሽጘጘ
(ማር. 6፡1-6፤ ሉቃ. 4፡16-30)
53እየሱስም እንዛይ ተከጥድ ዊግት ኻተት ግረ ጘጝ ስፍረይስ ጕ ፊሩ። 54ጝኻግር ናዝሪት ፊር ጛይ ጊርምሽጥጚስቅ ጝታምኵራቫኒል ክንሳ ዊኑ፤ ጝት ወሸቍ እቅድም እጝቅ፦ «እን እጅርድ እኒን ጥቨቪዝመ እኒንት ፃቨነው ኻይልዝ ኣዊስ ችጙ? 55እኒን ፃርቨተይዝ ዅርድ ኣየውቀ? ጝኘየንስ ማርያም የነይሸን ኣይረይመ? ጝፅንድስ ያይቈቭ፣ የውሳ፣ ስሙን፣ ይዅዳ ኣየቍመ? 56እቍን ጝፅንድስ ይናጅቅ ፅበቍ ኣየቍመ? እደስለ እንቝጠ ጥቨቭ ኣዊስ ችጙ?» ይጛ ዊን። 57እንዝም ፅጋርጝ ጝት ለምሪጝቀ እዳቕ፤ እየሱስ ግን፦ «ነቭይ በገዘ ጝኻግሪስ ጝበተሰቪስም ጭቝ የጝ ኪብራውድ» ዩ።#ይዃ. 4፡44። 58ኣምኒየቍ ኣጛንስቅም ጝግል ንቕፅቍ ታምራን ፃቪየውም።
Tans Gekies:
ማቲወስት ወንጌል 13: ኽምጣኣኪ
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
