ማቲወስት ወንጌል 12
12
ፈወነ 12
ቅዳምሲንቭትት ማጥን ኣልተው ዋቕረ
(ማር. 2፡23-28፤ ሉቃ. 6፡1-5)
1ኣይንድ እየሱስ ቅዳምሲንቭት ግርየዝ ቺዝጝ ማኽልዝ ዲቋ ዊኑ፤ ጝክንደጥድም ግድርድጝ ዊንጛንስቅ ዚሩ ሽውር ቅጣጥጛ ዅጥጘ ኪርም።#ዘዳ. 23፡25። 2ፈሪሳንድም እኒንት ቓልጛንድ፦ «ቓል! ክክንደጥድ ቅዳምሲንቭት ግርየዝ ፃቭጥነ ጥውሻው ሰቭ ሰራሽጛንድ» ይ። 3እየሱስም እንት ዩ፦ «ዳዊትስመ ጝጅቅ ዊነቍ እቂዝ ግድርድጛንድ ዳዊት ወረጘ ፃቨጘ ኣንቭቪርነቅመ?#1ሳሙ. 21፡1-6። 4እደረት መቅደሲል ጥው ካኽነጣኒዝጚ ጝጭስም ኣነ ጝጅቅ ዊነቍ እቂዝ ዅጥጘ ጥውሻው ቀድስሽተው ኽቭስትድየንት ዅ።#ዘሊ. 24፡9። 5ዊንስ ካኽነጣንድዛይ ቅዳምሲንቭትት ሸርጝ መቅደሲዝ ኣቒል ሰቭ ሰራሽጛንድ ጛጭስ በደል ኣቓው ኣቐጘ ሙሴት ኽጊስ ኣንቭቪርነቅመ?#ዘዅ. 28፡9-10። 6ዊገድ ግን ክታት፦ ‹መቅደሲስ ዲቈው እንል እኩ› የኵን። 7ቈሽም፦ ‹ያን ቀነውድ ስቝርትጚ ምስዋይትም ኣየው› ይሽት ፃፍሸውድየንት ኣስክስርናን እንዛይ ኽጥያት እጀቍድዛት ፊርድትርነም ዊኒርነቅ።#ማቲ. 9፡13፤ ዀስ. 6፡6። 8ምላሰንድም እጅር ዅር ቅዳምሲንቭትት ጕርየ የጝ።»
እየሱስ ጝናንድ ሲለው እጅር ቓዘጘ
(ማር. 3፡1-6፤ ሉቃ. 6፡6-11)
9እየሱስም ጘጝ ስፍረይስ ጕ ጝታምኵራቫኒል ጥዉ። 10ጝግልም ጝናንድ ሲለው ላው እጅር ዊኑ፤ እየሱስት ኪስጥጘ ስቨቭ ደምዘቍ እቅም፦ «ቅዳምሲንቭት ግርየዝ ፅውዝጅነ ቓዘነው ፊቅድሸኵመ?» ይጝ ዋቕር። 11ጘጝም፦ «ክታጊስ ቢገ ፃየው ላው እጅር ጝቢገድ ቅዳምሲንቭት ግርየዝ ቢል ጥዋን ቢⶔስ ጒዝ ፊሳውመ?#ሉቃ. 14፡5። 12እደስለ ቢገዝ ሽመ እጅር ዲቋዋ? ኣቓንስቅም ቅዳምሲንቭት ግርየዝ ቀሰው ሰቭ ሰራሸነው ፊቅድሸው የጝ» ዩ። 13እግረም እድየን ፅውዝጅነድየንት፦ «ክናንድ ዘርጋቕ!» ዩ፤ ጘጝም ዘርጋቑ፤ ኣይንድም ጝናንድ ቓድ ልክ ትኽንው ሊጘትረ ናኒዝጘ ኣቑ። 14ፊሪሳንድ ግን ጝጊስ ፍጝ እየሱስት ኣወሽጝ ቁጥጘጘ ማኽርሽ።
እደረ ማርፀው ኣገልጋይድ
15እየሱስ ግን ጝታሲረድየንት ኣርቓንስቅ ጝጊስ ላየ ስፍረል ገለል ዩ፤ ንቕፀቍ እቅም ጝት ቲክንጝ ፊር፤ ጘጝም ፅውዝጅንጥንድ እጝቅትቅ ቓዙ። 16እቅድዛትም ጘጝ ኣው ኣቐጘ ኣውማውስቅ ድቋይጘጘ ጣጝቅቅሱ። 17እንም ኣቐውድ ነቭይ ይሳያስ፦
18«እንወ ያን ማርፀው፣
ጝቍዝም ዲስ የው፣ ይቀነው ኣገልጋይድ እኒን የጝ፤
ይመንፈስድየንት ጝዲጊል ፃቭጭር፤
ጘጝም ኣኽዛቫኒዝቅ ጭቅ የው ፍርድ ኣውጅጡ።
19ተጨቃጭቅሻውም፤ ቓፃውምም፤
ጝድመድም ኣርወይል ወይሽታውም።
20ጭቅ የው ፍርድ ኻቕ ፍጢስቅ፣
ቃጥቅጥሸው ኣቲነ እኳ ኪላውም፤
ጥየው ጥዋፊዙ ክርም ስሳውም።
21ኣኽዛቫንድቅ ጝሽዝ ቲስፈ ፃቭጥቍ»
የው ዊግተው ትንቢትድ ፋፅምሻንስ የጝ።#እሳ. 42፡1-4።
እየሱስ ብየልዘቩልዝ ጋኒን ፊሰኵ ይሽተጘ
(ማር. 3፡20-30፤ ሉቃ. 11፡14-23)
22እንዝ ግረ እቅ ጋኒን ጨው ላው ኻርቨ፣ ድደም ኣቐው እጅር ፃይጝ እየሱስትጐ ነስ፤ እየሱስም ጝት ቓዙ፤ እጅርድም ኣይንድ ዊግተነውዘመ ቓለነውዝ ቸሉ። 23ኽዝቭድም እጝቅቅ ጊርምሽ፦ «እኒን ዳዊትት ዅርመ ኣጢ?» ዩ።
24ፈሪሳንድ ግን እኒንት ወሽጛንድ፦ «ጘጝ፦ ‹ብየልዘቩል› የነው ጋኒናነ ኻልቀይዝ ኣየውዝየ ጋኒናን ፊሳውም» ይ።#ማቲ. 9፡34፤ 10፡25።
25እየሱስም ጝታኻሰቭድ ኣርቕ እንት ዩ፦ «ጝስመ ጝስ ቲተቲተው ምጝግስትድቅ ሊቨኵ። እኒዝጘም ጝስመ ጝስ ቲተቲተው ኻትመዝመ በተሰቭዝ ፀናቓውም። 26ሲጣንም ሲጣንድ ፊሰውዝየ ጝስመ ጝስ ቲተቲቱ የነት የጝ፤ እደስለ ጝምግስትድ ኣወይ የጝ ፀናቕ ችብርጠ ቸለውድ? 27ያን ጋኒናንድ ፊሰውድ ብየልዘቩልዝ ኣቐውዝየ ክታእቅድ ወረጘዝ የጝ ፊስጘውድ? እንዝ ማጥን ጛይ ክታት ፊርድጥቍ። 28ያን ጋኒናንድ ፊሰውድ እደረት መንፈስዝ ኣቐውዝየ ግን እደረት ምጝግስትየን ክታግል ችጝርኵች የነት የጝ። 29ዊንስ ላው እጅር ኻይሉ እጅርዝ ጝኒል ጥው ጝንብርትድየንት ዚርፍጠ በናን፣ በውገ እድየን ኻይሉ እጅርድየንት እፅቊየውዝየ ኣወሽ የጝ ዚርፍጠ ቸለውድ? እድ ኻይሉድየንት እፅቈውዝየ ግን ዚርፈነው ቸልጡ። 30ይጅቅ ኣቒየውድቅ ይት ተቃውምሸኵ፤ ይጅቅ ኣኽቫውድም ቢትነኵ።#ማር. 9፡40። 31እንዝ ማጥን እጅር ሰራሸው ኽጥያትድም ኣነ ዛንድቅ ይቅር ይሽትጡ፤ መንፈስ ቅዱስትል ዛንዙ ዊገ ዊግተው እጅር ግን ጝኽጥያትድ ይቅር ይሽታውም፤ የኵን። 32እጅር ዅርትል ዛንዙ ዊገ ዊግተው እጅርድቅ ጝበደልድ ይቅር ይሽትጡ፤ መንፈስ ቅዱስትል ዛንዙ ዊገ ዊግተው እጅርድቅ ግን እን ኣልሚዝም ኣነ ተረው ኣልሚዝቅ ጝበደልድ ይቅር ይሽታውም።#ሉቃ. 12፡10።
33«ዘፍ እጝቅ ኣረሰውድ ጝፍረይዝ ኣቓንስቅ፣ ቀሰው ፍረ ችጝርናንስ ማጥን ቀሰው ዘፍ ፃይርነቅ ኣጥን፤ ጭቓ ዘፍ ፃይርነቅ ኣቕርንሽ ግን ጝፍረድም ጭቓ ኣጡ።#ማቲ. 7፡20፤ ሉቃ. 6፡44። 34እፈ ሲቭረይዝ ቝር ክታትርነ! ክትን ጭቕ ኣቕርን ፅብርና ኣወሽርን ቀሰው ዊገ ዊግተነው ቸልትርና? እጅር ጝጊዝዊዝ እቻቕ ቲርፈውድየንት የጝ ጝምቸይዝ ዊግተውድ።#ማቲ. 3፡7፤ 23፡33፤ 15፡18፤ ሉቃ. 3፡7፤ 6፡45። 35ቀሰው እጅር ጝጊዝዊዝ እቻዘው ቀሰው ዊገይስ ቀሰቍ ገቭ ፊሰኵ፤ ጭቓ እጅር ቈሽ ጝጊዝዊዝ እቻዘው ጭቓ ዊገይስ ጭቕ ገቭ ፊሰኵ። 36እማንዝ የኵን፤ እቅ ግድ እጀው ዝም ይጝ ዊግትጘው ዊገይዝቅ ፍርድዝ ኰር ዋቕርሽጥቍ። 37ምላሰንድም ክቃሊዝቍዝ እማንተው ኣተር፤ ክቃሊዝቍዝም ፊርድሽትር።»
የውናስት ምልክትነይድ
(ማር. 8፡11-12፤ ሉቃ. 11፡29-32)
38ኣይንድ ላው ላው ወሪትት ኽግ ክንሰጥዝመ ፈሪሳንዝ እየሱስት፦ «ክንሰተወ! ታምርዙ ምልክት ፃቭራንድ ቓልነ በንነኵን!» ይ።#ማቲ. 16፡1፤ ማር. 8፡11፤ ሉቃ. 11፡16። 39ጘጝም ዊስ እንት ዩ፦ «ጭቓ ሸርሙጠ ዅለድ ምልክት ዋቕረኵ፤ ዊገድ ግን የውናስት ምልክትነይድ ኣየውዝየ ላየ ምልክት ይውሽታውም።#ማቲ. 16፡4፤ ማር. 8፡12። 40የውናስ ኽየው ኻዘዙ ጊዙ ኣቒል ሻቘ ግርቅዝመ ሻቘ ጨንዝ ሳብጠጘ፣ እኒዝጘ ቈሽ እጅር ዅርም መቃቭር ኣቒል ሻቘ ግርቅዝመ ሻቘ ጨንዝ ሳብጡ።#የው. 1፡17። 41ነነውየት እቅድ ፍርድዝ ኰር እንዚምኒዙ ዅለይጅቅ ጕጝ ጛግል ፊርድጥቍ፤ ምላሰንድም ነነውየት እቅድ የውናስት ስቭክትድ ወሽጝ ንስኻ ጥውጝኵ። ነን ግን የውናስቲስ ዲቈው እንል እኩ።#የው. 3፡5። 42ደቩቭት ንግስትየን ፍርድዝ ኰር እን ዅለይጅቅ ጕር ጛግል ፊርድቲ፤ ምላሰንድም ጚ ሰለሙንት ጥቨቭድ ወሽተ ዝቨዝ ደርቸይስ ጕር ተትርኵች፤ ዊገድ ግን እንወ! ሰለሙንቲስ ዲቈው እንል እኩ።#1ነገ. 10፡1-10፤ 2ዚመ. 9፡1-12።
እርኵስ መንፈስ እጅርል ኣወይ እንደ ገነ ዋጥርጠጘ
(ሉቃ. 11፡24-26)
43«እርኵስ መንፈስ እጅሪስ ፋንድ ጝፈወነ ስፍረ ደምዝጠ ኣቝ እጀው ይዘው ስፍረዝ ጅልዋ ዲቈኵ፤ በነው ስፍረድ ግን ችጛውም። 44ኣይንድም፦ ‹በውገ ዊነው ይጝኒል ዋጥር ፊጨ› የኵ፤ ዋጥር ተራንድም ጝንድ ባደው ኣቕ ጂዚት ዊር የው ኣስልሽ ችጘኵ። 45እንዝ ግረ ፊር ላጥ ጝጊስ ወሰቍ ጭቕ ላጝጠ ጋኒናን ፃይ ተረኵ፤ ጛይም በውረ ጋኒንድ ዊነው እጅሪል ጥውጝ ጐይጘኵ፤ ኣቓንስቅም እድ እጅሪዙ ፅብጘድ በውገትዊስ እግርገትውድ ወሰው ኣቐኵ፤ እኒን ጭቓ ዅለይልም እኒዝጘ ኣጡ።»
እየሱስት ኘስመ ጝፅንስ
(ማር. 3፡31-35፤ ሉቃ. 8፡19-21)
46እየሱስም ኽዝቪዝ ገነ ዊግታ ሲጝቀ ጝኘስመ ጝፅንስ ጝት ገቭስጥጘ በንጝ ቢዘይል ችብርጝ ዊን። 47ጝግል ዊነቊስም ላውድ፦ «እንወ! ክኘስመ ክፅንስ ክት ገቭስጥጘ በንጝ ቢዘይል ችብርጝኵ» ዩ። 48ጘጝ ግን፦ «ይኘየን ኣው ጚ? ይፅንድስ ኣውታይ ጛይ?» ዩ። 49ጝናኒዚም ጝክንደጢዝጐ ሚርያ፦ «ይኘስመ ይፅንስ እንወ! እንዛይ ጛይ። 50ሲመይ ፅበው ይርት ፍቃድድ ፋፅመውድቅ ይዝንም፣ ይስንም፣ ይኘም የጝ» ዩ።
Tans Gekies:
ማቲወስት ወንጌል 12: ኽምጣኣኪ
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
