ማቲወስት ወንጌል 15
15
ፈወነ 15
እጅር ኣርክሰውድ ወረጘ ኣቐጘ
(ማር. 7፡1-13)
1ኣይንድም እየሩሳልየምስ ተረቍ ፈሪሳንዝመ ወሪትት ኽግ ክንሰጥዝ እየሱስትጐ ኣልትጝ፦ 2«ክክንደጥድዛይ ውርቃጥ የጝ ኣቅለ ባኽልድየንት ሸርጘውድ? ሚ ዅጛንድ ጝታናንጣንድ እቓራቍም» ይ። 3እየሱስም እንት የው ዊሱ፦ «ክትንስ ውርቃጥ የጝ ክታባኽሊዝ ማጥን ይርን እደረት ትዛዝድ ሸርድርነውድ? 4እደረ፦ ‹ኪር ክኘት ኪብርዝ፤ ጚርት ዊንም ጝኘት ጭቓዝ ዛሸውድቅ ክርነ› የውኩ።#ዘፀ. 20፡12፤ 21፡17፤ ዘዳ. 5፡16፤ ዘሊ. 20፡9። 5ክትን ግን፦ ‹ኣውማው እጅር ጚር ጝኘት፦ <ያን ክታጭስ ነቅጨ ጥውሸው ከቨድቅ እደረስ ሚቨ ፃቭ ይውኩን> ይሽ፣ 6ጘጝ እጅርድ ጚር ጝኘት ኪብርዝጠ በንዛውም› ይርነኵ፤ እንዝ ኣይንትዝም ክታባኽሊዝ ማጥን ይርን እደረት ትዛዝድ ሸርድርነኵ። 7እፈ ተክዘጥ ክታትርነ! ይሳያስ ክታማጥን፦
8‹እኒን ኽዝቭድ ጝምቸይዝ ይት ኪብርዘኵ፤
ጝእዘንድ ግን ይጊስ እክልደው የጝ፤
9ይት ጊነዝ ኣምልክጘኵ፤
ጝታክንስጘው ክንድጝድም እቅ ፊስጘው ስረት የጝ› የው ትንቪት ዊግተውድ እማን የጝ»#እሳ. 29፡13።
10እየሱስም ኽዝቭድ ጝጐ ጭጝ፦ «ወጭጥን! ኣስክስጥንም! 11እጅር ኣርክሰውድ እጅርዝ ምቸይስ ፈውድ የጝጚ፣ እጅርዝ ምቸይል ጥወውድም ኣየው» ዩ። 12እንዝ ግረ ጝክንደጥድ ጝጐ ኣልትጝ፦ «ፈሪሳንድዛይ እን ዊግትረው ዊገድ ወሽጝ ኻልክሽጘጘ ኣርቕሩመ?» ይጝ ዋቕር። 13ጘጝ ግን፦ «ሲመይ ፅበው ይር ቲክልየው ቲከለድቅ ኒቅልሽጡ። 14በጥን፤ ጛይ ኻርብ ቃወቍ ኻርብ ጛይ፤ ኻርቨ ኻርቨድየንት ቃዋን ጝታቪልጝቅ ቢል ሊቭጘኵ» ዩ።
15ቢጥሮስም፦ «ተከድየንት ይናጭስ ቲርጕም» ዩ። 16እየሱስም እንት ዩ፦ «ክትንም ነኳን ኣሽ ኣስክሲርነቅም የነትመ? 17ምቸዝ ጥወውድቅ ጊዝው ኣቒል ጥው በር ጝዝለ ቢዘ ፍጠጘድ ኣርቓይርነቅመ? 18ምቸይስ ፈውድ ግን እዘኒስ ፈኵ፤ እጅር ኣርክሰውድም እኒን የጝ።#ማቲ. 12፡34። 19ጭቓ ኻሰቭ፣ ኒቭስ ድሰነው፣ ሚንዝረነው፣ ሻርሙጠነው፣ ቕፅጝ፣ ኻሽትዝ ሚዝርደነው፣ እቀ ሽ ድሰነው፣ እኒንቅ እዘኒስ ፈኵ። 20እጅር ኣርክሰቍድ እንዛይ ጛይጚ ናን እቓሪጝቀ ዀነውስ እጅር ኣርክሳውም።»
ከናንትወ እውነት እምንትድ
(ማር. 7፡24-30)
21እየሱስም ጝጊስ ፍ ጢረውስስመ ሲዱነ ኻትምጢዝ ጅልወይዝቍ ኻግራኒዝጐ ፊሩ። 22ጝጊስም ላይ ከናንወ እውነ እየሱስትል ተትር፦ «ኣደረወ! ዳዊትት ዅር! ኣለቀይ ሳቝጭ! ይቝረ እርኵስ መንፈስዝ ፃይሽር ጭቕጘ ተሰቃይሸች» ይር ቓፅር ጨውች። 23ጘጝ ግን ላው ቃልም ዊግቲየው፤ ኣይንድ ጝክንደጥድ ጝጐ ኣልትጝ፦ «እኝቸን እውነየን ይናት ቲክንዳ ቓፅራ ጨወች፤ ኣለቀይ ሲነቭሽ!» ይጝ ጨው። 24ጘጝም፦ «ያን እፃጨውድ ቢቂዝጘ ድዘቍ እስራየላኒል ጭቝ የጝ» ዩ። 25እውነየን ግን ጝልኲል ሊቭር፦ «ኣደረወ! ኣለቀይ እርዲ ይ!» ይች። 26እየሱስም፦ «ዅሊዙ ሚድ ጕይን ግፅጝዝ ማለነው ጥውሻውም» ዩ። 27ጚይም፦ «ኣደረወ! እማን የጝ፤ ኣነጚ ግፅጝም ቃል ጝታወኒዙ መዲስ ሊቨው ፍርፋሪድ ዅጘኵ» ይች። 28ኣይንድም እየሱስ፦ «እውነ ክተ! ክእምንትድ ኽየው የጝ፤ ክት በንረጘ ኣነ» ዩ። ጝርቝረየንም ጚ ሰትሸንቲስ ኪርምር ቓድች።
እየሱስ ንቕፀቍ ፅውዝጅንጥ ቓዘጘ
29እየሱስም ጝጊስ ጕ ገሊለት ባኽሪዝ ጋቢዙ ስፍረይዝጐ ፊሩ፤ ኣበልም ፍ ጝግል ጐዩ። 30ንቕፀው ኽዝቭም፣ ኻካዛንድ፣ ኻርብድ፣ ድውያንድ፣ ድደንድ፣ ላጥ ንቕፀቍ ፅውዝጅንጥም ፃይ እየሱስትል ተር ጝልኲዝ ጋቢል እቕሩ፤ ጘጝም ጝታፅውዘይስ ቓዙ። 31ኽዝቭድም ድደንድ ዊግትጛንድ፣ ድውያንድ ቓድጛንድ፣ ኻካዛንድ ዳኽነዝ ተግርጛንድ፣ ኻርብድ ቓለነው ቸልጛንድ፣ ቓላንስቅ ዲንቅሹ፤ እስራየልት ኣምላክትም ሚዝየንዙ።
እየሱስ ሲዘ ሽኽ እቅ ታምርዝ ሚግቨጘ
(ማር. 8፡1-10)
32እየሱስም ጝክንደጥድዛት ጝጐ ጭጝ፦ «ኽዝቭድ ውርቅ ዂጝቀ ሻቘ ግርቅ ይጅቅ ዊናንስቅ ጝጭስ ኻዝነኵን፤ ጒደነይስ ግድርዝ ዝላቕ ሊቫየጘ ፃም በርስጨ በነቅም» ዩ። 33ጝክንደጥድም፦ «እንቝጠ ኽዝቭዝ ኣቐው ሚ እኒን በራኸይስ ኣዊስ ችጝና?» ይ። 34እየሱስም፦ «ዋቐ ምጭ ፃይርንኵርኑ?» የው ዋቕሩ፤ ጛይም፦ «ላጝጠ ምጭዝመ ዊትቍ እጥልቃን ኻዝዛ» ይ።
35እየሱስም ኽዝቭድ ዝቨይል ጐያንስ ኣዙ። 36ላጝጠ ምጪዝመ ኻዚዝም ጒ እደረት ሚዝየንዝ በር፣ ኪል ጝክንደጢዝ ይዉ፤ ክንደጥድም ኽዝቪዝ ኣድል። 37እጝቅም ዅጝ እፍት፤ ቲርፈውድየንትም ጝክንደጥድዛይ ላጝጠ ምስቫን እቻዝጝ ጕይ። 38ዀቍ እቅድም እቍኒዝመ እፈሪዝ እጊቲጝቀ ግልቍድ ጭቝ ሲዘ ሽኽ ዊን። 39እየሱስም ኽዝቭድ ሲነቭትዘት ግረ ታኰዝ ተሳፍርሽ መጊደውል ትጐ ፊሩ።
Tans Gekies:
ማቲወስት ወንጌል 15: ኽምጣኣኪ
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
