ማቲወስት ወንጌል 16
16
ፈወነ 16
እየሱስ ሲመይስ ምልክት ቓሊሳንስ ዋቕርሸጘ
(ማር. 8፡11-13፤ ሉቃ. 12፡54-56)
1ፈሪሳኒዝመ ሰዱቃኒዝም እየሱስትል ተርጝ ጝት ፊትንጥጘ በንጝ ሲመይስ ምልክት ቓሊሳንስ ዋቕር።#ማቲ. 12፡38፤ ሉቃ. 11፡16። 2ጘጝም፦ «ኵናንድ፦ ‹ሲመይድ ሰርኩ፤ ብረ ኣጠ የጝ› ይርነኵ። 3ቅሻንድ ቈሽ፦ ‹ሲመይድ ድምንድ ሰርኩ፤ ንጭ ስወ ሊቭጠ የጝ› ይርነኵ፤ ሲመይዙ ሚልክድስ ቲዘነው ቸልድርነኵ፤ ዊገድ ግን እንዚምኒዙ ምልክትድ ቲዘነው ቸላይርነቅም። 4ጭቓ ሸርሙጠ ዅለድ ምልክት በነኵ፤ ዊገድ ግን የውናስት ምልክትነይድ ኣየውዝየ ላየ ምልክት ይውሽታውም» ዩ። እንዝ ግረ ጛት በር ፊሩ።#ማቲ. 12፡39፤ ሉቃ. 11፡29።
ፈሪሳኒዝመ ሰዱቃኒዝዙ ምጨድ
(ማር. 8፡14-21)
5ጝክንደጥድም ባኽርድየንት ከርጛንድ ሚርጝ ሚ ፃዪየቍም ዊን። 6እየሱስም ጛት፦ «ልብ ይጥን! ፈሪሳኒዝመ ሰዱቃኒዝዙ ምጨይስ ሊሚድጭጥን!» ዩ።#ሉቃ. 12፡1። 7ጛይ ግን ጛስ ጛይ፦ «ሚ ፃዪይነቅ ኣናንስቅ ኣጠት እንት የውድ» ይሽተይሽት።
8እየሱስም ጝታኻሰቭድ ኣርቕ፦ «እፈ እምንት ጒድልድርነቅ ክታትርነ! ውር ቃጥ የጝ ክታስ ክታይ፦ ‹ሚ ፃዪይነቅ ኣናንስቅ የጝ እንት የውድ› ይርና ዊግትርነውድ? 9ገነመ ኣስክሳይርነቀ? ኣኰ ምጭድ ኣኰ ሽኽ እቅ ዅጝ፣ ቲርፈውድየንት ዋቐ እቻቐቍ ምስቫን ጕይርነጘ ኣጃይርነቅመ?#ማቲ. 14፡17-21። 10እኒዝጘስ ላጝጠ ምጭድ ሲዘ ሽኽ እቅ ዅጝ ቲርፈውድየንት ዋቐ እቻቐቍ ምስቫን ጕይርነጘ ኣጃይርነቅመ?#ማቲ. 15፡34-38። 11እደስለ ያን ዊግጠውድ ሚዝቍዝ ኣየው ኣቐጘ ውረ ልብ ያይርነቅ? ነንም ፈሪሳኒዝመ ሰዱቃኒዝዙ ምጨይስ ሊሚድጭጥን» ዩ።
12ኣይንድም ጝክንደጥድ ጘጝ ዊግተውድ ፈሪሳኒዝመ ሰዱቃኒዝዙ ክንድጚስ ሊሚድሽጛንስጚ፣ ምኰተል ድወነው ምጨይዝቍዝ ኣየው ኣቐጘ ኣስክስ።
ቢጥሮስት እምንቲዝመ ሚዝርነይዝ
(ማር. 8፡27-30፤ ሉቃ. 9፡18-21)
13እየሱስም ፊልበውስ ቂሳርየ የነው ኻግሪል ችጛንድ ጝክንደጥድዛት፦ «እቅ እጅር ዅርት ኣው የጝ ይጘኵ?» የው ዋቕሩ። 14ጛይም፦ «ላው ላውድ ጣምቀተ ይዃንስ፣ ላው ላውድ ይልያስ፣ ላው ላው ቈሽ የርምያስ፣ ዊንም ነቭያታኒስ ላውድ የጝ ይጘኳ» ይጝ ዊስ።#ማቲ. 14፡1-2፤ ማር. 6፡14-15፤ ሉቃ. 9፡7-8። 15ጘጝም፦ «ክትንሰ ይት ኣው ይርና?» ዩ። 16ስሙን ቢጥሮስም፦ «ክት ዘላልም ፅበው እደረት ዅር ክርስቶስ የጝ» ዩ።#ይዃ. 6፡66-69።
17እየሱስም፦ «የውነት ዅር ስሙንወ! ክት ቀቫሽረር የጝ፤ እኒንት ክጭስ ጋልፀውድ ሲመይቱ ይር የጝጚ እጅርም ኣየው። 18ያንም ክት የኵን፤ ክት ቢጥሮስ#16፡18 ቢጥሮስ፦ ግሪኪዝ ጝትርጕምድ ፃፀ የነት የጝ። የጝ፤ እኒን ፃፀይልም ይምከንሸንት ተስጭር፤ ገኻነምት ሚልድ ጝርት ኻቓቍም። 19ክጭስም ምጝግስተሰማያትት ቝልፋንድዛት ነቅጭር፤ ዝቨይስ እፁቍረውድ ሲመይስ እፅቍሸው ኣጡ፤ ዝቨይስ እክስረውድ ሲመይስ እኪተው ኣጡ» ዩ።#ማቲ. 18፡18፤ ይዃ. 20፡23። 20እንዝ ግረ ጝክንደጥድዛት ጘጝ ክርስቶስ ኣቐጘ ኣውማውስቅ ድቋይጘጘ ኣዙ።
እየሱስ ጝሚከረይዝቍዝ በውግስ ዊግተጘ
(ማር. 8፡31-33፤ ሉቃ. 9፡22-27)
21ኣይንት ግርየይስ ኪርም እየሩሳልየም ፊርጠጘ፣ ጝጊስም ሽመቅሊዝ፣ ካኽነጣነ ኻልቅጢዝመ ወሪትት ኽግ ክንሰጢዝዙ ናኒዝ ኽየው ሚከረ ለምርጠጘ፣ ቍውሽትጠጘ፣ ሸወትረ ግርየይዝም ክርጘይስ ጕጠ ጥውሸው ኣቐጘ፣ ጝክንደጢዝ ጋልፅጠ ኪርሙ። 22ቢጥሮስም እየሱስት ጝጐ ፊስ፦ «ኣደረወ! እነየው ዊገ ክጭስ ኣቒነ!» ያ ኪልክልጠ ኪርሙ። 23እየሱስም ቢጥሮስ ትጐ ዋጥር የው፦ «እፈ ሲጣን ክተ! እድጐ ፊጥ! እጅርዝውድጚ እደረትውድ ኻስቫርም፤ ክት ይጭስ ፅጋ ኣቕርኵሩ» ዩ።
ክርስቶስት ቲክነናንድ ኪፍልሰው ምስዋይትነይድ
(ማር. 8፡34—9፡1፤ ሉቃ. 9፡23-27)
24እንዝ ግረ እየሱስ ጝክንደጥድዛት እንት ዩ፦ «ይት ቲክንጠ በነውድቅ ጝቕምት ኻዲነ! ጝሚስቅልድየንትም መውር ይት ቲክነ!#ማቲ. 10፡38፤ ሉቃ. 14፡27። 25ጝርዅየሸንት ቓዝጠ በነውድቅ ጝርት ድስጡ፤ ጝርዅየሸንት ይማጥን ደሰውድ ግን ጝርት ቓዝጡ።#ማቲ. 10፡39፤ ሉቃ. 17፡33፤ ይዃ. 12፡25። 26እጅር ኣልሚዙ ኻፍትድቅ ችጛን፣ ጝኒፍስሸት ግን ቓዚየውዝየ ውር ጣቅምሽጡ? ዊንስ እጅር ጝኒፍስሸንስ ማጥን ኪፍለው ወየድ ወረጘ የጝ? 27እጅር ዅር ጚርት ክቭርዝ ጝመላካኒጅቅ ተርጡ፤ እጝቅ እጅርዝቅም ጝሰብ ጝሰቢዝጘ ጝወየድ ኪፍልጡ።#ማቲ. 25፡31፤ መዝ. 62፡12፤ ረው. 2፡6። 28እማንዝ የኵን፤ እንል ችብረቍ እቂዝ ማኽሊስ እጅር ዅር ጝምጝግስቲዝ ተራንድ ቓልጥጚስቅ ክርጘ ቓላቍ እቅ እኵ።»
Tans Gekies:
ማቲወስት ወንጌል 16: ኽምጣኣኪ
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
