ማቲወስት ወንጌል 17
17
ፈወነ 17
እየሱስት ሚልክድ ላውጥሸጘ
(ማር. 9፡2-13፤ ሉቃ. 9፡28-36)
1ዋልጠ ግርቅዝ ግረ እየሱስ ቢጥሮስት፣ ያይቈቭት፣ ያይቈቭትዝን ይዃንስት፣ ጝታለ ፃይ ላው ኽየው ኣበል ፉ።#2ቢጥ. 1፡17-18። 2ጝጊስም ጝታበዊል ጝሚልክድ ላውጥሹ፤ ጝጋፅድም ኰረይዝጘ ኣቭርኹ፤ ጝኣልቨድም ፃር ብርኻኒዝጘ ኣቭርቅርቁ። 3ኣይንድም ሙሴስመ ይልያስስ እየሱስ ጅቅ ዊግሽጛ ጛጭስ እትል። 4ቢጥሮስም፦ «ኣደረወ! እንል ኣቐነው ይናጭስ ቀሰው የጝ፤ ክት ዊድረር ኣርሽ ክጭስ ላው፣ ሙሴስ ላው፣ ይልያስ ላው፣ ሻቘ ደፅ ተስጨ» ዩ።
5ጘጝም እኒንት ዊግታ ሲጝቀ ኣቭርኸው ድምነ ተር ጛት ሺፍኑ፤ ድምነይዝ ኣቒስም፦ «ያን ጝቍዝ ዲስ የው ይቀነው ይዅርድ እኒን የጝ፤ ጝት ወጭጥን» የው ድመ ተሩ።#ዘፍ. 22፡2፤ ዘዳ. 18፡15፤ መዝ. 2፡7፤ እሳ. 42፡1፤ ማቲ. 3፡17፤ 12፡8፤ ማር. 1፡11፤ ሉቃ. 3፡22። 6ጝክንደጥድዛይም እኒንት ወሽጛንድ ዳጝግፅጝ ጝታግምባሪዝ ዝቨይል ደፋሽ። 7እየሱስም ጝታግል ኣልት ጝናኒዝ ዳቕ በር፦ «ጕጥን ጐውትርነ!» ዩ። 8ጛይም ጭቅ ይጝ ቓልጛንድ እየሱስትለ ላየ ኣውማውትም ቓልየቍ።
9ጛይም ኣበይስ ጊምጛ ሲጝቀ እየሱስ፦ «እጅር ዅር ክርጘይስ ጕጢስቅ እን ቓልድርነውድየንት ኣውማውስቅ ድቍርነቅ» የው ኣዙ። 10ጝክንደጥድዛይም፦ «እደስለ፣ ወሪትት ኽግ ክንሰጥድ፦ ‹በዊል ይልያስ ተርጠ ጥውሸኵ› ይጘውድ ወረጘ የጝ?» ይጝ ዋቕር።#ምል. 4፡5። 11እየሱስም፦ «ይልያስመ እርግጥ በዊል ተር እጝቅትቅ ኣስተካክልዝጡ። 12ዊገድ ግን ይልያስ ተርኩ የኵን! ኣቕሽም ጛት ሸጘ ፃቭጚ ጝት ኣርቒየቍም፤ እኒዝጘም እጅር ዅር ጝታናኒዝ ሚከረ ለምርጡ» ዩ።#ማቲ. 11፡14። 13ኣይንድ ጝክንደጥድ እየሱስ ዊግተውድ ጣምቀተ ይዃንስት ማጥን ኣቐጘ ኣስክስ።
እየሱስ ጋኒን ጨው እፈረ ቓዘጘ
(ማር. 9፡14-29፤ ሉቃ. 9፡37-43)
14እየሱስስመ ሻቘ ክንደጢዝም ኽዝቪል ችጛንድ ላው እጅር እየሱስ ትጐ ኣልት ጝበዊል ግርቨቭሽ፦ 15«ኣደረወ! ኣለቀይ ይዅርት ሳቝጭ፤ ማለው ፅውዘዝ ጭቕጘ ተሰቃይሸኵ፤ እክሰው ግርየ ልየል ሊቨኵ፤ ኣቚልም ጥወኵ። 16ክክንደጢዝጐም ነሱን፤ ጛይ ግን ቓዘነ ብ» ዩ። 17እየሱስም፦ «እፈ እምንት እጅረር ጠማም ዅለ ክተ! ኣውን ኣሽ ክታጅቅ ፅብጭር? ኣውን ኣሽስ ክታት ቸልጭር? እፈረድ እንጐ ነስጥን» ዩ። 18ኣይንድም ጋኒንድየት ጋስፅ እፈረይስ ፊሱ፤ እፈረድም ጚ ሰትሸንቲስ ኪርም ቓዱ።
19እንዝ ግረ ጝክንደጥድ ጝታለ እየሱስትል ኣልትጝ፦ «ይን ጋኒንድ ፊሰነ ብነውድ ወረጘ የጝ?» ይጝ ዋቕር። 20እየሱስም፦ «ክታእምንትድ ጒድለው ኣቓንስቅ የጝ፤ እማንዝ የኵን፤ ስናፍጭ ፍረት ኵተ እምንትት ፃይርነቅ ኣቕርናን፣ እኒን ኣበድ፦ ‹እኒስ ጕር እድጐ ፊጥ› ይርናን ፊርጡ፤ ክታጭስ ቸልሻው ዊገ ዊናውም።#ማቲ. 21፡21፤ ማር. 11፡23፤ 1ቈረ. 13፡2። 21እነየው ጋኒንድ ግን ፀለውትዝመ ፃምዝ ኣየውዝየ ፋውም» ዩ።
እየሱስ ጝክርጘይዝቍዝ ሊጘት ዊግተጘ
(ማር. 9፡30-32፤ ሉቃ. 9፡43-45)
22ጛይም ገሊለ ኣኽቭሽጝ ፅብጛ እየሱስ ጛጭስ፦ «እጅር ዅር እቀ ናንል ዲቍሽት ይውሽትጡ። 23ጛይም ጝት ቁጥቍ፤ ሸወትረ ግርየይዝም ክርጘይስ ጕጡ» ዩ። ጝክንደጥድም ጭቕጘ ኻዝን።
መቅደስ ጝኒዝ ግቭር ኪፍለነውዝ ማጥን ኣልተው ዋቕረ
24እየሱስመ ጝክንደጢዝ ቅፍርናዀም ችጛንድ መቅደስ ጝኒዝ ግቭር ለምረቍ እቅ ቢጥሮስ ትጐ ኣልትጝ፦ «ክታክንሰተድ መቅደስ ጝኒዙ ግቭርድ ኪፍላውመ?» ይጝ ዋቕር።#ዘፀ. 30፡13፤ 38፡26። 25ቢጥሮስም፦ «እረ ኪፍለኳ» ዩ፤ ቢጥሮስም ጝኒል ጥዋንድ እየሱስ በዊል፦ «ስሙን! ዝቨትቍ ንጕሳንድ ቀረጥ ዊንም ግቭር ለምርጘውድ በገዘ ጝታቝሪስመ ዊንስ ላጥ እቂስ የጝ?» የው ዋቕሩ። 26ቢጥሮስም፦ «ላጥ እቂስጚ» ዩ፤ እየሱስም፦ «እደስለመ ጝታቝርድ ግቭር ኪፍለነዊስ ኻርነይ ፈቍ ጛይ የነት የጛ? 27ኣቕሽም ጛት ፅጋሳይነጘ ባኽሪዝጐ ፊትር ክመንጠቈድየንት ባኽሪል ማል፤ በዊል ፃይረው ኻዘድየንት ጝምቸድ ብዝራንድ ቍርሻን ችጝትር፤ ጛት ፊስር ይጭስም ክጭስም ኪፍል» ዩ።
Tans Gekies:
ማቲወስት ወንጌል 17: ኽምጣኣኪ
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
