ማቲወስት ወንጌል 18
18
ፈወነ 18
እጝቂስቅ ኽየው ኣቐው እጅርድ
(ማር. 9፡33-37፤ ሉቃ. 9፡46-48)
1ኣይንድ ጝክንደጥድ እየሱስትል ኣልትጝ፦ «ምጝግስተሰማያትስ እጝቂስቅ ኽየው ኣቐው እጅርድ ኣው የጝ?» ይጝ ዋቕር።#ሉቃ. 22፡24። 2እየሱስም ላው ኽፃን ጭጝ ክታማኽሊል ችብስ እንት ዩ፦ 3«እማንዝ የኵን፤ ላውጥሺርነውዝየ፣ ኽፃናታኒዝጘም ኣቒርነውዝየ ምጝግስተሰማያት ስሪስቅ ጥዋይርነቅም።#ማር. 10፡15፤ ሉቃ. 18፡17። 4እንዝ ማጥን ምጝግስተሰማያትስ ኽየው ኣቐውድ እኒን ኽፃኒዝጘ ጝቕምት ዝቅ ሸውድ የጝ። 5እነየው ኽፃንድየንት ይሽዝ ለምረውድቅ ይት ለምረኵ።
6ዊገድ ግን ላው እጅር ይት ኣምነቍ እንዛይ መልቍስ ላውድየንት ቀሳንቲስ ሽ ኽየው እጕ ጝቕልመይል እፁሸጘ ባኽር ልቢል ስርሻን ጝጭስ ቺዘኵ። 7እኝቸን ኣልምሸን ፅጋረነውዝ ምላሰነ ኣራንስቅ ጝርስ ወየው፤ መቸም ፅጋረነው ገቨ ተሪጝቀ እዳቓውም፤ ዊገድ ግን ፅጋረነውዝ ምላሰነ ኣቐው እጅሪዝ ወየው። 8ክናንድ ዊንም ክልኵድ ቀተዝ ምላሰነ ኣቕሽ ጛት ቀቭር ማል፤ ምላሰንድም ሊጘ ናንጣን ዊንም ሊጘ ልኵጣን ፃይረር ኣቕር ዘላልምት ልየይል ጥውራንቲስ ሽ ኻካዝ ዊንም ቈማጥ ኣቕር ዘላልምት ርዅየል ጥውራን ቺዘኵ።#ማቲ. 5፡30። 9እኒዝጘም ክእልሸን ቀተዝ ምላሰነ ኣርሽ ጝርት ፊስር ማል፤ ምላሰንድም ሊጘ እልጣን ፃይረር ኣቕር ዘላልምት ልየይል ጥውራንቲስ ሽ ላው እል ፃይር ዘላልምት ርዅየል ጥውራን ቺዘኵ።#ማቲ. 5፡29። 10እንዛይ መልቊስ ላውድየንት ነቅርነቅ ጣጝቅቅጭጥን፤ ምላሰንድም ሲመይ ፅበቍ ጝታመላካንድዛይ ሲመይ ፅበው ይርት ጋፅድየንት ቓልጘኵ የኵን! 11እጅር ዅርም ተረውድ ድዘውድየንት ደምዝጠ የጝ።#ሉቃ. 19፡10።
ድዘው ቢገይዝ ተከድ
(ሉቃ. 15፡3-7)
12«እስቲ ድቍጥን፣ ላ ቢቅ ፃየው ላው እጅር ዊናን፣ ጛጊስ ላውድ ድዛን፣ ፃይጭርጝን ፃይጨድ ኣበይል ማል እድየን ድዘውድየንት ደምዝጠ ፊራውመ? 13እማንዝ የኵን፤ ችጛንድም እዛይ ድዚየቍ ፃይጭርጝን ፃይጨይስቅ እድየን ድዝ ችጝሸው ቢገይዝቍዝ ዲስ የኵ። 14እኒዝጘም እንዛይ መልቍስ ላውድ እኳ ድዝጠ ሲመይ ፅበው ክታይርድ በናውም።
ቢድለው እጅርድየንት ወረጘ ፃቨነው ጥውሽጠጘ
15«ክዝንድ ክት ቢድልሽ ፊትር ክስመ ጝስ ክታይለ ኣቕርን ጘጝ ቢድለው ዊገድየንት ጝጭስ ድቍ፤ ኣይንድ ክት ወሽሽ፣ ክዝንድየንት ዊስር ክቕምቱ ፃቭሩ የነት የጝ።#ሉቃ. 17፡3። 16ክት ወሺዪሽ ግን ላው፣ ዊንም ሊጘ እቅ ፃይር ዊግሽ፤ ምላሰንድም ዊገድቅ ሊጘ፣ ዊንም ሻቘ ሚዝረጫንዝ ፀናቐኵ።#ዘዳ. 19፡15። 17ጛትም ወሺዪሽ ምከንስ ድቍ፤ ምከንትም ወሺዪሽ ኣኽዛቪዝጘዝመ ቀረጥ ቀቨዊዝጘዝ ፃቭር በጭ።
18«እማንዝ የኵን፤ ዝቨይስ እፅቍርነውድ ሲመይስ እፅቍሸው ኣጡ፤ ዝቨይስ እክስርነውድ ሲመይስ እኪተው ኣጡ።#ማቲ. 16፡19፤ ይዃ. 20፡23። 19እንደ ገነ እማንዝ የኵን፤ ዝቨይስ ክታጊስ ሊጘድ ላው ዊገዝ ቲስመምጝ ጨውጝሽ ሲመይ ፅበው ይር ጛይ ጨውጘውድየንት ፃቭጡ። 20ሊጘ ዊንም ሻቘ ኣቕጝ ይሽዝ ኣኽቭሽጘዊልቅ ያን ጝታማኽሊል ችጝጭር።»
ይቅርተ ፃቨነውዝ ማጥን
21ኣይንድ ቢጥሮስ እየሱስትል ኣልት፦ «ኣደረወ! ይዝንድ ይት ቢድላን ዋቐን ይቅር ይጨ? ላጝጠን ኣሽመ?» የው ዋቕሩ።#ሉቃ. 17፡3-4። 22እየሱስም እንት ዩ፦ «ላጝጠን ላጝጥርጝን ኣሽጚ፣ ላጝጠን ጭቝም የቅ።#ዘፍ. 4፡24።
23«እንዝ ማጥን ምጝግስተሰማያት ጝኣገልጋያኒዝ ናኒል ዊነው ጝኺሳቭድ ተሳስቭሽጠ በነው ንጕስ ተከች። 24ጘጝም ተሳስቭሸነው ኪርማንድ ፅቃ ሽኽ መክሊት#18፡24 መክሊት፦ ላው መክሊት ምሊወንዝ እጊተው ቍርሸዝ ቝጠ የጝ። ቢን ፃየው እጅር ጝጐ ነስ። 25ንጕስድም ኣገልጋይድየን ጝቢንድ ኪፍለነ ባንድ፣ ጘጝ፣ ጝውነ፣ ጝቝር፣ እጝቅ ጝፃየውድየንቅ ቂይሽ ቢንድ ኪፍልሽጥጘ ኣዙ። 26ኣይንድ እኒን ቢን ጕርየ ኣገልጋይድ ጝኣደረይዝ በዊል ደፋሽ፦ ‹ኣደረወ! ኣለቀይ ግርየ ነቅ፤ እጝቅት ኪፍልጭር› የው ጨዉ። 27ጝኣደረድም ጝጭስ ኻዝናንስቅ ሳቝሩ፤ ጝቢንድዛትም በሩ።
28ዊገድ ግን እኒን ኣገልጋይድ ጝጊስ ፍ ፊራንድ ጝፃምጥ ኣገልጋያኒስ ላ ዲናር#18፡28 ዲናር፦ ላው ዲናር ላው ሰራሸተ እጅርዝ ላው ግርየዙ ምኻየ ዊኑ። ቢን ጝጊስ ፊስ ዊነው ላውድየንት ችጝ፦ ‹ቃሲ ፊስረቍ ይጊንዝቫንድዛት ኪፍል!› የው ጝቕልመድየንትም ኻንቕ ፃዩ። 29ጝፃምረ ኣገልጋይድም ጝበዊል ደፋሽ፦ ‹ኣለቀይ ግርየ ነቅ፤ እጝቅትቅ ኪፍልጭር› የው ጨዉ። 30ጘጝ ግን ግርየ ይውጠ በኒየውም፤ ጝፃምረ ኣገልጋይድየንት ወኽኒ ጝንል ፊስ እፁሱ። 31ላጥ ጝፃምጥ ኣገልጋያንድም እኒንት ቓልጛንድ ጭቕጘ ኻዝን፤ ፊርጝም እን እጅርድየን ፃቨው ገቨድየንት እጝቅትቅ ጝታኣደረይዝ ድቍ። 32ኣይንድ ኣደረድ እድየን ኣገልጋይድየንት ጭጝ፦ ‹እፈ ጭቓ ኣገልጋይ ክተ! ክት ይት ጨውራንድ እንቝጠ ቢነድየንትቅ ሳቝጡን። 33እደስለ ያን ክት ሳቝጠጘ ክትስ ክፃምረድየንት ሳቝርተ ጥውሻውመ?› ዩ። 34ኣደረድየንም እነይ ቈጣሽ ጝቢንድ እጝቅትቅ ኪፍል ኻትጢስቅ ወኽኒ ጝንል ኣሰቃይዘቊዝ ዲቍስ ይዉ።
35እንዝ ማጥን ክታጊስ ኣውማውድቅ ጝዝንድየንት ጝእዘኒዝ ይቅር ዪየውዝየ፣ ሲመይ ፅበው ይርም ክታት እኒዝጘ ፃቭጡ።»
Tans Gekies:
ማቲወስት ወንጌል 18: ኽምጣኣኪ
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
