ማቲወስት ወንጌል 19
19
ፈወነ 19
ዳቕርሸነውዝቍዝ ኣልተው ዋቕረ
(ማር. 10፡1-12)
1እየሱስም እኒንት ዊግት ኻተት ግረ ገሊለት በር ዮርዳኖስት እጂዙ ይዅዳት ኣውራጀይዝጐ ፊሩ። 2ንቕፀው ኽዝቭም ጝት ቲክኑ፤ ጘጝም ጝጊስ ፅውዝጅንጥድዛት ቓዙ።
3ፈሪሳንም ጝት ፊትንጥጘ በንጝ ጝጐ ኣልትጝ፦ «እጅር ኣውማው ምላሰንዝቅ ጝውነት ዳቕርጠ ፊቅድሸኵመ?» ይጝ ዋቕር። 4ጘጝም፦ «ፈጣሪ በውገ ግልወዝመ እውነስ ፃቭ ፋጥረጘ ኣንቭቪርነቅመ?#ዘፍ. 1፡27፤ 5፡2። 5ቈሽም፦ ‹እንዝ ማጥን እጅር ጚር ጝኘት በረኵ፤ ጝውነ ጅቅም ጣምርሸኵ ጝታቪልም ላው ኣካል ኣጘኵ› ዩ።#ዘፍ. 2፡24። 6ኣቓንስቅም ነስየ ላው ኣካል ጛይጚ ሊጘም ኣየቍ፤ እንዝ ማጥን እደረ ጣምርዘውድየንት እጅር ቲዚነ» ዩ።
7ጛይም፦ «እደስለ ሙሴ ወረጘ የጝ ላው ግልወ ጝውነት ጝርድቕሪዙ ወረቂትድ ይው በርሳንስ ኣዘውድ?» ይ።#ዘዳ. 24፡1-4፤ ማቲ. 5፡31። 8ጘጝም፦ «ሙሴመ ክታእዚኒዙ ጭቕትድየንት ኣርቓንስቅ ክታእቍንድ ዳቕርድርናንስ ፊቅዱጚ ኽፅሚስ ግን እነየውም ኣየው ዊነውድ። 9ጝርጕርየት ዲጊል ሻርሙጢረውዝለ ጝውነት ዳቕር ላየ እውነት ድወውድቅ ሻርሙጠኵ፤ ጝርትም ሻርሙጥተ ፃበኵ፤ ዳቕርሽረይሸንት ድወውድም ሻርሙጠኵ የኵን» ዩ።#ማቲ. 5፡32፤ 1ቈረ. 7፡10-11።
10ጝክንደጥድዛይም፦ «ባልና ምሽቲዙ ገቨድ እነየው ኣቐውዝየስ ገባሻይነው ቺዘኵ» ይ። 11እየሱስ ግን፦ «እን ዊገድ እደረ ይወቊዝ ኣሽጚ እጝቅዝቅም ኣየው። 12ምላሰንድም ላው ላውድ እዅርሽጛንድ ስልቭ ኣቕጝ እዅርሽጘኵ፤ ላው ላውድ እቅ ሲልቭጙዝ ስልቭ ኣጘኵ፤ ላጥድ ቈሽ ምጝግስተሰማያትትቍዝ ይጝ ስልቫኒዝጘ ገባሸነው በርጘኵ፤ እኒንት ለምርጠ ቸለውድቅ ለምርነ» ዩ።
እየሱስ ኽፃናታን በርከጘ
(ማር. 10፡13-16፤ ሉቃ. 18፡15-17)
13ጝዝ ግረ ጝናንድየንት ጝታዲጊል ፃቭ ፀልያንስ ማጥን እቅ ኽፃናታንድዛት ጝጐ ነስ፤ ጝክንደጥድ ግን እቅድዛት ቃርሽ። 14እየሱስም፦ «ኽፃናታን ይጐ ተርጝነ፤ ምጝግስተሰማያት ጛት ተከቊዝ ኣራንስቅ ኪልክልትርነ» ዩ። 15ጝናንድየንትም ጝታዲጊል እቝር በርክ በር ጝጊስ ጕ ፊሩ።
ኻፍታም እጅሪዝ ዋቕረድ
(ማር. 10፡17-31፤ ሉቃ. 18፡18-30)
16ጝዝ ግረ ላው እጅር እየሱስትል ተር፦ «ክንሰተወ! ዘላልምት ርዅየ ችጛንስ ማጥን ወረጘ ቀሰው ሰቭ ሰራጨ?» የው ዋቕሩ። 17እየሱስም፦ «ቀሰው ዊገዝቍዝ ወረጘ ይት ዋቕርዳ? ቀሰው ኣቐውድ ላው ኣምላክድ ጭቝ የጝ፤ ርዅየል ጡተ በንረውዝየ ግን ትዛዛንድዛት ፋፅም» ዩ። 18እጅርድየንም፦ «ኣውዛይ ትዛዛን?» የው ዋቕሩ። እየሱስም፦ «ቁተ፣ ሻርሙጥተ፣ ስተ፣ ኻሽትዝ ሚዝርድተ፣ 19ኪር ክኘት ኪብርዝ፣ ክፃምረድየንት ክቕም ትጘ ቀን፣ የቍዳ» ዩ።#ዘፀ. 20፡12፤ ዘዳ. 5፡16፤ ዘሊ. 19፡18። 20ውርጋጠ እጅርድየንም፦ «እንዛትመ ፋፅምኩን፤ ላየ ይጊስ ጒድለውድ ወረጘ የጝ?» የው ዋቕሩ። 21እየሱስም፦ «ፍፅም ኣተ በንረውዝየ ፊትር ክፃይረውድየንትቅ ቅይር ጊንዝቭድ ድኺዝ ይይ፤ ሲመይስም ኻፍት ችጝትር፤ ጝዝግረም ተትር ይት ቲክን» ዩ። 22እድ ውርጋጠ እጅርድየንም ንቕፀው ኻፍት ጕርየ ዊናንስቅ እኒንት ወሻንድ ኻዝና ፊሩ።
23እየሱስም ጝክንደጢዝ፦ «እማንዝ የኵን፤ ኻፍታምዝ ምጝግስተሰማያት ጥወነውድ ጭቕጘ ቺግርዘው የጝ። 24ሊጘት የኵን! ኻፍታም ምጝግስተሰማያት ጥወነው ሽ ግምለ ሚርቨዙ እልዝ ጭልቓን ቀለኵ» ዩ። 25ጝክንደጥድም እኒንት ወሽጛንድ ጭቕጘ ጊርምሽጝ፦ «እደስለ ኣው የጝ ቓድጠ ቸለውድ?» ይ። 26እየሱስም ጛት ቓላ፦ «እኒን እጅርዝ ቸልሻውም፤ እደረስ ግን እጝቅቅ ቸልሸኵ» ዩ።
27ቢጥሮስም፦ «ይን እጝቅትቅ በርን ክት ቲክንንኵኑን፤ እደስለ ወረጘ የጝ ችጝነውድ?» የው ዋቕሩ። 28እየሱስም እንት ዩ፦ «እማንዝ የኵን፤ ተረው ኣይር ኣልሚዝ እጅር ዅር ጝክቭር ዙፋኒል ጐያንድ፣ ክትን ይት ቲክንድርነቅድም ፅጭ ሊጘ ዙፋናንል ጐይርን ፅጭ ሊጘ እስራየላነ ነገዳኒል ፊርድትርንቅ።#ማቲ. 25፡31፤ ሉቃ. 22፡30። 29ይሽዝ ማጥን የው ጝጝንጥድ፣ ዊንም ጝፅንት፣ ዊንም ጝኣቅልድ፣ ዊንም ጝቝርት፣ ዊንም ጝቺዝጝድ በረውድቅ፣ ላ እፅፍ ድርቭ ለምርጡ፤ ዘላልምት ርዅየም ችጝጡ። 30ዊገድ ግን ንቕፀቍ ነን በውጥ ኣቐቍ እገጥ ኣጥቍ፤ ነን እገጥ ኣቐቍም በውጥ ኣጥቍ።»#ማቲ. 20፡16፤ ሉቃ. 13፡30።
Tans Gekies:
ማቲወስት ወንጌል 19: ኽምጣኣኪ
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
