LUKAS 5
5
Ruma Isa kad̄alena anamori-Na ma sarambakaina
(Mat. 4:18-22, Mrk. 1:16-20)
1 #
Mat. 13:1-2, Mrk. 3:9-10, 4:1 D̄isab̄ua wakatu, Ruma Isa kid̄ina d̄ikengge Ndano Genesaret. Mboto dou macici weki b̄a ne'ena ringa haba ma ramai ta Ruma Hatalla. 2Eda b̄a Ruma Isa d̄ua mbua sampa d̄ikengge ndano ede; dou-dou mataki ngupa uta wa'ura londo rad̄i ade sampa-sampa ede ro wunga karasona ala siad̄oho. 3Ruma Isa ne'ena ese sab̄ua sampa d̄i ade sampa mawara, eded̄u sampa la Simon. Edempara kauna la Simon runggi sampana ede kad̄o'o nari lab̄o kengge ndano. Ruma Isa dohona d̄i ade sampa ede ro ngoa ra teina mboto dou.
4Sawa'u b̄a nggori teina, nggahi Sia d̄i la Simon, ”Karawe cad̄eipu, ro wurapu alamu d̄i wa'ukai uta.”
5 #
Yah. 21:3
”Pak Guru,” cambe b̄a la Simon, ”sab̄ala ai madad̄oho karawi kapodamu ade, pala wati wara rakamu au-au! Pala b̄ara kaukai b̄a Ita, taho; mada d̄imawura ala wali.” 6#Yah. 21:6 Sawa'u b̄a siad̄oho karawina ede, siad̄oho mboto poda rakana uta sampe ala siad̄oho tampu'ura nci'ina. 7B̄ara ndedena siad̄oho rahona bantu d̄i lengad̄ohona d̄i sampa ma kalai. Lengad̄ohona ede mai edempara siad̄oho sama-sama isina d̄ua mbua sampa ede b̄ini b̄a uta sampe sampa-sampa ede ne'empara mimi. 8Wakatu eda b̄a la Simon ede, sia sujuna d̄itando Ruma Isa, edempara nggahina, ”Tu'u wi'ipu mada, Ruma! B̄ara mada dou madosa!”
9La Simon ro sara'a dou-dou ma sama-sama lab̄o sia namidi adena eda mboto uta rawa'u b̄a siad̄oho. 10Ndede rau lab̄o lenga-lenga la Simon, eded̄u la Yakub, ro la Yahya, ana-ana la Zebedeus. Nggahi Ruma Isa d̄i la Simon, ”Aina dahu! Tampu'u ake nggomi d̄imandad̄i dou ma'ala dou.”
11La Simon ro lengad̄ohona hintina sampa-sampa ede aka kengge ndano, sawa'u b̄a ede tu'u wi'i sara'ana, edempara b̄atuna Ruma Isa.
Ruma Isa katahona sab̄ua dou ma supu ncola
(Mat. 8:1-4, Mrk. 1:40-45)
12D̄isab̄ua ainaina, Ruma Isa wara d̄i sab̄ua kota. Ta aka wara sab̄ua dou mone, sarumbuna b̄ini b̄a supu ncola. Wakatu eda b̄a sia Ruma Isa, sia sujuna d̄itando-Na ro raho nembana, ”Pa, nggara ngawasi Ita, Ita maloaku kataho mada!”
13D̄ama b̄a Ruma Isa dou ede ro nggahina, ”Nahu ngawa, tahora!” Wakatu ede lalo supu dou ede mborana. 14#Im. 14:1-32 Edempara kanta b̄a Ruma Isa d̄i dou ede ngoa rero lampa rawi ede kone d̄i cou-cou rau, nggahi-Na, ”Laopu d̄i imam, ro rahopu sia d̄imakapastina b̄a one nggomi wa'ura taho. Edempara lao d̄onggo ra mbeipu koroba b̄une rakaukai b̄a la Musa, d̄i bukutikai d̄i dou-dou b̄a one nggomi poda-poda wa'ura taho.”
15Pala haba mab̄oha Ruma Isa nanaha mbou rero, ro mboto dou mamai b̄a ne'ena ringa Sia ro siad̄oho ne'ena d̄ikataho wea supuna. 16Sawa'u b̄a ede Ruma Isa lao sambeana aka hid̄i ma lingi.
Ruma Isa katahona sab̄ua dou mamade b̄inci
(Mat. 9:1-8, Mrk. 2:1-12)
17D̄isab̄ua ainaina wakatu Ruma Isa wunga ngoa ra teina, wara pila-pila dou Farisi ro guru-guru agama madoho ta ede. Siad̄oho rad̄i Yerusalem, ro rad̄i kota-kota d̄i Galilea ro Yudea. Kuasa Ruma wara d̄i Ruma Isa d̄ikatahokaina dou-dou masupu. 18Aipu wakatu ede pila-pila dou mamai wa'a sab̄ua dou mamade b̄inci ma maru ese wawo dipi. Siad̄oho na'usahaku wa'a dou ede d̄i ade uma loakud̄u tohona sia d̄itando Ruma Isa. 19Pala b̄ara dou ma'ipi mboto ta aka, siad̄oho wati loana wa'a kalu'u. B̄ara ndedena siad̄oho ampana sia ese wawo b̄utu uma. Edempara siad̄oho henggana gante, ro kalondona sia lab̄o dipina d̄itando Ruma Isa d̄i woha dou mamboto ede. 20Wakatu eda b̄a Ruma Isa ndede na'e imbi siad̄oho, nggahi Sia d̄i dou ede, ”Cina, dosamu wa'ura kangampu wea.”
21Guru-guru agama ro dou-dou Farisi tampu'u nuntu d̄i sab̄ua lab̄o sab̄ua dou, ”Cou dou ake, madisa kab̄awa ra katuna Ruma Hatalla? Cou ma loa kangampu wea dosa, selasi ndai Ruma Hatalla?”
22Ruma Isa nab̄adeku rasod̄i b̄a siad̄oho. Ndad̄i nggahi Sia, ”B̄ab̄auku nggomid̄oho sod̄i-sod̄i ndedekaimu d̄ei ademu? 23B̄e mancewi mod̄a, nggahi, ’Dosamu wa'ura kangampu wea’, atao nggahi, ’Tu'ura ro lampara!’? 24Pala ake Nahu d̄imabukutina d̄i nggomid̄oho b̄a one ese wawo dunia ake Ana Manusia mantau kuasa d̄imakangampu wea dosa.” Edempara nggahi Ruma Isa d̄i dou mamade b̄inci ede, ”Tu'ura, hantapu hid̄i marukaimu, ro lao dulara!”
25Rociku dou ede tu'u laona d̄itando siad̄oho sara'ana, edempara hantana hid̄i marukaina, ro lao dula ro roi ra wadina Ruma Hatalla.
26Siad̄oho sara'ana midi poda adena edempara roi ra wadina Ruma Hatalla. Ro kai ade madahu, nggahi siad̄oho, ”B̄isa ra guna poda mandad̄i ra'eda b̄a ndai d̄i ainaina ake!”
Ruma Isa ouna la Lewi
(Mat. 9:9-13, Mrk. 2:13-17)
27Sawa'u b̄a ede Ruma Isa losa ro edana sab̄ua dou mataki tagi bea, mangara la Lewi, mawunga doho d̄i kantona. Nggahi Ruma Isa d̄i sia, ”B̄atupu Nahu.” 28Tu'u kid̄i la Lewi ro tu'u wi'ina sara'ana ede, edempara lao b̄atuna Ruma Isa.
29Sawa'u b̄a ede la Lewi katu'una ndiha d̄i umana d̄i ru'u b̄a Ruma Isa. Mboto dou mataki tagi bea ro dou-dou makalai mab̄atu ngaha sama-sama lab̄o siad̄oho. 30#Luk. 15:1-2 Pila-pila dou Farisi ro guru-guru agama mawati ca'u, edempara nggahina d̄i anamori Ruma Isa, ”B̄ab̄auku nggomid̄oho sara'ana ngaha ra nonokaimu lab̄o dou-dou mataki tagi bea ro dou-dou masampu ra nggele?”
31Cambe b̄a Ruma Isa, ”Dou ma wati supu wati paraluna dokte; dou ma supumpa. 32Nahu maiku laina d̄ima'ou dou-dou ma iu wekina wa'ura taho, malaisi dou-dou ma wa'ura dosa loakud̄u siad̄oho tobana rad̄i dosa-dosa siad̄oho.”
Mab̄oha puasa
(Mat. 9:14-17, Mrk. 2:18-22)
33Nggahi dou-dou d̄i Ruma Isa, ”Dou-dou mab̄atu la Yahya ro dou mab̄atu dou Farisi naca'u puasa ro sambea. Pala anamorid̄oho-Mu nangaha ra nonoku.”
34Cambe b̄a Ruma Isa, ”Sab̄ua nggomid̄oho maloaku kau puasa dou-dou mamai d̄i ndiha nika, salama b̄unti mone mbuipu sama-samana lab̄o siad̄oho? Tantu wati! 35Pala d̄imamai wakatuna b̄unti mone ede d̄iweha d̄i siad̄oho. Wakatu edeku siad̄oho d̄i puasakaina.”
36Edempara Ruma Isa caritana d̄i siad̄oho conto ra ibara ake, ”Wati wara dou manempa b̄aju mpasa kai satob̄e ci rad̄i b̄aju b̄ouna. B̄ara nakancipaku b̄aju ma b̄ou ede. Ndede walija ci ma b̄ou ede wati ncihi ncaona lab̄o b̄aju ma mpasa. 37Ndede rau wati wara dou ma lua anggo b̄ou d̄i ade kad̄ud̄u huri ma mpasa, b̄ara anggo mab̄ou ede d̄imakancipa kad̄ud̄u ede. Ndad̄ina mboho anggo, ro kad̄ud̄una iha. 38Anggo ma b̄ou pab̄uaku d̄ilua d̄i ade kad̄ud̄u ma b̄ou rau. 39Ndede rauja wati wara dou ma ne'e nono anggo mab̄ou sawa'u b̄a nonona anggo mawa'ura ntoi. ’Anggo mawa'ura ntoi ede nancewi caruna,’ nggahina.”
Tans Gekies:
LUKAS 5: LAIBHP
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
@LAI 2001
