LUKAS 4
4
Ruma Isa coba b̄a Ibilis
(Mat. 4:1-11, Mrk. 1:12-13)
1Ruma Isa kuasakai b̄a Roh Allah wakatu Sia tu'u wi'ina Sori Yordan. Roh Allah mad̄ende ra wa'ana Sia lao aka so sarae. 2Ta ede Sia coba b̄a Ibilis upampuru nai ntoina. Santoi wakatu ede, Sia wati ngahana au-au. Ndad̄i cumpukaina Sia iuna hid̄o.
3Nggahi Ibilis d̄i Sia, ”Nggara Nggomi ana Ruma Hatalla, kaupu wadu ake ndad̄i roti.”
4 #
Ul. 8:3
Cambe b̄a Ruma Isa, ”D̄i ade Alkitab ratunti, ’Manusia wati loana mori kai roti mpoa.’ ”
5Edempara Ibilis lao wa'ana Ruma Isa aka hid̄i mad̄ese, ro ade sapid̄a mada Ibilis turu teina d̄i Sia sara'a ntau ra wara d̄i dunia. 6”Sara'a kuasa ro ntau ra wara ake d̄id̄onggo b̄a nahu d̄i ru'u Nggomi,” nggahi Ibilis d̄i Ruma Isa, ”b̄ara sara'ana wa'ura mbei d̄i nahu ro nahu loa mbei d̄i cou-cou rau d̄i ne'e b̄a nahu mbei. 7Sara'ana ede d̄imandad̄i ntau Nggomi, nggara Nggomi masuju nembasi nahu.”
8 #
Ul. 6:13
Cambe b̄a Ruma Isa, ”D̄i ade Alkitab ratunti, ’Nembapu Ruma Hatalla, Rumamu ro karawipu d̄i ru'u Siampa.’ ”
9Edempara Ibilis lao wa'ana Ruma Isa aka Yerusalem ro wi'ina Sia ese wawo b̄utu Bait Allah ro nggahina d̄i Sia, ”Nggara Nggomi Ana Ruma Hatalla, babupu ta ake. 10#Mzm. 91:11 B̄ara d̄i ade Alkitab ratunti, ’Ruma Hatalla d̄imakauna mala'eka-mala'eka-Na majaga kataho Nggomi.’ 11#Mzm. 91:12 Ro rau, ’Mala'eka-mala'eka d̄imasakaka ao Nggomi kai rima siad̄oho, loakud̄u ed̄i-Mu wati tudu b̄a wadu.’ ”
12 #
Ul. 6:16
Cambe b̄a Ruma Isa, ”D̄i ade Alkitab ratunti, ’Aina cobamu Ruma Hatalla, Rumamu.’ ”
13Sawa'u b̄a Ibilis nggori cobana Ruma Isa kai mboto cara, sia tu'u wi'ina Ruma Isa ro ngenana wakatu ma taho.
Ruma Isa tampu'u kai karawi-Na d̄i Galilea
(Mat. 4:12-17, Mrk. 1:14-15)
14Edempara Ruma Isa lao mbalina aka Galilea; ro Sia kuasakai b̄a Roh Allah. Haba mab̄oha weki ndai-Na wa'ura mbou rero d̄i dana ra rasa ede. 15Sia ngoa ra teina d̄i uma-uma sambeakai, ro sara'ana dou maroina Sia.
Ruma Isa wati tarima ao b̄a dou d̄i Nazaret
(Mat. 13:53-58, Mrk. 6:1-6)
16Ruma Isa lao rauna aka Nazaret, hid̄i rakana'ekai Sia. D̄i'ainaina Sabat, ranginakai-Na, Sia lao aka uma sambeakai. Sia tu'u kid̄i-Na d̄imabaca Alkitab, 17ro rambei buku Nabi Yesaya. Sia henggana buku raluru ede, eda-Na ayat ake,
18 #
Yes. 61:1-2
”Roh Ruma wara d̄i Nahu,
b̄ara Sia wa'ura hantana Nahu d̄imbeina
Haba Mataho d̄i ru'u b̄a dou mancoki mori.
Sia nggaduna Nahu d̄imangoa dou mamboto
d̄ihorikai dou rabui
ro d̄ikatahokai dou mambuda;
d̄imahori wea dou raka'iha wea morina
19ro d̄ingoa ra kahaba maikai wakatu Ruma
makasalama ela-Na.”
20Ruma Isa luru mbalina buku ede, ro mbei mbalina d̄i dou mataki karawi ede, edempara dohona. Sara'ana dou d̄i ade uma sambeakai ede mantanda Sia. 21Ro Ruma Isa tampu'u nuntu ra nggahina d̄i siad̄oho, ndake, ”Ayat-ayat Alkitab ake d̄i ainaina ake na ndad̄ira wakatu nggomid̄oho ringamu.”
22Nggahi ra eli rarenta b̄a Sia nawancuku caruna, ndad̄ina siad̄oho nawancuku ca'una ro kad̄ese ra kantasana Sia. Nggahi siad̄oho, ”Sab̄ua laina Sia ake ana la Yusuf?”
23Edempara nggahi Ruma Isa d̄i siad̄oho, ”Pasti nggomid̄oho makaniku pribahasa ake d̄i ru'u b̄a Nahu, ’Dokte katahopu sarumbu ndaimu. Lampa rawi mab̄isa ra guna ringa b̄a nami rakarawi b̄a Nggomi d̄i Kapernaum, karawi raupu d̄ikampo ra mporo ndai-Mu.’ ” 24#Yah. 4:44 Nggahi wali b̄a Ruma Isa, ”D̄ikawaramu, wati wara nabi d̄ilia ra horoma d̄i kampo ra mporo ndaina. 25#1Raj. 17:1 Pala ringa ra kade'epu: Aipu jamana la Elia, aipu wati londo ura tolu mba'a ini wura ntoina, ndad̄ira sarahid̄o poda d̄i sara'a dana ra rasa. Aipu wakatu ede wara mboto dou-dou siwe mambaru mboha d̄i Israel. 26#1Raj. 17:8-16 Konena ndede, Ruma Hatalla wati kauna la Elia lao aka sab̄ua dou siwe mbaru mboha d̄i ade weki dou-dou siwe mambaru mboha ede malaisi d̄i sab̄ua dou siwe mbaru mboha d̄i Sarfat d̄i dana ra rasa Sidon. 27#2Raj. 5:1-14 Ndede rauja aipu jaman Nabi Elisa wara mboto dou d̄i Israel masupu ncola, pala wati kone sab̄ua dou d̄i ade weki siad̄oho rakataho, selasi la Naaman dou Siria ede.”
28Sara'a dou mawara d̄i uma sambeakai ede mbani poda wakatu ringana nuntu ra nggahi ede. 29Siad̄oho tu'u kid̄ina edempara fou kalosana Ruma Isa ari mai b̄a kota, ro wa'a-Na aka rengge doro ratu'ukai rasa siad̄oho. Siad̄oho nane'eku d̄unggi lo'o Sia d̄i rengge ede. 30Pala Ruma Isa losana d̄i dou mamboto ede edempara laona.
Dou lu'ukai b̄a roh seta
(Mrk. 1:21-28)
31Edempara Ruma Isa laona aka kota Kapernaum d̄i Galilea. Ta aka Sia ngoa ra teina dou-dou d̄i ainaina Sabat. 32#Mat. 7:28-29 Siad̄oho nawancuku ca'una eda cara Sia ngoa ra teina, b̄ara Sia nuntu ra nggahina kai wibawa. 33Ta ede d̄i uma sambeakai wara sab̄ua dou rakuasakai b̄a roh seta. Dou ede kanggica-nggicana, 34”Oe Isa, dou Nazaret, au d̄ine'e karawi b̄a Nggomi d̄i nami? Sab̄ua mai Nggomi d̄imakaleli nami? Nahu kab̄adeku cou Nggomi: Nggomi dou raso ranggadu b̄a Ruma Hatalla!”
35”Midi!” b̄aka b̄a Ruma Isa d̄i roh seta ede. ”Losapu rad̄i dou ake!” Edempara roh seta ede b̄atena dou ede d̄i tando siad̄oho sara'ana, edempara losana rad̄i ade dou ede kai wati kapilina.
36Sara'ana dou midi adena, ro nggahina d̄isab̄ua lab̄o sab̄ua dou, ”Heba poda nggahi ra eli-Na. Kai wibawa ro kuasa, Sia kauna roh-roh seta ede losa, ro siad̄oho rau losana!” 37Edempara haba mab̄oha Ruma Isa mbou d̄i sara'a dana ra rasa ede.
Ruma Isa katahona mboto dou
(Mat. 8:14-17, Mrk. 1:29-34)
38Ruma Isa tu'u wi'ina uma sambeakai ede, edempara laona aka uma la Simon. Riana siwe la Simon wunga hengge sari'ina, ro dou-dou nangoaku lampa rawi ede d̄i Ruma Isa. 39Ruma Isa laona aka hid̄i marukai ina ede, edempara b̄aka kalosana hengge sari'i ede. Hengge sari'i ede mbora, ro riana siwe la Simon tu'u lalona ro kab̄uana ngaha ra nono siad̄oho.
40Wakatu nci'i liro, sara'ana dou lao wa'ana aka Ruma Isa cina ra angina ma wunga hina b̄a mboto pahu supu. Ruma Isa tohona rima-Na ese cua-cua ndai siad̄oho ro katahona siad̄oho. 41Roh-roh seta rau losa d̄i ade mboto dou, ro kanggica salahona, ”Nggomiku Ana Ruma Hatalla!”
Pala Ruma Isa b̄akana siad̄oho ro wati kauna nuntu siad̄oho, b̄ara siad̄oho nab̄adeku Siaku Sangaji Mambei salama.
Ruma Isa mahotoba d̄i ade uma-uma sambeakai
(Mrk. 1:35-39)
42Wakatu tampu'u wontu liro Ruma Isa tu'u wi'ina kota ede edempara laona aka sab̄ua hid̄i ma lingi. Dou-dou tampu'ura ngupana Sia, ro wakatu eda b̄a siad̄oho Sia, siad̄oho na'usahaku loakud̄u Sia aina tu'u wi'i walina siad̄oho. 43Pala nggahi Ruma Isa, ”Haba Mataho mab̄oha Karaja'an Allah d̄ipab̄ua kahaba rau b̄a Nahu d̄i kota-kota makalai, b̄ara ru'u edeku Ruma Hatalla nggaduna Nahu d̄i dunia.”
44B̄ara ndedena Ruma Isa hotobana ade uma-uma sambeakai d̄isara'a dana ra rasa Yudea.
Tans Gekies:
LUKAS 4: LAIBHP
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
@LAI 2001
