LUKAS 3
3
Haba la Yahya Mataki kandeu karaso dou
(Mat. 3:1-12, Mrk. 1:1-8, Yah. 1:19-28)
1Aipu mba'a kasampuru limakaina d̄i ade Pamarenta Kaisar Tiberius, Pontius Pilatus mandad̄i gubernu d̄i Yudea, ro Herodes maparenta d̄i Galilea. Filipus ari la Herodes maparenta d̄i dana ra rasa Iturea ro Trakhonitis, la Lisanias maparenta d̄i Abilene. 2Ma b̄ora mana'ekai imam-imam eded̄u Hanas ro imam Kayafas. D̄imba'ana ede Ruma Hatalla manuntu d̄i la Yahya, ana la Zakaria d̄i so sarae. 3Ndad̄i la Yahya lao tab̄e-b̄e d̄i samenana dana ra rasa Sori Yordan ro karonggana haba ma ramai ta Ruma Hatalla. Nggahi nggao la Yahya, ”Tobara rad̄i dosa-dosamu, ro nggomi pab̄uaku d̄ikandeu karaso, loakud̄u Ruma Hatalla kangampu weana nggomi.” 4#Yes. 40:3-5 Ede ncihi ncao lab̄o ratunti d̄i ade buku Nabi Yesaya:
Wara dou manggahi nggao d̄i so sarae,
’Sadiapu ncai d̄i ru'u Ruma,
kapiripu ncai d̄i ru'u b̄a Sia.
5Sanikina dana makancob̄a pab̄uaku d̄i umbu
sanikina doro ra dorena d̄ikapiri.
Ncai ma nteko pab̄uaku d̄ikarombo,
ro ncai ma d̄ese d̄ei d̄ikapiri.
6Dou-dou d̄isamenana dunia d̄ima'eda
Ruma Hatalla makasalamana manusia!’ ”
7 #
Mat. 12:34, 23:33 Mboto dou mamai d̄i la Yahya mane'e d̄ikandeu karaso. Nggahi la Yahya d̄i siad̄oho, ”Nggomid̄oho dou dab̄ae! Cou ma nggahi b̄a one nggomid̄oho wati b̄oha b̄a hukuma Ruma Hatalla d̄imamai peade? 8#Yah. 8:33 Katadapu kai ruku ra rawimu b̄a one nggomid̄oho wa'ura tobamu rad̄i dosa-dosamu! Aina tampu'umu nggahi b̄a one la Ibrahim eded̄u wa'i ra waromu. D̄ikawaramu: Rad̄i wadu-wadu ake rau Ruma Hatalla naloaku kandad̄i londo ra mai d̄iru'u b̄a la Ibrahim! 9#Mat. 7:19 Ponggo wa'ura sadia d̄ib̄o'okai haju sampe awa-awa amuna. Sanikina fu'u haju ma wati loa mbua wua ma taho d̄i b̄o'o ro d̄ipaki d̄i ade afi.”
10”Ndad̄i, auku d̄i pab̄ua karawi b̄a madad̄oho?” sod̄i b̄a dou-dou d̄i la Yahya.
11Cambe b̄a la Yahya, ”Dou ma ntau d̄ua ndo'o b̄aju, pab̄uaku mbeina sando'o d̄i dou ma wati ntau; ro dou ma ntau ngaha ra nono, pab̄uaku d̄icenggana.”
12 #
Luk. 7:29
Dou-dou mataki tagi bea mai rau b̄a ne'ena kandeu karaso b̄a la Yahya. Sod̄i b̄a siad̄oho, ”Pa Guru, auku d̄ipab̄ua karawi b̄a madad̄oho?” 13Cambe b̄a la Yahya, ”Aina weha kancewimu au rawa'u katantu b̄a pamarenta.”
14Wara rauja tentara ma sod̄i, ”B̄uneku madad̄oho? Auku d̄i pab̄ua karawi b̄a madad̄oho?”
Cambe b̄a la Yahya, ”Aina weha pakasa d̄i cou-cou rau ro aina rampamu pitina kai b̄ab̄u ralo'omu mawati poda. Ncihimpa kai gajimu!”
15D̄iwakatu ede dou-dou tampu'ura sod̄i-sod̄ina, sab̄ua la Yahya Sangaji Mambei salama rangena b̄a siad̄oho. 16B̄ara ndedena la Yahya nggahina d̄i siad̄oho sara'ana, ”Nahu kandeu karasoku nggomid̄oho kai oi, pala peade d̄imamai dou ma ncewi na'e ntewi kaisi nahu. Kone hengga wea ai sapatu-Na nahu wati patuna. Sia d̄imakandeu karaso nggomid̄oho kai Roh Allah ro afi. 17D̄irima-Na wara d̄oku d̄i mbed̄ikai samenana gando-Na sampe rasona. Gando d̄ikab̄oro-Na d̄i ade jompa, pala sara'ana saroe d̄ika'a-Na d̄i ade afi ma wati loa made!”
18Ndedeku la Yahya ngoa ra tei katahona dou-dou kai mboto cara, aipu wakatu sia ngoa rerona Haba Mataho. 19#Mat. 14:3-4, Mrk. 6:17-18 Pala Herodes, makuasa d̄i Galilea, rojo b̄a la Yahya mab̄oha nika lab̄o la Herodias, wei arina, ro mab̄oha sara'a karawina ma dab̄ae. 20Pala la Herodes nanaha karawiku madab̄ae kai kalu'una la Yahya d̄i ade uma bui.
Kandeu karasokai Ruma Isa
(Mat. 3:13-17, Mrk. 1:9-11)
21Sawa'u b̄a nggori sara'ana doud̄oho ede kandeu karaso, Ruma Isa kandeu karaso rau. Ro wunga Sia sambeana, hengga weki langi, 22#Kej. 22:2, Mzm. 2:7, Yes. 42:1, Mat. 3:17, Mrk. 1:11, Luk. 9:35 ro Roh Allah londo ese Sia b̄une nasi dara. Edempara ringa eli Ruma Hatalla manggahi, ”Nggomiku Ana-Ku meci ra ca'u b̄a Nahu. Nggomi makasanana ade Nahu.”
Dafta wa'i ra waro Ruma Isa
(Mat. 1:1-17)
23Aipu wakatu Ruma Isa tampu'una karawi-Na, umu Sia takasi tolumpuru mba'a. Ranggahi dou, Sia ana la Yusuf, ana la Eli, 24ana la Matat, ana la Lewi, ana la Malkhi, ana la Yanai, ana la Yusuf, 25ana la Matica, ana la Amos, ana la Nahum, ana la Hesli, ana la Nagai, 26ana la Matat, ana la Matica, ana la Simei, ana la Yosekh, ana la Yoda, 27ana la Yohanan, ana la Resa, ana la Zerubabel, ana la Sealtiel, ana la Neri, 28ana la Malkhi, ana la Adi, ana Kosam, ana la Elmadam, ana la Er, 29ana la Yesua, ana la Eliezer, ana la Yorim, ana la Matat, ana la Lewi, 30ana la Simeon, ana la Yehuda, ana la Yusuf, ana la Yonam, ana la Elyakim, 31ana la Melea, ana la Mina, ana la Matata, ana la Natan, ana la Daud, 32ana la Isai, ana la Obed, ana la Boas, ana la Salmon, ana Nahason, 33ana la Aminadab, ana la Admin, ana la Arni, ana la Hezron, ana la Peres, ana la Yehuda, 34ana la Yakub, ana la Ishak, ana la Ibrahim, ana la Terah, ana la Nahor, 35ana la Serug, ana la Rehu, ana la Peleg, ana la Eber, ana la Salmon, 36ana la Kenan, ana la Arpakhsad, ana la Sem, ana la Nuh, ana la Lamekh, 37ana la Metusalah, ana la Henokh, ana la Yared, ana la Mahalaleel, ana Kenan, 38ana la Enos, ana la Set, Ana Adam, Ana Ruma Hatalla.
Tans Gekies:
LUKAS 3: LAIBHP
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
@LAI 2001
