LUKAS 2
2
Rawarakai Ruma Isa
(Mat. 1:18-25)
1Aipu wakatu ede Kaisar Agustus maparenta sara'ana dou d̄i negara Karaja'an Roma dafta mena ngara d̄i ne'e sensus. 2Sensus ma sarambakaina ake rakalampa aipu wakatu Kirenius mandad̄i gubernu dana ra rasa Siria. 3Sara'ana dou aipu wakatu ede lao d̄i ne'ena dafta ngara aka cua-cua kota ndaid̄ohona.
4La Yusuf rau tu'una aka Nazaret d̄i Galilea, lao aka Betlehem d̄i Yudea, hid̄i rawarakai Sangaji Daud; b̄ara la Yusuf londo ra mai la Daud. 5La Yusuf daftana ngarana ro la Maria dou sod̄ina, ma wunga na'e loko. 6Wakatu siad̄oho d̄i Betlehem rakara wakatuna la Maria d̄i ngganakaina. 7Sia ngganana ana mone, anana ma sarambakaina. Ana dou to'i ede ralombokaina kanefe, edempara karuna d̄i ade hid̄i ngahakai binata mawara isi rapa; b̄ara siad̄oho wati rakana hid̄i d̄i marukaina.
Ompu jimba ro mala'eka
8Wakatu aimangad̄i ede waraku ompu-ompu jimba ma wunga jagana jimba-jimbana d̄i so mpori d̄i dana ra rasa ede. 9Wed̄i lalompa mala'eka Ruma katadana weki d̄i siad̄oho, ro kalea mataroa rad̄i Ruma makataroana siad̄oho, ro siad̄oho nawancuku dahuna. 10Pala nggahi mala'eka ede, ”Aina dahu! B̄ara maikai nahu ake mawa'a Haba Mataho d̄i ru'u b̄a nggomid̄oho – haba ma wancuku d̄i neokai ade b̄a sara'ana dou. 11Ainaina ake d̄i kota Daud wa'ura wara Sangaji Makasalamamu eded̄u Al Masih, Ruma. 12Akeku tandana: Nggomid̄oho d̄ima'eda sab̄ua ana dou to'i ralombo kai kanefe, ro wunga maruna d̄i ade sab̄ua hid̄i ngahakai binata.”
13Wed̄i lalompa mala'eka ede wara mboto mala'eka makalai malab̄ona, ma roi ra wadi Ruma Hatalla. Nggahi siad̄oho, 14”D̄ese ra ntasa d̄i ru'u Ruma Hatalla ese langi ma ese poda! Ro ese wawo dana, taho ra ntai d̄i ru'u manusia ma kasana ade Ruma!”
15Sawa'u b̄a mala'eka-mala'eka tu'u wi'ina siad̄oho ro lao mbalina d̄i saroga, nggahi ompu-ompu jimba ede d̄i weki ndai d̄ohona, ”Maira ndai talaoku aka Betlehem ro tatioku lampa rawi ma wa'ura ndad̄i ede, rangoa b̄a Ruma d̄i ndaita.”
16Siad̄oho lao lalona, edempara edana la Maria ro la Yusuf, ro ana dou to'i ede mawunga maruna d̄i ade hid̄i ngahakai binata.
17Wakatu eda b̄a ompu-ompu jimba ana dou to'i ede, siad̄oho carita au ranggahi b̄a mala'eka-mala'eka mab̄oha ana dou to'i ede. 18Ro sara'ana dou namidi adena ringa carita ompu-ompu jimba ede. 19Pala la Maria nawi'iku samenana ede d̄i adena ro kananuna. 20Ompu-ompu jimba ede lao mbali aka so mpori ro roi ra wadina ro kad̄ese ra kantasana Ruma Hatalla, b̄ara samenana nawa'ura ringa ra eda, ncihi ncao b̄une ranggahi b̄a mala'eka.
Mbeikai ngara Ruma Isa
21 #
Im. 12:3, Luk. 1:31 Sawa'u b̄a umu waru nai, ana dou to'i ede d̄i suna. Ro tangarakai b̄a siad̄oho Isa, ngara rambei b̄a mala'eka d̄i Sia sawatipu Sia warana d̄i ade loko ina-Na.
Ruma Isa d̄id̄onggo mbei d̄i Ruma d̄i Bait Allah
22 #
Im. 12:6-8
Rakara wakatuna la Yusuf ro la Maria kalampana lampa rawi karaso b̄atu hukum la Musa. Ndad̄i siad̄oho wa'ana ana dou to'i ede aka Yerusalem d̄id̄onggo mbei d̄i Ruma. 23#Kel. 13:2, 12 B̄ara d̄i ade Hukum Ruma ratunti ndake, ”Sanikina ana dou mone ma sarambakaina, pab̄uaku d̄id̄onggombei d̄i Ruma.” 24Siad̄oho ne'e rau d̄onggo ra mbei koroba, eded̄u d̄ua mbua kampodu atao d̄ua mbua nasi dara mandara, b̄une rakatantu d̄i ade Hukum Ruma.
25Aipu wakatu ede d̄i Yerusalem wara sab̄ua dou mangara la Simeon. Sia dou mataho, ma dahu d̄i Ruma Hatalla ro mawunga ngena wakatu Ruma Hatalla makasalamana Israel. Roh Allah mad̄ende rawa'a sia, 26ro Roh Allah nawa'ura ngoa d̄i sia b̄a one sia wati d̄imamade sawatipu b̄a edana Sangaji Mambei salama rasake b̄a Ruma. 27Kai d̄ende ra wa'a b̄a Roh Allah, la Simeon lu'u d̄i ade Bait Allah. Wakatu ede la Yusuf ro la Maria wa'a kalu'una Ruma Isa, ma mbuipu to'i ede d̄ikarawikaina upacara raparenta b̄a hukum Taurat. 28Edempara la Simeon wehana ana dou to'i ede ro ce'ina, edempara roi ra wadina Ruma Hatalla,
29”Ake, Ruma, Ita wa'ura mbeimu rasake b̄a Ita.
Co'opu Ada-Mu ake made kai taho iu.
30B̄ara wa'ura eda b̄a ndaiku
Makasalama ma rad̄i Ita.
31Makasalama ede rasadia wea b̄a Ita
d̄i ru'u b̄a sara'ana bangsa:
32 #
Yes. 42:6, 49:6, 52:10 b̄une santika taroa ma kataroana ncai d̄i ru'u b̄a bangsa-bangsa ma kalai,
d̄imamai d̄i Ita;
eded̄u taroa ma kamaina horoma
d̄i ru'u b̄a ela-Mu Israel.”
33Ama ro ina ana dou to'i ede midi adena ringa au ranggahi b̄a la Simeon mab̄oha ana siad̄oho. 34La Simeon do'a mbeina bareka d̄i siad̄oho ro nggahina d̄i la Maria, ina ana dou to'i ede, ”Ana dou to'i ake wa'ura kad̄ale b̄a Ruma Hatalla d̄imakalelina ro d̄imakasalama mboto dou Israel. Sia d̄imandad̄i tanda rad̄i Ruma Hatalla, ma d̄imadaca'u b̄a dou mamboto, 35ro kai ndedena henggara wekina isi ade siad̄oho. Ncoki ade d̄imacaki ade ra lokomu b̄une peda ma ngaha.”
36Wara rauja sab̄ua dou nabi siwe mawa'ura tua poda. Ngarana la Hana, ana la Fanuel, rad̄i suku Asyer. Sawa'u b̄a pidu mba'a nikana, 37la Hana ndad̄i mbaru mboha, ro ake umuna waru mpuru upa mba'a. Watipu iu b̄a sia tu'u wi'i Bait Allah. Aimarai aimangad̄i sia sambeana ta ede d̄i Ruma Hatalla kai do'a ro puasana. 38Ncihi ncao wakatu ede rau sia maina, edempara roi ra wadina Ruma Hatalla ro nuntuna mab̄oha Ana dou to'i ede d̄i sara'ana dou mangena wakatuna Ruma Hatalla mahori kalosa Yerusalem.
Dula mbali aka Nazaret
39 #
Mat. 2:23
Sawa'u b̄a la Yusuf ro la Maria nggori karawina sara'a d̄i pab̄ua karawi b̄a Hukum Ruma, siad̄oho dula mbalina aka Nazaret d̄i Galilea. 40Ana dou ede nanaha na'e ro tenggo. Sia nawancuku loana ro Anugera Ruma Hatalla wara d̄i Sia.
Ruma Isa d̄i Bait Allah
41 #
Kel. 12:1-27, Ul. 16:1-8 D̄i sanikina mba'a dou matua Ruma Isa lao aka Yerusalem d̄i kandihakaina Ainaina Aruraja Paskah. 42Ro aipu Ruma Isa umuna sampuru d̄ua mba'a, siad̄oho lao d̄i ndihakai ede b̄une ranginakai. 43Sawa'u b̄a nggori ndiha ede siad̄oho dulana, pala Ruma Isa, Ana dou ede, mbuipu ngge'ena d̄i Yerusalem, ro ama ra ina-Na wati b̄adena. 44Siad̄oho kacaina Sia b̄atu d̄i ade weki mamboto. Sawa'u b̄a lampa sambia ai siad̄oho ampodena ngupa Sia d̄i ade woha iwa ra wekina ro dou-dou rapata b̄a siad̄oho. 45Pala siad̄oho wati rakana eda Sia, ndad̄i siad̄oho dula mbali aka Yerusalem ngupana Sia. 46Sawa'u b̄a tolu nai rangupa, siad̄oho rakana eda Sia d̄i ade Bait Allah. Sia wunga doho kade'ena dou-dou guru agama ro mboto sod̄ina. 47Sara'a dou ma ringa Sia midi adena b̄ara ringana cambe-Na ma ipi loa. 48Dou matua rauna midi adena eda Sia. Nggahi ina-Na d̄i Sia, ”Ana, b̄ab̄auku karawikai-Mu ake d̄i nami? Ama ra Ina-Mu darura ade b̄a ngupamu Nggomi!”
49Cambe b̄a Ruma Isa, ”B̄ab̄auku ama ra ina ngupakaimu Mada? Sab̄ua wati b̄ade b̄a ama ra ina b̄a one Mada pab̄uaku wara d̄i ade uma Ama-Ku?” 50Pala siad̄oho wati loana ka'ao racambe b̄a Ruma Isa.
51Edempara Ruma Isa dula samana lab̄o siad̄oho lao aka Nazaret, ro to'ana d̄i siad̄oho. Samenana lampa rawi ede wi'i b̄a ina-Na d̄ei adena. 52#1Sam. 2:26, Ams. 3:4 Ruma Isa nanaha na'e ro nanaha loa timba ra lemba, ro meci ra ca'u b̄a Ruma Hatalla ro ca'u b̄a manusia.
Tans Gekies:
LUKAS 2: LAIBHP
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
@LAI 2001
