Акълова 16

16 къаьм

1ЙакӀис пикро-хиял инсаллис гей,

сикӀас жаваб БетӀергьаллис гей.

2Инсаллил гицца гьинис ният-къас мацойо гейлӀона,

БетӀергьалли масана шибабли ругьлис пикро-хиял.

3Дибозу ишла, БетӀергьалликьа боважна, йечабаннейагьда,

йакӀкьа гаьгьийо жо тӀубази йахъца.

4Гьоᵸсдана мурад гаьчӀел гьоьшшона жо йахъинна гаьъа БетӀергьалли,

лъаькъейа сукӀобана ба̄хъинна Гьолцо балагьлила водла̄л.

5БетӀергьаллил букъо аьмал гаьгьийа̄ ба̄тӀаъас,

гьолло̄л тамбигьлиъис тиса муьвахаъчалакьа йакӀо йоᵸкъос.

6Гургьел-рагьмолана божилъилана мунагьла чурзи йовагьца,

БетӀергьаллихъа гьичӀейолъила кешлъи муьгъатта̄ тӀуцца.

7Инсаллила ишла̄кьа БетӀергьан рази ахъда,

гьолцола тушмалла̄гъойна рекъел бахъилца Гьолцо.

8Гьаьла-бацӀадса йиᵸхъойо йоькькьа жо ахо гей,

оᵸтӀолана йиᵸхъова телилагъа.

9Инсалли гьинил эᵸкье-говал гьино кьодос гьакӀца,

гьолълъо гьид гьули БетӀергьалли эжеллис.

10Аллагьлила сикӀад пача икълашеш,

пачали битӀараб гьоькмо богьцалаъ, гьолцола мицана мунагь боваъас.

11Ахо йаᵸсалабацас сайцӀорийана, сайцӀорийа̄с хаьтӀа̄на БетӀергьаллиъкьа̄ гей,

базаргаллила боьъоъ гаьгьийа гирийана Гьолцо йовагьийа̄ гей.

12Кешлъи йо̄йолъи пача̄л йатӀаъас,

ритӀухълъила гьоллос ханлъи йилӀакъолца!

13ЙоᵸтӀола̄ъцас сикӀо пачалил йацца,

оᵸтӀола̄ъцала сукӀос къиматна бо̄с гьолцо.

14Пачалис симо хеллис чапар гей,

амма аᵸкъилаб сукӀохъа гьолцос къаьм лӀийода̄ йуьᵸхонна йахъца.

15Пачалис мотӀо мацойо зогъда, рагӀиятлис#16:15 РагӀият (араб.) – пачалила ханлъилаъ гаьгьийа̄ аьдамла. йакӀо гигъа йеᵸкьеш,

гьули рази ахъийолъи йеᵸлъейо гей эмеда̄ла гьасалъ.

16Аᵸкъиллъи йиᵸхъойолъи месед йиᵸхъовагъа кӀетӀо гей,

аᵸкъло-насигъат михъойолъина ахо гей окко-месед йиᵸхъовагъана.

17Мацова аьдамла̄ш гьино кешлъилаъас бовачойолъи гей;

гьинисзу гьино цӀуми йо̄йо сукӀо хъосар ахъца.

18Пасадлъилас аьᵸйда̄ш жо – чӀугьи-пахрулъи гей,

къаьм лӀийода̄ йекийа̄с – букъо аьмал бахъийолъи гей.

19Мискилла̄ъ эᵸдо сабру-мутӀиълъилаъ ахъийолъи ахо гей,

чӀугьарабла̄с давла биццас ахъцалагъа.

20БетӀергьаллис йаьже йохийа̄л кӀетӀослъи йиᵸхъос,

гьардарабла гаьъад Гьолцокьа йакӀо йоᵸкъона боважийа̄.

21Къаьмиъ аᵸкъло гаьгьийахъа цӀодораблӀо нисос,

кӀетӀа каламлид икълашецалас илмо-лъайна дӣслъис.

22ЦӀодорабла̄л аᵸкъло-малъи – маулхӀаят гей,

аьбдалла̄л тамбигь гьидесзу аьнтлъи гей.

23Аᵸкъилаблила йакӀиъ гаьгьийона гей гьолцола сикӀа нисоцас жо,

гьолцола сикӀаъаслӀо нисода аᵸкъло-насигьат гӯс.

24Нийа̄ калам тӀотӀис нуцолъийо гей,

йакӀил лазатна ницца гьолълъо,

лӀоьᵸва̄л даруна гей гьоло.

25Гей гьино инсаллил йаᵸкъойцӀойолӀо гиццас,

амма ахирна гьолълъо хеллиъ бейажеш.

26Нуковахъа сукӀо огьдас,

гьолцола оᵸха икье-аькье голцас гаьлълъоха гьули.

27Гьаликатаб-къадараб сукӀо кешлъилал иᵸгьолдас,

гьолцола мицаъкьа̄ цӀо гӯс.

28Мекъабли сукӀо даьъба-йаьже йиᵸте йе̄ᵸш,

мицахъалли сидил-гьоᵸсо вацца̄на атаба̄кӀца.

29Зулмолалъда̄ гьаьй гаьгьийа гьинис гьицас сукӀо къосси о̄с,

чикейа гьидна эжеш.

30Гьаьй йаькьенна говацӀойо сукӀо гьилла-макролал иᵸгьолдас,

сикӀо чӀекӀдокӀцалас йакӀиъна кешлъи йуᵸцона йахъца.

31Гьаьлдийо кеᵸйа – кьухъийо таж гей,

ритӀухълъилаъ оьмро ме̄йал, гьулина гуцӀос.

32Сабру букъо гаьгьийо – багьадурлигъана кӀетӀо гейлӀо нисос,

гьинис тавакал гаьгьийона – шагьар ко̄ъ бокчийагъа кӀетӀолӀо нисос.

33ЦӀула аьдамла̄ милъинаъ йагъос,

амма лъо̄кьади цӀула йоᵸкъо̄лъина БетӀергьаллиъкьа̄ гей.

Tans Gekies:

Акълова 16: KapPROLUK

Kleurmerk

Deel

Kopieer

Акълова 16

Gewilde Bybelverse vanaf
Акълова 16

Bybel:

бежкьалас миц

Weergawe: Анкълова, Лука - KapPROLUK