Акълова 15

15 къаьм

1Гьеренаб жавабли симо болъолца,

хъачӀабли йаьжи симо йилӀа бийиллис.

2Аᵸкъилабла̄ла сикӀаъкьа̄ илмо-лъай гӯс,

аьбдалла̄ла сикӀаъкьа̄ аьнтаб йаьже гӯс.

3БетӀергьаллис гьаьй йоᵸкъаъцас маьче гаьъа:

чикейа̄на бегабас, кӀетӀа̄на бегабас.

4СикӀас гьеренлъи – чӀаголъилас хоьхо гей,

йоᵸтӀолацала сикӀа пасад бо̄с.

5Аьбдалли абос малъи-хъай гьица мейаъас,

кантӀизи о̄йолъи йохийал аᵸкъло мокъос.

6Муъмин-сукӀос билӀо хазиналис йоцӀна йахъца,

лъаькъейа сукӀоба̄ла боцӀи-ризкъила балагь кьодо мокъолца.

7ЦӀодораблила сикӀа илмо-лъай мите ме̄ш,

аьбдалла̄с йакӀода гьолълъодойс ата̄ йовачош.

8Лъаькъейа сукӀоба̄с къурбан БетӀергьаллил батӀаъас,

муъмилла̄ла гьари-доьъалкьа Гьули рази ахъца.

9Лъаькъейа сукӀос гьино БетӀергьаллил йатӀаъас,

ритӀухълъи тӀалаб йогьцас сукӀо Гьолцол ацца.

10Гьинолкьас тарзи ахъийа сукӀол тамбигь букъо бахъца,

нисойо йоваъцас сукӀона хеллиъ эᵸкьеш.

11Журжагьна Жагьандаманна БетӀергьаллидой гьаьгъа аьᵸйда̄ гей,

аьдамла̄ла йакӀиъ гаьгьийо жо Гьолцол йилӀазу ахо йикъаъасди!

12Йаьгь-ламус гаьчча сукӀол йатӀаъас жу кантӀизи ахълал,

аькъилабла̄дой гьицана эᵸкьаъас гьули.

13ЙакӀиъ рохел зогъда мотӀо цӀилӀона бахъца,

йакӀкьа мокъова ургъелли йакӀо йугъолца.

14ЦӀодораблила йакӀи илмо-лъай тӀалаб бо̄с,

аьбдалла̄ла сикӀа йуьᵸхъчаш жо – аьнтлъи йахъца.

15Мискин-пакъирлил къацӀцӀа̄ водбо чикейа̄ йа̄хъца,

йакӀо цӀилӀова̄л нитоназу бейтен йахъца.

16Йоькькьана йахъна БетӀергьаллихъа гьичӀейолъи ахо гей,

тели бечелъина йиᵸхъона, гьолълъола ургъеллиъ ахъийагъа.

17Дул атӀийа сукӀогъой йуьᵸхъийо чӀагьбаш кен ахо гей,

йакӀиъ симона бахъна мухал бегъакӀийа оᵸсис хо йуьᵸхъийагъа.

18Симо гьех бигьцала тушманлъилас цӀо лъишелца,

сабру гаьгьийасола даьъба-йаьже йолъолца.

19КӀаъаблис гьино зазлис йоцӀийо йахъца,

муъмиллис гьино йаᵸкъойцӀойо йахъца.

20ЦӀодорабли оьжди або рази о̄с,

аьнтабли – ийо нуькучӀ йо̄с.

21Аьнтаб гьинила аьнтлъилакьа рази ахъца,

цӀодораб сукӀо йаᵸкъойцӀойо гьидлакьа̄ эᵸкьеш.

22Аᵸкъло-насигьат зогъаъда мурадлиъ оᵸкъаъас,

аᵸкъло ниццас телибалъда мурад гикьа мокъос.

23Гьинила сикӀала кӀетӀа жавабли инсан рази о̄с,

нисал нуцӀа̄цо, нисойо йаьже ахо гаьъад!

24ЦӀодорабли сукӀола гьиноли кьодда̄ бейажеш,

гигъа гаьгьийа журжагьлиъис гьули хъосар ахъца.

25Йукъо йакӀо гаьгьийа сукӀос билӀо БетӀергьалли къаьм лӀийода̄ йекилца,

къоролайлила маче-бохас оьрхъи Гьолцо гаьлълъа̄чо йечанне̄ш.

26Чикейа сукӀоба̄с ният-къас БетӀергьаллил батӀаъас,

кӀетӀа сукӀола каламликьа Гьули рази ахъца.

27Гьаьрамаб боцӀи-ризкъи йакӀо йоцӀечӀе бокӀоллас билӀо йугъолца,

ришват батӀеэшла̄с – чӀаго гьихлъолца.

28Муъмилли йаьже пикро богьна нисос,

лъаькъейа сукӀола сикӀа кешлъи чӀалӀеш.

29Лъаькъейа сукӀодойс БетӀергьан ата̄ эчеш,

муъмиллис гьари-доьъа Гьолцол тухъца.

30ЙакӀо аваданлъилаъ гаьгьийахъа гувабацӀова̄с йакӀо рази йахъца,

кӀетӀа хабалли лӀоьᵸва йилӀакъолца.

31Аᵸкъилабла̄ъ эᵸдо иᵸхъос бетӀербахъи

кӀетӀлъицасна насигьатлихъа энекзи ахъцасна сукӀо.

32Нисойо жо аьᵸдалаъ йеᵸйаъцала сукӀо гьинис оьмро инжит-гьаькъир бо̄с,

насигьатлихъа энекзи ахъийал аᵸкъло мокъос.

33БетӀергьаллихъа гьичӀейолъила аᵸкъиллъилаъна адлолаъна уьᵸхо-аьᵸхелца,

ца̄ᵸ йеᵸкьал аьᵸйда̄ аьдамлис сабру-мутӀиълъи телилъца.

Tans Gekies:

Акълова 15: KapPROLUK

Kleurmerk

Deel

Kopieer

Акълова 15

Gewilde Bybelverse vanaf
Акълова 15

Bybel:

бежкьалас миц

Weergawe: Анкълова, Лука - KapPROLUK