Sefanja 1:7-18

Bly stil, die Here is naby! Die dag van die Here is naby. Die Here maak alles gereed, Hy wil mense slag soos 'n mens diere slag om te offer. Hy het hulle geroep en Hy maak hulle reg om hulle te offer. Die Here sê: “Op daardie dag sal Ek die amptenare en die prinse straf, almal wat klere dra van ander lande. Ek sal almal straf wat nie by die tempel se deur inloop nie, maar wat daar inspring soos die heidene altyd doen. Ek sal almal straf wat wrede dinge doen aan mense. Hulle steel die mense se goed en dan bring hulle die gesteelde goed na die tempel van hulle Koning, die Here.” Die Here sê: “Daardie dag sal hulle hoor hoe roep die mense by die Vis-poort, hulle sal hoor hoe huil die mense in die Tweede Stad. Hulle sal hoor hoe die heuwels stukkend breek. Mense wat in die Vysel woon, julle moet huil, want die handelaars sal sterf. Op daardie dag sal Ek al die mense soek wat in Jerusalem in die donker wegkruip, die mense wat tevrede is en dink hulle het niks nodig nie. Ek sal hulle straf. Hulle is die mense wat sê: ‘Die Here sal niks doen nie, nie iets wat goed is of iets wat sleg is nie.’ Vyande sal hierdie ryk mense se goed wegvat en hulle huise afbreek. Hulle sal weer huise bou, maar hulle sal nie in die huise woon nie. Hulle sal wingerde plant, maar hulle sal nie druiwe kry om wyn te maak nie.” Die groot dag van die Here is naby, dit is baie naby, dit kom gou. Dit sal 'n baie slegte dag wees, en die soldate sal skree. Op daardie dag sal die Here kwaad wees. Op daardie dag sal die mense swaarkry. Op daardie dag sal die stormwinde waai. Op daardie dag sal dit baie donker wees. Op daardie dag sal daar donderwolke wees. Op daardie dag sal die vyande die ramshoring blaas en hulle sal skree. Hulle sal kom en hulle sal die sterk mure en die hoë torings van die stede aanval. Die Here sê: “Ek sal die mense laat swaarkry, want hulle het sonde gedoen teen My. Hulle sal loop soos blinde mense, hulle bloed sal op die grond val soos stof en hulle derms sal uitkom uit hulle liggame.” Hulle het baie silwer en goud, maar dit sal hulle nie help op die dag wanneer die Here hulle wil straf nie. Die Here is baie kwaad. Hy sal die hele aarde verwoes. Hy sal al die mense op die aarde vinnig laat sterf.

Gratis leesplanne en oordenkings oor Sefanja 1:7-18