MIJAHEI 24
24
1Tûna hinchu Balaam in, Rōngpu’n Israelhei ṭhatchômna aman pek hnōm kha a-inhret jo, khava jâra amak hma aleitlo kapōa vasena sik leh tlâ sânna sik tlomak jo. Ama nêrdiramting khan inheia, 2Israel he’n anphung et a rephōr antasâk kha ahmu jo. Pathen rathla’n ajōng che-ôrep a, 3khana aman hiva ṭongsân hei hi ahri jo:
“Beor sapa Balaam ṭonghei,
Inthengtak a akahmu tor mi inkhat,
4Pathen tahri katheitorpa ṭonghei.
Kasang kanga ka-ena ke’n hmangtalâra kahmu,
Akahratpen Pathena inphut hmangtalâr kae.
5Israel pōn-inn kaṭhahei,
6Kahno thing agôr kaseihei ka-ang,
A-emak leh tuidung panga rahōnhei,
Rōngpu’n aleiphun aloe kunghei kapō,
A-emak leh tuikea cedar thing kapō hei kae.
7Anmani’n khōtui katluk a annei sik,
Kaṭhatak a tui omna hleiheia hmuchihei anmankek sik.
Anrengpa kha Agag kanek a kalen jôk sik.
Khan chu anvairôn kha kalen kaseisa sik.
8Pathen in Egypt a inphut aheiṭhōisōt hei;
Anmani sik a ram sehrat inkhat kapōa a’nsukpui pek hei.
Anmani’n an-inrepuihei kha ansuk manhmang hei,
Anru ansuk rabun hei, anthe andor thlek pek hei.
9Hiva jât hi shabakkai inkhat kapō kae;#Aph 49.9; Aph 12.3
Ama aje pha, tûte’n mathōi ngammak hei.
Tu enum Israel vângṭhat kapek kha vângṭhat achen sik kae.
Khana tu enum Israel hâksêr kapek kha hâksêr achen sik kae.”
10Balak ahnuk kana joa akut-hei akatōma Balaam hneng ati, “Ka’nrepuihei kahâksêr sik a kabek che, tâk vethumset ṭhatthei napek jôk jo hei. 11Tûnchu innting inle jo roh! Hlōman pek sik chea le’ntep eng, tâk hlōman nahmu sik kha Rōngpu’n hnōm mak jo.”
12Balaam in amasôn, “Kahnenga nahei tir ṭongkarônhei hneng kaleihri jo khachu, 13nareng-innpuia sana leh dangka rakip nanipek eng inum, ke’n Rōngpu ṭongpek kaler a binga heite khatbek um tlotor mak ning. Rōngpu’n hri roh tia amanthei rōk kha kahri sik kae.”
Balaam Tlâ-sân A’nchainapen hei
14Balaam in Balak hneng ati, “Tûnchu kei kamihei hneng inle sik jo eng, tâk Israel in hnung leh namihei chunga heimo anta hongtlo sik kha kasemak hma kamanthei dek che kae.” 15Khava sōa ama’n hiva ṭongsân hi aleihri:
“Beor sapa Balaam ṭonghri,
Inthengtak a akahmu tor,
16Pathen ṭonghri akathei tor
Khan chu A’nshângpena inphut manhretna akajōng kha a’nhlângpa ṭonghei kae.
Kasang kanga ka-ena ke’n hmangtalâra kahmu,
Akahratpen Pathena inphut hmangtalâr kae.
17Ke’n hnunga sik ka-ena,
Israel jât kahmu hei.
Rn inkhat ârsi kavâr inkhat kapōa khava jât a inphut hongkathōi sik.
Ârsi sômkaleng kapōa Israel a inphut kajōng sik.
Moab hlamkakeihei asukkhōi sik hei
Seth hei avōk mathlâk sik hei.
18Edoma a’nrepuihei kha ator sik hei
Anram kha akarōi amanchang sik jo,
Khava shunga Israel in ator injôn sik hei.
19Israel phung in anmani kha achōnpha sik hei
Khana akahring seng um amanhmangsō sik hei.”
20Khava sōa Balaam in Amalek-hei kha hmangtalâra ahmu heia hiva ṭongsân hi ahrisōt:
“Amalek kha jât rakip hei kâra ratha kaneipen kae,
Tâk achaina chu inhmangthang sik jo.”
21Hmangtalâra ama’n Kenhei aleihmu hei, hiva ṭongsân hi aleihri:
“Na-omna hmun kha kahnet,
Kare chunga varabu inchom kapōa inhuk,
22Tâk Assyria he’n anhong sur pha chea,
Kenhei, nangni suk manhmang sik chei kae.”
23Balaam in hiva ṭongsân hi aleihri:
“Sak lang tinga a’ntûp hei hi tuhei mo?
24Re katlo he’n Cyprus inphut rakōng anhei tôr sik;
Assyria leh Aber antor sik hei
Tâk anmani, khava tloman a, ahei tik a inhmang sik jo hei.”
25Khava sōa Balaam intluk a innting inle jo, Balak um asena hlam ahro jo.
Tans Gekies:
MIJAHEI 24: KOMRBSI
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
Komrem Revised Bible - LEKHARABU INTHENG
Copyright © Bible Society of India, 2015.
Used by permission. All rights reserved worldwide.