MIJAHEI 23
23
1Ama’n Balak hneng ati, “Hinahin maichâm 7 asyempek roh, khana sehratche 7 leh kemōngche 7 aheikei pek roh.”
2Amanthei kapōa Balak in aleitlo, ama leh Balaam in maichâm rakip a kemōngche leh sehratche inkha-khat antōksōt jo. 3Khava sōa Balaam in Balak hneng ati, “Rōngpu’n a’nhmupui sik eng mo, a’nhmupui mak sik eng mo, avaka-en sik a kase kâra nang ro-inthoina hnenga hin leingir roh. Ama’n amanhmu eng rakip kha kahri pek sik che.” Khava jâra ama abing rōk a bung bilik a kaketou jo, 4khana Pathen in ama a’nhmupui jo. Balaam in ahnenga ati, “Ke’n maichâm 7 kasyema sehratche 7 leh kemōngche 7 maichâm et a katōk jo.
5 Rōngpu’n ahri sik kha Balaam hneng amantheia aṭong kha Balak hnenga avakahri sik a atir male jo. 6Ama inlea, ro-inthoina hnenga Balak kha Moab hlamkakei rakip hei leh aleikangir ṭhak kha avahmu.
7Balaam in hiva ṭongsân hi aleihri,
“Moab rengpa Balak in
Nisōtinga Syria ram a inphut aheiṭhōi eng.
Ama’n, ‘Hong roh kei sik a ṭong avahri pek roh.’
‘Israelhei kha avahâksêr pek hei roh,’ ati.
8Pathen in ahâksêr mak kha heikhong mo kahâksêr sik,
A-emak leh Rōngpu’n inrimna ahri mak kha heikhong mo kahri sik?
9Hlungpui inshânga inphut anmani kajōng hmu hei;
hmebunga inphut kajōng ensuitor hei.
Anmani anbing rōk a akahring jât-hei kae;
jât-hlop hei kanek a mahâmṭhat anchenna kha inhret hei.
10Israel sōn leh pârhei kha vaiphin kapō hei kae,
Anja katam reia intei tor mak jo.
Pathen mihei kapōa kakanikhō hei hi manchai rong;
Mikadik kapōa kamōnga thi rong.”
11Khava pha Balak in Balaam hneng, “Kahnenga heimo natlo jo? Ka’ndōipui hei kahâksêr sik hinahin kaheiṭhōi che kae, tâk natlo rakip hichu mahâmṭhat napek jo hei.”
12Ama’n, “Rōngpu’n hri roh ati rōk kha kahritor kae,” tia amasôn.
Balaam Tlâ-sân Inhnina
13Khava sōa Balak in Balaam hneng ati, “Varoh kei leh hmunhlop a se nôk rih khan Israel ṭhahrep rōk nahmu sik hei. Khava hmun a inphut ahâksêr pek hei roh.” 14Ama’n Pisga Tlângbung bilik chunga Zophim hlei tetlânga khan aṭhōitou jo. Kha’num ama’n maichâm 7 asyema khava rakip a sehratche leh kemōngche inkha-khat atōksōt nôk jo.
15Balaam in Balak hneng ati, “Naro manvâm tōksōtna hnenga hin leingir roh, ke’n sova hmun son Pathen va’nhmupui hi rong.”
16 Rōngpu’n Balaam kha a’nhmupui, hri sik hei kha amanthei, khan aṭonghei kha Balak hnenga avakahri sik a atir male jo. 17Khava jâra ama inlea Balak kha Moab hlamkakeihei leh aro manvâm tōksōtna hnenga anlei ngir ṭhak kha avahmu jo. Rōngpu’n heimo ahri pek kha Balak in aleider, 18Balaam in hiva ṭongsân hei hi ahri jo:
“Varoh, Zippor sapa Balak,
Khana kahri sik hei hi rangei roh.
19Pathen hi, malei kasei mihring kapō changmak.
Ama hi malung kathleng lele mihring inkhat changmak.
A’ntepna jo rakip kha, ama’n atlo;
Ama’n ahri kha intlosōt a kae.
20Ṭhatthei bukna sik a ṭong apek jo eng,
Khana Pathen in ṭhatthei abōk kha, ke’n bekmale theimak eng.
21Ke’n kaleihmu khachu hnunga Israel chunga
Vângsetna leh khōdengthei heisōk mak ning.
Rōngpu an-Pathen khan a-ompui ṭhak hei;
Anmani’n ama hi anreng kae tia anphông.
22Pathen in Egypt a inphut aheiṭhōisōt hei;
Ama’n ansik a, ram sik a sehratche kapōa re adōi,
23Israel phung leh jât-hei dōina sik a,
Hmitphedôi leh dôi ṭong inhmang mak.
Tûnchu mihe’n Israelhei chunga hinga anti sik,
‘Enruh Pathen in heimo atlo jo!’
24Israel jât hi ratha kanei shabakkai inkhat kapō kae:
Akei hlera amadesō mak lai seng,
Athat hei kha anthi a-insōmak lai seng, inhnga mak a kae.”
25Khava sōa Balak in Balaam hneng ati, “Israelhei kha hâksêr hnōm mak jo hei che, tâk mahâmṭhat rōk chu pemak hei roh!”
26Balaam in amasôn, “Rōngpu’n amanthei eng rōk kha katlo sik tia kalei hridek changmak mo?”
Balaam Tlâ-sân Inthumna
27Balak in ati, “Kei leh se rih, ke’n hmunhlop a kaṭhōi sik che. Khava hmun a khan Pathen in kei sik a anmani amanhâkser khakhat sik che.” 28Khava jâra ama’n Peor Tlângbung bilik nêrdiram hmun a khan aṭhōi nôk jo. 29Balaam in ahnenga ati, “Hinahin maichâm 7 asyempek ina, sehratche 7 leh kemōngche 7 aheiṭhōi pek roh.” 30Balak in amanthei kapōhrep a atlo jo, maichâm rakip a khan sehratche leh kemōngche inkha-khat atōk jo hei.
Tans Gekies:
MIJAHEI 23: KOMRBSI
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
Komrem Revised Bible - LEKHARABU INTHENG
Copyright © Bible Society of India, 2015.
Used by permission. All rights reserved worldwide.