MIJAHEI 25
25
Peor a Israel Mihei
1Israel he’n Acacia Phaichama rephōr anmatunglai pase he’n khava hmun a ka-om Moab jōrhei ansetpui jo hei. 2Hiva nuhmeihei hin Moab pathen kamukna inthoina reveia anbek heia kae. Israelhei khan thlai kha ansâk a 3Peor pathen Baal kha’m ankamuk jo. Khava jâra Rōngpu kha anchunga ahnuk kana joa, 4Moses hneng aleiti, “Israel hlamkakeihei seng kha ṭhōi hei ina kei ṭong juina, sûn kanivâr thōia that hei roh; kha achang inchu mipuihei chunga kahnuk namak ning.” 5Moses’n ṭōnpui karônhei hneng ati, “Nangnihei seng in nanphung shung et a pase, Peor pathen Baal inmuk rakip kha nantathat sik hei kae.”
6Israel he’n Rōngpu omna Pōn-inn kot kunga ṭajai ansui laitak, mipui leh Moses hmit-hmua Israel mi inkhat in Median jōr inkhat akakōa apōn-inn shunga aheiṭhōi manhlut a kae. 7Thempu Aaron tupa, Eleazar sapa Phinehas khan hivahi ahmu pha, kathōisōt a mipui intûp kha adahlon jo. Ama’n kasei inkhat ahrut a, 8Pase leh nuhmei kha pōn-inn shunga ajui heia, kasei vâng an-inhnibât a asunhlon jo hei. Hing’hin Israelhei aleikathat inram hrise kha kabâng jo, 9tâk hivahin mi 24,000 aleithat dek jo hei.
10 Rōngpu’n Moses hneng ahri, 11“Phinehas ṭōntlo jâra, kei Israelhei chunga kahnuk namak jo. Ama’n kei teilo pathenhei kamuk sik kha hnōm mak, khava jâra kahnuknat a kasuk manhmang mak hei kae. 12Khava jâra ke’n ahong katlung sik khang katlunga sik ama leh intepna kasyem jo ti hi manthei roh. 13Ama leh asōnhei kha thempu sik a phun manhnet jo hei kae, ajârchu kei ani kadōihei leimajôm mak hei, khana mipuihei set rangei mandamna ahei rôn sōt a kae.”
14Median jōr leh antathasap Israel mi kha Salu sapa Zimri kae, Simeon phunga innshung upa kae. 15Nuhmeinu rahming kha Cozbi anti. Apa Zur kha Median rup inkhat a upa kae.
16 Rōngpu’n Moses hneng ṭong aleipek, 17“Medianhei kha re vasō hei ina suk manhmang hei roh, 18anmani’n Peor a nachunga anhōn chea akaṭhamak antlo jâra, khana hrise asōklai ale’nthat jo Cozbi jâra vasō hei roh.”
Tans Gekies:
MIJAHEI 25: KOMRBSI
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
Komrem Revised Bible - LEKHARABU INTHENG
Copyright © Bible Society of India, 2015.
Used by permission. All rights reserved worldwide.