MIJAHEI 11
11
Tabera inti Hmun
1Mipuihei kha ankhōdengthei jâra Rōngpu hneng inphin jo hei. Rōngpu’n athei jo hei pha ahnuk kana joa, mipuihei chunga hmei ajōng mathlâk jo. Hmei kha ankâra kakâng jo, rephōr ahmor inkhat akâng manhmangsō jo. 2Mihei kha inthōpui kangek a Moses hneng kapeng jo hei; ama’n Rōngpu hneng derna aneia, hmei kha kathi jo, 3Khava jâra ahmun kha Tabera inti jo, ajârchu Rōngpu hmei in khana khan ankâra kakânga kae.
Moses’n Hlamkakei 70 Akadei hei
4Israelhei leh ramlak mi ṭhahrep khōhme sena le’nṭhōi hei. Anmani kha hme sâk sik anrangei joa inphin heia anti, “Hme ajingbek nisâk inchu! 5Egypt a chu nisâk hnōmchen nga nilei sâk, aman heite om mak. Sanghma, dônkho, tillou, purûn, maru-marâng, chanam nilei sâk hei kha nanmandon mo? 6Tâk tûnchu niratha hei katlâksam jo. Hinchu sâk sik heite omkhâk mak jo, heite om mak, ani katai hiva manna tei loa!”
7(Manna kha hmuchi kasintek kapō kae, aret kha êngdâng kae.#Sōk 16.31 8-9Jân leh rephōr chunga, radai leh inṭhōia katla ri. Ajîng jîngkâra ankimvea anhei mantûp, khan an-ep mandi a-emak leh ansuk a jâmdia ansyem khana ansōnga buhlom pek a a’nsyema kae. Khavakha olive thai leh manheia syemsōt buhlom apōa kae.)#Sōk 16.13-15
10Moses’n mi rakip anpōn-inn kotkung heia arup-rup a kangir heia an-inphin kha athei jo. Ama amalung kachâm jo ajârchu Rōngpu kha anchunga ahnuk kana jo, 11ama’n Rōngpu hneng ati, “Heisik a mo hingtuk natlo manset eng? Heisik a mo kachunga namalung akatlâi mak jo. Heisik a mo hiva mipuihei rahno nalei manrôn eng. 12Ke’n anmani syem mak hei eng khana matetmak hei eng. Heisik a mo nai inzen inkhat kapōa ṭōn katlo sik a namanse eng khana naidônghei kapōa kabâna kapom heia anpa anpuhei hneng nalei intepna ram kajōna kakadom sik hei? 13Khona inphut mo hiva mipuihei sik a hme kahmu tor sik? Anmaduna kha anhri sepsop a anngek ṭhak jo enga kae. 14Kabing rōk a hiva mipuihei seng sik a hin rahno rôn tor mak ning; kei sik a inhnak rei jo! 15Hinga natlo sik eng achang inchu, nang hnuk kase kha kathok nôk makna sik a alungset ina athat jo roh.”
16 Rōngpu’n Moses hneng ati, “Kaja ka-om, mipui hlamkakeihei kae tia manhretsa pase 70 mantûp hei ina ka-omna Pōn-inna mantûp hei roh, khan nahnenga anngirna sik a manthei hei roh. 17Khana khan kei jōng kaṭum sik enga kha ka’n bekpui sik che, nachunga ratha kaleipek che kha ṭhahrep kalosōt a anmani kapek sik hei. Khava sōa chu hiva mipuihei rahno rônna an-inthōpui tor sik jo che, nabinga inrôn mak jo tin. 18Tûnchu mipui manthei hei roh, ‘Jînga sik a nanbinga insuk intheng ruh; hme sâk sik a nanhmu sik. Egypt ram a nanka-om kaṭhadet nantina leh hme sâk sik a nanchihla a nanhri ṭhakna kha Rōngpu’n athei pek jo chei. Tûnchu Rōngpu’n hme apek sik jo chei, nansâk sik jo. 19Ni khat, ni 2, ni 5, ni 10, ni 20 kapha sik rōk a nantasâk sik changmak, 20tâk thla katlung bit a nansâk sik, nankōr ting ahong sōk mak lai seng leh nannatmak lai seng. Nangni’n Egypt ram kha dahlon hêrmak sik a inphin cheia hinahin nankâra aka-om Rōngpu kha nanhlonsōt jâra hihei hi akasōk sik kae.’ ”
21Moses’n Rōngpu hneng ati, “Ke’n hinahin mi 6,00,000 kaṭhōi hei, thla khat a ankatluk hme napek sik hei nati? 22Anmani tlukna sik a se leh kemōng nithat tor sik mo? Tui-ôngpuia nga rakip heiso ansik a akatluk sik mo?”
23 Rōngpu’n amasôn, “Karatha neina hi, abângna aka-om mo? Ke’n heimo kaleihri kha asōk leh asōk mak nahmu bei sik jo.”
24Khava jâra Moses kha kasesōt a Rōngpu ṭonghri kha mi ava manthei jo hei. Ama’n hlamkakei 70 amantûp hei khana Pōn-inn kimvea amanngir heia kae. 25Khava sōa Rōngpu kha sumtuk hlom kâra jōng kaṭuma ahnenga ahri jo. Ama’n Moses chunga ratha aleipek kha ṭhahrep alosōt a upa hlamkakei 70 kha apek jo hei. Rathla kha anchunga ajōng chu pha sânkathemhei kapōa ông leh peng anphut jo, tâk sôtmak a kae.
26Hlamkakei 70 hei kâra 2, Eldad leh Medad kha rephōra leika-om hei Pōn-inna leise mak hei. Rephōra khan rathla kha anchunga jōng kachu jo, anmani’m sânkathemhei kapōa ông anphut jo. 27Rether inkhat kasōksōt a Eldad leh Medad ṭōntlo kha Moses hneng ava manthei jo.
28Khava sōa Nun sapa Joshua, a-rether laia inphut Moses inthōpuipa khan kaṭonga Moses hneng ahri, “Apu, manbâng hei roh!.”
29Moses’n amasôn, “Kei tatlo chunga thangsetna nanei mo? Rōngpu’n mi rakip chunga arathla pek hei sona sânkathemhei kapōa ankhenga anka-ông sik kamadu kae!” 30Khava sōa Moses leh hlamkakei 70 hei kha rephōr ting inle jo hei.
Rōngpu’n Vakanim Ajōng Masō
31 Rōngpu’n manhret manloa tui-ôngpuia inphut thlipui ahei tira va ahei mantlen hei, vahei kha raleia inphut metre inkhat rōk inshânga kajōng heia kae. Vahei kha rephōr chunga leh khava kimvea kilometre katamtak kahōp a katla heia kae. 32Khava jâra anmani’n sûn nilun, jân kathang, ajîng kani katlung bit a vakanim kha ansura kae; mi inkhat in kilograme 1,000 katla det a surmak hei. Anrephōr kimve rakip a khavakha manchâr sik a anphōia kae. 33Antasâk sik a hme katamtak a-omlai khan, Rōngpu kha mipui chunga ahnuk kana joa ankâra hrise amanleng pek jo hei. 34Khava hmun kha Kibroth Hattaavah (lôpna thlân) tia inphō jo, ajârchu khava hmun a khan hme sâk a a’nler hei kha kathi kalōng anleivûma kae.
35Khava hmun a inphut mihei kha Hazaroth a inthonsōt heia rephōr ansak jo.
Tans Gekies:
MIJAHEI 11: KOMRBSI
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
Komrem Revised Bible - LEKHARABU INTHENG
Copyright © Bible Society of India, 2015.
Used by permission. All rights reserved worldwide.
