MIJAHEI 10
10
Dangka Pengkunhei
1 Rōngpu’n Moses hneng ati, 2“Mipui bek mantûpna leh rephōr ṭhetna mipui bek mantûpna hmang sik a sekvâng hem a dangka pengkun 2 syem roh. 3Pengkun 2 kha anjōngṭum sōt inchu ka-omna Pōn-inn hlutna kot kunga nankimvea vaipui a’ntûp sik hei kae. 4Tâk pengkun inkhat rōk a’nhring inchu, phung hlamkakeihei rōk nahnenga ahon’tûp sik hei kae. 5Bongkhat rōk antum inchu, nisōting rephōra ka-om phunghei kasesōt sik hei. 6Vehni changna bongkhat antum inchu, thlâng tinga ka-om phunghei kasesōt sik hei. Khava jâra tum manbong hei kha rephōr ṭhetna sik a hmang sik kae, 7tâk vaipui bek mantûpna sik khachu tum mansôt sik kae. 8Pengkunhei kha Aaron sapa, thempu he’n antatum sik kae.
“Hiva sena dân hi ahei tik a antajui ṭhak sik kae. 9Nanram shunga re nankōn pha leh, nanjōng kasō nan-inrepui heia inphut inhrungna sik, rekōn manhretna sik apengkun hi tum ruh. Nan-Pathen Rōngpu ke’n, nankadōi heia inphut ka’nthōpui sik chei khana kahuk sik chei. 10Khana inpâkna rōi heia, Thlather Reveihei leh beklanga rehōi ralak-heia, romanvâm inthoina leh inlôikhômna inthoina nantōk pha pengkunhei hi nantatum ri sik kae. Khan chu ke’n ka’nthōpui sik chei kae. Kei nan-Rōngpu nan-Pathen eng kae.”
Israel Sahei Rephōr Ṭhet
11Mipui he’n Egypt ram anhei dahlonsō kum 2 tlukna, thla hni tlukna, ni 20 ning, Rōngpu omna Pōn-inn chunga sumtuk kha inhlik sōt jo, 12Israelhei kha Sinai nêrdiram a inphut anramse inphut jo hei. Sumtuk kha Paran ramhânga inhnga jo.
13Moses hneng Rōngpu ṭongpek kapōa anmani inthon jo hei, 14khana ansesōt pha rakip a sedân inkhat kha anjui ri. Judah phungṭhen pōnlek thōia seng kha, Amminadab sapa Nahshon hlamkeina, arup-rup a kasesōt masa hei. 15Issachar phung kha Zuar sapa Nethanel in hlam aleikei hei. 16Zebulun phung kha Helon sapa Eliab in hlam aleikei hei.
17Khava sōa Pōn-inn kha anṭhetsōt sik a kha khana Pōn-inn a’ndom Gershon leh Merari phung he’n akase inphut sik heia kae.
18Abânna, Reuben phung hlamkeina rup-hei pōnlek thōia hei kha, arup-rup a, Shedeur sapa Elizur hlamkeina thōia akase inphut sik heia kae. 19Semion phunga Zurishaddai sapa Shelumiel in hlam aleikei. 20Gad phung kha Deuel sapa Eliasaph in hlam aleikei hei.
21Khava sōa Kohath inti Levi phung he’n se anphut sik, neinâk intheng kha ankadom sik. Abânna rephōr kha anheitlung pha, Pōn-inn kha anmatungsōt nôk sik a kae.
22Abânna, Ephraim phung hlamkeina pōnlek thōia hei, arup-rup a, Ammihud sapa Elishama hlamkeina se anphut sik. 23Manasseh phung kha Pedahzur sapa Gamaliel in hlam aleikei hei, 24Benjamin phung kha Gedioni sapa Abidan in hlam aleikei hei.
25Achaina pena, Dan phung hlamkeina rup-hei pōnlek thōia, ṭhen rakip hei kahnungpena aka-ensuihei kha, Ammishaddai sapa Ahiezer hlamkeina, arup-rup a se anphut sik. 26Asher phung kha Okhran sapa Pagiel in hlam akei hei, 27Naphtali phung kha Enan sapa Ahira in hlam aleikei hei. 28Israel sahe’n rephōr anṭhet pha khana ansesōt pha rakip a arup-rup a ansesōtna sik dân kha kae.
29Moses’n anuhmei naipa Jethro sapa Midian mi Hobab hneng ati, “Rōngpu’n keini apek sik a ahrina hmun kajōna a’nphut sik jo ung kae. Ama’n Israel nei leh haona sik a le’ntep, khava jâra, hong roh inṭhōi rih, kannei leh kanhaona hei kha kanchen pui sik che.”
30Habab in amasôn, “Dâng, kei ka’ntetna ram a inle sik jo eng.”
31Moses’n ati, “Lungsettak a keini adahlon mak roh. Nangni’n ramhâng thōia kanrephōr sakna sik hmun kha’m namanhret, keini hlam nanikei thei sik ung. 32Keini leh ni’nṭhōi inchu, Rōngpu’n vângṭhat apek rakip ung kha nang um kanchen pui sik che.”
Mipui Inthonsōt
33Mihe’n Sinai Tlâng intheng kha andahlon pha, ni 3 hlam a kase hei. Anrephōr matungna hmun kajongsōt sik a Rōngpu ṭongtep thingbôm kha pha rakip a anhma anmankei ṭhak a kae. 34Rephōr rakip a inphut an-inthonsōt pha Rōngpu sumtuk in sûna chu anchunga amakhu ri hei.
35Ṭongtep bôm kha se anphut katai, Moses’n hinga ati sik, “Ṭhōi jo roh, Rōngpu; na’nrepuihei kha kathek chai hei roh nakahōt hei kha ṭit-inpirna mantlân jo hei roh!”#Hl 68.1 36Khana an-inhngat kataia, ama’n hinga ati sik, “Rōngpu, Israel innshung lishing lishing hei hneng jo’nle jo roh.”
Tans Gekies:
MIJAHEI 10: KOMRBSI
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
Komrem Revised Bible - LEKHARABU INTHENG
Copyright © Bible Society of India, 2015.
Used by permission. All rights reserved worldwide.
