Mat 11

Ghunafta Yuhwana ta mnduha

Luk 7:18-35

1Manda kɗakwa *Yesu ta tsa tagha skwiha ŋa tsa duhwalha ni ghwaŋpəɗ his ya ná, ka sliʼaftá tsi hada ka laghu da ra luwaha ma tsa haɗik ya ŋa tagha skwiha, nda ya ŋa mna *Lfiɗa Gwaɗa.

Ɗawutá vla Yuhwana mnda maga batem

2Ma tsa fitik ya, ma gamak na Yuhwana mnda maga batem. Ka snaŋtá tsi ta mna gwaɗa ta *Kristi nda slnaha ta mag tsi. Ka ghunaftá tsi ta sanlaha ma duhwalha ni 3da ɗawaŋta da *Yesu kazlay: Kagha Kristi dzaʼa sagha ya re, ari ka kəzla ŋni ta sana mndu a na kəʼa. 4Ka Yesu nda həŋ mantsa: « Lawa mnanatá Yuhwana ta skwi ya snaŋ kuni nda skwi ya nghaŋ kuni. 5Nda ngha gwal si nda ghulpa ta vli. Ta mbaɗa gwal si nda raghwa səla taŋ. Nda mbamba gwal si nda rɗa mndu ta həŋ. Nda sna gwal si ka matghəm ta sləməŋ. Sliʼagap sliʼa gwal si ta rwuta. Mnana mna lu ta *Lfiɗa Gwaɗa ta gwal ka pɗu#11:5 Ngha ta Isaya 35:5-6, 61:1.. 6Rfu da mndu ya kul kwalaghutá zlghaftá iʼi, » kaʼa.

Gwaɗa Yesu ta ghəŋa Yuhwana

7Ta sliʼi duhwalha Yuhwana ka vru, ka mnə *Yesu ŋa dəmga ta gwaɗa ta Yuhwana, kaʼa mantsa: « Nahgani laghu kuni da nghay ma mtak na? Gagaɗak ta vyə falak rki laghu kuni da nghay na? 8Nahgani laghu kuni da nghay ɓa? Mndu ta suɗavata lgut nda bla rki laghu kuni da nghay? Ya wya gwal ta suɗavatá lgut nda bla nda bla ta həŋ ná, ma həga ga mghamha həŋ. 9Nu va skwi laghu kuni da nghay tama? *Anabi rki laghu kuni da nghay? Mantsa nzakwa ni, ka yu ta mnaghunata ná, malaghu mala tsa mndu ya ta anabi. 10Tsatsi tsa mndu mnə deftera Lazglafta ta gwaɗa ta ghəŋa ni kazlay: Wya yu ta tiŋlaghutá ghunafta mnda ɗa ka kagha ŋa payaghatá tvi#11:10 Ngha ta Malatsi 3:1. kəʼa ya. 11Kahwathwata ka yu ta mnaghunata na: Mataba inda mndu ya yaga marakw nda ya ná, haɗ mndu ya ta zlagapta ka malaghutá Yuhwana mnda maga batem wa. Tsaw tama ná, mndu ya ta htuta katakata ma ga mghama Lazglafta ná, malaghu mala ta tsatsi. 12Daga ta fitika Yuhwana mnda maga batem, ha ka sagha ta gitana, ta hwisay lu nda mbraku ta ga mghama Lazglafta. Ta zbay tsa gwal ta hwisay nda mbraku ya ta zluʼatá tsa ga mghama Lazglafta ya guli. 13Inda la anabi nda deftera Musa tani, mnumna həŋ ta gwaɗa ta ghəŋa tsa ga mghama Lazglafta ya, ha ka sagha ta fitika zlagapta Yuhwana. 14Ka ta kumay kuni ta snaŋta katsi ná, Yuhwana tsa Iliya dzaʼa vragaghata ya. 15Ka mamu mndu nda sləməŋa snay ka sna tsi.

16« Nda wa dzaʼa gra yu ta mnduha ta na zamana na na? Manda tskatá vgha zwani ta luma ta tsgha lwi ŋa graha taŋ 17kazlay: Vyanafha ŋni ta siŋlak ná, skala a kuni wu, fanafha ŋni ta laha ta ŋa ɗa ghəŋ, tawa a kuni wu kəʼa ya həŋ. 18Saghaha Yuhwana, za a ta skwi wu, sa a ta skwi wu, “aʼ nda halaway ma ghəŋa ni!” ka mnduha nda tsi. 19Saghaha *Zwaŋa mndu, ta zay ta skwi, ta say ta skwi, “aʼ mamblahawa ya, dagala sasakwani, aʼ gra gwal tska dzumna, nda gwal dmaku ya,” ka həŋ nda tsi. Kulam nda tsa, ta nghaku ɗifila Lazglafta ma slnaha ni. »

Sana luwaha ta kwalaghutá zlghaftá Yesu

Luk 10:13-15

20Tahula tsa tama, ka tsukunustá tsi nda gwaɗa ta luwaha ya maga tsi katakata ta mazəmzəmha ni mida, kabga kwalaghuta taŋ ta mbəɗanaftá nzakwa taŋ. Kaʼa mantsa: 21« Ɗaŋwa ŋa gha luwa Kwariziŋ! Ɗaŋwa ŋa gha luwa Betsayda! Ka má tsa mazəmzəm mag lu ma luwa gha ya, má maga ma luwa Tir, nda luwa Tsiduŋ lu katsi ná, má gitagita a ta mbəɗanaftá həŋ ta nzakwa taŋ ka pghavatá buhu nda hutiɗif ta vgha#11:21 Kwariziŋ, Betsayda, Tir, Tsiduŋ: Ngha ta Isaya 23:1-18, nda Izekiyel 26, nda Yuʼel 4:4-8, Amus 1:9-10. wa. 22Tsaya ta kəl yu ka mnaghunata kazlay: Baɗu tsay dzaʼa tsə Lazglafta ta guma ta ghəŋa mnduha ná, ta dər dər ŋa luwa Tir nda luwa Tsiduŋ dzaʼa nzakwa tsi ka ŋa ghuni.

23« Kagha guli Kafarnahum! Dzaʼa kapay Lazglafta ta iʼi ta luwa ka kagha ta gray ra? Bukwa a gha tsa! Dzaʼa vradagha vra lu tɗəm da vla gwal nda rwa. Ka má tsa mazəmzəm maga lu ma luwa gha ya, má maga ma luwa Sədum lu katsi ná, má ta tekeʼa luwa Sədum gita na#11:23 Ngha ta Isaya 14:13-15, Sədum Ngha ta Zlrafta 19:24-28.. 24Tsaya ta kəl yu ka mnaghunata kazlay: Baɗu tsay dzaʼa tsə Lazglafta ta guma ta ghəŋa mnduha ná, ta dər dər ŋa luwa Sədum dzaʼa nzakwa tsi ka ŋa gha kəʼa. »

Snanamta Yesu ta Da ni ta gwal ka zwana ni

Luk 10:21-22

25Ma va tsa fitik ya, ka *Yesu mantsa: « Ta rfay yu ta kagha Da, Mghama luwa nda haɗik tani, kabga ɗifana ɗifa ka ta na skwiha na da gwal nda ɗifil ma ghəŋa taŋ, nda gwal nda sna ta skwi#11:25 Ngha ta 1 La Kwareŋt 1:17-29., ka maranatá ka ta zwani. 26Manda va tsa nzakwa ni Da, ta rfay yu ta kagha, ma zɗakwa gha nzakwa tsi mantsa.

27« Da ɗa ta vliha ta inda skwi. Haɗ sana mndu nda sna ta Zwaŋ wa, ba Da yeya nda sna. Haɗ sana mndu nda sna ta Da guli wa, ba Zwaŋ yeya nda sna, nda mndu ta kum Zwaŋ ta maranata, » kaʼa.

Sagha da Yesu ŋa mutsa mbiʼa vgha

28« Saghawa sa da iʼi inda kaghuni gwal nda hərfa da ndəgaku ka mbiʼaghunapta yu ta vgha. 29Zba a yu ta nzaghunaghata wa. Klawa kla ta ndəgaku ya ta klə yu, ka tagha kuni ta skwi da iʼi, mantsa ya dzaʼa kəl kuni ka mutsaftá mbiʼa vgha. 30Manda va tsaya nzakwa ni, skwi ya dzaʼa faghunaghata yu ná, ndəgaghunata a wa. Kafkafani nzakwa ni, » kaʼa.

Tans Gekies:

Mat 11: xed

Kleurmerk

Deel

Kopieer