Mat 12
12
Zwaŋa mndu Mgham ta ghəŋa Sabat
Mak 2:23-28, Luk 6:1-5
1Ma va tsa fitik ya, baɗu fitika Sabat, ka lab i *Yesu nda duhwalha ni nda ma vwaha hya. Ka kuzlanaftá maya ta duhwalha ni. Ka ɓalaʼatá həŋ ta ghəŋa alkama#12:1 Ngha ta Vrafta ta Zlahu 23:26. ŋa dghaɗay. 2Nghay la *Farisa ta tsa skwi ta mag həŋ ya ná, ka həŋ nda Yesu mantsa: « Ngha ta duhwalha gha ɓa! Waʼa həŋ ta maga skwi kul raku ka magay baɗu Sabat#12:2 Ngha ta Sabi 34:21., » ka həŋ nda tsi. 3Ka Yesu nda həŋ mantsa: « Ta dzaŋaf a kaghuni ta skwi ya maga Dawuda kuzlanafər maya, nda gwal kawadaga nda tsatsi tani ra? 4Ka lam həŋ da həga Lazglafta ka zuta həŋ ta skwa zay fana lu ta Lazglafta. Haɗ sana mndu ta za tsa skwa zay ya, dər Dawuda, dər tsa gwal kawadaga nda tsi ya mazlay wu, ba gwal dra skwi ŋa Lazglafta#12:4 Ngha ta 1Samuyel 21:2-7, nda Zlahu 24:9. yeya ta zay. 5Ari ta dzaŋaf a kuni ma deftera zlahu kazlay: Baɗu Sabat ná, ta zluŋ zla gwal dra skwi ŋa Lazglafta ta zlaha Sabat ta mag həŋ ta slna ma həga Lazglafta, ksaf a ta həŋ ka dmaku#12:5 Ngha ta Mbsak 28:9-10. wu kəʼa na? 6Tsaw ka yu ta mnaghunata ná, mamu sana skwi hadna ta malaghutá həga Lazglafta. 7Ka má nda sna kuni ta klatá ghəŋa skwi mnə lu kazlay: Tawa hiɗahiɗa skwi ta zɗəgihata pla ghəŋ nda rini#12:7 Huseya 6:6, nda Mata 9:13. a wu kəʼa ya ná, má haɗ kuni dzaʼa mnay kazlay: Maga maga həŋ ta dmaku, kəʼa nda tsa gwal kul haɗ dmakwa taŋ ya wa. 8*Zwaŋa mndu ná, tsatsi mgham ta ghəŋa fitika Sabat, » kaʼa.
Mbanafta Yesu ta mndu nda mta dzva ni
Mak 3:1-6, Luk 6:6-11
9Ka sliʼaftá *Yesu ka zlaŋtá tsa vli ya, ka laghu da həga tagha skwa la *Yahuda. 10Hada, mamu sana mndu nda mta dzva ni. Ka mnduha ɗawaŋta da Yesu mantsa: « Vla vla zlaha mu ta tvi ŋa mbanaftá mndu baɗu Sabat re, ari ki na? » ka həŋ nda tsi ŋa mutsaftá rutsak tida. 11Kaʼa nda həŋ mantsa: « Wa ya mataba ghuni, ka dəɗaghatá kɗakwa tuwaka ni turtuktuk da gudzuvruŋ baɗu Sabat, dzaʼa kwal kul kligiŋtá tsa tuwaka ni ya na? 12Malaghu mala a mndu ka tuwak ra? Tsaya tama ná, pyaf a lu ta mndu ka maga zɗaku baɗu Sabat wa, » kaʼa. 13Kaʼa nda tsa mndu nda mta dzva ni ya mantsa: « Tɗap dzva gha, » kaʼa. Ka tɗaptá tsi, gi yəmaɗ vravafvra tsa dzva ni ya manda va tsa sana ni ya.
14Ka gi gazlagaptá la *Farisa, ka laghu dzrəku ŋa zba tvi ŋa zaɗiŋtá Yesu.
Yesu ná, kwalva ya zbap Lazglafta ya
15Tsatsafta *Yesu ta tsa ndana taŋ ya, ka sliʼaftá tsi ma tsa vli ya, ka laghu. Ka sliʼaftá dəmga guli ka laghu mista ni, ka mba mbə tsi ta inda gwal ma ɗaŋwa. 16Ka zlahanaghatá tsi ta həŋ ka ŋɗaŋɗa kazlay: Yaha yaha kuni da mnihata kəʼa. 17Kəl tsi ka mnay mantsa ya ná, nda nza ŋa dzanaghatá ghəŋa gwaɗa ya mna anabi Isaya kazlay:
18Wya kwalva ɗa ya zbap yu, ya ɗvu yu, ya ta zɗəgihata katakata, dzaʼa fanagha fa yu ta Sulkuma ɗa, dzaʼa mnana mna ta inda mndəra mndu kazlay: Tɗukwa guma ɗa kəʼa.
19Zbəta a ta zlərɗa wi wa. Dzəta a ta lawlaw wa. Haɗ mndu dzaʼa snaŋta ta gugɗaku ta pazlala wa.
20Haɗ dzaʼa kɗəgliŋtá ɓlanaptá sulam nda ghada ŋatá ni wa. Haɗ dzaʼa kɗiŋta mtəgliŋtá pitirla ta mtaku mtaku guli wa. Mantsa ya dzaʼa maga tsi ha ka vlaŋta ni ta za ghwa ta skwi tɗukwa.
21Ŋa fafta mndəra mnduha ta ghəŋa taŋ ta hga ni#12:21 Ngha ta Isaya 42:1-4. kəʼa ya.
Ghzliŋta Yesu ta ghwaɗaka sulkumha
Mak 3:22-30, Luk 11:14-23
22Ka kladaghatá lu da *Yesu ta sana mndu ksu ghwaɗaka sulkum ta ghulpiŋta, ka tsiŋta ka rgha guli. Ka mbanaftá tsi. Ka gwaɗ tsa mndu ya ta gwaɗa tsəleŋ, ka nghaŋtá tsi ta vli tsiɗiɗ guli. 23« Zlah zwaŋa Dawuda a na mndu na wu re? » ka mnduha ka ndərmimay.
24Na snaŋta la *Farisa ta tsa skwi ya, ka həŋ mantsa: « Nda mbrakwa halaway#12:24 Ngha ta 10:25. ta nzakway ka mghama ghwaɗaka sulkumha ya ta ghazla tsi ta ghwaɗaka sulkumha, » ka həŋ.
25Tsaw nda sna Yesu ta skwi ta ndanu həŋ. Kaʼa nda həŋ mantsa: « Ka ta lmuvuslma va tsa ga mgham turtuk ya ta lmu katsi ná, sladglata a tsa ga mgham ya wa. Ka ta lmuvustalmu gwal ma luwa turtuk, ka gwal ma həga turtuk a tsi guli ta lmu ná, haɗ ya dzaʼa sladglata ma həŋ guli wa. 26Ka si ta ghəzlay halaway ta halaway katsi ná, dgavap dga tsa halaway ya nda tsa tama. Waká ga mghama ni dzaʼa sladglata tama na? 27Ka si nda mbrakwa Halaway ta ghəzla yu ta ghwaɗaka sulkum ya ní, nda mbrakwa wa ta ghazla zwana ghuni guli? Tsaya tama, vərɗa hahəŋ dzaʼa tsaghunatá guma ni. 28Ala, ka si nda Sulkuma Lazglafta ta ghəzla yu ta ghwaɗaka sulkumha katsi, ɓhavaghunaɓha ga mghama Lazglafta nda tsa tama.
29« Ari, waká mndu dzaʼa laviŋtá lami da həga ga mndu nda mbra ka hluguduŋtá huzla ni ta kul habaftá tsi ta tsa mndu nda mbra ya na? Tahula tsaya dzaʼa kəl tsi ka hluguduŋtá huzla ni.
30« Mndu kul haɗ mista ɗa ná, ghuma ɗa tsa mndu ya. Mndu kul haɗ ta katihata nda tskanata guli ná, kwizidiŋtá ŋa tsa mndu ya ta kwizay. 31Tsaya ta kəl yu ka mnaghunata kazlay: Inda dmaku ta gə mndu, nda rutsak ya ta pghə tsi ta Lazglafta ná, dzaʼa plinis pla lu ta həŋ. Ama mndu ta vzaftá rutsak ta Sulkum nda ghuɓa ná, haɗ lu dzaʼa plinistá dmakwa ni wa. 32Ka vzaf vza mndu ta rutsak ta *Zwaŋa mndu katsi, dzaʼa plinis pla lu ta dmakwa ni. Ama mndu ta vzaftá rutsak ta Sulkum nda ghuɓa ná, haɗ lu dzaʼa walaŋtá plinistá dmakwa ni, dər ta na zamana na, dər ta zamana dzaʼa sagha wa. »
Fu nda yakwa ni
Luk 6:43-45
33« Ka si zɗa ya fu ya, ka lu ná, zɗa yakwa ni. Ka si zɗa a ya fu ya wu, ka lu ná, zɗa a yakwa ni guli wa, kabga ta yakwa ni ta tsatsafta lu ta fu. 34Mndəra la mupuha na! Waká kuni si má dzaʼa mnagaptá skwi ɗina, kaghuni la ghwaɗak na! Ka nu ndəghatá skwi ma ŋuɗufa mndu ta mnigiŋta wubisima mndu. 35Ŋərma mndu ná, ma tsa ŋərma skwiha ma ŋuɗufa ni ya ta kligista tsi ta skwi ɗina. Ghwaɗaka mndu guli ná, ma tsa ghwaɗaka skwiha ma ŋuɗufa ni ya ta kligista tsi ta ghwaɗaka skwi. 36Ka yu ta mnaghunata ná, nda wa taŋ dzaʼa mnəgiŋta mnduha baɗu guma ta inda ŋaslu ya brəfəgiŋ həŋ. 37Nda gwaɗa ma wa gha dzaʼa tsaghaghata lu ta guma. Ka ŋa kwala dmakwa gha kul haɗ tsi, ka ŋa nzakwa dmakwa gha mamu a tsi. »
Zlgha wa Yesu ŋa gwal ta ɗawa mazəmzəm
Mak 8:11-12, Luk 11:29-32
38Ka sanlaha ma gwal tagha zlahu ŋa mnduha, nda sanlaha ma la *Farisa guli, nda *Yesu mantsa: « Mghama ɗa, ta kumay ŋni ta magata gha ta mazəmzəm ŋa grafta ŋni kazlay: Sa daga da Lazglafta ka kəʼa, » ka həŋ.
39Ka Yesu nda həŋ mantsa: « Ghwaɗak mnduha ta na fitik na. Haɗ həŋ ta zləŋa Lazglafta wa. Ta ɗawa mazəmzəm həŋ. Haɗ sana mazəmzəm dzaʼa maganata lu ta həŋ, ka tsa ŋa anabi Yunusa ya a tsi wa. 40Manda va ya maga anabi Yunusa ta vaghu hkən nda rviɗik hkən ma huɗa mghama klipi#12:40 Ngha ta Yunusa 2:1. ya, manda va tsaya guli dzaʼa magata Zwaŋa mndu ta vaghu hkən nda rviɗik hkən ma haɗik. 41Ghalya guli, gwal ma luwa Ninive ná, sna sna həŋ ta gwaɗa anabi Yunusa#12:41 Yunusa 1-4., ka mbəɗanaftá həŋ ta nzakwa taŋ. Wana mamu mndu ta malaghutá anabi Yunusa hadna. Baɗu tsay dzaʼa tsə Lazglafta ta guma ta ghəŋa mnduha, “ŋa ghuni dmaku,” ka gwal ma luwa Ninive dzaʼa sliʼafta mnay ŋa mnduha ta na fitik na. 42Ghalya, ka sliʼaftá sana marakw ta ga mgham ma vli diʼiŋ nda ga maghura#12:42 Ngha ta 1 Mghamha 10:1-10., ka lagha da sna ɗifila Salumuŋ. Wana mamu mndu hadna ta malaghutá Salumuŋ nda ɗifil. Baɗu tsay dzaʼa tsə Lazglafta ta guma ta ghəŋa mnduha, “ŋa ghuni dmaku,” ka tsa marakw ya dzaʼa mnanatá mnduha ta na fitik na. »
Vradamta ghwaɗaka sulkum da mndu
Luk 11:24-26
43« Ka sab sa ghwaɗaka sulkum ma mndu katsi, ŋa dzaʼa ni da ra vli tuhwayaŋ tuhwayaŋa ka zba vli ŋa mbiʼa vgha ni. Ka triɗ mutsaf a tsi ta tsa vli ŋa mbiʼa vgha ni ya wu katsi, 44“ka vra yu da tsa həga ɗa sab yu mida ya gra,” kaʼa dzaʼazlay, ŋa sliʼafta ni ka vradaghata. Ka ta vradaghatá tsi nda tsukwa vli mida, nda paya ɗina katsi, 45yawa da! kəʼa dzaʼazlay ŋa vraghuta ni, ŋa hlanakta ni ta sanlaha ma ghwaɗaka sulkumha ndəfáŋ ta malaghutá tsatsi nda sidi. Ŋa lama taŋ da tsa həga ya ka nzamta mida. Mantsa tama, dzaʼa nzakway ɓadzatá nzakwa tsa mndu ya ka malaghutá nzakwa ni taŋtaŋ. Manda va tsaya dzaʼa nzakwa tsi nda na mnduha ta na ghwaɗaka fitik na, » kaʼa.
Vərɗaka mnduha Yesu
Mak 3:31-35, Luk 8:19-21
46Tata gwaɗa tsa gwaɗa ya *Yesu nda dəmga ná, ka ɓhadaghatá i ma ni nda zwana ma ni, ka nzaghutá həŋ mabli, ka zbə həŋ ta gwaɗganata. 47Ka sana mndu nda tsi mantsa: « Waʼa i ma gha nda zwana ma gha mabli ta zba gwaɗgaghata, » kaʼa nda tsi. 48Ka Yesu nda tsa mndu ta mnay ŋa ni ya mantsa: « I wa i ma ɗa nda zwana ma ɗa na? » kaʼa nda tsi. 49Ka fadaptá tsi ta dzvu təv duhwalha ni, kaʼa mantsa: « Wana i ma ɗa nda zwana ma ɗa. 50Dər wati ma mndu ta maga skwi ya kumaŋ Da ɗa ta nzakway ta luwa ná, tsa mndu ya ta nzakway ka zwaŋama ɗa, nda makuma ɗa, nda ma ɗa, » kaʼa.
Tans Gekies:
Mat 12: xed
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
© Wycliffe Bible Translators, Inc. All rights reserved.
