Mat 10

Hga duhwalha Yesu ghwaŋpəɗ his

Mak 3:13-19, Luk 6:12-16

1Ka hagaftá *Yesu ta duhwalha ni ghwaŋpəɗ his. Ka valaŋtá tsi ta mbrakwa ghazla ghwaɗaka sulkum, nda mbamba mnduha ma inda ɗaŋwaha, nda ya ma inda ɗaŋwaha ta raghwa mndu nda raghwa ta həŋ. 2Wya hga tsa gwal ghwaŋpəɗ his ya: Taŋtaŋa ni, Simuŋ ta hgə lu ka *Piyer, nda Andre ta nzakway ka zwaŋama ni, nda Yakubu zwaŋa Zebedi, nda Yuhwana ta nzakway ka Zwaŋama ni, 3nda Filip, nda Bartelemi, nda Tuma, nda Mata mnda tska dzumna, nda Yakubu zwaŋa Alfe, nda Tade, 4nda Simuŋ mnda la Kananit, nda Zudas Iskaryut ta skwaptá Yesu ya.

Ghunafta Yesu ta duhwalha ni ghwaŋpəɗ his

Mak 6:7-13, Luk 9:1-6

5Tsa gwal ghwaŋpəɗ his ya ghwanagha *Yesu da luwa. Kaʼa nda həŋ ma kɗaku tsi ka ghuna həŋ mantsa: « Yaha kuni dzaʼa da mndu kul nzakway ka la *Yahuda. Yaha kuni lami da luwa la Samari. 6Lawa təv la Israʼila, hahəŋ ná, nda nza həŋ manda tuwak nda zaɗa. 7Lawa ka mna kuni ŋa taŋ kazlay: Ndusagagha ndusa ga mghama Lazglafta, kəʼa. 8Ka mbamba kuni ta gwal kul ɗughwanaku, ka sliʼaganapta kuni ta gwal nda rwa, ka mbambanafta kuni ta gwal nda ksa da rɗa mndu, ka ghazliŋta kuni ta ghwaɗaka sulkumha. Zlghaf ka mbalay kaghuni ka vla kaghuni guli ka mbalay. 9Yaha kuni klaftá dər dasu, dər tsedi, dər skwi ŋa da manaka tsedi ma zliba ghuni. 10Yaha kuni klaftá dər zliba mbuluh. Turtuktuk ka kuni da klaftá lgut. Yaha kuni klaftá ɓaɓah, dər dafa, kabga nda ra ka mutsay mnda slna ta skwa zay ni#10:10 Ngha ta 1 La Kwareŋt. 9:14, nda 1 Timute. 5:18..

11« Ka lam la kuni da luwa dagala, dər da zwaŋa luwa a tsi, zbawa zba ta mndu ya nda fa vgha ni ŋa tsuʼaftá kaghuni. Ka nzata kuni ga tsa mndu ya ha ka sagha fitika sliʼafta ghuni. 12Ta lam kuni da həga ga mndu ya, “ka nza zɗakwa Lazglafta nda kaghuni#10:12 Ka nza zɗaku nda kaghuni: Tsaya ga zgwa la Yahuda ta lagha həŋ da mndu.,” ka kuni dazlay. 13Ka nda fa vgha gwal ma tsa həga ya ŋa tsuʼa zɗaku katsi, dzaʼa nzaku tsa zɗakwa ghuni ya ta ghəŋa taŋ. Ala, ka fa a vgha taŋ wu katsi, ka vragaghu vra tsa zɗakwa ghuni ya da kaghuni. 14Ka kwalaghu kwala lu ta tsuʼaftá kaghuni snaghuna a lu ta gwaɗa ghuni wu katsi, sliʼapwa sliʼa ma tsa həga ya, ka ma tsa luwa ya a tsi, ka tukwiŋta kuni ta rgitik ta səla ghuni. 15Kahwathwata ka yu ta mnaghunata, baɗu tsay dzaʼa tsə Lazglafta ta guma ta ghəŋa mnduha ná, ta dər dər ŋa luwa *Sədum nda Ghamura dzaʼa nzakwa tsi ka ŋa mnduha ma tsa luwa ya. »

Skwi dzaʼa slanaghatá duhwalha Yesu

Mak 13:9-13, Luk 21:12-17

16« Wana yu ta ghuna kaghuni manda tuwakha da taba kramtak mtakha. Ka nzata kuni nda hiɗa manda nahaɗik, manda ghərbuʼ kul haɗ gwaɗa ta ghəŋa ni ya ká kuni da nzata guli. 17Ɗasuwa ká kuni, dzaʼa hlay mnduha ta kaghuni da vla guma. Dzaʼa sləvay həŋ ta kaghuni nda gaslərɓaha ma həga tagha skwa taŋ. 18Dzaʼa hlay lu ta kaghuni, kabga gwaɗa ta iʼi ta kəma ŋumna nda ya ta kəma mghamha. Ŋa nzakwa ghuni ka masləmtsəka ɗa ta kəma taŋ, nda ya ta kəma sanlaha ma mndəra mnduha. 19Ka hlaf hla lu ta kaghuni ka hladaghata ta kəma guma katsi, yaha kuni da ndana skwi ŋa mnay ghuni, nda ya ka kuni dzaʼa da gwaɗay. Dzaʼa vlaghuna vla Lazglafta ta gwaɗa ya ŋa gwaɗay ghuni ma va tsa fitik ya. 20Tsa gwaɗa dzaʼa kuni gwaɗay ya ná, kaghuni a dzaʼa gwaɗay wu, Sulkuma Da ghuni dzaʼa gwaɗay nda ma kaghuni.

21« Zwaŋama ni dzaʼa vlatá zwaŋama ni ŋa dzata. Da ni dzaʼa vlatá zwaŋa ni ŋa dzata. Dzaʼa ndəranava ndəra zwana taŋ ta dadaha taŋ, ŋa vlatá həŋ ŋa pslata. 22Dzaʼa husaŋ husa kuni ta inda mnduha ta ghəŋa gwaɗa ta iʼi. Ama mndu dzaʼa kɗanakta ná, dzaʼa mbaku. 23Ka ta giri lu ŋa ghuni ma sana luwa katsi, ka hwaya kuni da sana luwa. Kahwathwata ka yu ta mnaghunata, ma kɗaku kuni ka ranaftá inda luwaha la Israʼila ná, dzaʼa vragagha vra *Zwaŋa mndu.

24« Malaghu mala a mndu ta tagh lu ta skwi ŋa ni, ka mndu ta taghanatá skwi wa. Malaghu mala a kwalva ta daŋahəga ni həga ni guli wa. 25Laviŋ lava mndu ta taghanata lu ta skwi ta nzakway ka guram nda mndu ta taghanatá skwi. Laviŋ lava kwalva ta nzakway ka guram nda daŋahəga ni həga ni guli. Ka si halaway, ka lu ta hga daŋahəga ni həga ya ní, kighkigh ká lu dzaʼa hga gwal ma tsa həga ya tama? »

Faftá ghəŋ ta Yesu

Luk 12:2-7

26« Yaha kuni da zləŋa həŋ. Haɗ skwi bukwana lu dzaʼa kwal kul sabi ta daɓi wa. Haɗ skwi ɗifana lu dzaʼa kwal lu tsatsafta guli wa. 27Skwi mnaghuna yu ma grum ya ná, mnawa mna baŋluwa. Skwi mnaghuna lu ma sləməŋ ma sləməŋ ya guli ná, gugɗawa gugɗa ta wa lilwa. 28Ma zləŋ kuni ta gwal ta dzatá sluʼuvgha ta kwal kul laviŋta dzatá hafu. Lazglafta ta laviŋta zaɗanatá#10:28 Ngha ta Yakubu 4:12. sluʼuvgha nda hafu tani ma həga vu ya ŋa zləŋay katək. 29Haɗ lu ta skwaptá tiyti his ta kwaɓu ra? Kulam nda tsa ná, haɗ ya dər turtuk ma həŋ dzaʼa zaɗavaghuta kul ɗvaftá Da ghuni wa. 30Nduk nda swidi ma ghəŋa ghuni tani ná, mbəɗaf mbəɗa Lazglafta demdem. 31Yaha kuni da zləŋ, mal kaghuni sgita ni ka ndəghata tiytiha.

32« Tsaya tama, ka ŋa *Yesu iʼi ka mndu ta kəma inda mndu katsi ná, iʼi guli ná, ŋa ɗa na mndu na wu, ka yu dzaʼazlay ta kəma Da ɗa ta nzakway ta luwa. 33Ala, ka ŋa Yesu a#10:33 Ngha ta 2 Timute. 2:12. iʼi wu, ka mndu ta kəma mnduha ya guli ná, iʼi guli ná, ŋa ɗa a na mndu na wu, ka yu dzaʼazlay ta kəma Da ɗa ta nzakway ta luwa. »

Zɗaku a klagagha Yesu wa

Luk 12:51-53, 14:26-27

34« Yaha kaghuni da ndanay kazlay: Zɗaku klagagha iʼi da ghəŋa haɗik kəʼa. Kafay klagagha yu. 35Sagha sa yu da dganatá i zwaŋ nda da ni, ta i makwa nda ma ni, ta i ghwaʼali nda midza ni. 36Gwal ma həga ga mndu dzaʼa nzakway ka ghuma mndu ma va tsa həga#10:36 Ta ghəŋa aya 35-36, ngha ta Mika 7:6. ya. »

Vlatá ghəŋ manda ŋa Yesu

37« Ka malaghu mala ɗvafta mndu ta da ni ka ma ni a tsi ka iʼi ná, ta nza a tsa mndu ya ka ŋa ɗa wa. Ka malaghu mala ɗvafta mndu ta zwaŋa ni ka makwa ni a tsi ka iʼi ná, ta nza a tsa mndu ya ka ŋa ɗa guli wa. 38Ka kla a mndu ta udza zləŋay ni ka dzaʼa mista ɗa wu ná, ta nza a tsa mndu ya ka ŋa ɗa wa. 39Ka ta nzula hafa ɗa yu ka mndu katsi ná, dzaʼa zaɗiŋ zaɗa tsa mndu ya ta tsa hafa ni ya. Mndu ta zaɗiŋtá hafa ni ta gwaɗa ta iʼi guli ná, dzaʼa mutsay tsa mndu ya ta tsa hafa ni ya guli. »

Mndu ta tsuʼaftá duhwalha Yesu ná, Yesu tsuʼaf tsi

Mak 9:41

40« Ka tsuʼaf tsuʼa mndu ta kaghuni, iʼi tsaya tsuʼaf tsi. Mndu ta tsuʼaftá iʼi guli, mndu ta ghunagatá iʼi tsaya tsuʼaf tsi guli. 41Mndu ta tsuʼaftá anabi kabga nzakwa ni ka anabi ná, dzaʼa mutsay ta nisəla manda ya ta vlə lu ŋa anabi. Mndu ta tsuʼaftá mndu tɗukwa, kabga nzakwa ni ka mndu tɗukwa ná, dzaʼa mutsay ta nisəla manda ya ta vlə lu ŋa mndu tɗukwa. 42Mndu ta tanaftá dər leghwa imi ləŋləŋa yeya tsi ŋa say ta sani turtuk mataba tsa zwani ya, kabga nzakwa ni ka duhwala ɗa ná, kahwathwata ka yu ta mnaghunata, haɗ nisəla tsa mndu ya dzaʼa zwaɗuta wa. »

Tans Gekies:

Mat 10: xed

Kleurmerk

Deel

Kopieer