Kungani iPhasika?Isampula

Kungani simdinga uJesu?  

Mina nawe sadalelwa ukuhlala ebudlelwaneni noNkulunkulu. Kuze kube yilapho sithola lobo buhlobo, kuyohlale kukhona okushodayo ezimpilweni zethu. Ngenxa yalokho, sivame ukuqaphela igebe. Omunye umculi we-rock wakuchaza ngokuthi: "Nginobuze ngaphakathi."

Owesifazane othile, encwadini engibhalela yona, wabhala "ngesikhala esijulile." Enye intombazane encane yakhuluma "ngesiqephu esilahlekile emphefumulweni wayo."

Abantu bazama ukugcwalisa lowo mzwelo ngezindlela ezihlukahlukene. Abanye bazama ukuvala igebe ngemali, kodwa lokho akwenelisi. U-Aristotle Onassis, owayengomunye wabantu abacebe kakhulu emhlabeni, wathi ekupheleni kokuphila kwakhe: "Izigidi azihlanganisi njalo lokho umuntu akudingayo ekuphileni."

Abanye bazama izidakamizwa noma utshwala ngokweqile noma ukuziphatha okungekuhle kocansi. Enye intombazane yathi kimi: "Lezi zinto zinikeza ukwaneliseka okusheshayo kodwa zikwenza uzizwe ungelutho kamuva.’"Kanti abanye bazama ukuzikhandla, umculo, ezemidlalo noma ukufuna impumelelo. Kungase kungabi khona lutho olungalungile ngalokhu ngokwakho, kodwa akuyenelisi leyo ndlala ekujuleni kwawo wonke umuntu.

Ngisho nobuhlobo obuseduze kakhulu babantu, nakuba bubuhle kakhulu, abunelisi ngokwabo ngalo "muzwa ekujuleni kwangaphakathi." Akukho lutho oluyovala lesi sikhala ngaphandle kobuhlobo noNkulunkulu esadalelwa bona.

Ngokusho kweTestamente Elisha, isizathu salokhu ukungabi nalutho ukuthi abesilisa nabesifazane bafulathele uNkulunkulu.

Ujesu wathi: "Mina ngiyisinkwa sokuphila" (NgokukaJohane 6:35). Nguye kuphela ongasuthisa ukulamba kwethu okujulile ngoba nguye owenza kube nokwenzeka ukuba ubuhlobo bethu noNkulunkulu bubuyiselwe.

a) Wanelisa ukulambela kwethu injongo nenhloso yokuphila

Ebuhlotsheni noMdali wethu kuphela lapho sithola khona injongo yangempela yokuphila kwethu.

b) Usuthisa ukulambela kwethu ukuphila ngale kokufa

Abantu abaningi abafuni ukufa. Silangazelela ukusinda ngale kokufa. KuJesu Kristu kuphela lapho sithola khona ukuphila okuphakade. 

c) Usuthisa ukulambela kwethu intethelelo

Uma sithembekile, kuyodingeka sivume ukuthi sonke senza izinto esazi ukuthi azilungile. Ngokufa kwakhe esiphambanweni, uJesu wenza ukuba sikwazi ukuthethelelwa futhi sibuyiselwe ebuhlotsheni noNkulunkulu.