U-Eksodusi 38:9-31
U-Eksodusi 38:9-31 IBHAYIBHELI ELINGCWELE (ZUL59)
Walenza negceke; ngaseningizimu ohlangothini lwaseningizimu izilenge zegceke zaziyilineni elicolekileyo lemicu ephothiweyo, izingalo eziyikhulu. Izinsika zazo zazingamashumi amabili, nezinyawo zazo zazingamashumi amabili zethusi; izingwegwe zezinsika nezibopho zazo zaziyisiliva. Ngasohlangothini lwasenyakatho yizingalo eziyikhulu, izinsika zazo zingamashumi amabili, nezinyawo zazo zingamashumi amabili zethusi; izingwegwe zezinsika nemishayo yazo kwakuyisiliva. Ngasohlangothini olungasentshonalanga izilenge zaziyizingalo ezingamashumi ayisihlanu, izinsika zazo zaziyishumi, nezinyawo zazo zaziyishumi; izingwegwe zezinsika nemishayo yazo kwakuyisiliva. Nangasempumalanga ngasohlangothini olungasempumalanga yizingalo ezingamashumi ayisihlanu. Izilenge kwelinye icele lesango zaziyizingalo eziyishumi nanhlanu; izinsika zazo zazintathu, nezinyawo zazo zazintathu. Kwaba njalo nakwelinye icele: ngalapha nangalapha kwesango legceke zazikhona izilenge eziyizingalo eziyishumi nanhlanu; izinsika zazo zazintathu, nezinyawo zazo zazintathu. Zonke izilenge zegceke nxazonke zazingezelineni elicolekileyo lemicu ephothiweyo. Izinyawo zezinsika zaziyithusi, izingwegwe zezinsika nemishayo yazo kwakuyisiliva; izihloko zazo zazinamekwe ngesiliva; zonke izinsika zegceke zazinesibopho sesiliva. Iveli lesango legceke lalingumsebenzi womfekethisi ngokuluhlaza nangokububende nangokubomvu, nangelineni elicolekileyo lemicu ephothiweyo; ubude balo babuyizingalo ezingamashumi amabili, nokuphakama ngokobubanzi bezilenge kwakuyizingalo eziyisihlanu ngokulingene nezilenge zegceke. Izinsika zalo zazizine, nezinyawo zalo zazizine zethusi; izingwegwe zaziyisiliva, ukunamekwa kwezihloko nokwezibopho kwakuyisiliva. Zonke izikhonkwane zetabernakele* nezegceke nxasonke zaziyithusi. Lokhu kuyimali yetabernakele,* itabernakele lobufakazi, njengokubalwa kwayo ngesiyalezo sikaMose, ngokubala kwamaLevi ngesandla sika-Itamari indodana ka-Aroni umpristi. UBesaleli indodana ka-Uri kaHure, owesizwe sakwaJuda, wakwenza konke uJehova amyale ngakho uMose. Wayeno-Oholiyabe indodana ka-Ahisamaki, owesizwe sakwaDani, umqophi nengcweti nomfekethisi ngokuluhlaza nangokububende nangokubomvu, nangelineni elicolekileyo lemicu ephothiweyo. Lonke igolide okwasetshenzwa ngalo, wonke umsebenzi wendlu engcwele, igolide lomnikelo lalingamatalenta* angamashumi amabili nesishiyagalolunye namashekeli* angamakhulu ayisikhombisa namashumi amathathu ngokweshekeli lendlu engcwele. Isiliva lababebalwa esizweni lalingamatalenta* ayikhulu namashekeli* ayinkulungwane namakhulu ayisikhombisa namashumi ayisikhombisa nanhlanu ngokweshekeli lendlu engcwele, kwaba yilowo nalowo wanikela ngebeka* eliyinxenye yeshekeli* ngokweshekeli lendlu engcwele kubo bonke abadlulela kwababaliweyo abaneminyaka engamashumi amabili nangaphezulu, abantu abayizinkulungwane ezingamakhulu ayisithupha nantathu namakhulu ayisihlanu namashumi ayisihlanu. Amatalenta* ayikhulu esiliva ayengawokukhanda izinyawo zendlu engcwele, nezinyawo zesihenqo, izinyawo eziyikhulu ngamatalenta ayikhulu, italenta ngonyawo. Ngamashekeli* ayinkulungwane namakhulu ayisikhombisa namashumi ayisikhombisa nanhlanu wenza izingwegwe zezinsika, wanameka izihloko zazo, wazenzela izibopho. Ithusi lomnikelo laba ngamatalenta* angamashumi ayisikhombisa namashekeli* ayizinkulungwane ezimbili namakhulu amane. Wenza ngalo izinyawo zomnyango wetende lokuhlangana, ne-altare lethusi, nehele lalo lethusi, nezinto zonke ze-altare, nezinyawo zegceke nxazonke, nezinyawo zesango legceke, nazo zonke izikhonkwane zetabernakele, nazo zonke izikhonkwane zegceke nxazonke.
U-Eksodusi 38:9-31 IsiZulu 2020 (ZUL20)
Wenza negceke; ngaseningizimu kwakulenga amakhethini enziwe ngelineni lemicu ephothiweyo ecolekileyo, lingamakhubhithi ayikhulu ubude; izinsika zalo zazingama-20, nezisekelo zalo zethusi ezingama-20; izinkintsho zezinsika nezibopho kwakuyisiliva. Ngasohlangothini lwasenyakatho kunamakhethini angamakhubhithi ayikhulu ubude; izinsika zawo bungama-20, izisekelo zawo ezingama-20 zilithusi, izinkintsho namabhande kulisiliva. Ngasohlangothini lwasentshonalanga kulenga amakhethini angamakhubhithi angama-50 ubude, enezinsika ezilishumi, nezisekelo ezilishumi; izinkintsho namabhande kulisiliva. Ngasohlangothini lwasempumalanga kungamakhubhithi angama-50. Amakhubhithi ohlangothini lwesango ayengamakhubhithi ali-15, enezinsika ezintathu, nezisekelo ezintathu. Ngakolunye uhlangothi kusuka ngapha kuya ngale kwesango legceke kwakulenga amakhethini angamakhubhithi ali-15, enezinsika ezintathu, nezisekelo ezintathu. Onke amakhethini eyezungeze igceke ayenziwe ngelineni lemicu ephothiweyo. Izisekelo zezinsika zazilithusi; izinkintsho zezinsika namabhande akhona kulisiliva; izihloko zalo zicakwe ngesiliva, zonke izinsika zegceke zinezibopho zesiliva. Isihenqo sesango legceke sasihlotshiswe ngensonto eluhlaza okwesibhakabhaka, ngokubukhwebezane, ngokubomvu, nangelineni lemicu ephothiweyo elicolekileyo. Kwakungamakhubhithi angama-20 ubude, ukuphakama nobubanzi balo bungamakhubhithi ayisihlanu, kulingana namakhethini egceke. Kwakunezinsika ezine nezisekelo zazo ezine kungezethusi, izinkintsho zalo kungezesiliva, izihloko zazo zembozwe ngesiliva, nezibopho zalo zingezesiliva. Zazilithusi macala wonke zonke izikhonkwane zethabanakeli nezegceke. Lezi kwakuyizindleko zethabanakeli; ithabanakeli lesivumelwano, ezahlanganiswa njengokuyala kukaMose, umsebenzi wabaLevi wawuphansi kuka-Ithamari, indodana ka-Aroni umphristi. UBhezaleli indodana ka-Uri, kaHure wesizwana sakwaJuda, wenza konke lokho uSimakade ayeyale ngakho uMose. Wayeno-Oholiyabhe indodana ka-Ahisamakhi wesizwana sakwaDani, umqophi, nengcweti yokuhlobisa, ngokuluhlaza okwesibhakabhaka, ngokubukhwebezane, ngokubomvu, nangelineni elicolekileyo. Lonke igolide elasetshenziselwa lowo msebenzi, kuwo wonke umsebenzi wendawo engcwele, igolide lomnikelo lalingamatalenta angama-29, namashekeli angama-730 ngokweshekeli lendlu engcwele. Isiliva elathokala enhlanganweni eyayibaliwe laba ngamathalenta alikhulu, namashekeli ayi-1 775 ngokweshekeli lendlu engcwele. Umuntu ngamunye wanikela ngebeka, okunguhhafu weshekeli ngokweshekeli lendlu engcwele, kubo bonke ababebaliwe ngesikhathi bebalwa, kusukela kwabaneminyaka engama-20 kuya phezulu, emadodeni ayizi-603 550. Amathalenta ayikhulu esiliva ayengawokukhanda izisekelo zendawo engcwele, nezisekelo zesihenqo; izisekelo eziyikhulu zingamathalenta ayikhulu, kuyithalenta isisekelo ngasinye. Wenza izinkintsho zezinsika ngamashekeli ayi-1 775 wacaka izihloko zawo, wenza nezibopho zazo. Ithusi elalinikeliwe lalingamathalenta angama-70, namashekeli ayizi-2 400; wenza ngalo izisekelo zesango lethende lokuhlangana, i-althare lethusi, inetha lethusi, nazo zonke izimpahla ze-althare, zonke izisekelo ezizungeze igceke, nezesango legceke, nazo zonke izikhonkwane zethabanakeli nxazonke zegceke.
U-Eksodusi 38:9-31 Contemporary Zulu Bible 2024 (CZB24)
Wenza igceke: ohlangothini oluseningizimu, ngaseningizimu, izilenge zegceke zazingelelineni elicolekileyo lemicu ephothiweyo, izingalo eziyikhulu. Izinsika zawo zazingamashumi amabili, nezinyawo zazo zazingamashumi amabili zethusi; izisekelo zezinsika namasongo azo ayeyisiliva. Ngasohlangothini olusenyakatho izilenge zaziyizingalo eziyikhulu, izinsika zazo zingamashumi amabili, nezinyawo zazo zingamashumi amabili zethusi; izisekelo zezinsika namasongo azo esiliva. Ohlangothini olusentshonalanga izilenge zaziyizingalo ezingamashumi ayisihlanu, izinsika zazo zaziyishumi nezinyawo zazo zaziyishumi; izisekelo zezinsika namasongo azo esiliva. Futhi ngasohlangothini lwasempumalanga, ngasempumalanga, izingalo ezingamashumi amahlanu. Izilenge kolunye uhlangothi lwesango zaziyizingalo eziyishumi nanhlanu; izinsika zawo zibe ntathu, nezinyawo zawo zibe zintathu. Ngakolunye uhlangothi lwesango legceke ngapha nangapha kwakukhona izilenge eziyizingalo eziyishumi nanhlanu; izinsika zawo zibe ntathu, nezinyawo zawo zibe zintathu. Zonke izilenge zegceke nxazonke zazingezelineni elicolekileyo elinemicu emibili. Izinyawo zezinsika zazingezethusi; izisekelo zezinsika namasongo azo kwakuyisiliva; nezinduna zabo zokumboza ngesiliva; zonke izinsika zegceke zazigcwele isiliva. Izilenge zesango legceke zaziyimisebenzi yokuthungatha, okuyindwangu ebubende neyibubende nebomvu, nelineni elicolekileyo lemicu ephothiweyo; ubude babuyizingalo ezingamashumi amabili, nokuphakama ebubanzini buyizingalo eziyisihlanu, ngokwezilenge zegceke. Izinsika zawo zazizine, nezinyawo zawo zine zethusi; izinkintsho zawo zaziyisiliva, nesembozo sezinduna zawo namasongo awo esiliva. Zonke izikhonkwane zetabernakele nezegceke nxazonke zazingezethusi. Lezi ziyinani letabernakele, itabernakele lobufakazi, njengoko kwabalwayo ngokomthetho kaMose enkonzweni yamaLevi ngesandla sika-Itamari indodana ka-Aroni umpristi. UBhezaleli indodana ka-Uri indodana kaHuri, owesizwe sakwaJuda, wenza konke uJehova amyale ngakho uMose. Kanye naye kwakukhona u-Oholiyabe indodana ka-Ahisamagi, owesizwe sakwaDani, engumbazi, nomdwebi, nomfekethisi ngokububende nangokubomvu, nangokubomvu, nangelineni elicolekileyo. Lonke igolide elathathelwa umsebenzi kuwo wonke umsebenzi wendlu engcwele, igolide lomnikelo, lalingamatalenta angamashumi amabili nesishiyagalolunye namashekeli angamakhulu ayisikhombisa namashumi amathathu ngokweshekeli lendlu engcwele. Isiliva lababalwayo bebandla lalingamatalenta ayikhulu namashekeli ayinkulungwane namakhulu ayisikhombisa namashumi ayisithupha nanhlanu ngokweshekeli lendlu engcwele; ibheka ngendoda, inxenye yeshekeli ngokweshekeli lendlu engcwele, kubo bonke ababalwayo kusukela kwabaneminyaka engamashumi amabili kuya phezulu, amadoda ayizinkulungwane ezingamakhulu ayisithupha nantathu namakhulu amahlanu namashumi ayisihlanu. Amatalenta ayikhulu esiliva kwakubunjiwe izinyawo zendlu engcwele nezinyawo zesihenqo; izikhonkwane eziyikhulu zamatalenta ayikhulu, italenta esitheni. Ngamashekeli ayinkulungwane namakhulu ayisikhombisa namashumi ayisikhombisa nanhlanu wenza izisekelo zezinsika, wavala izigqoko zazo, wazigcwalisa. Ithusi lomnikelo lalingamatalenta angamashumi ayisikhombisa namashekeli ayizinkulungwane ezimbili namakhulu amane. Wenza ngalo izisekelo zomnyango wetende lokuhlangana, ne-altare lethusi, nocezu lwalo lwethusi, nezinto zonke ze-altare; nezinyawo zegceke nxazonke, nezinyawo zesango legceke, nezikhonkwane zonke zetabernakele, nezikhonkwane zonke zegceke nxazonke.