Amahubo 76:1-12

Kumholi wokuhlabelela ngeNeginoti. Ihubo lika-Asafa. KwaJuda uNkulunkulu uyaziwa; igama lakhe likhulu kwa-Israyeli. Futhi liseSalema itabernakele lakhe nendawo yakhe yokuhlala iseSiyoni. Waphula lapho imicibisholo yomnsalo, nesihlangu, nenkemba, nempi. Sela. Ukhazimula futhi uphakeme kunezintaba zempango. Abanamandla enhliziyweni baphangwa, balala ubuthongo babo, akwabakho noyedwa kwabanamandla owathola izandla zabo. Ngokukhuza kwakho, Nkulunkulu kaJakobe, kokubili inqola nehhashi kwehlelwa ubuthongo obunzima. Wena, yebo, uyesatshwa, futhi ubani oyoma phambi kwakho lapho uqala ukuthukuthela na? Uthumele ukwahlulela kuvela ezulwini; umhlaba wesaba, wathula; Lapho uNkulunkulu emi ukuba ahlulele, asindise bonke abathobekileyo bomhlaba. Sela. Impela, ulaka lomuntu luyakudumisa; Yenza isibambiso, ukhokhe kuJehova uNkulunkulu wakho; Uyoqeda umoya wezikhulu; uyesabeka emakhosini omhlaba.