SAN MARCOS 11
11
Jerusalén puebloman Jesús yaicushcamanta
(Mt 21.1-11; Lc 19.28-40; Jn 12.12-19)
1Jerusalén puebloman ña chayagricushpaca, Betfagé puebloman, shinallatac Betania pueblomanmi chayagrircacuna. Chaillapitacmi Olivos urcupish carca. Chaiman chayashpami, Jesusca paipac yachacuccunapuramanta ishcaita cacharca. 2Paicunataca:
—Chai chimbapi cac ashalla huasicunaman richic. Chaiman chayashpaca, pi manarac montashca shuc burro huatashca shayacuctami ricunguichic. Chai burrota cacharishpa apamugrichic. 3Cancuna cacharicucpi maijan ‘¿imapactac apacunguichic?’ nicpica: ‘Apunchic Jesusmi apachun cachan, chaimantami apacunchic. Ñallami saquic shamushun’ ninguichic— nirca.
4Paicuna rishpaca, huasi ñaupalla ñan pambapi shuc burro huatashca shayacucta tarishpami cacharicurcacuna. 5Chashna cacharicucpimi, maijan chaipi caccunaca:
—¿Ima nishpatac burrotaca cacharicunguichic?— nircacuna.
6Chashna nicpi, chai ishcai yachacuccunaca Jesús ima shina nichun nishca shinallatacmi nircacuna. Chashna nicpica, apachun saquircacunallami. 7Ña Jesuspacman chayamucpica, burrotaca churanacunahuanmi sudarcacuna. Ña sudashca burropimi, Jesusca montashpa rirca. 8Achcacunami paicunapac churanacunata Jesús rina ñanpi tendishpa churarcacuna. Shinallatac shuccunaca sacha ramacunatami p'itishpa, ñanpi churarcacuna.
9Chashna churashpaca, Jesuspac ñaupata riccunapish, huashata c'atishpa riccunapish:
—¡Taita Dios cachashca shamucucca, alli nishca cachun! ¡Sumac cushicui cachun! 10¡Ñucanchic ñaupa mandac David mandashca shina mandangapac shamucucca, alli nishca cachun! ¡Jahua pachapipish alli nishca cachun!— nircacunami.
11Jesusca chashna Jerusalenman chayashpami, Diosman mañana huasiman yaicurca. Chai ucupi tucuita ricushpaca, ña tutayagricpimi, paipac chunga ishcai yachacuccunandic Betania puebloman rirca.
Mana p'ucuc higo yurata chaquichishcamanta
(Mt 21.18-19)
12Cayandic punzha paipac yachacuccunandic Betania pueblomanta ña llucshicushpami, Jesusca yarcachirca. 13Chashna yarcaihuan ricushpaca, carumanta shuc p'angasapa higo yura shayacuctami ricurca. “Chai yuraca ñami p'ucushca canga” nishpami, ricungapac rirca. Chai yuraman chayashpa ricucpica, manarac p'ucuna punzhacuna pactashcamanta chushac p'angallami junda carca. 14Chaimantami Jesusca chai yurataca:
—Cunanmanta pacha cai yuramantaca, mana pi ashtahuan micungachu— nirca.
Chashna rimactaca, paipac yachacuccunaca uyacurcacunami.
Jesusca Diosman mañana huasimanta c'atuccunata
llucchishpa cachashcamanta
(Mt 21.12-17; Lc 19.45-48; Jn 2.13-22)
15Chai q'uipaca Jerusalén pueblomanmi chayamurcacuna. Chaipimi Jesusca Diosman mañana huasiman yaicushpa c'atuccunatapish, randiccunatapish llucchishpa cacharca. Shinallatac cullquita cambiaccunapac mizacunatapish, palomacunata c'atuccunapac tiyarinacunatapish tigrachishpami shitarca. 16Chashnallatac Diosman mañana huasi ucupica, pitapish imata apashca purichunca mana saquircachu.
17Jesusca chaipi caccunataca yachachishpami:
—Dios quillcachishcapica: ‘Ñuca huasica tucui llactacunamanta shamuccuna ñucaman mañana huasimi canga’ ninmi, ashtahuanpish cancunaca shuhuacuna miticuna machai shinatami ruhuashcanguichic— nirca.
18Chashna nicta uyashpaca, mandashcacunata yachachiccunapish, curacunata mandac curacunapish Jesustaca ima shina huañuchinatami yuyaricurcacuna. Tucui gentecuna “Jesusca allitami yachachin” ninacucta uyashcamantami, manchashpa huañuchinata munarcacuna. 19Ña tutayamucpica, Jesusca paipac yachacuccunandicmi Jerusalenmanta llucshishpa rirca.
Jesús rimashca higo yura chaquishcamanta
(Mt 21.20-22)
20Cayandic tutamanta ñanta ricushpaca, higo yurataca tucui sapindic chaquishcatami ricurcacuna. 21Chaita ricushpami, Pedroca Jesús nishcata yuyarishpaca:
—Riqui, Yachachic. Can ‘cai yuramanta ama pi micuchun’ nishca yuraca, ña chaquishcami— nirca.
22Shina nicpi Jesusca:
—Taita Diosca imatapish ruhuaclla cashcata crichic. 23Maijan cancunamanta tucui shunguhuan crishpa, mana caita chaita yuyashpa, cai urcuta ‘caimanta anchuri, jatun cuchaman shitari’ nicpica, shitarinmanllami. Chaica chashnatacmi canga. 24Chaimanta cancunaman huillanimi: Cancuna imata Taita Diosman mañashpapish, ña japishca shinata crishpa mañashpaca japinguichicmi. 25Chashnallatac cancuna Taita Diosman mañacushpaca, maijanta p'iñachishca cashpaca perdonaichic. Chashna ruhuacpimi, jahua pachapi cac cancunapac Taitapish cancunapac juchacunata perdonanga#11.25 Shinallatac maijan quillcacunaca versículo 26 tapish nishpami yapachincuna. Chaipica: “Cancuna shuccunata mana perdonacpica, jahua pachapi cac cancunapac Taitapish cancunapac juchacunata mana perdonangachu” ninmi.— nirca.
“¿Pitac cantaca chashna ruhuachicun?” nishpa, Jesusman
tapushcamanta
(Mt 21.23-27; Lc 20.1-8)
27Chai q'uipami Jerusalén puebloman cutimurcacuna. Chaipica Diosman mañana huasipi Jesús puricucpimi, Israel*f** curacunata mandac curacunapish, mandashcacunata yachachiccunapish, cunac yuyaccunapish paipacman cuchuyarcacuna. 28Shina cuchuyashpaca:
—¿Pi mandacpitac chashna ruhuacungui? ¿Pitac cantaca chashna ruhuachun mandarca?— nishpa tapurcacuna.
29Shina nicpi Jesusca:
—Ñucapish cancunaman tapusha nini. Ñuca tapushcata cancuna cutichicpica, ñucapish pi chashna ruhuachun mandashcataca huillashallami. 30Bautizac Juan bautizachunca, ¿Dioschu cacharca, mana cashpaca runacunallachu cacharca? Cancunapish huillaichic— nirca.
31Jesús chashna tapucpica, paicunapura caishuc chaishuc rimanacushpaca:
—‘Taita Diosmi cachashca’ nicpica: ‘Shinashpaca, ¿ima nishpatac Juan huillashcataca mana crircanguichic?’ ningami. 32‘Runacunallami Juantaca cacharca’ ninapish mana allichu— ninacurcacuna.
Tucui gentecuna “Juanca Diosmantatacmi huillacun” ninacucta uyashcamantami, gentecunata manchashpa imata mana ni pudircacuna. 33Chashna parlanacushpami Jesusmanca:
—Mana yachanchicchu— nircacuna.
Shina nicpi Jesusca:
—Shinashpaca, ñucapish pi mandacpi chashna ruhuacushcataca mana huillashachu— nirca.
Quichua Cañar Nuevo Testamento © United Bible Societies in Ecuador, 1996.