SAN MARCOS 12
12
Millaita ruhuaccunamanta Jesús chimbapurashpa parlashcamanta
(Mt 21.33-46; Lc 20.9-19)
1Chai q'uipami, Jesusca yuyaita japina parlocunahuan paicunata yachachishpa cashna nirca:
—Shuc runami uvas chagrata tarpurca. Chai tarpushcataca rumicunahuanmi muyundicta pircarca. Chai chagrallapitacmi, uvasta capishpa vinota ruhuanatapish ruhuarca. Chashnallatac tucui chagrata chapangapacpish, shuc torretami shayachirca. Tucui chaita ruhuashca q'uipaca, chai allpayuc runaca uvas p'ucucpica chaupinacungapacmi, shuc runacunaman saquishpa, caru llactaman rirca. 2Uvasta pallana punzha ña chayamucpica, chai allpayuc runaca paita servic shuc runatami, pai japina cashcata chaupimuchun cacharca. 3Ashtahuanpish chai cachashca runa shamucpica, chagrahuan saquiric runacunaca japishpami macashpa, imata mana cushpa cacharcacuna. 4Chashna ruhuacpipish, chai allpayuc runaca cutinmi shuc servicta cacharca. Paitapish rumicunahuan umata p'aquishpa, c'amishpami cacharca. 5Chashna ruhuacpica, chai allpayuc runaca cutin shuc servictami cacharca. Paitaca huañuchircacunami. Chashna huañuchicpica, allpayucca cutin tauca runacunatami cacharca. Chaicunatapish maijancunataca macarcacunami, maijancunataca huañuchircacunami.
6Ña tucuita cachashca q'uipaca, chai allpayuc runapacca paipac shuclla c'uyashca churimi tiyarcarac. ‘Ñuca churitaca manchashpa, manapishchari imata ningacuna’ nishpami, paitapish cacharca. 7Paipac churi shamucta chai runacuna ricushpacarin: ‘Paimi taita charishcacunataca tucui japinga. Chaimanta pai japinata ñucanchic japingapac huañuchishunchic’ nircacuna. 8Chashna ninacushpami, chai churitaca japishpa huañuchircacuna. Chaimantaca uvas chagramanta llucchishpami shitarcacuna.
9Chashna ruhuashcamantaca chai allpayuc runaca, ¿imatashi ruhuanga? Pai shamushpaca, chai runacunataca huañuchishpami, chai chagrata quichushpa shuccunaman cunga. 10Cancunaca Dios quillcachishcapi cashna nishcataca, ¿manachu ricushcanguichic? Chaipica:
‘Huasita ruhuaccuna mana nishca
shitashca rumillatacmi,
huasita ruhuangapac
callaripi churana,
tucuimanta yalli
alli rumi tucushca.
11Chaitaca Mandac Taita Diosmi
chashna ruhuashca.
Chaita ricushpami
yallita cushicunchic’ ninmi— nirca.
12Yuyaita japina parlocunahuan Jesús paicunata rimashcamantami, paicunaca “Jesusta prezu japishun” nishpa yuyarircacuna. Chashna yuyacushpapish gentecunata manchashcamantami, mana imata ruhuashpa rircacunalla.
“¿Impuestotaca paganachu canchic?” nishpa,
Jesusman tapushcamanta
(Mt 22.15-22; Lc 20.20-26)
13Chai q'uipami fariseocunapuramantapish,*f** Herodespac runacunapuramantapish, Jesusta juchanchingaraicu imallatapish tapuchun maijancunata cacharcacuna. 14Chai cachashca runacuna Jesuspacman chayashpaca:
—Yachachiclla. Canca imatapish cashcallatami yachachingui. Canca Dios munashca shina alli causachunpish, alli yachachicmi cangui. Canca pitapish mana manchashpa, mana piman tucushpami yachachingui. Mandashcapi nishca shinaca, ¿jatun mandac Cesarman*f** impuestota paganaca allichu canga? Mana cashpaca, ¿manachu alli canga? ¿Pagashunchu, manachu pagashun?— nishpa tapurcacuna.
15Paicuna nic tucushpalla tapushcata yachashpami Jesusca:
—¿Ima nishpatac ñucataca chashna tapushpa, pandachishun ninguichic? Shuc cullquita ricuchingapac apamuichic— nirca.
16Cullquita apamucpimi Jesusca:
—Cai cullquipica, ¿pipac shutitac, pipac ñahuitac tiyacun?— nicpi paicunaca:
—Jatun mandac Cesarpacmi— nircacuna.
17Shina nicpi Jesusca:
—Shinashpaca jatun mandac Cesarpac cashcataca, jatun mandac Cesarllamantac cuichic. Diospac cashcataca Diosllamantac cuichic— nirca.
Chashna nicpica, paicunaca mana amirishpami mancharishpa saquirircacuna.
Huañushcacuna causarinata mana criccuna Jesusman tapushcamanta
(Mt 22.23-33; Lc 20.27-40)
18Chai punzhacunallapitacmi, huañushcacuna causarinata mana cric saduceocuna*f** Jesusman cashna nishpa tapuc shamurca:
19—Yachachic, Moisés ñucanchicta mandashpaca: ‘Shuc runa manarac huahuata charishpa huañucpica, paipac quiquin huauquillatac chai viuda huarmihuan cazarashpa, huañuc huauquipac randi huahuacunata charichun’ nishpami, quillcashpa saquishca. 20Ñucanchicpurapica canchis huauquindiccunami causarcacuna. Chai canchis huauquindiccunamantaca punta huauqui cazarashpaca, manarac huahuata charishpami huañurca. 21Paipac q'uipa huauquipish, chai saquirishca huarmihuan cazarashpaca, shinallatac manarac huahuata charishpami huañurca. Cutin chaipac q'uipa huauquipish shinallatacmi tucurca. 22Chashnallatac chai tucui canchis huauquindiccunami chai huarmihuanca cazarashpa, manarac huahuacunata charishpa huañurcacuna. Chai q'uipaca, chai huarmipish huañurcami. 23Chashna canchis huauquindiccunapura chai huarmihuan cazarashca cashcamantaca, huañushcacuna causarina punzhapi paicuna causaricpica, ¿maijanpactac chai huarmica canga?— nircacuna.
24Chashna nicpimi, Jesusca cashna nirca:
—Cancunaca Dios quillcachishcapi ima nishcatapish, Taita Dios imatapish ruhuaclla cashcatapish mana yachashpami, yallita pandaricunguichic. 25Huañushcacuna causarina punzhapica c'aricunapish, huarmicunapish mana cazarangacunachu. Paicunaca jahua pachapi causac angelcuna shinami cangacuna. 26Zarza yurapi nina rupacuc chaupimanta Taita Dios rimashcata Moisés quillcashcataca, ¿manachu ricushcanguichic? Taita Diosca huañushcacuna causarina cashcamanta huillashpaca, chai yuramantami: ‘Ñucaca Abrahampac, Isaacpac, Jacobopac Diosmi cani’ nishca. 27Taita Diosca mana huañushcacunapac Dioschu, ashtahuanpish causaccunapac Diosmi. Shinashpaca, cancunaca yallitami pandaricunguichic— nirca.
“Mandashcacunamantaca, ¿maijantatac ashtahuan yalli
cazuna canga?” nishpa, Jesusman tapushcamanta
(Mt 22.34-40)
28Imata tapucpipish, Jesusca allitami cutichirca. Chashna rimanacucta uyashpami, mandashcacunata yachachiccunapuramanta shuc runa Jesuspacman cuchuyashpaca:
—Mandashcacunamantaca, ¿maijantatac ashtahuan yalli cazuna canga?— nishpa tapurca.
29Chashna tapucpi Jesusca cashnami nirca:
—Tucui mandashcacunamanta ashtahuan yalli cazunaca, caimi: ‘Uyaichic israelcuna,*f** ñucanchic Taita Diosca Mandac Diosmi. Paica shucllami. 30Chaimanta canta Mandac Taita Diosta cambac tucui shunguhuan, tucui almahuan, tucui yuyaihuan, tucui munaihuan c'uyangui’ ninmi. 31Cai mandashcapac q'uipapish, chai shinallatacmi nin: ‘Can quiquinllatac ima shinami c'uyaringui, chai shinallatac shuccunatapish c'uyangui’ ninmi. Cai mandashcacunamanta ashtahuan yalli cazunaca mana tiyanchu— nirca.
32Chashna nicpica, chai mandashcacunata yachachicca cashnami nirca:
—Yachachic, canca mana llullashpa allitami nishcangui. Shuclla Diosmi tiyan, ashtahuan shucca mana tiyanchu. 33Taita Diosta tucui shunguhuan, tucui yuyaihuan, tucui almahuan, tucui munaihuan c'uyanaca allimi. Chashnallatac quiquinta c'uyaric shinallatac shuccunatapish c'uyanaca allimi. Cai ishcai mandashcacunata pactachinami, animalcunata Diosman cushpa huañuchishpa, rupachinatapish ashtahuan yalli allica— nirca.
34Chashna mandashcacunata yachachic alli yuyaihuan cutichishcata Jesús uyashpami:
—Canca Taita Dios mandacucmantaca mana carupichu cangui— nirca.
Jesús chashna nicpica, pingaihuan pi imata mana ashtahuan tapurcacunachu.
Cristoca mandac Davidtapish Mandac cashcamanta
(Mt 22.41-46; Lc 20.41-44)
35Diosman mañana huasipi Jesús yachachicushpaca:
—Mandashcacunata yachachiccunaca, ¿ima nishpatac Quishpichic Cristotaca: ‘Mandac Davidpac aillupurami canga’ nincuna? 36Davidllatacmi Diospac Espíritu yuyaita cucpica:
‘Mandac Taita Diosca
ñucata Mandactaca:
“Canta p'iñaccunata
cambac chaqui sarunapi
ñuca churangacaman,
canca ñuca alli maquiman
tiyacuilla” nin’ nishcami.
37Chashna cacpica, Davidllatac paitaca: ‘Ñucata Mandac’ nicpica, ¿ima shinatac Cristoca Davidpac aillupurallaca cangayari?— nirca.
Chaipi cac achca gentecunaca: “Jesusca allimi yachachin” nishpami, sumacta uyarcacuna.
Mandashcacunata yachachiccunata Jesús rimashcamanta
(Mt 23.1-36; Lc 11.37-54; 20.45-47)
38Gentecunata Jesús yachachicushpaca, cashnami nirca:
—Mandashcacunata yachachiccuna yachachishcataca, pacta c'atinguichicman. Paicunaca mandac tucusha nishpami, pambacaman suni churanata churarishpa purinata munancuna. Chashnallatac mai plazacunapi tupaccunapish, tucui c'uyaihuan alabaduchunmi munancuna. 39Paicunaca mai tandanacuna huasicunapipish, mai jatun micuicunapipish punta alli tiyarinata mashcashpami, tiyarinata munancuna. 40Viuda huarmicunapac huasicunatapish quichuccunami. Chashna ruhuashpaca, alli ricurishun yuyashpami, Taita Diosman unaita mañac tucuncuna. Chashna ruhuashcamantaca, paicunallatacmi ashtahuan llaquita apangacuna— nirca.
Shuc huaccha viuda huarmi cullquita Diosman cushcamanta
(Lc 21.1-4)
41Jesusca Diosman mañana huasi ucupi cashpaca, Diosman cullquita churana chimbapurapimi tiyacurca. Gentecuna ima shina cullquita churactami ricucurca. Chaipica chayuccunami achca cullquita churarcacuna. 42Cutin shuc huaccha viuda huarmipish shamushpaca, ishcai ashalla valic cullquitami churarca. 43Chaita ricushpami, Jesusca paipac yachacuccunata c'ayashpaca:
—Cai huaccha viuda huarmimi, caishuccuna cushcata yalli Taita Diosmanca cushca. Chaica chashnatacmi. 44Caipi cunan churacuc chayucccunaca puchushcallatami cushcacuna, ashtahuanpish cai huarmica paipac causaipac ashallata charishpapish, Taita Diosmanca tucuimi cushca— nirca.
Quichua Cañar Nuevo Testamento © United Bible Societies in Ecuador, 1996.