SAN MARCOS 10
10
Cusandic huarmindicca mana raquirinacunamanta
(Mt 19.1-12; Lc 16.18)
1Jesusca Capernaum pueblomanta llucshishpaca, Jordán yacuta pasashpa, Judea llactamanmi rirca. Paipacman achca gentecuna tandanacumucpimi, Jesusca pai yachachic cashca shinallatac cutin yachachi callarirca. 2Shina yachachicucpimi, ima mana allita nicpica, juchanchingaraicu maijan fariseocuna*f** shamushpaca:
—Mandashcacunapi nishca shinaca, ¿cusaca paipac huarmimanta raquirinaca allichu canga?— nishpa, Jesusman tapurcacuna.
3Shina tapucpi Jesusca:
—Moisés mandashcapica, ¿imatatac cancunamanca ninyari?— nishpa tapurca.
4Shina tapucpi fariseocunaca:
—Moisesca: ‘Firmata cushpaca, huarmimantaca raquirinallami’ nishcami— nircacuna.
5Shina nicpi Jesusca:
—Cancuna sinchi shungucuna cacpimi, Moisesca chashna ruhuachunca saquishca. 6Ashtahuanpish Taita Diosca cai pachata ruhuashpaca, c'aritapish, huarmitapish ruhuarcami. 7Chaimantami c'arica taita mamata saquishpa, huarmihuan tandarishpa causanga. 8Chashna tandanacushpaca, ishcaimanta shucllami tucunga. Shinashpaca ña mana ishcaichu, ashtahuanpish shucllami can. 9Chashna cashcamanta Taita Dios tandachishcataca, pi mana ch'icanyachinachu can— nirca.
10Paipac yachacuccunaca Jesushuan ña huasipi cashpami, cutin chaillamantatac tapurcacuna. 11Shina tapucpi Jesusca:
—Maijanpish paipac quiquin huarmimanta raquirishpa shuc-huan cazarashpaca, juchallishpami causan. 12Shinallatac maijan huarmipish paipac cusamanta raquirishpa, shuc-huan cazarashpaca, juchallishpami causan— nirca.
Huahuacunamanta Jesús mañashcamanta
(Mt 19.13-15; Lc 18.15-17)
13Chai q'uipami, huahuacunapac uma jahuapi maquita churachun nishpa, Jesuspacman pushamurcacuna. Ashtahuanpish chai pushamuccunataca:
—Ama p'iñachic shamuichicchu— nishpami, yachacuccunaca jarcashpa rimarcacuna. 14Chashna jarcacucta ricushpami, Jesusca p'iñarishpa paipac yachacuccunataca:
—Saquichic, huahuacuna ñucapacman shamuchun ama jarcaichicchu. Cai huahuacuna shina caccunami Taita Dios mandacucmanca yaicunga. 15Maijanpish shuc huahua chasquic shina, Taita Dios Mandac cachun mana chasquicca, Taita Dios mandacucmanca mana yaicungachu. Chaica chashnatacmi canga— nirca.
16Shina nishpami, Jesusca huahuacunata marcashpa, paicunapac uma jahuapi maquita churashpa, Taita Dios paicunata bendiciachun nishpa mañarca.
Shuc chayuc runa Jesusman tapushcamanta
(Mt 19.16-30; Lc 18.18-30)
17Jesús chaimanta llucshishpa ñanta ricucpimi, shuc moso paipac ñaupaman callpamushpa cungurirca. Shina cungurishpaca:
—Alli yachachiclla, ñuca huiñai causaita charingapacca, ¿imatatac ruhuana cani?— nishpa tapurca.
18Shina tapucpimi Jesusca:
—¿Ima nishpatac ñucata alli ningui? Shucllami allica tiyan, chaica Taita Diosmi. 19Mandashcacunapi ima shina nicuctaca, canllatac yachanguimi. Chaipica: ‘Ama huaclliringui, ama huañuchingui, ama shuhuangui, ama llullangui, ama umangui, cambac taita mamata c'uyangui’ nicunmi— nirca.
20Jesús chashna nicpimi, chai runaca:
—Yachachic, tucui caicunataca huahuamanta pachami pactachicuni— nirca.
21Chashna nicpimi, Jesusca chai runata c'uyailla ricushpaca:
—Can chashna ruhuashca cashpapish, caitami ruhuanarac cangui: Cambac tucui ima charishcacunata c'atushpa, huacchacunaman cugri. Chashna cushpaca, jahua pachapica achcatami charingui. Chashna cushpaca, ñucata c'atingapac shamuilla— nirca.
22Jesús chashna nicpi chai runaca mai chayuc cashcamantami, llaquilla tucushpa rircalla. 23Chaimanta Jesús muyundic gentecunata ricushpa, paipac yachacuccunamanca:
—¡Chayuccunaca Taita Dios mandacucmanca mana utca yaicui pudingachu!— nirca.
24Chaita uyashpami yachacuccunaca munai mancharircacuna. Shina mancharicucpimi, Jesusca cutinllatac rimashpaca:
—¡Huahuacunalla! Maijanpish ima charishcallapi shunguta churacca, Taita Dios mandacucmanca mana utca yaicui pudincunachu. 25Shuc chayuc runa Dios mandacucman yaicunapac randica, shuc camello*f** animalchari auja rinrita mana jarcarishpa pasarinmanlla— nirca.
26Shina nicpicarin, yachacuccunaca ashtahuan mancharishpami:
—Shinashpaca, ¿pitac quishpiringayari?— nishpa, caishuc chaishuc tapunacurcacuna.
27Chashna mancharicpi Jesús paicunata ricushpaca:
—Gentecunapac yuyaipica, maita mana quishpiripacchu, ashtahuanpish Taita Diosmanca imapish ruhuaipacllami— nirca.
28Chashna nicpi Pedroca:
—Ñucanchicca tucui imalla charishcacunata saquishpami, cantaca c'aticunchic— nirca.
29Shina nicpi Jesusca:
—Maijanpish quishpirinamanta alli huillaita chasquishcamanta ñucata c'atingaraicu huasita, huauquicunata, panicunata, taita mamata, huarmita, huahuacunata, allpata saquishpaca, 30cai pachapica pasac cutinhuanmi huasicunata, huauquicunata, panicunata, mamacunata, huahuacunata, allpacunatapish chasquinga. Chashnallatac ñucata c'aticushcamanta gentecuna p'iñashpa llaquichicpipish, shamuc punzhapica huiñai causaitami charinga. Chaica chashnatacmi canga. 31Shina cacpipish achcacunami cunan alli nishcacunaca, yangalla cangacuna. Yangalla nishcacunaca, alli nishcami cangacuna— nirca.
Jesús cutin “ñucataca huañuchingacunami” nishcamanta
(Mt 20.17-19; Lc 18.31-34)
32Jesusca Jerusalén puebloman ñanta ricushpaca, paipac yachacuccunapac ñaupatami ricurca. Paicunaca manchai manchaillami Jesustaca c'aticurcacuna. Chashna manchaihuan c'aticucpimi, Jesusca chai chunga ishcai yachacuccunallata c'ayashpa, pai ima tucunata cutin huillai callarirca:
33—Cunanca Jerusalenman ricushcataca, cancunallatac yachanguichicmi. Chaipimi Runa Tucungapac shamushca*f** ñucataca, curacunata mandac curacunapacmanpish, mandashcacunata yachachiccunapacmanpish japishpa apangacuna. Paicunaca ñucataca ‘huañunami cangui’ nishpami, mana israelcunaman*f** cungacuna. 34Paicunaca ñucata pucllashpa asingacunami, macangacunami, t'ucangacunami, huañuchingacunami. Chashna huañuchicpipish, quimsa punzhapica causarishallami— nirca.
Jacobopish, Juanpish mañashcamanta
(Mt 20.20-28)
35Chashna nishca q'uipami, Zebedeopac churicunapuramanta Jacobopish, Juanpish Jesuspacman cuchuyashpaca:
—Yachachic, ¿ñucanchic mañashcata manachu ruhuanguiman?— nishpa tapurca.
36Shina nicpi Jesusca:
—¿Imatatac ruhuachun ninguichic?— nirca.
37Chashna nicpi paicunaca:
—Sumac mandanapi can tiyarishpaca, ¿manachu ñucanchictaca, shuctaca cambac alli maquiman, shuctaca cambac lluqui maquiman tiyachinguiman?— nircacuna.
38Shina nicpi Jesusca:
—Cancunaca imata mañacushcataca mana yachanguichicchu. Jayacta ubiac shina, bautizaric shina llaquicunataca, ¿ñuca shina apai pudinguichicchu?— nirca.
39Chashna nicpi paicunaca:
—Ari, chashna ruhuashunllami— nirca.
Chashna nicpi Jesusca:
—Ari, cancunaca jayacta ubiac shina, bautizaric shina llaquicunataca, ñuca shina apanguichicmi. 40Ashtahuanpish maijanta ñuca alli maquiman, lluqui maquiman tiyachinataca, Taita Diosmi maijanman allichishca cashpaca tiyachinga, ashtahuanpish mana ñucaca— nirca.
41Jesús chashna nicta caishuc chunga yachacuccuna uyashpaca, Jacobohuanpish, Juanhuanpish p'iñarircacunami. 42Chaimantami Jesusca paicunata c'ayashpa cashna nirca:
—Cai pachapi mandaccunallami, paicunapac llactapi causaccunataca paicuna munashcata ruhuachishpa charincuna. Shinallatac mandaccunapurapipish, maijan ashtahuan jatun cashpaca, paicunatapish mandanllami. Chaitaca cancunallatac yachanguichicmi. 43Ashtahuanpish cancunapurapica, mana chashnachu cana canguichic. Maijanpish punta mandac casha nishpaca, caishuccunata servinami canguichic. 44Shinallatac cancunapurapi maijanpish punta mandangapac alli nishca casha nishpaca, caishuccunata servinami canguichic. 45Runa Tucungapac shamushca*f** ñucaca, mana servichingapacchu shamurcani, ashtahuanpish servingapac, shinallatac achcacunamanta huañushpa quishpichingapacmi shamurcani— nirca.
Ñahui mana ricuc Bartimeo runata Jesús alliyachishcamanta
(Mt 20.29-34; Lc 18.35-43)
46Chaimantaca Jericó pueblomanmi chayarcacuna. Jericomanta Jesusca paipac yachacuccunandic, caishuc achca gentecunandic llucshishpa ricucpica, paicuna rina ñanpimi Timeopac churi Bartimeo runa tiyacurca. Paica ñahui mana ricuc cashpami, imallatapish mañashpa tiyacurca. 47“Nazaret pueblomanta Jesusmi shamucun” nicta uyashpami, chai runaca:
—Mandac Davidpac aillupuramanta Apunchic Jesús, ¡ñucataca llaquiyari!— nishpami, capari callarirca.
48Chashna caparicucpica:
—¡Ama caparichu, upallai!— nishpami, achcacuna rimashpa jarcarcacuna.
Paicuna chashna jarcacpipish, chai runaca:
—Mandac Davidpac aillupuramanta Apunchic Jesús, ¡ñucata llaquiyari!— nishpa, ashtahuan caparirca.
49Chashna caparicucpimi, Jesús chaillapi shayarishpaca:
—Paita c'ayamugrichic— nishpa cacharca.
C'ayangapac riccuna chai runataca:
—Jatari, ama manchaichu. Jesús c'ayacunmi— nircacuna.
50Chashna nicpimi, chai runaca pai pillurishcata chaillapi shitashpa, jatarishcahuan Jesuspacman chayarirca. 51Chashna chayaricpi Jesusca:
—¿Imatatac ruhuachun ningui?— nishpa tapurca.
Shina nicpi chai ñahui mana ricuc runaca:
—Yachichic, ñuca ñahuicunata alliyachishpa cui— nirca.
52Shina nicpi Jesusca:
—Ña rilla, ñuca alliyachinata crishcamantaca, ñami alliyashcangui— nirca.
Chashna nicpi paipac ñahui ña ricucpica, Jesusta c'atishpa ñanta rircallami.
Quichua Cañar Nuevo Testamento © United Bible Societies in Ecuador, 1996.