पेरित 4
4
महासभाकर अगाडि पत्रुस र युहन्ना
1पत्रुस र युहन्ना मान्छेल्कोसिन बोलिधर्ल बेलानाइ पुजारिलत, मन्दिर रुङ्नाल्को कप्तान र सदुकिलत उछि आइला। 2र होलत धेरे रिसाइला, किनारइभने पत्रुस र युहन्नान “येसु मर्लबान जिउँते हक्ल जिन्खाए आने मान्छेलत पुनि मर्लबान जिउँते हक्छत” बाजिके सिकाइ धर्लाइ रइला। 3होल्किन पत्रुस र युहन्नालाइ पक्रिला, र रात परिसक्ल हुदान होल्काइ रातभोरि झ्यालखन्डनाइ थुनिकइ धर्ला। 4तर बचन सुन्नाराइ धेराल्किन बिस्वास गर्ला, र बिस्वास गर्नाराइ अडेल्को सङ्ख्या लगभग पाँच हजार हकल्ते।
5अर्को दिन मुख्य पुजारिलत, धर्म-गुरुलत र अगुवालत यरुसलेमनाइ जम्मा हक्ला। 6उछिका पर्धान पुजारि हन्नाससगिन, कइयाफा, युहन्ना, अलेक्जेन्डर र पर्धान पुजारिकर परिवारकराइ आने मान्छेलत पुनि रइला। 7होल्किन पत्रुस र युहन्नालाइ सभाकर अगाडि आनिकइ सोद्ला, “तोराल्किन कुन्टो सक्तिन वा कुनकर नाउँनाइ इन्खा काम गर्छो?”
8तब पबित्र आत्मान भरिपुर्न हकिके पत्रुसिन होल्काइ बल्-ल्याक, “मान्छेल्को सासकलत र अगुवालत हो, 9आज हाइनिन एउटो कुजो मानुसलाइ दया गरिके बिसेक पार्ल हुदान तोराल्किन ह्य किनिखे बिसेक हक्ले बाजिके सोद्छो भने, 10तोराल्काइ र इज्राएलकराइ सेब्बाइ मान्छेल्काइ था हक्दिक कि तोराल्किन कुरुसनाइ टागिकइ मार्लाइ, र परमेसोरिन मर्लबान जिउँते पार्ल, होइ नासरतकर येसु खिरिस्टकर नाउँनाइ ह्य मानुस तोराल्को अगाडि बिसेक हकिके ठडाइलाछ। 11‘येसु ने ह्व पाथर हो,
जुन तोरा घर बानाइनाराइ कर्मिकिन काम बइलागि बाजिके फ्याङ्लाइ रइलो,
तर होइ पाथर ने घर बानाइतिन मुख्य सुरे पाथर हकल्ते।’#भजन ११८:२२
12होइनाइ बाएक आने कुनुनाइ मुक्ति बइने, किनारइभने हाइनिन मुक्ति पाइलाइ धर्तिनाइ अर्को कुनइ नाउँ दिल बइने।”
13पत्रुस र युहन्ना असिछित र साधारन मानुसलत रइला तापुनि होल्को साहस देखिके महासभाकराइ सेब्बाइ मान्छेलत छक्क पर्ला, र हेलत येसुसिन हक्ल कुरो होल्किन था पाइला। 14तर बिसेक हक्ल मानुसलाइ पत्रुस र युहन्नासिन ठडाइधर्ल देखिके होल्किन केइ बाजइ बइसक्ला। 15होइहुदान होल्किन पत्रुस र युहन्नालाइ महासभाबान बाइर जाइनार आदेस दिल्याक अनि होलत चाइ आपसनाइ मिलिके इन्खा छलफल गर्ला, 16“अब हाइ ह्य मान्छेल्काइ केति गर्नार? किनारइभने यरुसलेमकराइ सेब्बाइ मान्छेल्किन हेल्किन गर्ल अचम्मकर काम था पाइलाछत, र ह्य कुरोलाइ हाइनिन बया बाजइ बइसके। 17तर ह्य कुरो आने मान्छेल्को माजनाइ फइलइ जुनपाइदिक बाजिके हाइनिन होल्काइ ‘येसुकर नाउँनाइ अबसिन केइ कुरो कुनुल्कोसिन बइगरइ’ बाजिके चेतावनि देइपर्छइ।”
18ह्व पछि होल्किन पत्रुस र युहन्नालाइ बालाइके “अबसिन येसुकर नाउँनाइ बइबलइ र बइसिकाइ” बाजिके कडा आग्या दिल्याक। 19तर पत्रुस र युहन्नान होल्काइ जबाफ दिल्याक, “तोराल्किन बल्ल मानइ कि परमेसोरिन बल्ल मानइ, परमेसोरकर हेराइनाइ कुन्टो चाइ ठिक हो? तोरा आफि बिचार गरो। 20किनारइभने हाइ ता देख्ल र सुन्ल कुरो नबाजिकइ बसइ बइसके।” 21महासभाकराइ मान्छेल्किन पत्रुस र युहन्नालाइ सजाय दिनार केइ उपाय बइभेट्टाइला, होइहुदान होल्काइ अजइ धेरे धम्कि दिके छाड्दिल्याक। किनारइभने होल्किन गर्ल अचम्मकर काम देखिके सेब्बाइ मान्छेल्किन परमेसोरकर पर्सन्सा गरिधर्लाइ रइला। 22इनिखे अचम्मकर कामबान बिसेक हक्ल मानुसकर उमेर चालिस बर्स भन्दा बढ्ता रल्ति।
साहस पाइनार पार्थना
23उछ्यान छुट्लपछि पत्रुस र युहन्ना बिस्वासि साथेकख्यानकोनाइ जाइला, अनि मुख्य पुजारि र आने अगुवाल्किन बल्ल सेब्बे कुरो होल्काइ सुनाइला। 24जब होल्किन इन्खा कुरो सुन्ला तब सेब्बाइ मिलिके एउटे सोरनाइ परमेसोरसिन इनिखे पार्थना गरइ लाग्ला, “हे सर्बसक्तिमान परमपर्भु, आकास, धर्ति, समुन्द्र र उछिनाइ हक्ल सेब्बे थोक तुइनिन ने बानाइलइ।#पर २०:११; नहे ९:६; भजन १४६:६ 25तुइनिन पबित्र आत्माबान आफ्ने सेबक हाम्रो पुर्खा दाउदकर मुखबान बाज्लइ,
‘आने जातिलत किनारइ रिसाइला?
र मान्छेल्किन बेर्थेकर कुरो किनारइ बिचार गर्ला?
26परमपर्भुकर बिरुद्दनाइ र परमेसोरिन अभिसेक गर्ल जनकर बिरुद्दनाइ
धर्तिकराइ राजालत खडा हक्ला,
र सासकलत जम्मा हक्ला।’#भजन २:१-२
27साँच्चि ने तुइनिन अभिसेक गर्ल, तोर पबित्र सेबक येसुकर बिरुद्दनाइ हेरोद,#४:२७ हेरोद ह्य हेरोद चाइ येसु जन्मितिन राज्य गर्नार हेरोद राजाकर बेटाक हेरोद एन्टिपास हो। पन्तियस पिलातस, आने जातिलत र इज्राएलकराइ मान्छेलत हेइ सहरनाइ जम्मा हक्लाइ रइला।#मति २७:१-२; मर्क १५:१; लुक २३:१,७-११; युह १८:२८-२९ 28तर होल्किन तुइनिन पइला ने निर्नय गर्ल तोर सक्ति र योजना अन्सार काम गर्ला। 29अब हे पर्भु, होल्किन दिल धम्किलाइ याद गर, र तोर बचन साहससिन बाजइलाइ हाइलाइ सक्ति देउ। 30तोर पबित्र सेबक येसुकर नाउँनाइ बिरामिल्काइ बिसेक पारइकर लागि, अचम्मकर चिन्न देखाइलाइ र अचम्मकर काम गरइकर लागि आफ्ने सक्तिसालि हात बाढाउ।”
31होल्किन पार्थना गरिसक्लपछि, होलत जम्मा हक्ल ठउँ हल्लिल्ते। होलत सेब्बाइ पबित्र आत्मान भरिपुर्न हक्ला र होल्किन परमेसोरकर बचन साहससिन बाजइ लाग्ला।
बिस्वासिल्को साजे सम्पति
32पर्भुनाइ बिस्वास गर्नाराइ सेब्बाइ एउटे मन र एउटे आत्माकराइ हक्लाइ रइला। होलत मद्दे कुन्नुल्किन पुनि आफ्ने धन सम्पतिकर केइ थोक ह्य मोर हो बाजिके बइबाज्तेला, तर होल्कोसिन हक्ल सेब्बे थोक साजे रल्ति।#पे २:४४-४५ 33पर्भु येसु मर्लबान जिउँते हक्लाछ बाजिके पेरितकिन बड्खो सक्ति पाइके साछि दितेला, र सेब्बाइ उप्रान परमेसोरकर बड्खो अनुगरह रल्ति। 34होलत मद्दे कुनुल्काइ केइ कुरोकर खाँचो बइपर्तेल्याक, किनारइभने जतुटाइ जग्गा जमिन वा घरकराइ मालिकलत रइला, होल्किन ह्व बेचिके, 35उछ्यान आइल पइसा पेरितकाइ जिम्मा लाइतेला, र जुनलाइ जे-जे कुरोकर खाँचो पर्तेल्ति होइ अन्सार बाड्दितेल्याक।
36ह्व दिननाइ साइपरस देसकर लेबि कुलकर योसेफ रइल, ह्यलाइ पेरितकिन बारनाबास बाजिके बालाइतेला, हेक्र अर्थ “उत्साह दिनार मानुस” हो। 37होइनिन पुनि जग्गा बेचिके आइल पइसा पेरितकाइ जिम्मा लाइले।
© 2024 (Active), Mother Tongue Translators Society and Wycliffe Bible Translators, Inc. All rights reserved.