पेरित 3
3
एउटो कुजो बिसेक हक्ल
1एक दिन पत्रुस र युहन्ना दिउँसो तिन बजे पार्थनाकर समयनाइ मन्दिर जाइतिन रइला। 2होइ बेला मान्छेल्किन जन्मइदेखिकर एउटो कुजोलाइ बोकिके आन्तिन रइला। होइनिन मन्दिरनाइ आइनार जाइनारकोसिन भिक माङ्दिक बाजिके दिन्ने होल्किन सुन्दर नाउँकर गेटनाइ धर्दितेल्याक। 3पत्रुस र युहन्नालाइ मन्दिरभित्र पसइ लाग्ल देखिके होइनिन होल्कोसिन पुनि भिक माङ्ले। 4युहन्नान पत्रुससगिन होलाइ एकडिस लाइके हेर्ला र पत्रुसिन होलाइ बलल्ते, “हाइलाइ हेर!” 5होल्कोबान केइ पाइनार आस गरिके होइनिन ध्यान दिके होल्काइ हेर्ले। 6तर पत्रुसिन होलाइ बलल्ते, “मुइसिन सुन-चाँदि ता बइने, तर जे मुइसिन आछि, ह्व तुइलाइ मुइ दिछु। नासरतकर येसु खिरिस्टकर नाउँनाइ उठिके हिन।” 7ह्य बाजिके पत्रुसिन होक्र दाइने हात आठाइके उठाल्ते। होइ बेला ने होक्र गोड र गोलि-गाठोनाइ तागत आल्ते। 8अनि ह्व जुरुक्क उठिके ठडाइले र हिनइ लाग्ले। ह्व हिन्तिन र उफ्रितिन परमेसोरकर पर्सन्सा गर्तिन होल्कोसिन मन्दिरभित्र पस्ले। 9सेब्बाइ मान्छेल्किन होलाइ हिनिधर्ल र परमेसोरकर पर्सन्सा गरिधर्ल देख्ला। 10मान्छेल्किन होलाइ मन्दिरकर सुन्दर नाउँकर गेटनाइ भिक मागइ बस्नार हेइ ने हो बाजिके चिन्ला र ह्व मानुस हिन्ल देखिके होलत अचम्म मान्तिन छक्क पर्ला।
मन्दिरनाइ पत्रुसकर पर्चार
11ह्व बिसेक हक्ल मानुस सोलोमन नाउँकर दलाननाइ पत्रुस र युहन्नासिन हिन्ल देखिके सेब्बाइ मान्छेलत अचम्म मान्तिन एकेचोटि कुत्तिन आइला। 12ह्य देखिके पत्रुसिन मान्छेल्काइ बल्-ल्याक, “हे इज्राएलकराइ मान्छे हो, तोरा ह्य कुरोनाइ किनारइ अचम्म मान्छो? तोराल्किन ह्य मानुसलाइ हाइनिन आफ्ने सक्ति र भक्तिन ने हिन्नार गराइल जिन्खाए हाइलाइ किनारइ ट्वाल्ल परिके हेर्छो? 13उन्खा बया, अब्राहाम, इसहाक र याकुबकर परमेसोर र हाम्रो पुर्खाल्को परमेसोरिन ने आफ्ने सेबक येसुलाइ महिमित पारल्ते। तोराल्किन चाइ येसुलाइ मारइपर्छइ बाजिके सुम्पिदिलो, जुन्लाइ पिलातसिन छाड्नार निर्नय गर्तिन पुनि तोराल्किन होक्रे अगाडि इन्कार गर्लो।#पर ३:१५ 14तर तोराल्किन ता पबित्र र धर्मि जनलाइ इन्कार गरिके एउटो ज्यानमारालाइ चाइ छाड्देउ बाजिके माग गर्लो।#मति २७:१५-२३; मर्क १५:६-१४; लुक २३:१३-२३; युह १९:१२-१५ 15जिबन दिनारलाइ तोराल्किन मार्लो, तर परमेसोरिन होलाइ मर्लबान जिउँते पारल्ते, अनि हेइ कुरोकर हाइ साछि आछे। 16येसुकर नाउँनाइ बिस्वास गर्ल हुदान तोराल्किन देख्ल र चिन्ल ह्य मानुसिन तागत पाइले। येसुबान पाइल बिस्वासिन ह्य मानुस तोरा सेब्बाल्को अगाडि बिसेक हक्लाछ।
17“दाजि-भाइ हो, मुइलाइ था आछ, तोराल्किन नजानिकइ उन्खा गर्लो र तोराल्को अगुवाल्किन पुनि उन्खाए गर्ला। 18तर परमेसोरिन पाठाइल खिरिस्टनिन दुख भोगइपर्छि बाजिके परमेसोरिन धेरइ अगिसिन सेब्बाइ अगमबक्ताल्को मुखबान बाज्ल अगमबानि इत्तिके पुरा गर्ले। 19अब तोरा आ-आफ्ने पापलाइ मानिलिके परमेसोरदिस फर्कोउबे र परमेसोरिन तोराल्को सेब्बे पाप छेमा गर्दिनार आछ अनि परमपर्भुबान सान्ति र आनन्द पाइनार आछो। 20र परमेसोरिन तोराल्को लागि पइलासिन ने चुन्ल मुक्ति दिनार खिरिस्ट अर्थात येसुलाइ पाठाइदिछइ। 21परमेसोरिन पइलासिन ने आफ्ने पबित्र अगमबक्ताल्को मुखबान बाज्ल सेब्बे कुरो नयाँ बानाइनार समय नआउन्जेलसम्म येसु स्वर्गनाइ ने हकइपर्छि। 22मोसान पुनि बाज्ल रइल, ‘परमपर्भु तोराल्को परमेसोरिन तोराल्को लागि तोराल्के जातिबान मुइजिन्खाए एउटो अगमबक्ता चुन्नारआछ। होइनिन बल्नार सेब्बे कुरो तोराल्किन मानइपर्स्या।#बेब १८:१५,१८ 23तर ह्व अगमबक्ताकर कुरो बइमान्नाराइ मान्छेलत चाइ परमेसोरकर जनकोसिन छुट्टिकइ नस्ट हक्नारआछत।’#बेब १८:१९ 24अनि समुएल र ह्व पछिकराइ सेब्बाइ अगमबक्ताल्किन हेइ दिनकर बारेनाइ बाज्लाइ रइला। 25अगमबक्ताल्किन दिल परमेसोरकर बाचा, र परमेसोरिन तोराल्को पुर्खाल्कोसिन गर्ल बाचा तोराल्को लागि हो। परमेसोरिन हाम्रो पुर्खा अब्राहामलाइ इन्खा बल्ल रल्ति, ‘तोर सन्तानबान धर्तिकराइ सेब्बाइ जातिल्किन आसिस पाइनारआछत।’#उत २२:१८ 26तोरा सेब्बाल्काइ आफ्ने दुस्ट कामबान फर्काइकइ आसिस देइलाइ परमेसोरिन आफ्ने सेबकलाइ छानिकइ होलाइ सबभन्दा पइला तोराल्कोनाइ ने पाठाइले।”
© 2024 (Active), Mother Tongue Translators Society and Wycliffe Bible Translators, Inc. All rights reserved.