पेरित 2
2
पबित्र आत्माकर आगमन
1जब पेन्तिकोसकर#२:१ पेन्तिकोसकर -निस्तार चाडकर पचास दिन पछि मानाइनार चाड हो। चाड आल्ते, तब येसुनाइ बिस्वास गर्नाराइ सेब्बाइ एकइ ठउँनाइ जम्मा हक्लाइ रइला।#ले २३:१५-२१; बेब १६:९-११ 2होइ बेला एक्कासि स्वर्गबान बड्खो बातास चल्ल जिन्खाए आवाज आल्ते, र होलत बस्ल घर भर्दिल्ते। 3अनि होल्को माजनाइ आगिकर ज्वाला जिन्खाए देखा परल्ते, र होलत सेब्बाइ उप्रान भाग-भाग हकिके बसल्ते। 4अनि होलत सेब्बाइ पबित्र आत्मान भरिपुर्न हक्ला, र होल्किन पबित्र आत्माबान बाज्नार सक्ति पाइके आने भासानाइ बाजइ लाग्ला।
5ह्व बेला यरुसलेमनाइ धर्तिकर सेब्बे देसबान यहुदिलत आइलाइ रइला। होल्किन परमेसोरकर डर मान्तेला। 6जब इन्खा आवाज सुन्ला तब चारेपट्यान मान्छेल्को भिड जम्मा हक्ला। ह्व यहुदिल्किन आ-आफ्ने भासानाइ बाजिधर्ल सुन्ला। 7र होलत एकदम छक्क पर्तिन बाजइ लाग्ला, “केति ह्य बाज्नाराइ सेब्बाइ गालिलिलत बया र? 8हेल्किन किनिखे हाम्रो आ-आफ्ने भासानाइ बाजिधर्ल सुन्तिन आछे? 9हाइ ता इछि पार्थिलत, मादिलत, एलामिलत, मेसोपोटामियाकराइ, यहुदियाकराइ, कापाडोकियाकराइ, पोन्टस, एसिया छेत्र, 10फिर्गिया, पामफिलिया, मिस्र देस, कुरेनिनाइ पर्नार लिबियाकर छेत्रलत र रोमबान आइलाइ, 11केरेटकराइ र अरबबान आइलाइ मान्छेलत आछे, हेल्किन परमेसोरिन गर्ल महान कामकर बारेनाइ बाज्ल हाइ आ-आफ्ने भासानाइ सुन्तिन आछे।” 12होलत अचम्मित हक्ला, र अलमल परिके एउटोन अर्कोलाइ सोदइ लाग्ला, “ह्य केति हो?” 13तर कत्ताल्किन चाइ खिसि गर्तिन बाज्ला “हेलत ताजा अङ्गुरकर मद्यन मात्लाछत।”
भिडकाइ पत्रुसकर पर्चार
14तब पत्रुस एघार पेरितकोसिन ठडाइके बड्खो सोरिन भिडकाइ बल्-ल्याक, “यहुदिया र यरुसलेमनाइ बस्नाराइ सेब्बाइ मान्छेलत, इछि केति हक्ल हो ह्व कुरो मुइ तोराल्काइ बल्छु। अब मोर कुरो सुनो। 15तोराल्किन सोच्ल जिन्खाए हेलत मात्लाइ बइनेत, किनारइभने अखन ब्यानकर नउ मात्र बज्लाछि। 16तर योएल अगमबक्तान बाज्ल कुरो हेइ हो,
17‘अन्त्यकर समयनाइ इन्खा हक्छि बाजिके परमेसोरिन बाज्लाछ,
मुइ सेब्बाइ मान्छे उप्रान मोर आत्मा खन्याइनारआछु,
अनि तोराल्को बेटार-बेटेरकिन अगमबानि बाज्नार आछत,
र छोडारिकिन दर्सन देख्नार आछत,
र बुढापाकाल्किन चाइ सपना देख्नार आछत।
18ह्व समयनाइ मोर सेवा गर्नाराइ दास-दासिउप्रान
मुइ मोर आत्मा खन्याइनारआछु,
अनि होल्किन अगमबानि बाज्नार आछत।
19उप्र आकासनाइ मुइ अचम्मकर चिन्न देखाइनारआछु,
र हेठ्ठ धर्तिनाइ अचम्मकर काम गर्नारआछु,
अर्थात रकत, आगि र धुवाँकर मुस्लो देखा पर्नारआछि।
20परमपर्भुकर महान र महिमाकर दिन आइभन्दा अगाडि
घाम आँधारि हक्नारआछि,
र चानाजुन रकत जिन्खाए पिर्ल हक्नारआछि।
21अनि जुनिन परमपर्भुकर नाउँ लिछइ, होइनिन उद्दार पाइनारआछ।’#यो २:२८-३२
22“हे इज्राएलकराइ मान्छे हो, ह्य कुरो सुनो, परमेसोरिन नासरतकर येसुमार्फत तोराल्को माजनाइ सक्तिसालि कामलत, अचम्मकर कामलत र चिन्नलत देखाइल तोराल्काइ था ने रोइस्या। ह्व कामबान परमेसोरिन नासरतकर येसुलाइ आफिन पाठाइल हो बाजिके पर्मानित गर्ले। 23परमेसोरिन आफ्ने निस्चित योजना र ग्यानअन्सार येसुलाइ तोराल्को हातनाइ सुम्पिदिले र तोराल्किन होलाइ अधर्मि मान्छेल्को हातनाइ सुम्पिकइ कुरुसनाइ टागिकइ मारइ लाइलो।#मति २७:३५; मर्क १५:२४; लुक २३:३३; युह १९:१८ 24तर परमेसोरिन होलाइ मर्लबान जिउँते पारल्ते, र मिर्त्युकर बन्धनबान छुटाल्ते, किनारइभने मिर्त्युन येसुलाइ रोकिधरइ असम्भब रल्ति।#मति २८:५-६; मर्क १६:६; लुक २४:५ 25दाउद राजान होक्र बारेनाइ इनिखे बाज्लाछ,
‘मुइनिन परमपर्भुलाइ सदइ मोर अगाडि देख्नाइ,
परमपर्भु मोर दाइनेपटि आछ, र मुइ बइडाराउ।
26होइहुदान मोर हिर्दय आनन्दित आछि,
र मोर जिब्रोन खुसिकर गित गिदाइधर्छि।
मोर सरिर पुनि आसानाइ जिनारआछि।
27किनारइभने तुइनिन मोर परानलाइ नरकनाइ छाड्नार बइने,
र आफ्ने पबित्र जनकर जिउँ सेराइ दिनार बइने।
28तुइनिन मुइलाइ जिबनकर बाट देखाइलाछस,
तोर उपस्थितिन मुइलाइ एकदम आनन्दित पार्नारआछ।’#भजन १६:८-११
29“दाजि-भाइ हो, हाम्रो पुर्खा दाउदकर बारेनाइ मुइ तोराल्काइ निर्धक्कसिन बलइ सक्छु। ह्व मर्ले र होलाइ चिहाननाइ गड्काइला, अनि आजकर दिनसम्म होक्र चिहान आछि। 30तर दाउद एक अगमबक्ता रइल र होक्रे सन्तानबान एउटो होक्रे सिहासननाइ बस्नारआछ बाजिके होलाइ था रल्ति, किनारइभने परमेसोरिन होइसिन पर्तिग्या गर्ल रइल।#भजन १३२:११; २समु ७:१२-१३ 31परमेसोरिन गर्नार काम दाउदिन पइला ने देखिसक्ल रइल। होइहुदान खिरिस्ट मर्लबान जिउँते हक्छइ बल्ल कुरोसिन ह्य मिलइ आइछि, न ता होक्र परानलाइ नरकनाइ छाड्ले, न ता होक्र जिउँ सेराल्ते। 32हेइ येसुलाइ परमेसोरिन जिउँते पारल्ते अनि हेइ कुरोकर हाइ सेब्बाइ साछि आछे। 33परमेसोर ब्वान येसुलाइ उच्च पारिके आफ्ने दाइने हातपटि धरल्ते, र आफ्ने पर्तिग्या अन्सार येसुलाइ पबित्र आत्मा दिल्ते, अनि होइ पबित्र आत्मा येसुन हाइ उप्रान खन्याइदिलाछ, होइ कुरो अखन तोराल्किन सुन्तिन र देख्तिन आछो। 34किनारइभने दाउद आफि स्वर्गनाइ बइजाइले, तर पुनि दाउद आफिन बाज्लाछ,
‘परमपर्भुन मोर पर्भुलाइ बलल्ते,
तुइ मोर दाइने हातपटि बस,
35जबसम्म मुइ तोर सतुरकाइ तोर पइतला हेठ्ठान बइपारु।’#भजन ११०:१
36“होइहुदान इज्राएलकराइ सेब्बे घर परिवारकिन ह्य कुरो पक्का गरिके जान्दिखन कि तोराल्किन कुरुसनाइ टागिकइ मार्ल येसुलाइ ने परमेसोरिन पर्भु र खिरिस्ट बानाल्ते।”
37ह्य कुरो सुनिके होल्को हिर्दय छिया-छिया हक्ल्याक, अनि होल्किन पत्रुस र आने पेरितकाइ सोद्ला, “दाजि-भाइ हो, अब हाइ केति गर्नार?”
38पत्रुसिन होल्काइ बल्-ल्याक, “तोराल्किन पाप छेमाकर लागि आ-आफ्ने पाप मानिलिके छाडो र येसु खिरिस्टकर नाउँनाइ बप्तिस्मा लिओ, र तोराल्किन परमेसोरकर बरदान पबित्र आत्मा पाइनारआछो। 39किनारइभने ह्य पर्तिग्या तोराल्को लागि, तोराल्को बेटार-बेटेरको लागि, र बद्दुरनाइ हक्लाइ सेब्बाल्को लागि हो, जुन्लाइ परमपर्भु हाम्रो परमेसोरिन बालाइछइ।”
40इत्तिके पत्रुसिन होल्काइ आने धेरइ कुरो बलिके साछि दिल्याक, र अर्ति दितिन बल्-ल्याक, “ह्य दुस्ट पुस्ताबान तोराल्किन आफिलाइ बाचाओ।” 41जत्ताल्किन पत्रुसिन बल्ल कुरोनाइ बिस्वास गर्ला, होल्किन बप्तिस्मा लिला र ह्व दिन लगभग तिन हजार जत्ता मान्छेलत होल्को सङ्ख्यानाइ थपिला।
येसुनाइ बिस्वास गर्नाल्को रहनसहन
42होलत पेरितकोबान सिक्नार, सङ्गति गर्नार, खाइपि#२:४२ खाइपिहेइनाइ पर्भु भोज पुनि पर्तेल्ति। गर्नार र पार्थनानाइ ध्यान दिके लागिधर्तेला। 43मान्छेल्को हिर्दयनाइ डर उत्पन्न हकल्ते, र पेरितकिन धेरे अचम्मकर काम र चिन्नलत देखाइला। 44पर्भुनाइ बिस्वास गर्नाराइ सेब्बाइ एकेठउँ जम्मा हक्तेला, र होल्को सेब्बे कुरो साजे रइल्याक।#पे ४:३२-३५ 45होल्किन आफ्ने जग्गा जमिन र सर-सामान बेचिके जुन-जुनलाइ जे-जे कुरोकर खाँचो पर्तेल्ति होइ अन्सार बाड्नार गर्तेला। 46होलत दिन्ने एउटे मनकराइ हकिके मन्दिरनाइ जम्मा हक्तेला र घर-घरनाइ खाइपि गर्तेला अनि होलत खुसि र खुल्ला मनिन मिलिजुलि खाइतेला, 47र सदइ परमेसोरकर पर्सन्सा गर्तेला। सेब्बाइ मान्छेल्किन होल्काइ मजाराइ मान्छेलत हो बाजिके ठान्तेला। अनि मुक्ति पाइनारको सङ्ख्या होल्को समुहनाइ परमेसोरिन दिन-दिने थपिदिल्याक।
© 2024 (Active), Mother Tongue Translators Society and Wycliffe Bible Translators, Inc. All rights reserved.