पेरित 5
5
हननिया र सफिरा
1तर हननिया नाउँ हक्ल एउटो मानुस रइल र होक्रि बोहेककर नाउँ सफिरा रल्ति। होल्किन पुनि आफ्ने एक टुक्रा जग्गा बेच्ला, 2अनि धेजनको सहमतिनाइ केइ पइसा आफ्ने लागि धर्ला र बाकि पइसा चाइ पेरितकाइ जिम्मा लाइला। 3तर पत्रुसिन बलल्ते, “ए हननिया, पबित्र आत्मासिन झुट बोलइ र जग्गा बेच्ल केइ पइसा आफिसिन धर्नार कुरो सइतानिन किनिखे तोर मननाइ हाल्दिल्यास? 4ह्व जग्गा बइबेच्तिन पुनि तोरे रल्ति र बेचिके आइल पइसा पुनि तोरे अधिकारनाइ रल्ति। इन्खा काम गर्नार बिचार तोर हिर्दयनाइ किनिखे आल्ते? तुइनिन मान्छेल्काइ ता बया तर परमेसोरलाइ ने झुक्याइलाछस।” 5ह्य कुरो सुन्लेसात हननिया भुइनाइ लड्ले र मर्ले। ह्य सुन्नाराइ सेब्बाइ एकदम डाराइला। 6छोडारिलत आइके हननियाकर लास लुगान बेर्ला र बाइर बोकिके लाकाइला र गड्काइला।
7हेक्र लगभग तिन घन्टापछि हननियाकरि बोहेक पुनि भित्र आइलि। होलाइ आफ्ने साहेक मर्ल कुरो था बइरल्ति। 8पत्रुसिन होलाइ सोदल्ते, “मुइलाइ बल, तोराल्किन जग्गा ओत्तानाइ ने बेच्लाइ हो ते?”
होइनिन बाज्लि, “हो, ओत्तानाइ ने बेच्लाइ।”
9तर पत्रुसिन होलाइ बलल्ते, “तोरा पर्भुकर आत्मा जाँच गरइ किनिखे सहमत हक्लो? हेर, तोर साएरलाइ गड्काइनाराइ ढोकानेर आइपुग्लाछत, र होल्किन तुइलाइ पुनि बाइर लाकाइके गड्काइनार आछत।” 10अनि तुरुन्तइ ह्व पत्रुसकर गोडनेरि लड्लि र मर्लि। छोडारिलत भित्र आइला र होलाइ मर्ल देखिके होक्र लास लाकाइके होक्रे साहेककर छेउनाइ गड्काइला। 11इन्खा घटना हक्लपछि मन्डलिकराइ#५:११ मन्डलि गिरिक भासानाइ ह्यलाइ एकलेसिया बाजइसत। सेब्बाइ मान्छेलत र ह्य कुरो सुन्नाराइ सेब्बाइ मान्छेलत एकदम डाराइला।
पेरितकिन धेराल्काइ बिसेक पार्लाइ
12पेरितको हातबान धेरइ अचम्मकर कामलत र चिन्नलत मान्छेल्को माजनाइ हक्तिन रल्ति, र पर्भुनाइ बिस्वास गर्नाराइ सेब्बाइ सोलोमन नाउँकर दलाननाइ एउटे मनकराइ हकिके जम्मा हक्तेला। 13आने मान्छेलत चाइ होल्कोसिन मिल्नार आँट बइगर्ला, तर पुनि मान्छेल्किन होल्काइ आदर गर्तेला। 14पर्भुनाइ बिस्वास गर्नाराइ अडे-बेटिकर सङ्ख्या झन धेरइ थपइ लागल्ते। 15इछिसम्म कि पत्रुस बाटनाइ हिन्तिन होक्र छाँया मात्र हक्तिन पुनि कोइ-कोइ बिरामिल्कोनाइ पर्दिक बाजिके मान्छेल्किन होल्काइ ओछ्यान र खाटनाइ सुताइकइ धर्तेला। 16यरुसलेम वरिपोरिकर ठउँबान पुनि धेरइ मान्छेल्किन बिरामिल्काइ र भुत आत्मान सताइलाल्काइ लिके आइतेला र होलत सेब्बाइ बिसेक हक्तेला।
पेरितकाइ सताइल
17पर्धान पुजारि र होक्र सदुकि समुहकराइ मान्छेलत डाहन भरिके पेरितको बिरोद गर्ला, 18र होल्किन पेरितकाइ आठाइके झ्यालखन्डनाइ थुन्ला। 19तर होइ रात परमपर्भुकर एउटो स्वर्गदुतिन झ्यालखन्डकर ढोकौ खोल्दिल्याक, र होल्काइ बाइर लाकाइके बल्-ल्याक, 20“मन्दिरनाइ जाइके सेब्बाल्काइ नयाँ जिबनकर बारेनाइ सेब्बे कुरो सुनाओ।” 21ह्य सुन्ल पछि होलत ब्यानिन्न उज्यालो हकइ लाग्तिन मन्दिरनाइ जाइके मान्छेल्काइ सिकाइ थाल्ला।
पर्धान पुजारि र ह्वसिन हक्लाइ मान्छेल्किन इज्राएलकराइ सेब्बाइ अगुवाल्काइ महासभानाइ बालाइला। ह्व पछि पेरितकाइ झ्यालखन्डबान आनइलाइ सिपाइकाइ पाठाइला। 22तर होल्किन झ्यालखन्डनाइ पेरितकाइ बइभेट्टाइला र फर्कि आइके इन्खा बाज्ला, 23“हाइनिन झ्यालखन्ड मजसिन साँचो लाइल र पालेलत ढोकानाइ ठडाइके रुँगिधर्लाइ भेट्टाइले, तर ढोका उघार्तिन हाइनिन भित्र कुनुल्काइ बइदेख्ले।” 24ह्य सुनिके मन्दिर रुङ्नाल्को कप्तान र मुख्य पुजारिलत छक्क पर्ला, र अब केति हक्नार हो बाजिके अलमलनाइ पर्ला। 25तर होइ बेला ने एउटो मानुस आइके होल्काइ बल्-ल्याक, “सुनो, तोराल्किन झ्यालखन्डनाइ थुनिकइ धर्लाइ मान्छेलत ता मन्दिरनाइ सेब्बाल्काइ सिकाइतिन आछत।” 26इन्खा सुनिके मन्दिर रुङ्नाल्को कप्तान र सिपाइकिन पेरितकाइ जबरजस्ति नगरिकइ आन्ला, किनारइभने मान्छेल्किन होल्काइ पाथरिन हिर्काइछत कि बाजिके होलत डाराइला।
27होल्किन पेरितकाइ महासभाकर अगाडि ठडाइ लाइला, र पर्धान पुजारिन होल्काइ सोद्ल्याक, 28“हाइनिन तोराल्काइ येसुकर नाउँनाइ फेरि कुनुल्काइ केइ बइबलइ बाजिके कडा आग्या दिलाइ रइले, तर तोराल्किन ता आफ्ने सिछ्या यरुसलेमभरि फिजाइसक्लो, अनि येसुलाइ मार्ल दोस हाइलाइ पो लाइ चाइछो।”#मति २७:२५
29तर पत्रुस र आने पेरितकिन बाज्ला, “हाइनिन मान्छेल्किन बल्ल बया, तर परमेसोरकर आग्या ने मानइपर्छइ। 30तोराल्किन कुरुसनाइ टागिकइ मार्ल येसुलाइ हाम्रो पुर्खाल्को परमेसोरिन जिउँते पारल्ते। 31इज्राएलिल्किन आफ्ने पापलाइ मानिलिके छाड्दिखन र छेमा पाइदिखन बाजिके परमेसोरिन येसुलाइ राजा र मुक्तिदाता बानाइके उच्च पारिके आफ्ने दाइनेपटि धरल्ते। 32ह्य सेब्बे कुरोकर हाइ साछि आछे, र परमेसोरिन आफ्ने आग्या पालन गर्नारकाइ दिल पबित्र आत्मान पुनि साछि दितिन आछ।”
33ह्य कुरो सुनिके महासभाकराइ सेब्बाइ रिसिन चुर हक्ला, र पेरितकाइ मारइ चाइला। 34तर उछिका गमलिएल नाउँ गर्ल फरिसि महासभाकर अगाडि ठडाइले। होलाइ सेब्बाल्किन मान गर्तेला र असल धर्म-गुरु पुनि रइल। होइनिन पेरितकाइ महासभाबान एकछिन बाइर जाइनार आदेस दिल्याक, 35र महासभाकराइ मान्छेल्काइ बल्-ल्याक, “हे इज्राएलकराइ मान्छे हो, ह्य मान्छेल्काइ तोराल्किन जे गरइ आँट्लाछो, होइनाइ होसियार हको। 36किनारइभने केइ बर्स अगाडि थुदास बल्ल एउटो मानुस आफिलाइ बड्खो मानुस हो बाजिके आइल रइल, तर ह्व मारिले, र होलाइ पछ्याइनाराइ लगभग चार सय मान्छेलत छरपस्ट हक्ला, अनि होक्र नाउँ निसाने नाठल्ते। 37ह्व पछि जनगन्ति गर्नार समयनाइ गालिलकर यहुदा बल्ल मानुस देखा पर्ले। होइनिन मान्छेल्काइ बिद्रोह गरइ उस्काइल्याक र धेराइ मान्छेलत होक्र पछि लाग्ला। ह्व पुनि मारिले, र होलाइ पछ्याइनाराइ पुनि सेब्बाइ छरपस्ट हक्ला। 38अखनकर ह्य मामिलानाइ मुइ तोराल्काइ बल्छु, ह्य मान्छेल्कोसिन बद्दुर बसो, र हेल्काइ छाड्दिखन, किनारइभने हेल्को ह्य बिचार र काम मान्छेल्कोबान रल्तिसइ भने ह्व आफि नाठिके जाइनार आछि। 39तर यदि ह्य परमेसोरबान हक्ल हो भने ता तोराल्किन हेल्काइ रोकइ बइसको। नत्र ता तोरा परमेसोरकर बिरुद्दनाइ खडा हक्ल ठहरिछो।”
40महासभाकराइ मान्छेल्किन गमलिएलकर सल्ला मानिके होल्काइ भित्र बालाइके हिर्काइ लाइल्याक, अनि होल्किन पेरितकाइ “येसुकर नाउँनाइ कइले पुनि पर्चार बइगरइ” बाजिके आदेस दिल्याक, र होल्काइ छाड्दिल्याक। 41पेरितलत येसुकर नाउँनाइ दुख र अपमान सइनाराइ योग्यकराइ ठहरिले बल्ल कुरोनाइ आनन्द मानाइतिन महासभाबान निस्किके जाइला। 42र होल्किन दिन-दिने मन्दिरनाइ र घर-घरनाइ जाइके येसु ने खिरिस्ट हो बाजिके सिकाइ र पर्चार गरइ बइछाड्ला।
© 2024 (Active), Mother Tongue Translators Society and Wycliffe Bible Translators, Inc. All rights reserved.