JOHAN 19
19
1Tsüselo Pilat le Jisu zen gü vü. 2Lo shüpahü nyu dan le tsehü pe raja perün thyülo-o pe a-pe rün shü, lo phi nhon shweshwe tsekethyüe a-no benlo. 3Tsüselo anyugun le a-ki ryüo, “Judanyu raja gü, nle kvukelogü thyülo chi!” tson-o anyugun benje pe a-vü.
4Tsüselo Pilat le nichwigü anyugun ka, “Hire, awe a-ge kemu nme-e hyulo mvu kethyü genyu hagun no shalo titseo a-zen-o hagun ki chwiryü bin nyo.” 5Lo Jisu le tsehü perün pvü, lo phi nhon nshwen kethyü ben tseo chwiryü. Tson-o Pilat le anyugun ka, “Temi gü tsü le hi mare!”
6Tsüselo peshünyu dan lo tsonlokethyünyu dan le Jisu hyushü ntsin, nra sen-o, “Pe krus ge hüla lo! Hüla lo!”
Lo Pilat le anyugun ka, “Hagun npvü a-zen gü krus ge hüla ta, awe a-ge kemu nme-e hyulo mvu.”
7Judanyu dan le a-ka, “Agun jvü nme le bin, lo a-le tejvü tsügü nyu sila zü; kechamvule a-le a-npvü a-lope Sunggigü Nyugü letse kehü genyu.”
8Tsügenyu Pilat le jo tsü shalo ntsin nshvu nila. 9Tson-o a-le süda bin nyu niyü gü Jisu ka, “Nle dikipon ryü la?” tson ni.
Ai Jisu le a-ka thame zoni mvula. 10Tsügenyu Pilat le a-ka, “Nle aka tha zomvu ti ole? Ale nhoshüla nrün lo nno krus ge hüla nrün kekvu le bin kethyü nle shamvu ole?”
11Jisu le a-ka, “Teso ki khipe ntsüshü kemvu we nle age kekvu nme-e binlo ho; tsügenyu a-ten pe nben nyu keshü gü kemu le rükvu laso.”
12Tsüselo Pilat le a-hoshüla nrün tson fü so. Ai Judanyu dan le nra sen-o, “Nle temi higü hi hoshü kela we, nle Kaisar kesonyu kemvu. Temi lihigu"e a-npvü a-le rajanyu tsekethyü jo tsüle Kaisar shwikerüchün jo nme so.”
13Tsügenyu Pilat le jo tsü shalo njüo Jisu zen chwigü bin nme le a-zan le Ibrinyu khwen ki “Gabatha,” tsekethyü jokera kehü keda bin nyu binlo. 14Tsüle nkenkechwi nga ndonron kethyü gwünkho ti bin laso nhennyu khoka. Pilat le temi dan ka, “Hika hagun raja gü le re!” tsonshü.
15Tsügenyu anyugun le nra sen-o, “A-no bin nyalo! Pe krus ge hüla lo!”
Lo Pilat le anyugun ka, “Ano hüla lotse la?”
Lo Peshükedanyu dan le, “Kaisar kemvu agun raja kecha ndi.”
16Tsüselo a-le anyugun no pe krus ge hüla lotse pe anyugun tsüla.
Jisu Pe Krus Ge Hükela
(Mt 27:32-44; Mk 15:21-32; Lk 23:26-43)
17Tsügenyu anyugun le Jisu zen gunla. Lo tsükatsü a-le a-npvü a-krus pen-o bin nme a-zan le Pekhunru tsekethyü, Ibrinyu khwen ki Golgatha tsekethyü nme nyu gunla. 18Anyugun le tsünyu Jisu pe krus ge hüla, lo Jisu le a-chvü nyu, lo lukipon nme lo hikipon nme tse mihvu pe a-sin-o hü. 19Lo Pilat le tha zan nme thu pe krus ge shü, lo tsüge thu keshü le hihontse: NAZARET JISU JUDANYU RAJAGÜ. 20Lo zan tsüle Ibrinyu khwen lo Griknyu khwen tse thu; lo Jisu pe krus ge hü kethyü bin le rünyi nyida gü kho ka genyu Judanyu kechon le tsü swü. 21Tsügenyu Judanyu peshükeda dan le Pilat ka, “Judanyu Rajagü, tson thu mvule, a-le a-npvü, ‘Ale Judanyu Rajagü,’ tson hü nle tse thu shü chi.”
22Ai Pilat le, “Ale thu shü kela gü tsü thu shü laso,” tsonla.
23Lo shüpahünyu le Jisu pe krus ge hükela siki a-phi a-nya pe jünzi thyüo shüpahünyu nme no jünmeme khilo, lo a-mirün-e tsühontse. A-mirün we a-kerishvu ndio a-soki do tsügü a-pha ti.
24Tsügenyu anyugun le zo-o, “Ngun hiwe sürhenla nya-o senyu le hyulo tiyo henkeshwi thyülo.” Tsüle kechamvule ketsin lesü nyu:
“Anyugun npvü aphi pe
kenjünlo laso
lo anyugun le amirün pe henkeshwi
thyülo laso.” Tson kenjü jo gü tsüno penlo nrün genyu shüpahü dan we tsü thyü.
25Ai Jisu krus khoka kebin Jisu a-jvü lo a-sikezengi Klopa nu Maria, lo Maria Magdalin ko tse tsüka bin. 26Lo tsükatsü Jisu le a-jvü lo a-le so keryü senthyükelogü anyugun le tsükhoka kebin hyushü njüo a-le, a-jvü ka, “Nnyu le li.”
27Tsüselo a-le senthyükelogü ka, “Njvü le li.” Tsüselo senthyükelo tsügü le a-zen gü a-npvü a-ka ki leyi tinla.
Jisu Kesi
(Mt 27:45-56; Mk 15:33-41; Lk 23:44-49)
28Tsüselo Jisu le tha aphu thyü penkelo shalo njüo, ketsin lesü jo no penlo nrün genyu, “Ale teriho laso.”
29Lo tsünyu tsü thakhin nme nyu keshonzü pe sü njü; lo anyugun le hisop ro nme ge spunj pe keshon zü ka ntsenlo njüo pen gü Jisu mün ka shü. 30Lo Jisu le keshonzü tsü tsülo ntsin, “Pen laso,” tsonshüo A-kapu hoshü la.
Mi Pe Jisu Nyasin Jenkeshü
31Lo Judanyu dan le tsünyü tha ndonron kethyü jon genyu Sabbath jon nyü kesi min no krus ge bin mvu nrün genyu tsü penla titseo Pilat ka tsüdan pha duse titseo hi. Anyugun le temi no Sabbath jon nyü krus ge hü bin nyü mvula; kechamvule Sabbath tsüle jon keda nme genyu. 32Tson-o shüpahünyu le ryüo Jisu sin-o hü kenjü kerigü lo kechagü pha dusela. 33Ai anyugun le Jisu ki keryü ka a-le sikela hyulo njüo a-pha duse mvula. 34Tson-e shüpahünyu nme le mi lope Jisu nyasin jen shü, lo tsonshü ntsin tezi lo züle tsun chwiryü. 35Lo tsü kehyu gü le a-npvü jo higü jün zoshü, lo a-jo hile a-ketsin; a-le ketsin zo tsekethyü a-npvü tsü shabin nyo; kechamvule hagun ko no tenyelo nrün genyu. 36Lo ketsinlesü nyu, “A-ru nme-e duse loho,” tson kenjü jo no penlo nrün genyu tha hi aphu thyü keshü. 37Tsüntimvule ketsinlesü nyu jo kecha nme le, “Anyugun le anyugun npvü mi pe jen kelagü tsü nri ti,” tson thu njü.
Jisu Kesun
(Mt 27:57-61; Mk 15:42-47; Lk 23:50-56)
38Tsüselo Arimathia nyu nme, a-zan le Josef tsekethyü gü le Jisu min penlo titseo Pilat ka hi. Josef tsüle Jisu sikethen nyu nme, ai Judanyu kenshvu genyu kebu hü. Lo Pilat le ahza hoshü. Tsügenyu a-le gü Jisu min penlo. 39Lo tsümhundyü kheje ki Jisu ki keryü Nikodema ko myrrh lo aloe kesin kethyü terzü sher henpvün pen ryü. 40Tson-o au le Jisu min pen gungü Judanyu le me kesun jvü hontse tharün kenyi peshü tseo Jisu min yün pe linen phi no jelo. 41Lo Jisu pe krus ge hü kethyü bin nyu chwi nme le bin; lo chwi tsünyu himhundyü temi nme min-e pe shü hü kemvu sika nme le bin. 42Lo tsünyü tsü le Judanyu le tha ndonron kethyü jon genyu lo sika tsüle nithen kemvu genyu au le Jisu lope tsünyu shüla.
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.