مَرقُس 3
3
شِفا پیای گه دس حُشگ بیتی
1عیسی یِگِلی‌تِر چی اَرِه عَبادتگا یهود. اَر اورَه پیای بی گه یِه دَسی حُشگا بوئی. 2اونَل عیسی‌ئو آوشدوئیِ کِل چیَم گه بوئینِن اِنوم روژ شَمَه مقدّس اَ پیا شِفا مِ تاگَه دَسپیچی اَرِه مَکوم کِردِنی بِهَنَ دی. 3عیسی وَه پیای گه دَسی حُشگا بوئی وِتی: «بوری اَرِه ایرَه.» 4اَسَه اَژینو پِرسیتی: «روژ شَمَه اَرِه خوئی کِردِنَ یاگَه گَنی کِردِن؟ گیو کسی نجاد دائِن یاگَه کُشتِن؟» مِنتائای اونَل بی‌کِش مَنِن. 5عیسی، وَه پیرّا سِیل کِردی اَر کسَلی گه اِ دورا بینی ئو خَمین اژ سنگدلیو، وِتیَ اَ پیا: «دسِت دِریژ کَ.» او دس ووژ دِریژ کِردی ئو دَسی اِجور اول آزاآ بی. 6اَسَه هِرازِه شیخَل فرقَه فَریسی چِنَ دِریر ئو وَه‌گَرد طرفدارَل هیرودیسِ پاتِشا شورو کِرد گه چطور عیسی بِکُشِن.
جیَمیَت فِرِه‌ی مَچِنَ دُم عیسی‌آ
7عیسی وَه‌گَرد شاگردَلی چی ویرِ دریاچَه. بِری اژ مردِم جلیل وَه دُمیا کَتِنِ رئی. 8ئو هَمیش، جیَمیَت فِرِه‌ی اژ مردِم یهودیَه ئو اورشلیم ئو اَدومیَه ئو هِناس اَکو روو اُردن ئو هِناس صور ئو صِیدون، وخدی خَوَر کارَل عیسی‌ئو شنَفت، هاتِنی اَرِه تک. 9اژ زور جیَمیَت، عیسی وِتیَ شاگردَلی قائِقی اَرِه آمادَه کَنی، تاگَه مردِم زور اَری نارِنی. 10اَرِیَگه بِری شِفا دائیتی، دردَبارَل کُل مَرِشیانَ سراِرا تاگَه دس بِنِنی اَر قِ‌آ. 11هَریَگه روحَل گَن اوئنَ موئینیا، اِ نوای مَکَتِن اَر خاک ئو مَقارونو: «تو کُر خدائین!» 12مِنتائای عیسی اونَل قِدَخَنَ مَهَردی وَه کسی نوشِن او کیَ.
دوازَه رسول
13عیسی چی اَر بِنار کوی ئو اونَلی گه اِ وَر نظر داشدی، هِنا کِردی اَرِه تک ووژ ئو اونَ هاتِنی اَرِه تک. 14او دوازَه نفر جیا کِردی ئو نُم اونَ ناءَ رسول، تا وَه‌گَرد بوئنی ئو اونَ کِل‌کِ اَرِه موعظَه کِردِن، 15ئو ایی قدِرت‌واختیارونَ داشدوئی گه مِلاکَتَل بِهَنَ دِریر. 16اَ دوازَه نفرَ گه جیا کِردی یوئنَ بین: شَمعون (هَراَوَه گه عیسی نُم ناءَ پطرس)؛ 17یعقوب کُر زِبِدی ئو بِرای یوحنا (گه نُم اونَل ناءَ ’بوآنِرجِس‘، یانی ’کُرَل تَش‌بِریق‘)؛ 18آندریاس، فیلیپُس، بَرتولْما، مَتّی، توما، یعقوب کُر حَلْفای، تَدّای، شَمعونِ غیور، 19ئو یهودا اَسخَریوطی گه عیسی داءَ گیر دشمن.
20یِه روژتِر عیسی چی اَرِه مال ئو اِدوارَه بِری جیَم بین، هُنَ گه او، ئو شاگردَلی جُ‌جُ وخد خوراک هُاردِن‌یشو ناآشد. 21وخدی کس ئو کارَل عیسی یِئونَ شنَفت، چِن تاگَه او هیزدَن ئو وَه‌گَرد ووژو بیَرِن، اَرِیَگه موئِتو: «داسِ سر.»
کِفِر کِردِن وَه روح‌القدس
22مَلِمَل تورات‌یش گه اژ شیَر اورشلیم هاتوئین، موئِتو: «یَه بِعِلزِبول گه رِئیس مِلاکَتِلَ او گِرتیِ، ئو وَه یاری او مِلاکَتِلَ مِهِئَه دِریر.» 23اَسَه عیسی هِنا کِردی اَر اونَل ئو متلَلی اَرِنو آوِردی ئو وِتی: «چطورَ ماو شِطو، شِطو بِهِئَه دِریر؟ 24اَرّ مملکتی اَرضد ووژ کُت‌کُت بو، نِمَتونی پایار بِمینی. 25ئو هَمیش اَرّ مالی اَرضد ووژ کُت‌کُت بو، اَ مالَ پایار نِمَمینی. 26شِطون‌یش اَرّ وَه ضد ووژ هیزگِری ئو کُت‌کُت بو، نِمَتونی طاخَت باری، بلکِم رَسیَسَ آخِر کار ووژ. 27هَمیش هُیچ‌کس نِمَتونی بِچو اِنوم مال پیا زورداری ئو مال‌‌ِمنالی خارَت کِ، مَر یَگه اول اَ پیا زوردارَ آبوئنی. دُما اَوَه مَتونی مال خارَت کِیتی.
28«حخیختاً، موشِمَ بینتو گه تمومِ گنائَل آمیزاءَ ئو هر کِفِری گه بوشی بَشخیا ماو؛ 29مِنتائای هر کی وَه روح‌القدس کِفِر بوشی، هرگِس بَشخیا نِماو، بلکِم وَه یِه گنا ابدی مجرمَ.» 30اَژونَبیَ عیسی ایی قصَه وِتی گه موئِتو «روحِ گَن دیری.»
دا ئو بِرال عیسی
31اَسَه دا ئو بِرال عیسی هاتِن، هوسیانَ دِریر ئو یَکونی کِل‌کِرد تاگَه هِنا کِیت‌اِر. 32جیَمیَتی گه اِ دور عیسی نیشتوئین، وِتونَ بی: «دا ئو بِرالِت هوسیانسِ در ئو مِنِیتَ مَهَن.» 33عیسی جوواو داتی: «دا ئو بِرالِم کیِن؟» 34اَسَه سِیل کِردی اَر اونَلی گه نیشتوئینی‌َ دورا، ئو وِتی: «دا ئو بِرالِم یوئنَنَ! 35اَرِیَگه هر کی گه خواس خدا باریَ جا، بِرا ئو خُیَه ئو دا مِنَ.»
@ 2024 Korpu Company